Galation 4 Sung Telgenna Part 2

Galation 4 Sung Telgenna Part 2

Thukham Nampi Nih a omlam,  Lstho sungah siangtakin a kikhen sitsetlam Part 1 ah ih gen khin hi. Tu'n a banzom in Colosians 2: 14-17  Sunga Paul gen eite langa pang eite hong do, Singlamteh tungah a kikilh thukham acih koipen hi ding hiam cih ensuk leuleu ni.

Colossians 2: 14-17  "Blotting out the handwriting of ordinances that was against us, which was contrary to us, and took it out of the way, nailing it to his cross; 15And having spoiled principalities and powers, he made a shew of them openly, triumphing over them in it. 16Let no man therefore judge you in meat, or in drink, or in respect of an holyday, or of the new moon, or of the sabbath days: 17Which are a shadow of things to come; but the body is of Christ. (KJV)

Colosse 2: 14-17 "eite langa pang eite hong do, a kigelhsa ngeina-bucing le a zuih ding ngeinate phiat-a, singlamteh ah kilhin a lakhiamang hi. 15 A vangliatnate le a thuneihnate suahkhiatsakin, singlamteh tawh  tuate tungah gualzo-a, amah in tuate mipi muhnop a suaksak hi.16 Tua ahi manin annek tuidawn ahi a, biakna pawikham ni, Kha Det pawi ahikeh Sabbath ni tawh kisai-in note tungah kuamah thu na khensak kei un. 17 Hihte in hong tung ding nate liim ahi hi; a taktak pen ahileh Christ sungah a om hi." (ZIV)

Atunga LStho mun in agente ensuk dih ni:

(1)    Paul  in "handwriting of ordinances", "a kigelhsa ngeina-bucing le zuih ding ngeinate" na ci hi. Thukham nampi nih ah koipen tawh kituak cih kimu pah hi. Thukham Sawm pen Pasian khut mahmah tawh kigelh hi in, ngeina-bucing le zuih ding ngeinate, ordinances cih maimai hilo ahih manin hitenga agen pen Thukham Sawm hithei lo hi.

(2)    "Eite langa pang eite hong do,  kiphiat, singlamtehah kilh, lakhia mang," naci leuleu hi. Paul in thu um mite tungah a gen hi a, Paul leh tua hun a thu ummite langah a pang thukham cih na hi. Koici bangin langpang in do mawk ahi tam?

Hitenga agen pen thukham sawm dingin tuatpak leng:

(i)                Milim bia ken, nu le pa mawhna bawl ke'n, gu ke'n, that ke'n cih te akipan thukham sawm sunga om teng pen Paul leh tua hun a thu ummite langah pang cihna hipah dinga singlamteh ah tuate beita, kila khia mangta cihna hi ding hi.

(ii)               Tua ahih man in singlamteh khitah milim kibia thei dinga, zongh kiguta theita dinga, zongh mi kithat thei ta dinga, amanlo in teci kipang thei dinga, cih a kipan thukham sawm sunga omteng, hih ke'n acihte kihih theita dinga, hih in acihte hih kulnawnlo ding hi.

(iii)             Ahi zongin tua bang na hisam lo in singlamteh ma in milim biak pen mawhna ahih  mah bangin singlamteh khit ah zong mawhna mah hilai hi. Gukna, mi thahna, hazatna, amanlo teci panna, nu-le-pa mawhna bawlna a kipan avekin singlamteh ma leh singlamteh khit kibanglai mawk hi.

(iv)             Thukham sawm sungah kuateng omlai in, khat (ni sagih Sabbath tanna) bei cih bang zongh lah gensam lo hi. A bei leh a sawmin bei dinga, a omlai leh a sawm mah in omlai ding hi. Bang hang in maw? Ahang in James in thukham khat napalsat leh avek in apalsat mah na hi hi ci hi. Khat kituak khen theilo, kimanna neilo theilo cihna hipah hi.  Pasian in thukham 10  % discount in singlamteh nungah pia cih omtuan lo hi.

Tua leh koi bang dan in bang thukham in Paul leh thu ummite langah pangin do a, singlamteh ah kikilh in ki lakhia mang mawk hi ding hiam?

(1)  Aneu 16 ah en suk leng: "… annek tuidawn ahi a, biakna pawikham ni, Kha Det pawi ahikeh Sabbath ni (KJV in Sabbaths ci in, plural form na zangh) tawh kisai-in"  ci hi.

(i)                Thukham sawm sungah  annek-tuidawn, biakna pawikham ni, khadet pawi, sabbath nite  cih bang om vetlo in kisai khavetlo hi. Moses thukham sungah avekin ih mu thei hi.

(ii)              Aneu 17 ah: "Hihte in hong tung ding nate liim" ci hi.   Cihnopna ah singlamteh ma in ataktak om nailo cihna hi. Hong tung ding acih ciangin mailam agen hi a, ni sagih Sabbath ahih leh, PHAWK in Remember ci in, abeisa thu "phawk" ding agen na hizaw hi. Ni sagih Sabbath ahih leh ataktak om khin kisa phawk ding na ci sitset hi. Kileh bulh linlian mawk hi.

(iii)             Koi bangin Paul le thu um mite langpan hiam cih leh:

Topa Zeisu sihma in tuuno tawh biakpiakna pen mawhna hilo hi. Bek thamlo in tuuno or ganhing khat peuhpeuh tawh biakna na piak kei leh mawhmaina ding lampidang omlo hi. Tua pen Zeisu ii liim ahih-man hi. Tua ahih manin tua bangin biakna na piak kei leh mawhna ahi hi. Ahi zongh in Topa Zeisu singlamteh tungah hong sihkhit a kipan in tuuno tawh biakna pia  le cin tuapen mawhna hong suakta hi. Ahangin ataktak Zeisu hong sikhin  ahi man hi. Biakbuuk sunga daalna puanpi atungpan anuailam ah kibal suk khin hi.  Singlamteh khitah tuuno tawh biakna pialai hileng Zeisu sihna asang zolo kisuak dinga, Paul leh  thu um mite langah pangin a dodo kisuak pah ding hi. Tua ahih manin paul in 'eite langa pang, eite hong do ' a cingiat na hi hi.

 

Zoplai ding…………

PS. Ih thulu ah Galatians 4 sung telgenna ih ci hi. Tua sung ih tun ma in ih telbaih theih nadingin a kizoppihteng a gengenphot ih hi hi.

 

Lungdam! Topa'n laisim mimal  telsiamna thupha hong pia ciat tahen!

Lamthang