Mrs. White Nuntakna leh Nasep

Mrs. White Nuntakna leh Nasep

            Ellen G. Harmon leh a peen pih sanggamnu November 26, 1872 ni-in, America sak-nisuahna Gorham a kicihna mun ah suak uh hi.  Kum kua a phak lai takin up mawh loh pi, a taan pih lawmte khat suang lot in kha hi.  A maitang liamna nasia a hih manin a nuntakna bei dek phialin thaneem saka, a sang kah zom zo lo hi.

            Kum sawm leh khat a phak ciangin Pasian' tungah ki-apa, tuipi sungah phum teekteekna tawh kibaptize-a, Methodist pawlpi mi suak hi.  A innkuanpih dangte tawh Portland, Maine-a William Miller leh a pawlte in Khris hong kum kikna ding nai ta hi, ci-a a tangkona uh lungsim tak tawh hong sang uha, muang takin Topa hong pai ding na lam-en uh hi.

            Kum 1844, December kha zingsang khat, numei dang  li tawh thu a nget lai takin Pasian' vangliatna ama tungah hong tung hi.  A masa-in leitung nate khempeuh mangngilh hi;  tua ciangin Topa' hong pai ding a lam-en mite Pasian khuapi manawha khual zin lam pai bangin a lim mu hi.  A letsong ngah ding te uh zong mu hi.  Lau pipi lingpi liang mahin, hih kum 17 mi in a mangmuhna a baana te zong Portland, Maine-a thu-um mite kiangah gen khia zel hi.  A hun hong pai zela, amah zong Maine leh a kiim gamte-a Adventistte tungah tua a mangmuhna gen kawikawi hi.

            Kum 1846, August kha ciangin Ellen Harmon zong Adventist sia a sem tangvalno James White tawh hong kiteeng hi. A baan kum 35 sung a pasal tawh kikopin thupha tangkona na sem khawm uha, 1881 kum August ni 6 ni-in a pasal in sih san ta hi.  Amau in United States sung teng ah khual zin khawmin thu hilhin, lai gelh-in, suan kawmin, lam khawmin, pawlpi phutin, makaih hi.

            Mrs. White leh a pasal Pastor White leh a pawlte' nasepna pen a hun zong hong kicingta-a, a sep a bawl, a lam khiat a phuh khiat uh nasepnate hoihin kip mahmah ta hi.  Amau in Sabbath tang Adventistte a makaihna uh 1849 leh 1850 kum ciangin laikhetna, lai hawm khiatnate zong hong nei to uha, pawlpi kibehlapin, pawl sung sum zeekna maan tawh 1850 kum bang hong tung to ta uh hi.  Tua teng baan ah, Seventh-day Adventist General Conference zong 1863 kum ciangin hong ding to sak ta uh hi.  1860 kum kim ciang bang a hong hih toh ciangin, zato zong hong phuan to zela, 1870 kum kipat lam ciangin pawlpi ngimnate tawh kizui pilna ngah theihna dingin sang lian pipi te zong hong phuan to uh hi.  1868 kum ciangin kum sial kikhoppite hong phuan khia uha, 1874 kum ciangin gam dang ah sangmang puak khiat zong hong kipan ta uh hi.

            Hih nasepna lian pipi te mai a nawtna dingin Pasian in mipi a makaihna pen Mrs. White tung tawna kam tawh genna a hi zongin, lai tawh gelhna a hi zongin hong sawlna bangbang zui-in a khangto a hihi.

            Hun masa lai-a, thu kizak saknate pen amah mah lai khakna pan leh, Tulai Thumaan cih thu kizak sakna (tadensa) neih masak pen sung pan a hi zongin kizang pen hi.  1851 kumin laimai 64 a pha "A Sketch of the Christian Experience and Views of Ellen G. White a kici aibu no masa pen Mrs. White in khen khia zo pan hi.

            1855 kum kipat cil lamin, Testimony of the Church a kici min pua, lai hawm dal pawl khat a nambat a pai toto te kihawm khia leuleu hi.  Hih laite tawh Pasian in Ama mite hong thuhilh, hong telkheh, a hunhunin thupha hong pia-a, hong sitin hong makaih hi.  A kisam banga zat theih dingin, 1885 kum ciangin tua thuhilhnate bu 4 kisuahin laibu-in ki bawla, a baana om laite tawh 1889 1890 sungin Testimonies for the Church ci-in bu kua kipha to sakin kikip sak hi.

            White-te nupa in ta 4 nei uh hi.  A tapa upa pen Henry Kum 16 a phak dong nunta-a, a taneu pen Herbert kha 3 a phakin si hi.  A ta laite nih Edson leh William a khang ham dong uh nungta uha, Seventh-day Adventist pawlpi nasepna sungah nasem muanhuai te suak uh hi.  General Conference-te' deihna a zuihna-in Mrs. White 1885 kumin, Europe ah pai hi.  A kipan tung tua gamte thahat sak ding, mainawt sak dingin, kum 2 sung va om hi.  Ama omna inn Basel, Switzerland ah koih a, a hih hangin Europe khang lam, laizang, leh sak lam gamte zin kawikawi-in pawlpi kikhopna, thu-um mite kikhopna tuamtuam te ah va kihel kawikawi hi.

            Kum 4 sung America ah hong ciah kik khit ciangin, General Conference-te' sawlna a manna-in, kum 63 a phak lai takin Australia ah va pai leuleu hi.  Tua lai takah kum 9 va oma, nasep kipat tungnate va makaihin, va khang sak hi.  A diakdiakin pilna lam leh zato lam va pan khia pha deuh hi.  1900 kumin Mrs. White hong ciah kika, America nitumna lam gam St. Helena, California ah 1915 kum a sih dongin om hi.

            Mrs. White in a nasep sung America ah lum 60 leh gam dang ah kum 10 valte sawt hun sungin, mangmuhna 2000 val ngah hi, gim ing, tawl ing, ci lo-in, mimal te, pawlpite, mihon kikhopnate leh General Conference kikhop nate ah, hih ih nasepna mai a nawtna dingin ngaihsutna pia-in, makaih-in pantah to hi.  Pasian in ama tunga hong pai sak thute, a mawkmai sak om lo-in, mipite hong hilh sawn teekteek zel hi.

            Ama laigelhte a vekin laimai tulza val dim hi.  Lai tawh gelha hong puak thute, mimalte tungah a hi zong-in nipi kaal siala kihawm khia lai thuzaksakna bute ah a hi zongin a laibu tuam mahmaha kibawlte a hi zong-in, ih ngah thei hi.  A thupuakte in Lai Siangtho tangthute, nisial Khristiante' gamtat zia dingte, cidamna ding thute, pilna lai siamna ding thute, thupha tangkona ding thute, a kizang pah ding thute ngen a hihi.  Leitunga pau nam lian zaw deuhdeuh te tawh ama gelh laibu tuamtuam bu 46 bang kikhen khia khina, bu awn tam pipi kizuak khia khin hi.

            Kum 1909 kum, Mrs. White kum 81 a phak lai takin General Conference kikhoppi a pai dingin Continent khengin hong pai hi.  Tua baanah kum guk a hin' lai sungin a laigelh ding te zo siang to hi.  A nuntakna a bei kuan a laigelhna khat ah, "Ka nuntakna a om lai-a, a bei zongin, ka laigelhte in thu gengen lai dinga, a nasepte uh hun bei dongin mainawt ding hi," ci hi.

            Khalauna omlo, muanna tak tawh July 16, 1915 ni-in ama teenna inn sungah amah si-a Battle Creek, Michigan gam Oak Hill han ah, pasal leh a tate kiangah a tawlnga dingin kivui hi.

            A nasep pihte, a pawlpi leh a innkuan pihte mahmah dongin, Mrs. White pen zahtakin, nu hoih, nu hanciam, nu taangtai sak, biakna nasep gim thu gen ngei lo, ci-in a paakta ciat uh hi.  Amah in pawlpi zumte pen a malnei-in len ngei lo hi.  Pawlpi in hi ta leh, amah mah in hi ta leh, amah pen Pasian in A mite' tunga a thuzak sakna 'kamtai nasem' ci-in ngaihsun uh hi.  Amah in kuamah tungah huhna ngen ngei lo-a, letsong kipia te zong ama nop tuamna dingin zang ngei lo hi.  Ama nuntakna leh a neihsa khempeuh Pasian nasepna dingin ap tawntung hi.

            A sih lai-in, Nipi sial magazine "The Independent' (thu zaksakna lai minthang khat) editor pa in, August 23, 1915 ni-a suak sungah a hin lai-a a nasep hoih gah pha te hih bangin gelh hi: "Amah in a mangmuhnate ah upna kip a nei hi.  A nuntakna tawh lei ngam hi.  Kha lam kisaktheihna nei lo-a sum siangtho lo zang ngei lo hi.  A nuntakna in kamsang ding maha manpha leh, a kilawmin nungta hi,' ci-in suak sak hi.

            A sih madiakin Mrs. White in makaite lakah 'Muante committe khat phuana, amaute a laigelhte kama khen khia-in hawm khiat beh zel dingin ap hi.  Leitung bup Seventh-day Adventist headquarters Washington D.C., USA-a General Conference zum ah, hih 'Muante' Board in, Ellen G. White laigelhte mangpau-in theh khia uha, pau dangdang te-in zong a bupbup a hi-a a bu phelphel in a hi zongin theh khiatna ding hanciamin na sem uh hi.  Mrs. White thuhilhna om sa te, tadensa pan a hi-a, ama khut gelh om laite pan a hi zongin, suak sak zel uh hi.  Hih laibu zong tu-a ih gen Board te thupiakna tawh a ki hawmkhia hi pah hi.

Source: Pawlpi Thu Lamlak