Amin kithei Mipil Thumte - Nang Khine

Guaite aw, ong uk, leitung kumpiten tawlngak ni dinga ong koihsak, lungdambawl ni, na bangci zat uh hiam? Kidawngdawng takeileng eima zatdan atuamciat om ding hi. Zatding leh zatlohding debate te mail sung hitaleh omkhoppih lakah zong i neithei zel hi. 

 

Atom in Gumpa Zeisu leitungah mi bangin ong suah tanghial lungdam luahang cih phawkna ding 'lungdambawl' kibawl hi cih kei lakzia hi. Tua lungdambawl abawl khempeuh in lah gupkhiatna ngah kim tuankenteh, abawllo ten zong tanlawhliang khintuansaap diam cih keima upmawh hi. Bawlhuailo hi aciten laisiangtho sungah kigelhlo hi ci uh hi. Pagan mite' phuat hi, zuihpih huailo hi, ci uh hi. Ahi zongin Laisiangtho sungah kigelh khempeuh leh laisiangtho gelhte' gamtat luhek, nekledawn, silhleten khempeuh tulai khuahun zui-in vakizuihpih theikhinlo ding hi ka cisimsim hi. 

 

Pagan mite' phuat khempeuh zuihpih kei ni cilehang, tulai a ih zatzat leitung khantohna tawh kizui a, mawtaw lampi highway system khempeuh, water system khempeuh, adiakdiakin glass window maankongkhak, maanpadenpauh, cihte akizat masak penpenna mun pagan temples hita zen hi. Hihte ih zatpih manin pagan biakna azuihpih pih hituanlo hihang. 'X'mas akicih hangin en 'Christmas' cihang a, ih lungsim ah santaclaus koihlo in, Christ ahi Zeisu mitsuan in ih lungtang sungah ih vomkinken ding thupi sa ingh. Reformer pa Martin Luther ka phawkvat hi. Christmas tree tungah mei avaak masa penpen Martin Luther hi. 'Jesus is the light of the world' ci-in mei ong tangsak hi. Bang thangpaihna nei-a, 'meivak' vakse hiding hiam ka ci hi.    

 

Eite' a dinga Gospel lai ong at i pu Matthew, Mark, Luke, John laisiangtho ka simkakkak ciangin ih Topa Zeisu ong suahna tawh kisai in ong gelhdan uh kilamdang ka sa hi. Dr Luke laigelh Luke leh Sawltakte tangthu bang ka sim teh a laigelhdan siam sa ingh. Banghanghiam cih leh thuthuk tellah luat ding ong helh khollo, simple tak leh tangthu paizia danin ong at ahih manin simnuamin khum kasa phadiak hi. Luke, ih cihcih kuate hiam? Judah miten Gentile mi acihcih uh Greek siavuan pilna nei mi nahi mawk hi. Siavuan siamten cina te lawm bangin bawlin damna apiakmah bangin Pasian zong eite' lawm ong suahtheihna dingin mihing bangin numei sungpan ong suakkhia hi, cih 'Zeisu' akhiatna a theinailo a lawmpa 'kei' leh Theophilus tungah kammalkhum takin ong hilhna hi ci-in ka ngaihsun hi. Zeisu in Pasian hi, Greek mite' pasian dan mawkmawk hilo hi ong cinuam zong ahi hi.

 

Luke laisiangtho patcil limlim nuamna (joy), eh! joy bek hikei in (mega joy) tawh thu ong pan hi. Zeisu khangtangthu ong patteh zong Matthew bang in Abraham pan panin kumpi David suan tawh ong khup bek hilo-in, Adam pan ong pan ngiatngiat hi. Adeihna bang ahi zen tam?  Luke laisiangtho simsimleng Zeisu naungek a ong suah limlim siampi Zechariah, azi Elizabeth, Mary, Vantungmite, Tuucingte,  Anna leh Simeon te i batnak leh nuamloh, celebrate loh, theihloh dingin ka tuat hi. Luke in zong a nuamte thei-in, amah zong nuamlua ahih manin nuamphatdeuhna tawh lai ong gelh ahi hi. Adang Gospel lai-at te sangin Zeisu ong suahna thu ah naknuam phadeuh leh nuamphadeuh numei te thu zong ong gelh beh hi.  

 

Numeite phadiak in Luke na it phatdiak ding uh ahi hi, adang ten numeite' thu khawng lim gelhlo uh hi.. hm..hm..hm..hem nawlnawl kha hang ee,...  

 

Matthew in mipil thumte' thu ong gelh napin amin uh ong gelhlo se hi. Luke in mipil thum, amin tawh ong gelh setset hi.

 

Luke in Chapter 1:5 pan ong panpah hi. Siampi Zecharias zi' min Elizabeth hi a, amah zong Aaron' suan ahih manin siampi nam mah ahi hi.

 

Aaron zi' min zong Elizabeth mah ahi hi. Greek min hi. Elizabeth khiatna pen 'God gives fullness' ci-in khia uh hi. Ahih hangin Zechariah zi in fullness lo-in empty mawk hi. Banghang? Ta ciing mawk hiven, agil sungah bangmah a omloh pi.

Aneu 6. A nih tuakun Pasian' muhna ah a manin gamta uh a, Topa' thukhamte leh a ngeina khempeuh paubaanglo takin a zui uh hi.

 

Pasian' muhna ah a manin bangci gamtat uh a, Topa' thukhamte leh a ngeina khempeuh bangci zuih uh aitam? Lungsim khempeuh, pilna khempeuh leh Kha khempeuh tawh it ding longal adang omtuanlo hi. Adventist te zong ih thungetna tua mah hi. Pharisees te ahih uh leh, amau leh amau, midangte' muhna ah amanin gamta uh hi. Ahi zongin hih santakah  Pasian' muhna ah a manin a gamta mi nih bebek om hi. Amaute miten a zahtak bawltuan uh hiam?  A nih tuakun tekta uh a, Elizabeth ciing sawnsawn ahih manin ta neilo uh hi. Tulai gam khangto ta dingin big deal khollo phamawhsa khollo uh hi. A eeng tam mahmah zawlaideep dinguh hi. Tua hunlai-in siampi semin, siampi suan 'zi' neilai in 'ta' neikei sawnsawn leteh miten ong koici muh ding, a zumhuai penpen khat a a ngaihsut uh hi.  Zecharias leh Elizabeth a' ding ngaihsut sak leng, a thuakdan dinguh nop hetlo kha ding hi. Bang mawhna khialhna nei uh a, Pasian' samsiatna thuak uh hiding hiam? Kua mawhna hizaw ding hiam? A zi hizaw ding maw/ a pasal hizaw ding?  Vei le tak ah ciimcii khuang zaihzaih zen ding hi. 

 

Pasian' thuman sungah i nuntak ciangin ihkiim ipaam ah thu hilolo in liit bangin i sisan duut nuamin ong dawkkeei uh hi. Hih bang hunte ih phut khak ciangin Zechariah leh Elizabeth te nupa i phawkding Laisiangtho sungah ong kigelh sak hi. 

 

Tua bek tawh man nailo, bang omlai,,,ta neitheilo, taciing khat pen thukhun om bangin a pasal in khen thei, ma thei himawk hi. A khennop kei leh  ta neihna dingin zi neu nei thei. Hih thukhun bel Elizabeth leh Zechariah tadingin a phutkhaknoploh amau' a dinga ahaksa penpen thukhun hikha ding hi. Tulaitak tua thukhun kizangsuak thei hileh a mehnuihnuih bang om giugiau ngelkha ding hi. Ahi zongin Zecharias leh Elizabeth in amau ki-itna lungtang khat a tek dong 'ta' nei takeile uh phel nih suahlo in kitulpih suak uh hi. Tekta cih ciang ta neih ding lamet omlo cihna hipah hi. Laisiangtho sungah tekta cih teh Abraham, Sarah, Joshua cihte kum 90 vaal vive, anau pen David kum 70 vaal te tekta na ci hi. Hih siam pite nupa bel kum 80 kiim hikha ding hi. Teknung guainung ah amau ta neih ding zong lamen nawn khollo leh thu zong ngen nawnlo kha ding uh hi. Ahi zongin siampiten biakinn sungah paknamtui ahal ciangun TAPA ngenden uh hi. Pasian' Tapa, Messiah ong paiding ngen/thuum tawntung uh hi. Zecharias in tua bangin paknamtui ahal laitakin vantung mi khat in ama kiangh Zechariah aw, Pasian in na thungetna hong zakhin a, na zi Elizabeth in tapa khat a nei ding hi, acih leh, siampi Zechariah in umlo hi. Gabriel in zong pautheilo sakpah hi. Phadawmlai, Zechariah in lai gelh thei.

 

Inn atun ciangin a zi tawh zawllai kikhak. Tua khit ciangin a zi gai a, kha nga sung inn pan koimah ah apaikia kei hi. Elizabeth in Tu petpet in Topa in hih bangin kei hong huh a, milak ah ka maizumna teng hong paihkhiatsak ta hi, aci hi. Aneu 24,25.

 

Teknung guainung a ta neih sansan zong lawpin anuam mahmah hang, mi' ciammuih ding zum leuleu a, abubu zong hikha leuleu thei hi. A ta ding bel aneu 15, na ah a kigenkholsa mah bangin a suahphet a kipan Khasiangtho tawh kidim ding tapa ahih manin limtak apaii khikhe ahih mel zong kitheilo hi. Elizabeth lungsim sunga om ding ngaihsutsak ciat ni.Ta neihtheih hunin neitheilo a, maizum mahmah hi. Ta neihtheihnawnloh hun teh neikik leuleu hi. Tulaitak pitek mahmah khat in ta ong nei sansan leh na bangci muh diam? Tua pitek leh putek na bangci zahpih gen kekkek diam? Tua mah tawh kilamdang hetlo ding hi. Piteekin hia naungek koici khansuahthei ding hiam? A tangvalma, a sangkah theihma in teksihta lo dinghiam???? he.he..

 

Bangbang piangta leh Elizabeth lungkialo, thuak keeikaai, awlmawhlo, na khempeuh a biak Pasian tungah ap lel hi. Bangzahta-in mite' muhna ah maizumna, kona thuak taleh Pasian' muhna ah a manin gamta-in, a upna khahsuahlo-in, biakinn ah pai -in, thu matzet a, angen teitei, a ettehhuai, a pahtawihuai Elizabeth (No.1) phawk ding. Topa aw, hihzah letsong lianpi nong piak zenzen.... 

 

Elizabeth in a lunggulh penpen tapa neih ding kum hizahta a ngakteta hangin TA neih hun zong acing nailo kum 15 khawng acing pan nu ngakno Mary, nau ong paai hi. A nih tuakun a tapa neihtuak dinguh 'special tapa' tuaktuak ding hi sawnsawn hi. A suahtunga kipan Khasiangtho tawh kidim ding hi. John sangin Jesus vaanglian zawlai ding hi. Zeisu van akah khita kipan Khasiangtho eite tawh hong omkhawm tawntung pah hi. Laisiangtho lui hun a te sangin ih hamphatzawkna (hallelujah) cihloh a phamawh hi. Laisiangtho lui hun lai-in Khasiangtho tawh kidim tawntung or omkhawm tawntung ngei lo uh hi. Zeisu van akah zawh Khasiantho leitungah eite tawh ong omkhawm tawntung pah hi. Judah minam te bek tawh omkhawm hituanlo hi. Adam suan khempeuh tawh ong omkhawm tawntung ta hi. Siampite kamsangte bek tawh omkhawm tuan hilo hi. Nang mahmah tawh a hong omkhawm a hi hi. Elizabeth in Mary kawi-in pomin Mary' ta neihding ong nuampih mahmah hi. Banghangin Topa in kei zong ka khangno lai-in ong pia peuhlo hiam cihetlo hi. Hazatna khat zong kihello hi. Mary in zong kiphatsakzawkna, kiliatsakzawkna nengcik zong neilo hi. Ih minam ih beh sung, ih pawlpi sungah omthei zen leh. Elizabeth nuntakna leh Mary nuntakna sungah kihazatna, kiliatsakna cincia zong ki mukhalo hi. Elizabeth in ama nuntakna sungah Pasian' piak bangbang tawh lungkimin nuam mahmah hi. Bek thamlo-in midangte' thupha ngahna hangin zong lungdampih mahmah hi. Kuakua in bangbang ong ciphial zongin Elizabeth pilzia, lungtang puakzia kawm/etteh sawmin a nuamte tawh ih nuamkhop theih ding....your words...

 

Tua leh Gabriel in Mary thupha tampi ong muam hi. Mary zong Elizabeth kiangah ong taipah vingveng hi. Toyota lah omnai hetlo a, Sakol or La  beek a tuangzen tam? Mary' min bulpi Miriam (Aaron leh Moses) sanggamnu min pan ong paisuksuk ahi hi. Akhiatna 'Beloved' cihna ahi hi. 

 

"Pasian' it" cihna hi. Banghanghiam cih leh, aneu 28 ah, Topa in nang hong pakta a, thupha lianpi hong piazo hi, ci ahihman hi. Mary in lamdang sa in a lung mang keei hi. Pasian' maipha ngahna dingin kei leltak ii nuntakna bang himawk ahi hiam? Hihbang lamdangsakna na neihkhak leh a tawntungin vantungmi in 'Lau ken' ong ci tawntung hi. Mary bangin kigaihvatna na neih leh lunghimawh vet ken. Vantungmi tawh aki hoho nahi hi.

 

Gabriel in Mary tungah piangding thu ong gen hi. Mary in umpah hi. Zechariah ong banglo hi. Ahi zongin Mary in um napi'ng, ka telzawh hetloh khat om ong ci hi. Bangci piantheih ding hiam? Ong telkhial kha hini teh. Kei nungak lai hing. Pasal nei nailo hing. Kuamah tawh lumkhawmngei lo hing. Tapa koici neihtheih ding kahi hiam? Gabriel heh dektak hi. Bangmah bel cih samkei. Tua leh vantungmi in Mary kiangah Khasiangtho in na hong sem ding hi. Pasian in Adam a bawl mah bangin a special mahmah mihing khat ong bawl leuleu ding hi. Amah pen Pasian' Tapa, Zeisu Khazih kici ding a, Mi hing lah hi, Pasian lah hi veve ding hi. Tua ciangin Mary in aneu 38,'Kei pen Topa' nasemnu ka hi hi. Na gensa bangin keima tungah hong piang ta hen' a ci hi. Pasian' na sepding khat aki piaknak leh Mary in pompah tinten hi. Mary' a dingin langnih hiam 'temta' tawh kibang hi.     

 

Tulai leitung khuasakzia tawh Topa Zeisu ong suak ding hileh, kum 15 apha pan nungak sungpan ong suakkhia keekkeek khollo kha ding hi. USA bang ah kumcing nailo leh thu nawngkai tampi in nungzuih ngalhngalh pah ding hi. Tuateng mah thei a, Mary zong Elizabeth kiangah atai pah vilvel ahi hi. A lawmpa Joseph zong theisak ngamlo ahi hi. Gabriel aw, ka lawmpa Joseph nangman tavuan na laksak in, kei Elizabeth kiangah vapai ning....

 

Luke 2:4-7. Gabriel leh Joseph ong kiho uh hi. Joseph zong a lawmnu Mary tawh Nazareth pan Bethlehem pai ding ong hita uh hi. Khe tawh ni 3 lampi bang hih tuak hi. Bethlehem hong tuntakuh ciangin zintunna ding awng nawnlo, amau lah kuaman thei ngeilo, a puansilh nikten mahmah uh zong Galilee minam puan ahih manin kuaman na thusimlo uh hi. Nau suakkuan tagai Mary' a dingin privacy room koimah ah muzolo ngahzolo uh hi. A ngahzawhna mun sunsun uh zong gancingten ganvilna dinga alam suangbuuk taunuai gan tawlngakna mun peuh hizen hi. Nausuak ding hitaktak ta, siavuan lah omlo, midwives lah omlo. Nungak tacil neinu a dingin haksa mahmah kha ding hi. Judah ngeina ah nausuah laitak a pasal nangawn ii et ding kiphallo hilai sawnsawn hi. Siangtho Mary a nausuah laitakin kuateng tawh omkhawm hiam? Nupi tanei ngeite' suutsuut dingin ong siit ing.

 

 ...Ganbukah tung uh a, a tacil ahi TA PASAL suakin, puan tawh tunin gan annekna kuang sungah a sial hi.

Hih santakah ka lungsim ong sukha mahmah ka khitui bang a luang kauhkauh khat om hi. Ih Pastor te khat ii thugenna pan hi. 'puan tawh tun' cih hi. Manglai ah 'swaddling clothes' ci hi. Laisiangtho hunlai-in khual a zinkhiat ding uh teh lampi lamkal ah migilo damiah tamlua mahmah hi. Migilo ten khualzin mite hingkhawi cih tamphalo hi, ci hi. Tuaman mahin Rabbi (Pastor) ten pawlpimite kiangah khual nazin uh ciangin lamkal ah ong ki that kha leh naluang tunna dinguh puan puakbeh hamtang un ci-in vaikhak hamtang hi, ci hi. Ih Topa Zeisu kitunna puan 'swaddling clothes' tua a puakbeh uh 'puan' hihtuak zen hi. Tuhun a naungek nei dingte kigindan a naungek silhding tending puan tuazah cih banga kigingzokeei na hihtuak lo hi. Siangtho Mary in ih Topa Zeisu a suahkhiat cilin a ngapngap a, amah kia a gamtangtang hizen hi. Ahuh ding akhoi ding kuamah omlo, kuaman ompihlo hizen hi. Gentheilua akisakha maitam? A thuumthuum a tautau kha maitam? Lungleng khuangai in a kapkap kha maitam? A TAPA bawngkuang sungah sial cileng, amah koi ah a lum tam. Ih Topa Zeisu a suahin a nu Mary, 'amah kia bek' hizen hi. Akiim ah kuamah dang omlo hi.

 

Hihte bel Mary' a dinga ka ngaihsutsak mawkmawk hi. Mary in na tuaci lungkham ngaihsut thei/ ngaihsun lo thei. Mary kam pan uplah muanlahna them cik zong kiza ngeilo hi. Eite zong Christian ih hi hi. Zeisu ih up hangin lungkham sinkham, lunglen hagawina te pan kipeng tuanlo hi. Hih bangin (Late 13) ih thuak laitak phawkding I pi Mary ong kikoihsak hi. Mary zong nausuak ding gimna a neihlai takin a-mah-kia-bek-mah ahimaw. Lungnem dingin tuatleng lungneu mahmah kha ding hi. Topa, Topa aw, koilai ah om nahi hiam? Bangdingin kei hong nungngat nahiam?

 

Tua laitaklian mahin Pasian ong pai-in nalamdang lianpi ong bawl a, Zeisu Khazih, eite Gumpa, ong suaksak ahi hi.  

 

Lungleng khuangai a ih omlaitak, hong hehnem ding kuamah ih lametloh laitak, vantunglam nga a ih khuadakdak laitak, I pi Mary nuntakna te lungngaih pih kik zelzel ni.....

 

A thumna ah meigong Anna thu Luke in ong genbeh hi. Anna pen Hannah, thunget hat mahmah Samuel' nu, pan kiguizuih suksuk min ahi hi. Akhiatna pen 'grace' hi. 'Grace' mangmin nei mawkmawk ten amin bulpi uh a theih dinguh kilawm hi. Anna pen a khangham mahmah kamsang numei khat ahi hi. A tunga tegel sangin teekzaw phial ding hi. A pasal neihin kum x+kiten kum 7+ meigong kum 84=kum 100+ cih peuhmah hikha ding hi. A pasal in sihsan baih ahih manin neihlelam sumlepaai nei vevalua khollo ding uh hi. Topa Zeisu pholhkhiat meigong dangkasan pya 2 nei nu phawktek ding hihang. Aneih zahzah uh Pasian a piakhia ngamte ahi uh hi.  Anna zong aneih khempeuh tawh biakinn ong tung hi. Ama neih bang hiam? 1. Biakinn nusia ngeilo, 2. a sun a zanin Pasian biabia, 3. antangin thu ngengen. Aneu 38. Zeisu biakinn ah a ki-ap hun laitakin Anna kamsangnu hong pai-in Pasian tungah lungdamna ko a, Jerusalem a suahtakna ding lamenin a ngak mi khempeuh tungah hih naungek thu a gen hi.

 

Anna nuntakna sungah thangpai/khasiatna cih bang kimulo hi. Midangte' adingin thungen tawntungin, Pasian phatin, Pasian' tungah lungdamko a, midangte tha piapia hi. Meigong ingh, tekta ingh, bang ingh..cilo-in biakinn ah kikhawm khawmin, antangin thungen ngenin, Pasian a biak biakna hangin a tawp na ah asuan bangin agah aneek ahi Pasian tungah 'lungdamkohna' KHA ANN ong la ta hi.

 

 

lungdambawl lapa ong khahkhia ning ka cih hiven, ki click mankei mawk ei!

Elizabeth, Mary leh Anna, Zeisu suah a alungdam  numei mipil thum