KHAWKPI 2 - HUN BEI CIANG DING

KHAWKPI  2

HUN BEI CIANG DING

            Eite in hun bei ding lai taka khang kha te ih hihi. Khris hong pai kikna ding lam lahnate zong tung kim hanhan ta hi. Ei' hun in hun thupi a ciliap huai hun a hihi. Pasian' Kha Siangtho damdamin leitung pan kila khia to hi. Pasian' hehpihna thupha a awlmawh lo te' tungah thukhenna leh gimna daante tungtung ta hi. Leitung leh tuipi kisiatna leh pawl tuamtuam om te kilem lohnate leh gal vai tamnate khawng in siatna hong tung ding madawkte vive hi ta uh hi. A takpi, a nasia pen hong tung ding siatna pana hong pawt khia kholkhol te hi ta uh hi.

            Siatna kusalete in kilom khatin khauh uh hi. Amaute in hun haksa pen cianga dingin tha a tawm kholkhol a hi uh hi. Kikheelna lian pipi hih leitung ah hong om dinga, a tawpna ding thute hong tung zangzang ding hi.

            Leiunga nate thute om zia te in eite tunga lung khamna ding lim vive hong lak hi. Tadensate in tu zawh a sawt lo a hong tung ding ki-elnate vive tawh kidim hi. Hang taka mi suama guk sak cih bang vive kimu ta hi. Kiphial gawpna vive om hi. Guktakna leh mi thahna tam mahmah hi. Dawi lawm nei te in numei, pasal naupang ci lo-in susia uh hi. Mihingte in tat siat bek utin, siatna nam kim a bawl uh hi.

            Galpa in thutang thumaan kawi sakin mite huaihamna leh ang sung zonna tawh zo hi. "Thumaan a tang pen gamla pi ah kihem khia-a, thutang pen kongzing khawngah kipaai khia-in, a hi bang thu lut zo peuh mah nawn lo ta hi." Isa. 59:14. Khuapi lian sung te ah zawn luatna leh tavaihna in mipi khuha, neek ding an om lo, belh ding inn om lo, silh ding puan om lo;  tua lakpi mah ah, tua khuapi sung mah veve te ah, lungsima zong ih ngaihsut khak zawh loh, noptatna tawh a sumte uh inn zepna peuh, amau kizepna peuh, amau mah a susia zaw ding a lunggulh pepeuh uh leina uha, zute, zatepte, a dangdang te-in zangin, amaute a khuak susia-in, lungsim kikhai kim nawn lo-in, a kha uh a susia lel te tampi mah om leuleu hi. A gil kial mite kiko na aw Pasian' mai ah hong tunga, tua lakpi ah mite in kibawl siatna leh, zawh thawh bawla suh sakna thusiate a cialcialin cian behbeh lai uh hi.

            Inn thuapte a cialciala van sang lam manawha kilamte en dingin zan laitak in hong kisam hi. Tua innte mei kang thei lo dingin kilama, a neipa leh a lam pa minthang sak ding a hihi.  Hih innte sang semsema, a sungah a mantam mahmah nate vive kizang hi. Hih bang inn a lamlam te in, "Bangci bangin Pasian' min ka thang sak thei ding hiam ci-in," amau leh amau kidong ngei lo hi. Amau' lungsim sungah Topa om lo hi.

            Tua banga inn sang pipi te kidema a khan tohtoh ciangin, a neite lungdamin kisathei uha, a vengte dem zo-in a lam zawh nopna hazatna ah kisial uh hi. Tua banga sum kizangte pen a pia zo lo pipi te kiang pana kingen khia teitei sumte leh mizawngte gawi cipna pana hong lut sumte peuh a hihi. Amau in vantung ah sum sazian kinei-a, leitunga na kisepna sum sazian khempeuh kiciamteh sisek a hih lam a phawk kei uh hi.

            Tua baan ah ka mai ah mei kang patau khat hong kilak hi. Mite in tua inn sangpite enin, mei kang thei lo dinga kibawl hi ngawn sam hi ven maw, 'muan huai sam nave' ci uh hi. A hih hangin tua innte zong kultal bangin mei kang in liak tum lel hi. Tua mei phelh sette in bang mah lawh zo tuan lo hi. Kang phelh te in lah, bangmah huu zo lo uh hi.

            Topa' ni hong tun hun ciangin tua a kisathei, leitung ngimna lian nei mite' lungsim kikhel tuan lo-in mite in, gupna a pia thei khut in suksiatna zong bawl zo ve zel hi, cih a mu ding uh hi, ci-in hong gen hi. Leitung vangliatna nei kuamah in Pasian' khut len cip zo lo uh hi. Topa' seh sa kisiat ni hong tun ciangin, Ama thupiak a awlmawh lo a huaiham mite thaman a piak kik ni ciangin, tua innte a kilamna ah a kizang vante in Topa' suksiatna a dal zo bang mah om lo hi.

            Lai siam mipilte leh taangpi' muana nasemte lak nangawn ah zong tu hun om zia te bang ci dan hiam cih a thei tam lo hi.  Kumpi gam uk a semte keekkeek mah in zong, mihing' lungsim kisiatnate, zawn luatnate, cihmawh gentheihnate, kithahnate khangkhanga, a cih a lawhna ding uh thei zo lo uh hi.  Amau in nasepnate sit tel semsem dingin vaihawm uha, a hih hangin a mawkna a kigim sak lel bang a hi uh hi.  Amau in Pasian' thumaan awlmawh zaw le-uh, tua buainate bang cih ding cih thei baih zaw ding uh hi.

            Lai Siangtho in Khris nih veina hong pai madeuh lai taka mite' om zia ding a genkholh sa mah a hihi.  Mite in khem bawla suh sakna leh suama guk sakna tawh hong hau ding uh hi, ci-in a gelhna ah:  'Note in ni nunung ni' a dingin sumte paaite na kaikhawm uh hi.  An at dinga nasem cial pa in note hong khem dinga, an at te kikona aw in mihonpi Topa' bil ah lut ta hi.  Note in leitung ah nopsa taking na nungta khin ta uha, na uang tat zo uh hi;  na lungsimte uh kithahna ni' a dingin na vaak kham khin uh hi.  Mi thumaante mawh sakin na that khin zo uha, amah in note hong lehdal lo hi," James 5:3-6 ah ci hi.

            A hih hangin hih lim lah kholhnate kua in thudon a hi hiam?  A leitung lungsim paaite bang zah pi-in ngaihsun uh hiam?  Amau' lungsim kikhelna a om beek hiam?  Noah hun lai-in zong hi zah val kimu tuan peuh mah lo hi. Tuiciin ma mite in zong leitung nasep leh gualnopna tawh a kidiah piikpeek lai takin, tuiciin tunga "amaute a phiat siang dongun, bangmah don lo uh hi," Matt. 24:39 ah ci hi. Vantung in patau ding tangko sak napi a ngai nuam kei uh hi.  Tua mah bangin tu ni tu hunin zong Pasian' hilhna aw kuamah in ngai nuam lo uha, a tawntunga kisiat cipna ding khuk nawhsa-in zuan uh hi.

            Leitung in gal vai lungsim bek tawh kitok den hi. Danial 11 sunga hilhkholhnate tung kim dekdek ta hi.  A sawt lo-in a kigen khol sa buainate hong tung ding hi.

            "Ngai in, Topa in leitung hawm suak saka, kisia sakin a khup a thalin paai a, a tunga a teeng te kitheh thang uh hi... Bang hang hiam cih leh, amau in thupiakte palsat uha, zehtante khek gawp uha, tawntung thuciam sutat uh hi.  Tua a hih manin samsiatna in leitung nawm valha, a sunga teeng khempeuh kihawm khai hi... Gualnopna khuang ging te daai-a, lungdamna gamlumte tawp ta-in tamngai tuma gualnuamte bei ta hi," Isa. 24:1-8.

            "Ala!  tua ni, Topa ni ding nai mah si! A thahatpa kiang pan suk siatna hong tung ding hi ta," Joel 1:15. "Leitung ka en hi, ngai dih in, meel leh thang zong nei lo hi;  Vantung nangawn in khuavak nei lo hi.  Ka ena, mualpite kiliingin, mual neute a bei mang hi, Ka en zela, ngai dih in, mihing ka mu kei-a, vantung vasa teng zong a leng mang hi.  Ka et leh, singgah huante gam simtham suak khina, khuapi lian te kicim zan hi." Jer. 4:23-26.

            'Ala! tua ni aw, thupi mah si!  Tua bang a dang om kei. Jakob' lungkhamna hun bang mah ahi ta ve maw!  A hi zongin a tua ci lungkham mi bel, gupna ngah ding hi zaw ai ve!  Jer. 30:7.

            Hih leitunga om mi khempeuh te in Pasian langdo pa kop pih kim sam lo uh hi. Mi khempeuh thunialte hi khin sam lo uh hi. Pasian tunga a thumaan mi tawm om lai uh hi;  John in a gelhna ah, 'Hih lai tak ah Pasian' thupiakte zui-a, Jesu' upna a neite om hi' Mang. 14:12 ah ci hi. A sawt lo-in Pasian'na a semte leh a sem lote' kikal ah nakpi kidona hong tung ding hi.  Tua ciangin a kising khia thei khempeuh kising khia ding hi. A kising khia zo het lo te bek mah kip ding hi.

            Satan in Lai Siangtho sin thanuam pa khat a hihi. Amah in hun tom khano bek nei lai cih thei a hih manin, leitunga Topa' nasepna a langpan theihna khem peuh zong kawikawi hi.  Hun lui-a bawl siatna om ngei teng leh vantung pan minthanna zong hong pai huna, a nungta kha Pasian' mite phuut khak thuakna zia ding kiseh thei vet lo hi.  Amaute in Pasian' tokhom pan hong tang khuavak zui ding uh hi.  Vantung mite' kamtaina kizang in leitung leh vantung kikal ah thu kiza den hi.  Satan, a vantung migilo te in kiimuumin, kei Pasian ka hi, ci-in na lamdang tuamtuamte bawlin mi khem ding hi. A hih theih leh a kiteel sa te keek mah zong khem ding hi. Pasian' mite in na lamdang a bawl manun muanna ngah tuan lo ding uh hi.  Bang hang hiam cih leh Satan in zong bawl ve mawk hi.  Pasian sit tel sa mite in Exo. 31:12-18 sung a kigen lim tawh din mun la ding uh hi. Amaute in a nungta kammal, 'Kigelh hi' cih siksan ding uh hi. Hih kammal sik sanna bek mah amaute din mun muan huai a hihi. Topa tawh kikala thuciam a palsat te tua hun ciangin Pasian nei lo, lam-et om lo, a suak ding uh hi.

            Pasian bia mite pen thupiak nambat 4 na zuihna tawh hong kilang khia pha diak ding hi;  bang hang hiam cih leh hih pen Pasian in na khempeuh a pian sakna tecihi-a, Amah, biak ding pa a hihna lim hi. Migilo te leuleu in Piangsakpa phawkna susia-a, Rom phuh tawm thu ultun sakna tawh hong kilang khia ding uh hi. Khristian sung pen ki-elna tawh phel lian pi nih hong kisuah dinga, Pasian' thupiakte zui-a Jesu upna a nei te pawl leh, Sapi leh a milim bia-a a ciam tehna ngah te pawl hong hi ding uh hi.  Pawlpi leh kumpi kikopin 'a neu a lian, a hau a zawng, a suakta leh to nei te' a vekpi sapi ciamtehna nei dingin a sawl gawp uh hangin, Pasian' mite in na saang lo veve ding uh hi (Mang 13:16). Patmos-a kamsangpa in a muhna ah, 'sapi leh a milim, a ciamtehna leh a min nambat a kisim khawmna pana suakta-a zawhna ngah mite in, Pasian' tamngai tawi in, Moses le Tuuno' la sa-in lim lang tui pi tunga ding a mu hi,' (Mang. 15:2).

            Pasian' mite a lauhuai sit telna leh thuak siatnate in ngak hi. Kigal bawlna lungsim in lei mong khat pan mong khat dongin minamte lakah kitawh suah hi. A hih hangin a hong pai ding buaina hun tak ciangin tua bang buaina minam om zawh peuh mahin a om ngei nai lo hi napi, Pasian' mite puuk tuan het lo ding uh hi. Satan leh a migilote in susia zo lo uh hi, bang hang hiam cih leh a hat pha diak vantung mite in amaute keem hi. 9T 11-17.

Source: EG White, Pawlpi Thu Lamlak.