NIPINI (Sabbath) Nitak lam Apr. 18
SIM DINGTE: Luke 5:1-11, Luke 6:12-16; Luke 9:1-6;
Matt. 10:5-15; Luke 10:1-24; Luke 9:23-25; Matt. 16:24-28.
KAMNGAH: Mi khempeuh kiang ah Zeisu in: "Mi khat
peuh in kei hong zuih nop leh apumpi nial a
Ama singlamteh nisim pua in hong zui ta
hen." (Luke 9:23).
"Nungzui" ih cih pen sangnaupang, mi cih bang a
ata mi khat peuh ahihi. Laisiangtho sung ah hih kammal
250 vei val bang om a Sawltak sung leh Lungdamna thubute
sung ah tamdiak hi.
Nungzui hihna in lungsim thalawp sak a lungsim
tawn'bawl in Pasian leh mite tawh ih kizopna ah hanciamna
sang pen kisamh hi. Khazih tung ah muanhuai takpina leh
athupuak ah nuntakna lo tawh nungzuihna cih om thei lo
hi. Hih sang a athupi zaw bang dang om thei ding?
"Pasian in mite ahih bang un sam a Ama nasepna
ah pantah hi. Ama tung ah ki pumpiak kul hi. Pasian Kha
Siangtho ih san ciang in akisam pilna siamnate hong kilang
ding hi. Kha Siangtho makaihna nuai ah lungsim ngaihsutnate
Pasian ah kipumpiak in hong khangto ding a Ama
deihna tawh kituak telsiam in hong semkhia ding hi. Azawngkhal
zialehtongte hong thakhauh ding hi. Muanhuai tak a
omna tungtawn in Amah tawh kikhawl khawm in Lungsim
leh omziate ah Amah kisunn semsem ding hi. E.G. White,
Khangcin lunggulh, D.A. p. 251.
Tu kal Zeisu in anungzuite asapzia tungtawn in Ama
nasepna ih zoptohna ah ih sin theih ding thute ih en ding hi.
NIMASANI (Sunday) Apr. 19
Mi Amante (Luke 5:1-11)
Simon leh Andrew te in zan tha pai in na sem
tangtangh uh hi. Ngabeng nasep asiam mahmahte hiuh a,
bang hun a tawlnga ding cih zong thei uh hi. Zan thapai
nga bang mah man lo uh hi. Lungkia thanem a aom lai tak
un amau ngaihsut tawh kituak lo sawlna ngah uh hi: "tui
thuukna lam ah pai un la ngente vapai un" (Luke 5:4, NIrV).
Peter in lungkiatak leh lamet bei tak in adawn kikna ah:
"zan thapai ka sep uh hi a bang mah kingah lo hi ven; nang
cih mang ung ei leh . . . ." (aneu 5, NKJV).
Hih ngabeng siam mahmah te tung a thu apia
khutsiampa kua hi mawk hiam? Simon in thudon lo thei
lua hi. Ahi zongin Zeisu hehnepna sa te leh thuhilhnate in
huzap nei lo thei ding hiam? Tua hi a, adawn kikna ah: "na
cih bang mang ung ei leh!".
Nungzui ih hih leh sin ding amasa pen thu in Khazih
kammal man'na ahihi. Andrew, John leh James te'n zong
agimhuai zan teng pen ngamat honpi teng tawh lametna leh
lawpna ading phalvak hun hong tung hi ta hi. Peter zong
tha khat thu in khuk din in agenna ah: "ka geinai ah om
ken, kei mawhna tawh akidim mi hi ing" (aneu 8, NKJV).
Pasian sianthona leh ih ninhuaizia theihna in nungzuihna
vai ah athupi kahlei dang khat ahihi. Isaiah in tua kahlei
tawn khin hi (Isaiah 6:5). Tu in Peter in zang leuleu hi.
Luke 5:1-11; Matt. 4:18-22; leh Mark 1:16-20 sim
in. Tua apiang na lamdang, ngabeng siamte lamdang sak
thu, Peter kipulakna, leh Zeisu' thu neihnate ngaihsun in.
Hih thupiangte sim kim in. Khazih nungzui suahna lampi a
thupiangte vai bang hong gen hiam?
"Lau kei in. Tu a kipan mite na man ta ding hi"
(Luke 5:10, NKJV). Ngabeng pana mi akikhel sakte suahna
in thu nasia mahmah hi a: Zeisu ah kipumpiak kul in,
1. Thanemna leh mawhnate phawkna,
2. Theihkholh loh khat tang a nungzuihna lampi ah
thatang ding a Zeisu upna tawh zuatna, leh
3. Khazih leh Ama tung bek a kingak dennate ahihi.
Ngabengte nuntak' genkholh theih om lo in lauhuai
hi. Tuihual gilo nawk kul a mailam thu genkholh theih
omlohi. Mi kikhel sakna vai zong tua bang mah hi a, ahi
zong in Topa in hong kamciamna ah, "laukei in" hong ci hi.
Nungzuih ih cih baih lo hi. Nopna dahna leh asuk ato om a,
hi mah leh khat tang a pai cih om lo hi. "Lau kei in" hong ci
pa in amuanhuai nungzuipa tonpih den hi.
Peter mawh sutna ngaihsun kik dih in. Amawhna
in Zeisu kiang pan kikhenkhia nuam sak hi. Eite Pasian
kiang pan hong sawnkhia nuam bang mawhna hiam?
NINIHNI (Monday) Apr. 20
Tua 12 te Telna (Luke 6:12-16)
Ei leh ei nungzui a kibawl tawm theih hi lo hi. Zeisu
sapna ih san'na hang ahihi. Luke genna ah Zeisu in Peter,
Andrew, John, leh James (Luke 5:11; Matt. 4:18-22 te sam
khin a Levi Matthew, siahdongpa zong sam hi (Luke 5:27-
32). Tu in lai at pa Luke genna ah Zeisu in 12 te hun dik tak
ah tel hi. Khutzawpa Nipini (Sabbath) a adam sak khit ciang
in (Luke 6:6-11), Pharisee te in Zeisu thah nading gel kipan
uh hi. Tua hi a, Topa in anasep adal kul a, singlamteh ah
asih khit ciang a tua nasep azom ding nasem hon khat tel
kul cih thei hi.
Luke 6:12-16 leh Luke 9:1-6 sim in. Hih munte in
nungzui makai 12 te asapna vai bang hong gen hiam?
Zeisu azui mi honte lak ah nungzui tampi om hi.
Sangnaupang in asia azuih bang a azuite ahi uh hi. Khazih
nasep pen hilh mawk bek hi lo in hotkhiat mihon, pawlpi,
ahotkhiatna thupuak leitung khempeuh ah atangko ding
uh thu ahihi. Tua ding in nungzui bek ahi lo kisam a, "tua
teng pan in ateltuam 12 te sawltakte cih min guan hi" (Luke
6:13, NKJV). "Sawltak" cih akhiatna in thutuam ading a
kisam tuam mite cihna hi. Luke in hih kammal 6 vei
alungdamna thubu ah na zang a sawltak thubu sung ah 25
vei val (Matthew leh Mark ah khat vei tuak bek) na zang hi.
12 te akitelna pen pilna, hauhna, lang'na, siangtho,
kilawm ahih man hi lo hi. Amaute in mi mawkmawkte sung
pan: ngabengte, siahdong khat alunghei nei khat leh lehekpa
asuak khat ahi uh hi. Amaute vai khat ading a kisam hi a:
kumpipa leh agam huam ading a sawlpi ding te ahi uh hi.
Pasian in mite sam a amah thei a akipuah uh leh
Ama na asem ding in kisin sak hi. Paubang lo ahih man uh
hi lo in Amah thei a Khazih hehpihna tungtawn in thumann
a agamtat uh leh Amah sun semsem thei ding uh hi. E.G.
White, Khangcin Lunggulh, D.A. p. 294.
Ei zong ih kicin loh hang, kipan in mapang ni.
Midangte zong akicing hi tuan lo uh hi. Kha lam thu ah
akhangto san ih hihi. (Midangte ih deih zah a akhangto kei
zong un!). Tua bang teng kawmkal ah amau hih thei bang
in sang phot in koici sepkhawm thei ding ih hi hiam?
NITHUMNI (Tuesday) Apr. 21
Nungzui Ding a Puahna leh Thupiakna (Luke 9:1-6)
Luke 9:1-6 leh Matt. 10:5-15 sim in. Hih munte ah
Zeisu in amaute asapzia pan bang kha lam thumann ih sin
thei ding hiam? Luke in nungzui ding a puahna leh nungzui
suah sakna vai thu thum in na gen hi.
Amasa pen ah, Zeisu in amaute samkhawm hi, Hih
sapna pen Christian nasepna leh Christian kammal zat ah
thupi hi. Ih sepna ih bawlna a ih kihelzia hong suak hi.
Nungzuipite in Zeisu sapna sang in, Ama kiang zuan in,
"om khawm" ding uh hi. Zeisu sapna mang in Ama tung a
kipumpiaknate pen khut khat tawi bang a mite leh Pasian
tawh sepkhopna ahihi. Tua kipumpiakna in masuan picin
na ding in thupi mahmah hi.
Nihna ah, Zeisu in vang leh thu neihna amaute pia hi.
Zeisu in Ama nasemte khut hawm in paikhia sak lo hi. Ei tha
tawh Ama na asem ding in hong koih mawk lo hi. Ih pil ih
teina, ih gualhuaizia, ahihkeh neihlehlamhte in Ama nasep
zawh nang in vang nei lo hi. Pilna siamna leh vang hong pia
Khazih ahihi. Greek pau in "vang" pen dynamis hi. Tua
kammal pan khuavak tha apia "dynamo," leh "dynamite"
halkhapna cih kammal hong pai hi. Mual tung teng azan sak
thei tha zong pia hi. Zeisu' hong piak vang leh thuneihna in
dawite leh agelnate uh zo mang thei hi. Zeisu in ih vangliatna
ahihi. "Mihingte in Pasian deihna tawh hong kop ciangin
hong vang lian mahmah hi. Ama hong sawlnate Ama tha
tawh kisem ding hi. Pasian sawlnate Ama panpihna tawh
mite in sem uh hi". E.G. White, Khazih Gentehnate, COL
p. 333.
Thumna ah, Pasian gam thu genna leh cinate dam
sak ding in sawl hi (Luke 9:2, NKJV). Thuhilhna leh dam
sakna tawn khawm hi. Nungzuite masuan in mi pum vekpi
kepna donna hi a; pumpi, lungsim, leh kha kihel khawm hi.
Mawhna leh Satan in mi pum hong mancip hi. Tua ziak in
mipum buppi Zeisu' vang siangtho sung ah a om kul hi.
Mi khat peuh in Khazih akipumpiak ciang in akawm
kal ah bang mah a om loh ciang bek in nungzui hoih suak
thei hi. Khazih leh nungzuite kikal ah ngun leh khamm ahi
a nu leh pa, tu leh ta, sihna leh nuntakna, tu ni leh zingciang
vai tuamtuamte a om lo ding ahihi. Khazih, Ama gam, leh
amangthang hih leitung a teci pan ding pen na dang teng
sang in thupi zaw hi.
"Na khualzinna ah bang mah keng kei in" (Luke 9:3,
NKJV). Ih tel ih ngaihsut ding a thupi bang thukhun hih
mun ah hong kilak hiam?
NILINI (Wednesday) Apr. 22
70 te Puak Khiatna (Luke 10:1-24)
Luke 10:1-24 sim in. Kha man ding a 70 te
puakkhiatna pen Khazih leh Satan kikal kikingkalhna kawm
kal vai ah bang hong hilh hong thei sak hiam?
Zeisu nasep sung in nungzui 12 sang tam zaw te in
zui uh hi. Peter in thu um mite kiang ah Judas tang tel ding
agen in mi 120 val bang pha hi (Sawl. 1:15). Paul genna ah
Zeisu van akah ma in nungzui 500 val bang pha hi. Tua hi
a, mi 70 te asawlna ah atam zaw om lai cih ki thei hi. Atel
tuam te agen hi bek zaw hi. Galilee gam khuate ah pai a
Ama pai theih hun ading a kiging khol sak ahihi.
70 te vai Luke bek in hong gen hi. Hih pen nasep
ding angaihsun den Luke om dan ahihi. Leitung bup huam
ngaihsutna tawh lai at pa zong ahihi. Nanbat 70 pen
Laisaingtho sung leh Jew te tangthu ah atuam deuh lim la
hi. Piancil thubu in Noah tate pan a piang minam 70 na
ciamteh hi. Moses in ahuh ding mi upa 70 tel hi. (Gamlak.
11:16, 17, 24, 25). Sanhedrin upa pawl mi 70 pha uh hi.
Hih pen Zeisu in 70 asap vai tawh kizopna om maw cih ih
thei kei hi. Athupi ah Zeisu pen pawlpi ading a makai sin
sak pa khat ahihi. Vang leh mawh puak mi tawmcikte tung
bek ah pia lo hi. Anungzui mi tuamtuamte huam kim hi.
Mi 70 te hong tun kik uh ciang in lungdamna leh
lawpna tawh kidim uh hi. Zeisu kiang ah: "Topa aw, dawite
nangawn in na min tawh ka gen uh ciang in mang uh hi" ci
uh hi (Luke 10:17, NIrV). Gualzawhna pen thu gente' nasep
hi lo a, amaute pen lungdamna thu gente hi bek uh hi.
Gualzawhna pen "nang min" - Zeisu tungtawn ahihi. Zeisu
min leh vang lungdam thutangkona masuan ah gualzawhna'
laigil ahihi.
Zeisu in 70 te gualzawhna thu lamdang 3 gen hi.
Amasa pen tangkona ah gualzawhna, dawimangpa
gual lelhna, (aneu 18).
Anihna ah, nasia taka asemte in Zeisu kiang pan
vang ngah uh hi (aneu 19).
Thumna ah, nasemte lungdamna pen leitung a
nasepte tawh hi lo in amin uh vantung ciaptehna ah akigelh
man hi zaw ding hi (aneu 20). Satan kiang pan hotkhiat te
vantung in lungdam pih hi. Topa gam a hotkhiat mi in
Satan gelnate zawhmangna ahihi.
Luke 10:24 sim kik in. En ih muh khak kamsangte
leh kumpite in amuh nop amuh loh uh bang te khawng
hiam? Eite ading bang khiatna aneih kul hiam?
NINGANI (Thursday) Apr. 23
Nungzuih Thamanh (Luke 9:23-25)
Socretes a Plato hi a, Gamaliel a Saul ahihi. Biakna
makai tuamtuamte in nungzui muanhuai nei tek uh hi. Zeisu
makaihzia leh leitung makaite makaihzia bang kilamdang
pi pen hiam? Adawnna ah leitung makaite mi ngaihsutna
ah kinga uh hi. Zeisu nungzuite ahi leh Zeisu in hih leitung
a asep abawlte tung ah kinga uh hi. Nungzui hihna pen
Khazih' thuhilhte leh mihingte hotkhiatna dinga asepte' tung
ah kinga hi. Zeisu in anungzuite kiang ah Ama tung ah ki
ap siang a, asinglamteh uh pua in amakaihna zui ding in
thu pia hi. Calvary khekhap azuih kei uh leh Christian
nungzui hihna aom lo suak hi.
Luke 9:23-25; Matt. 16:24-28; leh Mark 8:34-36 sim in.
Christian hing akici khat peuh ading in athupi
mahmah thupuak bang hiam?
Christian nungzui hihna thu in gumpa leh gupkhiat
mite kizopna vai ahihi. Gupkhiat te ih hih man in gumpa
nung azui ding ih hihi. Tua hi a, Paul in, "singlamteh ah
Khazih tawh ka si khawm a kei ka nungta nawn kei hi. Ahi
zong in Khazih in kei sung ah nungta hi" (Gal. 2:20, NIV).
Luke 9:23 ah nungzui hihna mawhpuak manh hong genna
ah: mi khat peuh in ka nung hong zuih nop leh ama deihna
nial in asinglamteh pua in ka nung hong zui ding hi. Hih
kammalte ngaihsun in: "nial," "puak," leh "zui" Peter in
Zeisu anialna ah nial cih kitel muh thei hi. Peter in "Zeisu
thei keng" aci ahihi. Tua hi a nungzui ding a sapna in eima
pumpi nial ding cih ciang in, kei ka om nawn kei hi; kei ka si
ta hi. Tua mun ah Khazih anuntak kul hi (Gal 2:20). Nihna
ah, nisim a singlamteh pua ding cih thu in ei thua tat
ngeilohna ahihi. Thumna ah, ih zuih ding ih mungtup pen
Khazih leh Amah bek ahihi.
Zeisu in nungzuih mawhpuak man hong telsuutna
hong lak hi (Luke 9:57-62). Zeisu ma a bang mah om lo hi.
Amah bek mah lawm leh kikholh pih pi pen, sepna leh
biakpiaknate ah zong hi ding hi. Christian nungzui hihna ah
ei vai ah sih ding pen ih tel hi lo in akul ahihi! "Khazih in
hong sap ciang in, hong pai in la, hong si in. . . . Akibang den
hi a - Khazih sung ah sih ding ahihi. Amanh hong sap ciangin
ih milui asih kul hi. . . . Ama angsung vai a sikhinte bek in
Khazih zui thei ding uh hi" - Adapted from Dietrich Bonhoeffer,
The Cost of Discipleship (Newyork: The Macmillan Company,
1965), p. 99.
Khazih nung na zuih bang zah ciang dong bei lawh
na hi hiam? Na dawnna khauh ngaihsut in. Bang khiatna
nei hiam?
KIGINNI (Friday) Apr. 24
SINBEH DING: "Singlamteh ih puak ciang in ei nuntakna
pan akipaikhia ahihi. Khazih van apua thei ding mun ah
hong koih ding hi. Ama hakkol pua lo in Khazih kizui thei lo
hi. Singlamteh liik khia a pua in anung zuih kul hi. Zeisu
hong toona tawh ih deih zia aki bat kei leh, ei lunggulhnate
ih nial hong kul ding a, ih lunggulh pen paikhia in, Khazih
khekhap ih zuih kul hi." E.G. White, Sons and Daughters
of God, p. 69.
KIKUP DINGTE:
1. Nilini sinna a Luke 10:24 sung a dotna en kik ni. Tu lai
a eite'n ih muh "kamsangte leh kumpite' '' muh nop amuh
khak loh te uh bang khawng hiam? Genkholhna thute
tangtunna vaite sem zong? Dan. 2, 7, leh 8 te amau
hun in amailam pek ahi lai tampite tu'n eite ading in
tangthu hi ta hi. Adangdang bang teng zong om lai hiam?
2. Zeisu thu genna sung a leitung khempeuh ngah a,
anuntakna atanpa vai ngaihsun in. Bang gen nuam hi
a? Honkhia nuamm kisa a asih zawk sop vaite e leh?
Bang cih nopna? Thu um lo mite'n angsung khual takin
hih leitung vaite sem hi leh zong thu khat hi mah lo
maw? Amau tua bek mah anei a kingaihsun uh hi ven.
Zeisu thu aum eite ading in zong hih leitung bei a athak
akipan ding hi ta hi. Tua nangawn atam ngah ding ki
tuh tha pai sawn lai? Hih kha lam thu a alauhuai thangg
pan koici ki dal thei ding ih hi hiam?
3. Luke 10:17-23 sim in. Dawite nangawn in Zeisu min
tawh acih bang uh aman ciang in alunglawpzia uh
ngaihsun thei hang. Zeisu dawnna en leng. Tangkona
nasemte tel ding athupi hong gen bang hiam?
4. Eite sang a Khazih telna hang a athuaksia zaw
Laisiangtho sung a kihel lote vai ngaihsun leng? "Hih
bang mite in bang tann uh a? Khazih nungzuihna hang
in bang tuak uh hiam? Kei zong tua bang mah in ka om
ngam diam?"
No comments:
Post a Comment