Zo Phualva Thupuak - Volume 05, Issue 17

A Sung aa Om Thute:

ZEISU KIANGAH KA TUAH THU KHEMPEUH GEN NING

CIDAMNA THU

• Tawlngakna
  
• Ihmut Hun
  

THU CUAMCUAM

• Laisiangtho Bu Kang Lo
  
• Laisiangtho sim manin Bawlsiatna Thuak
  
• Zunkhum Natna Ading Zatui hoihpen
  

KAAL SUNG NASEPTE

• Nau Apna
  
• Naumin Phuahna
  
• Dahpihna
  

SABBATH : LUNGNOP KIPAK NI

• Friday - Kigin Ni Hisak In
  
• Innkuan Kikhopna tawh Sabbath Muak Ding
  
• Sabbath Hunnuam Ei A'ding hilo Pasian HOng piak hi.
  

THU ZAKSAKNA

• Pawl Lutna
  
• ZSM / CDK
  
• Dorcas Lawmbawm
  
• Revival Meeting
  
• Lungdam Kohna
  
• Church Address

ZEISU KIANG AH KA TUAH THU KHEMPEUH GEN NING

 Kum tampi lai in Missionary pastor putek Henry Morrison te nupa pen Africa gam ah kum tampi Pasian nasem in a om khit uh ciangin pension la in tawlnga dingin New York khuapi lam zuan in hong ciah sawm ta uh hi. A khangno thahat lai teng uh Pasian nasepna dingin zang khin mah leh pension pahtawina nangawn ngah lo uh hi. Inn neu khat leina ding nangawn nei zolo uh ahih manin Pasian nasepna ah lawhsam kisa leh neihlehlam bangmah neilo ahih manun a lungkia mahmah uh hi.

Tua bangin, New York lam zuan dingin tembaw a tuan sawmna uh tembaw ah, tua hun lai-a American President Theodore Rosvelt in Africa gam a sabeng a a gamkuanna pan a ciah ding tua tembaw mah ah hong tuang kha hi. Tua America president khakna in band party (tumtheih tuamtuam leh lamna) bawl in thupi takin kha uh hi. Missionary putek Pastor Henry Morrison te nupa ahih leh kuamah a kha ding zong nei zolo uh ahih manin a lungsim uh na mahmah hi. A diakdiak in a pasal pastor pa lungsim na phadeuh hi. Atlantic tuipi a kantan lai un, pastor pa lungkim thei lo in, a zi kiangah, "Hih thu maan lo hi, ei nupa kum tampi Pasian na sem in ih khangno tha teng bei dong ih sep khit ciang ih ciah zong kuamah in hong pahtawi lo in, hih President, Africa a sabeng bek pen hihzah a pahtawina tawh kha ta zen uh" ci in a phunphun a, a zi in a hehnep hangin a lungsim na a damsak zo kei hi.

Tua tembaw America New York tembaw khawlna munpi hong tun ciangin, Africa gam a mipi sang atam zaw in US President pa a muak ding leh a mu nuam in na om leuleu uh hi. Mi lian tampi in muak in, thuthang kaikhawmte in tadensa ah lim gol pipi suangin President pa thu tuang sak zihziah uh hi. Ahih hangin, tua missionary tekte nupa ahih leh kua mah in na dawn lo in, na thudon vet lo uh hi. Tua tembaw panin a nupa un paikhia in, New York khua sungah innsap ding a mantawm pen pen zongin, na sepding amau sep theih khom zong pah uh hi.

Tua zan in, Pastor Henry lungsim na mahmah in, Pasian tungah a khasiat thu peuh a zi tungah hilh a, "Kua mah hong huh ding ih nei kei a, pai nading nangawn ih nei kei hi. Bang hangin kum sawtpi a na ih sep sak ih Pasian in hih banga ih kisap hun ciangin hong huh lo hiam?" ci hi. A zi in pilvang takin a pasal dawngin, "Bang hangin hih inn-khan khat ah nang guak pai in, ih Pasian kiangah na lungkim lohna a vekpi in tun lo ding nahiam?" na ci hi. Amah zong tua room sungah pai in, tawlpi khat a om khit ciangin maitai takin hong pusuak khia in, lungnuam leh lungdam tak leh lasa hiauhiau kawm in hong om suak ahih manin a zi in lamdang sa leuleu aa, "Bang thu bang la tuak nahiam?" ci-in adot leh Pastor Henry Morrison in, "inn-khan sungah thungen in Pasian kiangah Topa aw, "US president ahih leh mitampi in muak in pahtawi uh a, kei hun sawtpi nangma nasempa kuamah in zong hong dawn lo, hong thei lo, Topa aw, Na tungah khasia ngiat ing" ci-in thu ka ngen hi. Thakhat thu in ka tungah khut hong ki-nga bangin ka om a, hih bang awging ka za hi: "Ka ta aw, nang bel inn hong tung nai lo nai ve, nong tun ciang vangtungmi tampi in hong dawn in hong pahtawi ding hi" hong ci hi" a ci hi.

           "Leitung pen ih inn ahih lohzia leh ih khualzinna mun bek ahih zia ka theih cian ciangin ka lunggimnateng bei in ka tawldam hi" Kong it ute naute aw, leitung ah ci-le-sa tawh nungta ih hih mah bangin, Pasian mizat, a nuntakna khempeuh ap a Pasian nasemte nagawn leitung thupitna, inn-le-lo, sum-le-pai leh minthannate in hong buaisak thei hi. Hih bang hun ciangin ih zuih leh a ma na bek ih sep Topa Zeisu phawk den ding hihang..

           Ih Topa Zeisu in ahih leh, hih leitung ah mun nei lo hi. "Ngia-te in kua nei a, vasate'n bu nei uh hi, ahih zongin Mihing Tapa in a lu-ngak nading mun nei lo hi" ci hi. Mi banga hong suah khiat nading mun zong nei lo in ganbuk a kawmtawm mun ah hong piang hi. Pasian' na nibup asep khit ciang nitak khua hong zing ding hita, vasate in a bu zuan in, ngiate in a kua uh zuan uh hi. Ahih hangin Mihing Tapa in belh ding neilo in olive singkung nuai khat beel hi. A lungkhamnate a Pa kiang atun nading thungetna mun ding nangawn nei lo in mi huan akawmtawm Gethsemane huan ah thungen zel hi. Jerusalem ah thupitak leh pahtawina tawh alut ding nangawn in atuan ding la nei zolo aa mi a' kawmtawm hi. A nungzuite tawh nitak an special tak a ne khawm dingin geel himah leh amun ding kician zong neilo in mi indei peuh kawmtawm hi. Hih leiah na khempeuh a Bawlpa in 'kei a' cih ding khat zong nei lo hi. A kikilh cipna singkhuam zong ama a' ding hilo in Barnabas a' akawm tawm hilai tazen maw! Hong si in kivui nading hankhuk neilo in mi a' mah kawmtawmin tua han ah kivui tazen hi. Hih leiah ahih leh a lu a ngak nading mun khat beek zong nei lo hi. Tua Zeisu, lu-ngak nading mun nei lo pen, tuni a nang leh kei in a na ih sepsak leh a nung ih zuih PA ahi hi.

Ei Zeisu nungzuite hih leitung mite in hong pakta leh hong tawisang kei mah leh, inn leh lo, van hoihte nei kei mah taleng, tuanna ding mawtaw nei lo in sum-le-pai na-ngawn nei lo mah hileng ih Pasian tungah khasia kei ni. Hih leitung in eite gam ahi kei hi. Leitung mite'n ahih leh amau ngah ding letsong leh pahtawinate ngah khin uh hi. Eite in ahih leh, asawt lo in ih inn taktak ah ih ciah ciangin vantungmi simzawhlohte in hong dawn dinga, a na ih sep sak To Zeisu ih mu ding hi. Zeisu kiangah ih lungkhamna khempeuh ih tun dinga, Amah in ih khitui khempeuh hong nulsiangsak ding hi. Amen.

Naupang kum 3 gual khat Syria tualsung gal buaina ah Assad te in bomb zang in a inn suksiatsak uh a, a nu leh pa leh a unau khempeuh si hi. Tua naupang zong nakpi takin liam in zato ah kipuak mah leh dam zolo in si hi. A sih ma a, a thugen nunung pen in mikim lungsim khoih mahmah hi. Doctor-te in bang deih na hiam, bang gen nuam nahiam ci-in adot uh leh, "Zeisu kiangah ka tuah thu khempeuh gen ning" ci in tua-teng a pau khit ciangin si hi. Zeisu mai tektek ah Satan gitlohna hanga ih thumna, ih tauna leh ih thuakna khempeuhte ih gen ding ngaklah huai mah si mate, ute naute. Inn ih tun ding sawt nawnlo ding hi. Tua ahih manin, hat kei mah taleng khitui luang kawm sa mah in, singlamteh lam tawn in Zeisu nung zui tantan ni. Topa'n a sim mi khempeuh Thupha hong pia ta hen. Amen.               ? Pastor PL Thlenga, AIIAS, Philippines