Luke Thubu
"Tua ciangin apa kiangah hong ciah hi. Gamlapi pan in apa'n mu hi. A tapa it mah mah ahih man in hong dawn tuah hi. Ngawngkawi in namh hi." (Luke 15:20, NIrV).
Hih thu ih thei tek hi. Aki thei kim, aki deih kim pen tangthu khat ahi hi. Pasian nasem zato siampa khat in alawm Theophilus alaikhakna ah na gelh hi kei leh za kha ngei lo ding hi hang.
Tua zatui siampa min Luke hi ven! Amah Gentile thu um mi khat hi a, alaikhak pen Luke at lungdamna thubu kici hi. Luke in Sawltak thubu zong gelh lai hi. Amah pen
Paul khualzitpih khat hi a, Rome gamhuam sung a akizel athupi Zeisu' thuthang avil gige thukanpa khat ahihi. Paul tawh kinahvawh pha mahmah ahih man in Christian pawlpi' khiatna thuuktak in tel hi. Hih vaite nunga apangpipa, Zeisu Khazih, pen midangte kiang pan zong Luke in thuukkan thei hi. Tua hi a Kha Siangtho makaihna tawh, Luke in, "Christian pawlpi kipatkhiatna leh atangthu" akici thei ding thute laibu 2 ah (Luke leh Sawltakte) hong gelhkhia hi.
Abumasa pen Luke' lungdamna thubu Theophilus kiang a Sawltak thubu agelh ma a a at leh akhak ahihi (Sawl. 1:1). Thukan mipilte'n Luke' lungdamna thubu pen A.D. 61-63 kikal a kigelh ding in ngaihsun uh hi. Theophilus Greek thu um mi khat ahihi. Luke in Theophilus tungtawn in Greek leh Gentile thu um mite kiang a akhak ahihi. Ahi zong in Luke in Zeisu pen Jew mi bang a hong pianna phawk hi. Matthew in alungdamna thubu pen Jew minamte ading a a at ahihna tawh Zeisu pen Messiah ahihna hong lak hi. Mark in bel Romete kiang a a at ahih man in athubu sung ah akumpigam thu atangko kawm a gam akawm kawikawi kawm bang in hong hilh hi.
John' lungdamna thubu in Zeisu pen Thu, Piangsakpa, Pasian Tapa ci in hong hilh hi. Luke in bel Gentile te ading a a at hi a, amahn Zeisu pen mihing tapa, leitung Honkhiapa, leh mite lawm, in hong lak hi. Luke thubu ah hotkhiatna pen mi khempeuh ading ahihi. Tua hia Luke lungdamna thubu sung ah Zeisu' pupa khanggui pen Adam dong sut in Pasian tawh zom hi. Ahi zong in Matthew sutna ah Zeisu khanggui pen Abraham, Jew mite pupi ah khawlbawl hi (Luke 3:23-38; Matt. 1:1-17 tawh saikaak in).
Luke lungdamna thubu pen Laisiangtho thak ah guicing pen hi. Na lamdang pawl khat te Luke thubu bek ah kidawk hi. Gentehna in:
Nain khua meigongnu tapa thawhkik sakna (Luke 7:11-17) leh
Malchus dam sakna cihte ahihi (Luke 22:50, 51)
(Adang nalamdangte, Luke 5:4-11; Luke 13:11-17;
Luke 14:1-6; Luke 17:11-19 te ah en in).
Gentehna tampite Luke thubu bek a om athang mahmah pawl khat lak pan:
Samaria midikpa, (Luke 10:30-37)
Ahau mihaipa (Luke 12:16-22).
tapa taimang (Luke 15:11-32),
mihaupa leh Lazarua (Luke 16:19-31), leh
Pharisee pa leh siahdongpa (Luke 18:10-14).
Zacchaeus tangthu (Luke 19:1-10) zong Luke bekmah tungtawn ahihi.
Khasiangtho makaihna tawh, Luke in atangthu kan in mit a amute adot a agelh ahihi (Luke 1:2). Thu teng atel theih khit ciang in, alai at asim khempeuh te in Zeisu leh Ama lungdamna thu adik tak pi lam atheih na ding uh a lim tak a agelh ahihi (aneu 3 leh 4 en).
Akithei kim biakna thu ngaihsun siam James Denney kiang ah, "Zeisu thu atom-kim-hoih-cing pen koi ah ih mu thei tam?" ci a akidot vai ah, "Luke thubu na en nai uh hiam?" na ci hi.
Dik ta ngei ei. Leitung bup in tu quarter sung sinto khawm ni maw! John M. Fowler in kum 53 sung pawlpi ni sepna ah Pastor, Pasian thu leh ngaihsutna lam sia, endikpu, leh pilsinna lam ukpi nate sem hi. Dr. Fowler in thului' tampite leh laibute gelh in khangcing Nipini Laisiangtho sinna lam ah: Khazih leh Satan kikal van nuai bup Thubuaipi (2002) leh Ephet thubu: Kipawl kizopna vai lungdamna thu (2005) te leh tu quarter ih thu sin Luke thubu zong ama at mah ahihi.
SINNA 1 Mar. 28 - April 3
ZEISU MI BANGIN HONG PIANG
NIPINI (SABBATH) NITAK LAM Mar. 28
SIM DINGTE: Luke 1:2, 3; 2 Tim. 3:16; Luke 1:5-22; Thuhilhk 18:15; Luke 2:2-12; 25-32.
KAMNGAH: "Pasian in sep thei loh anei kei hi." (Luke 1:37, NIrV).
Luke Lungdamna thubu pen Gentile te ading a kigelh ahihi. Luke mahmah zong Gentile mi ahihi (Col. 4:10-14 tungtawnn in). A laikhakpa Theophilus zong Gentile mah ahihi.
Luke pen zatui mangpa ahih ban ah tangthu sia kician tak khat zong ahihi. Ama gelh lungdamna thu patna ah Luke in Zeisu pen tawntung khang pan in hong sut suk in, athu ala te ahun amun dong in hong suutna ah: Herod pen Judea kumpipa hi (Luke 1:5). Augustus in Rome gam huam teng uk hi (Luke 2:1). Zecharias kici siampipa in Jerusalem ah akiseh ama taiban hun in biakinnpi sung ah amasuan sem hi (Luke 1:5, 9).
Alian 3 ah Zeisu lampi asial tuiphumpa John nasep vai tawh kisai in Luke in hun leh ni vai thu 6 te hong gen hi.
Tua bang in Luke in Zeisu thu pen phuahtawm thu hi lo in atakpi ahihna khangtangthu tuamtuamte tawh hong tellah hi. Luke thubu asim te in Zeisu pen ataktak hi a, "honpa Topa Zeisu Khazih tungtawn in Pasian in leitung bup hong huap hi " (Luke 2:11, NKJV).
NIMASANI (Sunday) Mar. 29
Ciaptehna Kiciantak (Luke 1:1-3; Sawl. 1:1-3).
Sawl. 1:1 ah Luke in Sawltak thubu a atma in, "At masak" dang khat om khin cih hong gen hi. Hih thu leh tua lai at 2 te Theophilus ngah ding in kipiakhia cih thu in tua thubu gel a at kibang cihna hong suak hi. Tua thubu tegel pen "Christian pawlpi hong piankhiatna leh atangthu bu khatna leh nihna kici thei hi. A khatna pen Zeisu nuntak leh nasep (Luke lungdamna thu) ahihi. A bu nihna nungzui sawltak pawlpi masate sepna bawlnate pen Zeisu leh Ama thupuak hong kizelhzia thu ahihi.
Hih lungdamna thubu hong ki koici gelh hiam? Luke 1:2, 3 leh 2 Tim. 3:16 sim in. Jerusalem khuapi alinglawng sak Zeisu thu agelh midang tampi om khin cih Luke in thei hi. Mittang a mu te leh Pasian nasem mitampi cihte gen hi (Luke 1:2, NKJV). Hih thu pen nungzuite leh thu um midangte ahi uh hi. Luke in Paul leh nungzite a kipan hih tecite leh gupna thu nasemte tawh kimu kithei uh hi. Luke in Mark leh Matthew gelh lungdamna thu zakha in sim kha khin ding hi. Luke bel mittang a mu lak ah akihel khak loh hang in Khazih a um takpi khat ahihi.
Matthew in Jew mite kiang ah Zeisu pen Siapi lian, genkholhna picinna, Jew te kumpipa ci in na gelh hi. Matthew in Zeisu ah Laisiangtho lui tangtunna genpi in nei hi.
Mark in Rome mite tung a Zeisu pen thuteng aphongkhiapa na ci hi. Zatuimangpa Gentile mi Luke in Greek mite leh Gentilte mite kiang ah Zeisu pen leitung buppi honkhiapa na ci hi. Luke in alai gelh pen ahang thupi 2 hong gen a:
1. Thu atelsiang tak a lahkhiat na ding (Luke 1:3, NKJV)
2. Hunthak christian biakna vai thuguipite athu ala tawh panpih ding cih te ahihi. Zeisu sung a amuanhuai thumaan thutak vai pen Luke lungdamna thu' ngimna bulpi ahihi.
Kha Siangtho' makaih, Laisiangtho gelh Luke in mundangdangte pan a thute zang khawm hi. Alung luthuaipi khat hi! Mundang pan a thute zong zang cih ciang in Kha Siangtho humuap hi lo cihna hi lo hi. Laisiangtho gelhte lungsim leh ngaihsutna tungtawn a Kha Siangtho nasepzia hih thu in bang hong hilh hiam?
NINIHNI (Monday) Mar. 30
Amin John Na Phuak Ding Hi (Luke 1:5-22)
Malachi khit kum 400 dek tak sung Pasian thu kizak behna om lo mai hi. Tuiphumpa John leh Zeisu suahna vai hong ki gen ciang in tua adaihcip hun hong veng akipan hi ta hi.
John leh Zeisu hong suahna thute kivalak mahmah hi. Anih tuak un thu lamdang ahihi. John vai ah, Elizabeth pen ta nei thei ding in tek lua ta hi. Zeisu vai ah, nungak siangtho nau suak ding cih thu ahihi. Vantung mi Gabriel in hih nau suah vai kamciamte hong phuangkhia hi. Tua thute lamdang sakna, kipahna, leh Pasian deihna sung a ki apna tawh kisang hi. Nau ngek te gel Kha Siangtho sung ah khangto a tha hat ding uh hi (Luke 1:80; Luke 2:40).
Tua naungek 2 te masuan pen kilamdang mahmah leuleu hi. John pen Zeisu lampi ahong ding ahihi (Luke 1:13-17). Zeisu pen "Pasian Tapa" hi a (aneu 35) Messiah thu genkholhna picinna ahihi (aneu 31-33). Luke 1:5-22 sim in. Zecharias pen "paubang lo" na ci hi. Vantung mi thu zaksakna a uploh man in taina thuak hi. Hih thu in Zeisu a um te "paubang lo" ih cih ciang in koici dan cih hong tel thei sak hiam?
"Zecharias tapa neih ding pen Abraham leh Mary te tapa neih ding mah bang in, kha lam thumann vai lianpi hong hilh hi. Ih telsiam loh leh ih mangngilh pahpah thumann ahihi. Ei ma thu in na hoih ih bawl thei kei hi. Ih telsiam loh leh ih mangngilh pahpah thumann ahihi. Ei ma thu in na hoih ih bawl thei kei hi. Ih bawl thei loh te Pasian vang tawh Pasian akipumpiak thu um mite tung ah hong piang ding hi. Upna tungtawn in akikamciam tuiphumpa John hong kipia khin hi. Tua mah bangin, upna tawh kha nuntakna kipankhia hi. Adik apha hong sem hong bawl thei sak hi." E.G. Whte, Khangcin' Lunggulh, D.A. p. 98.
John vai ah Pasian in mihingte lamdang tak a hong makaih zia leh adeihna thupi mahmah om hi. Kum 400 tang adaihcip khit teh John thu vai tawh Israel te tangthu ah hong lut in thupuak tuampian vanglian takin hong kilangh hi. John' masuan leh thupuak in "Topa ading a mite kiging khol sak ding" (Luke 1:17, NKJV) cih thu ahihi. Messiah kiang ah hong kha ding ahihi. Zeisu' masuan apuahsiang khol ding zong ahihi.
NITHUMNI (Tuesday) Mar. 31
"Amin Zeisu Na Phuak Ding hi" (Matt. 1:21, 23)
Zeisu Khazih suah vai pen ngeina bang hi peuh mah lo hi. Pasian in asehkholhsa ahihi. "Ahun acin ciang in, Pasian in A Tapa hong sawl a numei sung pan hong piang hi" (Gal. 4:4, NKJV). Hih kamciam in mawhna hong lut khit a kipan amasa pen kamciam hong tang tunna ahihi.
Hih anuai a munte sim in. Hih munte khat sim in Zeisu hong suahna pen genkholhna' picinna bangci bangin suaksak hiam? Hih thu in Pasian hong kamciamna thute ih muan theih nang bang hong thei sak hiam? Thuhilhk. 18:15 leh Sawl. 3:22-24; Isa. 7:14 leh Matt. 1:21-23; Micah 5:2 leh Luke 2:4-7.
Gabriel in Zecharias kiang ah John hong suah ding thu agen khit kha 6 khit ciang in Nazareth khua Mary kiang ah alamdang zaw thu hong phuangkhia a "nungak khat in tapa nei ding a' amin Zeisu phuak ding hi (Luke 1:31, NKJV). Nungak sung pan Zeisu hong pianna pen pianngei bang hi lo a pianngei tawh gen siang theih hi lo hi. Mary mahmah in zong dong a; "kei pasal nei lah hi lo, bang cim, pian theih peuh mah ding?" ci hi. Vantung mi in hih pen Kha Siangtho nasep hi ci in dawng hi (aneu 35). Vantung mi cihna ah, "Pasian tawh apiang thei lo om lo hi" ci lai hi
(aneu 37, NKJV). Mary' kipum piak ziau pen lamdang hi: "na gen bangin ka tung ah piang ta hen" (aneu 38, NKJV).
Mihing in dot nop nei thei hamtang a, bang zah in kilawm kituak mah leh Pasian cih amanh ding ahihi. Piansakna maw singlamteh, mi bang a pianna maw, thawhkikna, Manna moh khiatna, Pentecost pawi a Kha Siangtho kibuakna cih vaite khempeuh ah kipumap a san' ding ahihi.
Mary in ama dotna mah Pasian ukna ah ki apna tawh dawng kik hi. Gabriel in dotna dang khat tawh tha pia a: "Kha Siangtho hong kum in Sangpenpa in hong liah ding hi. Apiang Asiangtho nau ngek pen Pasian tapa kici ding hi" (aneu 35, NIrV). Aleitung vai pawl khatte'n na khempeuh pen pian ngei leh pilna siamna tawh sep ding bawl ding bek in ngaihsun uh hi. Hih bang ngaihsutnate pen bang hang in Pasian na lamdang taktakte ngaihsut theih lohna suak hiam?
NILINI (Wednesday) Apr. 1
Bethlehem a Gan Annkuang (Luke 2:7)
Luke in Bethlehem bawngkuang vai tangthu tawh hong mapat hi. Joseph leh Mary te in akhua uh Nazarehth nusia in apianna mun uh Bethlehem lam hong zuan in Rome gam kuam ukpi Caesar Augustus kiang ah phiangsiah apiakna ding mun hong zuan uh hi. Quirinius pen tua lai tak in Syria gamke ukpa ahihi. Hih bang thucin thutangte in thu kan kimte Kha Siangtho makaihna vai Luke genna ah lungkim sak mahmah ding hi. Hih bang dan in Luke in thupiang tuamtuamte tawh Pasian mi banga hong piannan thucin thutangte na ciamteh sitset hi. Luke 2:7 ah Zeisu genthei takin hong piankhiatnate ngaihsun in. "Naudap, gan annkuang, zintun inn ah mun om lo . . . . " (NKJV) cih te Paul in Philp. 2:5-8 sung a Zeisu bang zah a hong kiniamkhiat cih thu agenna ngaihsun khawm in. Eite ading in Zeisu in bangci bang lampi hong tawn mawk hiam?
Luke in gentheih-huai taka mi bang a hong piang vantung Topa' hong thuaknate hong gen hi. Hih thute pen gan annkuang gei a hong hawh hong lengla tuu cing te vai tawh hong zomto hi. Hih "athupi alungdamhuai thu" pen ahau aliante tungah hilo, siampite leh laitheite tungah hilo in, gamsung ulian minthangte kiang hong tung kha lo in, akiniamkhiat mi tualniam tuu cingte kiang hong tung hi (Luke 2:10, NIrV). Agen thu telnop in vangliatna nasia tak tawh adimzia ngaihsun in: note ading David khuapi ah honpa hong piang hi. Teltuam Khazih Topa hi. Naudap tawh kituam na mu ding uh hi. Van silpiak manpha pen kiniamkhiat takin hong piang hi. Tua silpiak in, "Pasian minthanna" hong keng a "leitung ah lungmuanna" leh "mite ading lunggulh teng tangtunna ahihi (aneu 14, NKJV).
Luke ciaptehna sung a vantung mite in (Luke 2:2- 12) Christian ngaihsutna a athupi lungsim puakzia thumte hong pholak hi.
Amasa pen ah, tua lungdamna thupha in "mi khempeuh" ading ahihi. Zeisu sung ah Jewte leh Gentilete Pasian mite hikhawm uh hi.
Nihna pan in Zeisu in honpa hi. Adang om lo hi. Thumna ah Zeisu in Khazih Topa hi. Hih thu thum Luke in kiptak in gen hi. Anungsang ciang in nungzuite leh adiak in Paul thuhilhnate' bulpi (tawphah) hong suak hi.
Ih Christian upna ngaihsun dih ni. Piansak khempeuh apiangsakpa (John 1;1-3), hih amawh leitung ah mi bang in hong piang hi. Nuntak haksapi hong nungta in singlamteh ah tawp hi. Hih thu ih up tak pi leh, hih thumann lamdang mahmah ah aki pumap nuntakna ih nei ding hi. Tua thu na upna na nuntakna in bang lam teng kilang sak a bang lam teng kilang sak lo hiam?
NINGANI (Thursday) Apr. 2
Honpa Tecite (Luke 2:25-32)
Luke in bel Gentilte ading a agelh hi phadiak hi. Hi mah leh Jew te tangthu athupit lam phawk hi. Tua ziak in amahn Laisiangtho lui leh thak thute kizopzia vai ah kidawm mahmah hi. Ni 8 ni a naungek Zeisu aki vun at vai na gen a Jew te thukham tawh kizui a Jerusalem biakinnpi ah akipaipihzia zong na gen hi (Luke 2:22-24).
Luke 2:25-32 sim in. Simeon gen thu thum te zong ciamteh leng:
1. Gupkhiatna pen Zeisu tungtawn hi a;
2. Pasian bawl hi in;
3. Mi khempeuh (Jew te leh Gentilete) ading ahihi.
Hih thu Mang. 14:6, 7 sung a thute tawh bang ci kinahvawh hiam?
Simeon genkholhna thu in Zeisu nasepna thupi 2 zong genkhol hi.
Amasa pen ah, Khazih in, "Israel mitampite apuk sak leh aphong" hi ding hi (Luke 2:34, NIrV). Khazih in hotkhiatna leh khuavak mi khempeuh ading hong paipih a
mite ading in manh nei lo bel hi lo hi. Khazih ah thu lailak om lo hi. Sang ding maw nial ding cih thu bek ahihi. Tua dawnna mann ah mite gupna thu kinga hi. Khazih in ih vek in sang maw sang lo cih hong tel dot hi. Amah tawh aomkhawm te Amah tawh thokik in gamnuam luah ding uh hi. Amah anialte leh a awlmawh-lote lamet lo in siamang ding hi. Khazih upmuanna pen kideek theih thu hi lo hi.
Nihna ah Simeon in Mary kiang a agenkholhna thu "namsau khat in na lungsim hong vut ding hi" (Luke 2:35, NIrV). Hih thu in Mary muh khak singlamteh gen hi pelmawh hi. Mary leh khang khempeuh in singlamteh lo in hotkhiatna om thei lo cih ih phawk tek ding ahihi. Singlamteh in hotkhiatna thu gelna laigil ahihi.
Hotkhiatna in piakkhong hi a ih ngah nang a ih bawl theih om lo hi. Ahi zongin pawl khat te ading in man tam lua thei ding hi. Zeisu zuihna in nang ading in bang zah man hiam? Bang hang in kimanh mahmah hiam?
KIGINNI (Friday) Apr. 3
SINBEH DING:
"Luke, lungdam thubu at pa leh amin puakpa pen zatui mangpa khat ahihi. Laisiangtho sung ah amah pen "aki it mahmah zatui mangpa" Col. 4:14 na kici hi. Paul in azatui siam lam azak ciang in zong in maban tuam dang Topa piak khat bang in zong hi. Paul zong Luke i panpihna tawh zinkawikawi uh hi. Tawl khat khit ciang in Macedonia Philippi ah nusia hi. Hih mun ah Luke in kum sawtpi sung zatui mang leh lungdamna thu hilhsia sem hi. Zatui mang ahihna tawh cinate don in, athuaksiate in Pasian damsakna vang angah nang un thu nget sak hi. Tua bang dan in lungdamna thu tangko na ding lampi hong kihong hi. Luke in zatui mang khat ahihna tawh thu um lo mitampite kiang ah Khazih thu gen theihna hunpha ngah hi. Amah bang a ih sep ding pen Pasian gelna ahihi". E.G. White, Damna
Thupha, M.H., p. 140, 141.
KIKUP DINGTE:
1. Luke in midangte at sa thute at kik hi. Tua hi leh, Luke' lungdamna thubu a Pasian makaihna koici telsiam ding ih hi hiam (2 Tim. 3:16)? Koici bang dan in Pasian makaihna hi thei hiam? E.G. White, "The Inspiration of the Prophetic Writers," 1 SM, p. 15-23 sim in.
2. Nungak pan a pianna pen Pasian bawl hi a, alamdang ama vangliatna leh makaihna tungtawn ahihi. Mihingte telsiam theihnate kheng hi. Tua hi leh, "bang?" leitung mite' telsiam zawhloh bang thute om hiam? Nungak pan a suahkhiatna pen Ama hih theih zawh loh ahi thei ding hiam? Leitung pianngei omzia tawh apiang thei lo om thei hi. Nungak pan a piankhiatna pen ki neu sak kha thei hi. Kha lam thu atelsiamte ading in nial na ding om lo hi. Gentehna in Mary kiang a hih a up theih huai lo thu agen ciang in, "Pasian tawh apiang thei lo om lo hi" (Luke 1:37) ci in gen hi.
3. America TV a thudongte khat in acihna ah, hi thei leh athu dot nop pi pen Zeisu ahihi. Dotna khat bek dong nuam a: "nungak pan a piang takpi na hi hiam?" cih ahihi. Hih dotna leh adawnna bang hang in thupi mahmah hiam?
No comments:
Post a Comment