Sermon Lam Paithei' min thum nei mi' min tawh kibang zawzen maw!
Sermon lampai cih na zangei uh hiam? AY hun khawngah tangthu ong kigen na zakngei uh leh phawksak kikkikna ci ni. Kei bangbel sermon lampai theingei nailo, mungei nailo hing. Pulpit tungpan a kigen zakzak bekmah a theingei hing. 1953 kumin Chicago khuapi ah sermon lampai omngei cimawk aive. Sermon lampai..ngeingaikeei..a koici pai zentam?...
Nidang lai-in Germany gamah mipil mahmah philosopher, music siam mahmah musician, Pasian' thu um mahmah theologian khat om hi ci. Amah pen 1875 kumin suak a 1965 kumin si hi ci hi. Biakna Sia ahih manin biakinn sungah thuhilh leh thugen bekbek mah a nasep ahi hi. Tua leh khat vei a omkhonglai takin a lungsim banghiam khat in ong phawngvat khat om tawh kibang ong sa hi.
Ong lungngaingai ong ngaihsunsun in Pasian' nasep ahi thugen zakzak bek pen hikhin lo ding hiveh aw a kisam khat omlai ding hi ci-in Topa Zeisu in bangteng sem hiam cih ong kan behbeh hi.
Asawtlo hun khat Biakna organisation lian mahmah khat in Africa gamah Medical Missionary semding mi ong zonghiauhiau uh hi. Amah zong kipiakhia pahin kuankhiat ding ong sawmpah hi. Biakna kibat pihlohna hang tawh kisanglo hi. Tua leh aman zong bang ong sawmhiam cihleh, 'ken, genta keileng a gen mi tam mahmah lel ahih ciang ci-in ama minister nasep tawpin medicine lamah pilna ong sin san hi. Cidamna lamah Phisician ong suahzawh a sawtlo-in biakna min paulam lo-in ama hanciamna tawh Africa gamah Medical Missionary sem dingin ong kuankhia hi.
Athu bulphuh: Laisiangtho sunga 'Rich man and Lazarus' cih ahi hi.
Europe te pen Rich man, cidamna medical lamah pilna knowledge nei hi.
African te pen Lazarus tawh kibang hi. Natna satna thuakin akem akhoi ding Doctor neilo te ahi uh hi' cih hi.
Kampau bek tawh gospel vagen zakzak sangin khutma mahmah tawh gospel vasem ngiatngiat ding cih ngimna tawh ong kipankhia-in West Africa gamah 1952 kum Nobel peace prize a ngahlawh a Zato innpi Lambare'ne' Hospital tuni ciangdong zuattheih dingin omlai hi, ci hi. Music zong siam cih takin siam ahih manin tuni ciangdong ama composed organ note te kizang phamahmah lai hi, ci hi.
Theologian, musician, physician, philosopher, nobel prize ngah cih ngekngek mipa ahi hi. Hih banga mi thupi mahmah ahih hangin Mi khawng tawh man (photo) kizaih ding zum mahmah cileuleu zel hi.
A kum 1953 kum, a mun Chicago khuapi meileng khawlna railroad station hi. Kawlgam aa uliante ih dawn henhandan hihtuak hi. 1952 kum Nobel Peace Prize ngahpa Chicago ong zinding cih azak uh ciangin Khuapi uk uliante, news reporter te, tangpi tangta mihon tampitak ASSK dawn dingin meileng zumtual dimin ong sa hehu uh hi. Asawtlo meileng gin chu-duk-chu-duk, chiu-chiu, phiit-phiit ci-in meileng ong khawlta hi. Humpi in a nekding ganhon lakah a teel mah bangin a dawnpa uh mihonpi meileng tungpan ong mitsuan giugiau uh hi. Khamul kiat manlo, sammet ding phawkkhalo, a thalian
a thasang mahmah khat ong kumsuk ngiamngiam hi. Hausa ulian ten ong dawntuah pah uh hi. Camara manzaih bebek pen khuaphia bang zuahzuah tangial hi. Hih bang mithupi ih muhkhak hamphasam hangei! a cilo kuamah omlo hi ci-in khuailal bang henhanin luum heet-haat keei uh hi.
Kamsangpa in zong hih banga lipkhap taka nong dawn uh lungdam mahmah ing ci-in polite takin a lungdamna ong genkhia hi. Tua kawmkawmin ong khuadakdak leh a pamah muh khat ong nei hi. Nong hehpihna un hun tomcik khat ong excuse pak un ci-in mihonpi lakpan ong kin pai mahmah hi. Bang hipeuhmah ding hiam ci-a a etet uh leh meileng tungpan a tuakkhia a luggage nih tawh a kituailuai mahmah mivom nupi khat va huh va panpih tangtangh laizang a mu uh hi. A vanteng bus tungah nawnsak kaihkaih laizang khitteh i wish you a safe jouney ci sawnsawn laizang hi. Tua hunin America ta ding mivom vs. mikang cih peuhmah Jews vs. Samaritan hun tunkik hun ahi hi. A dawn mihonpi lakah ong kilehkikin 'sorry to have kept you waiting' ci-in apologized sawnsawn hi.
Tua mithupipa kua hiam cih leh, Dr. Albert Schweitzer, aminthang mahmah missionary Doctor a nun takna khempeuh Africa mizawnggam ading a kipiakhia a kikhampa ahi hi. Hih banga mithupi mizah tak huai mahmahkhat ii gamtatzia a muphadeuh ulian khat in agei a reporter pa kiangah bang hong ci hiam cih leh "that's the first time I ever saw a sermon walking" ci-in zahtakna lianpi tawh pahtakna ong genkhia hi.
No comments:
Post a Comment