KHAWKPI 6 - SIANTHOSAKNA A NGAH NUNTAKNA

KHAWKPI  6

SIANTHOSAKNA A NGAH NUNTAKNA

            Hong Honpa in ih neihsa khempeuh hong ngen hi. Ih ngaihsutna a masa bel leh a siangtho bel hong ngena, a siangtho ih pahtak lian bel hong ngen hi. Pasian' pianzia a ngah takpi ih hih leh, ih lung sung leh ih muk ah Amah kiphat den ding hi. Amah kipumpiaka, hehpihna leh thumaan theihna ah ih khan toh den ding a thupi pen a hihi. SL, laimai 95.

            Lai siangtho sunga sianthosakna a cih pen lungsim, kha leh pumpi bup tawh kisai hi. Hih in kipum apna a maan a hihi. Tua thupha a ngahna dingin Paul in Thesalonika khua-a pawlpi thu nget sak hi. "Lungnopna Pasian mahmah in note hong siangtho sak kilkel ta hen. Ih Topa Jesu Khris hong pai dongin na lungsim, na kha, na pumpi bup uh paubanna a om lohna dingin Pasian' kiangah thu ka ngen hi." 1Thesalonika 5:25.

            Biakna sungah sianthosakna thu tawh kisai-in a maan lo leh a huzap a lauhuai mahmah khat om hi. Sianthosakna a gengente in mun tampi ah sianthona nei lo uh hi. Amau' gen sianthosakna pen kampau leh biakna sung bek ah om hi.

            Thu khinkhaina leh khensat siamna nei lo-in, amau' ngaihsut tawm bek muangin, khat veivei a lungsim sung pan uha a phul lawpna bul phuhin sianthona a ngah kisa kha uh hi. Amau in sianthona a cih pen uh a hi lopi mah gen kankanin, kam tampi pau hi napi uh, a lah theih ding uh gah kician nei lo lel uh hi. Sianthona ngah khin ung a cite in amau' kineihtawmna tawh amau' kha a khem uh bek tham lo-in, Pasian' deihna banga a gamta nuam cinten mi tampite lam pial pih zawsop uh hi. Amaute in, "Pasian in hong makaih hi! Pasian in hong hilh hi! Mawhna nei nawn ke'ng" khawng cici uh hi. Hih bang kha tawh a kizom kha mi tampi, a tel zawh loh uh thuthukpi khuamial sung tung khin uh hi. Tua banga a omna uh pen Etteh thamcing Khris tawh a kibat loh hetna uh a hihi. SL, laimai 7-13.

            Sianthosakna in mai a nawtnawt nasepna a hihi. Tua pen a cialcialin Peter in hong gen hi. "Hi cintenin, na upna uh gamtat hoih tawh behlap un la, gamtat hoihna thutheihna tawh behlap un; na thutheihna uh kidek kidamna tawh behlap un la, kidek kidamna thuakzawhna tawh behlap un; na thuakzawhna uh sianthona tawh behlap un la, na sianthona uh ki-unau ngaihna tawh behlap un; na ki-unau ngaihna uh ki-itna tawh na thuap un. Hih nate note' sungah oma a kip leh ih Topa Jesu Khris na theihna uah gah nei lo-in na om kei ding uh hi." 2 Peter 1:5-8. "Tua a hih ciangin ute naute aw, note hong kisapna leh hong kiteelna ah kician takin om un. Tua banga na hih uh leh na puuk ngei kei ding uh hi. Tua bangin ih Topa leh Honpa Jesu Khris gam sung ah na lutna ding uh hong kibawl sak ding hi." Taang 10,11.

            Puuk ngei lo ding ih hihna a thu hiah om hi. Khristian nuntak hoih a behlap (thuap) totote, Kha Siangtho thupha a thuapthuapin kipia ding a hihna Pasian' kamciam om hi. SLO, laimai 94,95.

            Sianthosakna ih cih pen tawl khat sung, nai khat sung, ni khat sung nasep hi lo hi. Hehpihna sungah khantoh denna a hihi. Ih gal do lai ding bang zahin nasia ding cih ni khat thu tawh ih thei thei kei hi. Satan nungta-a, na sem sem a hih manin, amah ih dona dingin Pasian' kiang panin huhna leh hatna nisima ih nget ngitnget ding kisam hi. Satan a maan laiteng ei' deihna nuaisiaha, hong nawngkai sak teng ih zawh gawp ding kisam hi. Khawlna ding mun om lo hi, ngah kim khin zo ing ci-a ih din khawlna ding mun om lo hi.

            Khristian nuntak pen mai nawta a pai den ding a hihi. Jesu in a mite hal siangin hah siang hi. Amaute' sung pan Ama lim kician taka a kilat ciangin amaute a kicing a siangtho hi ding uha laak toh dinga kiging sa hi ta ding uh hi. Khristiante nasep thupi hong kisawl hi. Pasian zahtakna tawh tak leh kha kicing taka a sianthona dingin buahbanna khempeuh ih siangtho ding hong kihansuah hi. Nasep ding bang zahin thupi cih kumu hi. Khristiante in sep ding nei den hi. Gah a gah theihna dingin hiang khempeuh in guipi panin hinna leh hatna a ngah kul hi. 1T, laimai 340.

            Ama hong ngette thudon het lopi-in Pasian in amaute' mawhna mai sakin thupha pia ding hi cih upna tawh kuamah kikhem kei hen. Theih gige mawhna khat bawl teiteina in Kha teci panna aw dai sakin Pasian tawh kikhen sak hi. Biakna lam ngaihsutna bang zahtain nasia ta leh thukham siangtho a thudon lo mi' lung sungah Jesu teeng thei lo hi. Amah a pahtawite bek Pasian in pahtawi ding hi. SL, laimai 92.

            Paul in, "Lungnopna Pasian mahmah in note hong siangtho sak kilkel ta hen" (1 Thesalonika 5:23) a cih ciangin, amaute' bat zawh loh ding dinmun a ngim dinga amaute a sawl hi lo hi. Pasian in a piak nop loh pipi ding thupha a nget sak zong hi lo hi. Lung nuam taka Pasian tawh a kimu nuamte in zia leh tong a siangtho a neih uh kul a hihna ama'n thei hi. (1 Korinth 9:25-27;  1 Korinth 6:19,20 sim in.)

            Khristian taktakte in thunung ding a geelin nitum lo hi. Hih hih leng mite'n bang hong ci ngaihsut tam? Tua bawl leng ka leitung lametna a koici sukkhak tam? cici lo hi. A sepnate un Ama min a than sak theihna dingin Pasian in amaute bang sem sak nuam hiam cih theih nopna lungsim bek Pasian' tate'n nei hi. Leitung ah a kuang a taang meivakte a hih theih na dingun, Ama hehpihna tawh A nungzuite' nuntakna leh lungsim a ki-uk theihna ding vaihawmna kician Topa in nei zo hi. SL, 26,39.