THUKHENNA
Lungdamna thupha acing in ih ngah thei nangin abeisa hun, mai lam hun leh tumahmah in Jesu in eite a' dinga hong sepsaknate ih theih ding kisam hi. Tu hun ah a nunungpen Pasian' hehpihna tawh sapna ahi vantung mi thum thupuak (Mang. 14) kigen khia ta aa, Khris in van biakbuk ah Siampi lianpen nasep kipan khin ta hi.
"…Amah in, "Zingsang, nitak 2,300 sawt ding hi; tua ciangin mun siangtho a kisiansuah kik ding hi," hong ci hi. (Daniel 8:13,14, ZIV).
"Kisiansuah" cih kammal in "Kidiksak" cih hi aa, thukhenna ding hong lak hi. Vantung biakbuk kisiansuahna vai ih tel nadingin leitung biakbuk vai ih sin masa ding hi.
"A taktakin thukham in na khempeuh phial sisan tawh siansak dingin kal-a, sisan kibua loin mawh maisakna a om kei hi" (Heb 9:22, ZIV). Thuciam Lui hun a gan gawh biakpiakna in mawhmai nading a sisan kibuakna hong lak hi. Sisan lo in mawhna mai lo cih ahi hi. Ganhing sisan in Khris ii sisan limcing hi. Mawhneite a kisiansuah nadingin sisan in athupi penpen ahi hi.
Biakpiakna dingin biakbuk pen mun laizang ah kilam hi. Mite in sisan kibua tungtawn in mawhmaina a ngah nading, Pasian amaute tawh aom khop theih nading leh aom khop nop manin biakbuk kilam hi (Pai 25:8,9).
"Biakbuk khat a kilam hi. Tua buk dei masa ah meivak tunna, sabuai le a ki-apsa anlum om a, Mun Siangtho kici hi. Puanzak nihna nungah Mun Siangtho Pen kici inndei khat a om hi. Tua mun ah gim namtui halna kham biakna-tau le kham a kizut thukhun singkuang a om hi. Hih sing kuang sungah manna koihna kham bel, asel Aron ciangkhut le thukhun kigelhna suangpekte a om hi. Singkuang tungsan ah thoihdamna mun limsunin Minthanna cherub-te a om hi. Ahi hangin hih nate tu-in i sut ditdet zo kei ding hi. Hih bangin na khempeuh a kigualh diudeu khit ciangin siampite a nasepna uh sem dingin dei puanung sungah a hunhunin a lut den uh hi. Ahi hangin inndei sung nung pen sungah tulpipa bek lut-a, kum khatin khatvei bek lutin amahmah ading le mite in a theih loh man-ua a bawl uh mawhnate tang dingin sisan a tawi lo ngei kei hi" (Heb 9:2-7).
Biakbuk nasep leh vante a kicingin Paikhiatna 25, 26 leh 27 te ah kigelh hi. Biakpiakna ding ganhing biakbuk ah hong ki keng hi, ahi zong ganhing sisan in mawhna siangsak zo ngei lo hi (Heb 10:4). Biakna a pia mipa in Tankhiapa hong pai nading leh Jesu in Pasian Tuuno taktak hi cih upna lak khia ahi hi (John 1:29).
1) Biakna tau — Calvary singlamteh.
2) Khutsilna kuang — Khris nuntakna ah siansuah nasep (1 John 1:7)
3) Khuaimeivak — Khris, leitung khuavak (John 1:9)
4) Anlumte — Jesu, nuntakna Khomun (John 6:48)
5) Paknamtui halna tau — Jesu ii dikna, mite thungetna tawh kigawm khawm (Mang. 8:3)
6) Singkuang — Hehpihna, mawhnei a kisikkikte ading.
Siampite in nisim in biakbuk dei khatna ah nasem dingin lut uh hi, ahi zong Siangtho Pen Mun ahi dei nihna ah Siampi lianpen pa kum khat in khat vei bek lut hi. Tua ni pen Kilemna Ni (Day of Atonement) kici hi. Pasian leh mite Jesu sihna tungtawn aa kilem kikna (siansuahna ni) ni ahi hi (Siampi 16:29,30; 23:27).
Hih ni-in mite in a pulak loh mawhna, Pasian tawh hong kikhensak thei khat peuh aom diam ci-in amau leh amau kisit ciat uh hi. Tua manin hih Siansuah Ni in mite a' ding thukhenna ni hong hi aa, biakbuk siahsuahni zong hong hi hi. A kipulaak lo mawhna aom leh hih ni-in mawhnei mipa in mawhna thaman thuak ding hi.
"Kilemna Ni" hong tun ciangin keel nih hong ki paipih aa, khat pen Topa' keel, adang khat pen Azazel' keel kici hi (Siampi 16:7-10). A kigo Topa' keel in mite mawhna amai nadingin Khris hong kipumpiakna limcing hi (Heb. 10:12). Adang keel khat in Satan mawhpuak mawhna limcing ahi hi. Siampi pa in tua keel lu tungah a khut nga in Israel mite mawhnateng sung khia aa, tua khit teh tua keel gam sungah paipih uh hi (Siampi 16:21,22). Hih Satan' keel in mite mawhna lam ah azol den Satan limcing hi aa, Khris sihna sisan in Satan khialhna ah kilemna bawl lo hi.
Daniel 8:14 sunga gen kholhna – mun siangtho kisiansuah kik ding acih hun in 1844 kum in hong cingta hi. Tua hun pan vantung mi thum tangkona hong kipan aa, hih thupuak in atawntung lungdamna thu kici aa, singlamteh ma lungdamna thu leh singlamteh khit aa lungdamna thu akibang ahi hi. Hih kammal ah, "Ama Thukhen ding hun hong tung zo" (Mang 14:7) ci aa, 'hong paipai lai' cilo hi. Kum 2300 acin kum 1844 aa kipan thukhenna hun kipan aa, tua in van biakbuk siansuahna kici hi. Kilemna ni in thukhenna ni hi aa, 1844 in vantung ah thukhenna kipan ta nahi hi. "Thukhenna ding hun kipan a, laibute a kiphen hi" (Dan 7:10). Hun bei ciangin bawlsiatna thuak ding mawhnei mite thukhenna hi aa "dawpkholh thukhenna" kici hi.
Khris in van biakbuk ah biakna na a sem Siampi lianpen hi aa, vantung vanglianpi ziat lam ah tu in aom hi (Heb 8:1,2). Eite ading tu in palai na sem aa, hong thumsak den hi. Amah in eite hong Tanpa, leh hong Thumsakpa hi aa, van akah khit teh, hih a nasep hong kipan pah nahi hi. "Leitunga siampite' sepsepte pen vantungah a om thu, Pasian nasepnate a limin a sem uh ahi hi" (Heb 8:5). "Siangtho Pen Mun-ah a tawntungin a kimang dingin khatvei bek Khrih a va lut ciangin biakpiakna dingin keel sisan leh bawngno sisante va keng loin ama sisan va keng a, eite-a' dingin tawntung hotkhiatna a hong ngahsak hi" (Heb 9:12). " … A si mite tungah thukhenna ding hun … atung zo hi. Vantunga Pasian biakinnpi kihong a, ama biakinnpi sungah ama thukhun singkuangpi kimu hi (Mang 11:18,19).
Tomkaihna: Leitung biakbuk in van biakbuk ii alim ahi hi. Leitung biakbuk dei khatna siampite nisim in alutna mun pen van biakbuk dei khatna Khris vantung akah khit teh alutna mun ii alim ahi hi. Lei biakbuk aa Siangtho pen Mun pen thukhenna ni (siansuah ni) in kilut aa, van biakbuk aa Siangtho pen Mun ahih leh genkholhna ni 2300 acin ni dawpkholh thukhenna kipat panin kilut hi.
Leitunga siampite' zat keel nihte in,
1) Topa' keel, Khris kipumpiakna limcing hi aa,
2) Scapegoat or Azazeal keel, Satan limcing ahi hi.
Vantung ah dawpkholh thukhenna a kiman ciangin Khris in a siampi nasepte koih khia iin, Kumpi bangin van biakbuk pan hong pai khia dinga, Ama tatsa mite' pulak khiat mawhnateng nusia ding hi. Hihteng khempeuh siatna mangpa Satan lu tungah kisuan ding hi. Satan' keel gamsung tawng ah a ki paipih bangin, Satan zong taw neilo kuam sungah kikoih ding hi (Mang. 20:1-3). A tawpna ah kaat leh meikuang sungah ki susia ding hi. Hidan in van biakbuk siansuahna kizo ding a, mawhna bei siang tading hi.
Thukhenna ah koi bangin ding zo ding nahiam?
"Mi khat peuh in mawhna a bawl leh Pa tawh a om khawm Sitni khat i nei a, amah in midikpa Zeisu Khazih ahi hi" (1 John 2:1, ZSV). "A gualzo mipa puanpak ka silhsak dinga, a min zong Nuntakna Laibupi sung pan ka phiat ngei kei ding hi. Ka Pa mai le ama vantung mite mai ah ama min ka pulak ding hi" (Mang. 3:5, ZSV).
Ih nuntakna ah Gumpa ih belh leh, thukhenna ah lau nading omlo hi. Eite in ama tate ih hi aa, Pa mai aman hong laamsang ding hi. Nuntakna laibupi sungah ih minte kigelh ding hi.
"A thumanlo mi, thumanlo in omsuak tahen. A gamtatsia mi, gamtatsia in omsuak tahen. A dik mi in a dik in omsuak tahen. A siangtho mi in a siangtho in omsuak tahen," a hong ci hi. En in, a manlang in kong pai dinga, mi khempeuh a gamtatna uh tawh kizui in ka piak ding thaman kong pua ding hi" (Mang 22:11,12 ZSV).
Thukhenna pen Jesu nih vei kumkik madeuh in kikhak tading hi. Ih tangthu (case) khempeuh seal kitum suak tading hi. Kikheel kik theih hun om nawnlo dinga, zekai tading hi. TU MAHMAH in Christ leh Ama Thumann pom ciat ni.
by Jerry Mung
No comments:
Post a Comment