PAU LAMDANG
Pau lamdang thu pen mi pawl khat ading in gen gen dingin zong kul khawl lo mai thei hi.A hih hang in AD 34 kim pan kipan in Khristian te lak ah hi thu pen a om zel bang in kimu hi. Mi tampi takte in na buai pih mahmah uha,upna lampi ah lam pial theihna khutzat khat bang dan in kimu ahih man in, pau lamdang ii omzia leh apianzia mann tak Lai Siangtho hilhna banga lak pen na kisam mahmah hi. A ngahte ading in aungzatna leh utna tungsak leh asia ahih kei leh ahoih lam ah ahi zong manlang tak in hong paipih thei ahih man in , gen gawp a pau gawp chi hilo hi.
Tua ban ah Pau lam silpiak pen Lai siangtho ah zong Kha lam silpiak te lakah zong na om gige hi.Tua ahih man in, langdo in pau pih gawp ding zong hilo hi.1Cor.13:8.Khasiangtho ngah te lak ah zong om zel ding leh thu hilhna te, theihna te, akhawl ma lo siah khawl tuan lo ding in kimu hi.1Kor.13:8. Tua ahih leh tu lai pawl tuamtuam te lak ah pen kua te pawl in hiam hih silpiak pen angah in, kua te in ngah to zel ding ?Tua hi a, tu lai a pau lamdang ngah a akigen te in Lai siangtho a pau lam silpiak agen bang lian a mann tak in a ngah uhhiam?Tua te pen thei nading in pau lamdang hong om cilna leh a gah khia te Lai siangtho pan leh ni dang lai pekpek pan in sut suak ding hi hang.A masa bel in thu umlo mite lak pan in pau lamdang hong kipatna sut ding hi hang.
THU UMLO MITE LAKA PAU LAMDANG KIZATNA
1.Pau lamdang (seidei na)ih cih te pen, agen pa leh angah pa nangawng in a omzia theilo pen Khristian te lakbek ah hilo in,Khristian lo te kiang ah zong mu dingin omhi.B.C 100 kim ah Byblos khua pan in, Amon biakna bia te tangval khat pen pasian kiang ah na ap in a ap lai tak in a pasian in na man a, bang mah mumal omlo in awng khia (sei dei) gawp hi. Hih bang hun laitak in biakna lam ah lawpna nakpi tak in om hi.Tua pa kiang pan in mumal neilo a pau na (sei deina) pen hong om ta ahihi.G.a.Barton Archealogy and the Bible p.253.
2.Plato (B.C.429-324): Hih pa in,inn kuan thu ngetna ah amau ut thu a akici sak hi peuhmah lo in khua phawklo in awng khia (sei dei) na pen hong tung in, khua phawklo a a om na pan khua hong phawk tak ciang mi dam sak theihna te hong nei mawk hi.Tua hi a a kampau awmzia hong thei lo a, a kam pau alet kik thei ding mi deih mahmah hi. (Dialogue of Plato).
3.Sibylline biakna bi ate kamsang nu,Delos tui kulh a mi pen Apaolo pasian tawh kipawlna hun zang khawm na aneihlai in pau lamdang (sei deina) ngah in theihthei na pan theihthei loh in pau hi,Aneid book by Virgil,B.C.70-79.
4.Pythoness of Delphi:-Delphi khua a Pythoness nu kiang ah dawi hong lut in, ahong lut laitak in akam pan in acil phuan hong pusuak buahbuah a, pau lamdang in hong ku khia gawp in, siampi pawl khat te in a cihnop zia thei sawm in a kan uh leh amau zong na ngah khawm uhhi.By Chrisostom's church father.
5.Persia gam a Muslim te kiang ah zong pau lamdang a pau na na om hi.Ala, Aala ci a agen lai in, hong ling gawp in,hong sei dei mang gawp hi.Estolee.
6.Greenland gam a Eskimo- te kiang a aki khawpna uh ah khuang te tum in lam uha, tua lai a amakai pa pen Angakok ahihi.Tha khat thu in tangval khat Krisuka pen khua phawk lo in om in, nu ngak khat, Ivaloo tawh pau lamdang pau in om uhhi.Eskimo pau pen na hi hetlo uhhi.A deihna la kithei lo.Pau lamdang pau a seidei na aom taktak a leh tua pen bel athei hita ing, ci in Peter Freuchena in na gen hi.(Artic Adventure).
7.Tibet leh China ah: V.Raymond Edman, Wheaton College Principal in, siampi te pen pasian bia in alam lai in mangpau in napau uha, atheih lo pau uh ahi, German , Piantit pau te in na awng vatvat mai uh hi.Shakespear thu te na gen mawk mawk mai lel uh hi , na ci hi.
Hih te pen thu umlo mite kiang a pau lamdang pau a om dan te ahihi.Hih bang te in Satan pen Pasian umlo mite kiang ah zong na tungsak thei ahih man in,tu lai in zong ii up thei dingin a hih leh thei lel hi cih pen theihsa ahihi.Eden huan pan akipan amann leh amann lo, thu maan Leh zuau phuah pen na omkhawm to khin den hi.Zop lai ding….Thulu…KHRISTIAN PAWLPI PA TE HUN AH..
Dr.Pastor P.L Biakchhawna
No comments:
Post a Comment