KHAWKPI 4 - KHRIS TAWH PUM KHATNA LEH UNAU BANGA KI-ITNA

KHAWKPI  4

KHRIS TAWH PUM KHATNA LEH UNAU BANGA KI-ITNA

(Pasian' Sungah Khris Tawh Pum Khatna)

            A mite kikopa lom khat bek a suah ding uh Pasian in deih hi. Amau in vantung mun khat beka teen khop ding a lam-en te hi mah lo uh hiam?  Khris amah leh amah kilangdo ngei hiam?  Amah in kimuan mawhnate leh kilem lohnate a paih khiat lohpi mahun A mite mai nawtna pia ding a hiam? Deihna kikhatin Pasian' muhna ah a siangtho na a sem dingin nasemte in lungsim leh tha a piak masiah uh Pasian in amaute zawhna pia ding a hiam? Kikopna in thahatna hi-a, kikop lohna in thaneemna hi. Khat leh khat kikopin, mite gup khiatna ding kituak taka na ih sep khop leh "Pasian tawh nasem khawm te' ih hi ding hi. Sep khop diamdiam ding a ut lo mi in nakpi-a Pasian a simmawh a hihi. Tua banga deihna kikalh ziazua-a nasepna galpa in muhnop sa mahmah hi. Tua bang mi in unau banga ki-itna leh lungneemna a puah phat lai ding kisam hi. Mai lama, amau' kilem loh mana hong tung ding thamante mu thei le-uh kisik mahmah ding uh hi. 8T, laimai 240. 

Khris Tawh Khat Leh Khat Kipumkhatna In, Lungmuanna Hi

            Leitung mite in Khristiante' sunga kilem lohnate lungdamna tawh en uh hi. Muan huai om lohna amau lungdamna hi. Pasian in A mite ih kipuahphat ding hong sawl hi. Khris tawh kipum khatna leh khat leh khat kipumkhatna bek in, tu hun nunung ah lungmuanna hong pia thei hi. Satan in ih pawlpi mite kawkin "En un, hih mite in Khris dial khai nuai ah ding khawmin, khat leh khat kimudah uh hi. Ka galkapte tawh kido lo-a, amau leh amau a kido laiteng uh ei'a ding bang mah lau huai lo hi," a cih theihna ding om sak kei un.

            Kha Siangtho hong kum suk khit ciangin, nungzuite kha gup khiatna ding deihna lungsim kikhatin a tho kik Honpa' thu a tangko dingin kuan khia uh hi. Mi siang tho te tawh kithuaha om hon nate nuam sa uh hi. Amaute thuneemin, ngaihsun mahmah sa-in, amau' deihna nialin, thumaan dingin kipia khia nuam ciat uh hi. A nisial kithuahnate uah Khris in amaute lah khiat ding a deih ki-itna kilang sak uh hi. Ang sung khual lo a kampau a gamtatnate uh tawh midangte' lungsim sungah ki-itna khan sak ding hanciam uh hi.

            Kha siangtho hong kum suk khit ciangin sawltakte lungsim ki-itna tawh kidim a hih manin, thu-um mite zong lungdam mahmah uh hi. "Keimah in note kong it bangin note khat leh khat na ki-it un" cih thukham thak zuih nopna tawh amaute mai a nawt ding uh a hihi. (John 13:35) Ama sawlnate a picin sak theihna dingun, Khris tawh amaute kinai takin a kikop uh kul hi. Ama dikna tawh amaute' mawhna a mai sak thei Honpa' vangliatna a kilat sak ding uh a hihi.

            Khristian masate khat leh khat a ginat lohnate uh hong ki-en cik uh hi. Khialhnate sik sanin kigensiatnate hong zang uha, Honpa mu nawn lo-in Honpa in mawh nei te a itna zong hong mu nawn lo uh hi. A pua tham zuihnate hong khauh lak mahmah uha, upna thu ah a malmalin hong phincil zaw uha, a kigensiatna uh zong hong uang zaw pah hi. Midangte a mawhsak nopna lamun, amau' mawhna hong phawk kha lo uh hi. Khris in a hilh, unau ki-it banga ki-it ding cih thu hong mangngilh ta uh hi. Amaute a mangthang a hih lam uh a kiphawk loh uh a dah huai bel a hihi. A nuntakna panun nopsakna leh lungdamna bei-in, a sawt lo-in amaute khawmial sung tungin, a lung sung panun Pasian itna om nawn lo ding a hih lam amaute in phawk lo uh hi.

            Sawltak John in pawlpi sungah unau ki-itna bei hiau hi cih mu a, hih thu ah lung himawh mahmah hi. Khat leh khat ki-itna a neih den ding uh, a sih ni dong mah John in thu umte hansuah hi. Pawlpite a lai khaknate ah, tua lungsim kimukhia thei hi. "Ka it te aw, eite khat leh khat ki-it ni. Bang hang hiam cih leh, Pasian in ki-itna hi.... Ama' hangin eite ih nuntak theihna dingin Pasian in A Tapa khat neihsun leitung ah hong pai sak hi... Ka itte aw, Pasian in eite tua zahin hong it a hih leh, eite zong khat leh khat ki-it ni," ci hi. 1 John 4:7-11.

            Tu huna Pasian' pawlpi sungah zong, ki-unau itna tasam mahmah hi. Honpa ka it hi a ci mi tampi in Khristian pawlpi sunga a lawmte it lo mawk uh hi. Eite in upna kibang, innkuan khat sung mi a hi khawm, vantung Pa Pasian' tate a hi khawm, sih nawn lohna a ngah nuam te ih hi khawm hi. Bang zah taka kinai-in kilom khat ding te ih hi hiam! Ih upna in lungsim siangtho hong nei sak takpi hiam cih leitung mite'n mu nuamin hong vil gige uh hi. Amaute in ih khialhnate, ih gamtatnate ah ih cih tak lohnate hong mu baih mahmah uh hi. Ih thu upna hong simmawh sak theihna ding hun om sak kei ta peuh ni. 8T, laimai 240-242.

 Kilemna Leh Kupum Khatna In Teci Panna Khauh Pen Hi

            Leitung mite hong langdona pen a lauhuai pen hi zaw lo hi. Thu-um mi ka hi a kici te' lungsim hoih lohnate in Pasian' nasepna a buai sak, mai a dal nasia pen hi zaw hi. Ki-enna, khat leh khat a sia lama kimuanmawhna, mawh kizonnate leh thusia kingawhnate sanga ih kha lam vai a thaneem sak zaw dang om lo hi. "Hih bang pilnate in van pan hong kum suk hi lo-in, hih leitung lungtang puak leh gitlohna dawi lungsim a hihi. Ki-enna leh kidemna a omna peuhpeuh ah, nasep sia tawh buai pah lian ding hi. Van pan hong kipia pilna a hih leh, a masa-in kicianin siangtho lungmuanna thudam leh gennopna, hehpihna tawh kidimin gah pha gahin, pawl khenna om lo, khem bawlna om lo ding hi," James 3:15-18.

            Din mun tuamtuam nei mite' laka a om kidemna leh kipum khatna in, mawh neite a hon khia dingin Pasian in hih leitungah A Tapa hong pai sak hi cih thu gen khiatna a khauh pen a hihi. Hih teci ih pan ding eite hamphatna a hihi. Hih na ih sep theihna ding in Khris' sawlna ih man kul hi. Ama zia leh tong bangin ih zia ih tong ih puah phat kul hi. Ama deihna bangin ei' deihna ih ap ding hi. Tua tak ciangin lungsim kikingkalh om lo-in na ih sem khawm thei ding hi.

            Tawmtawm ih kibat lohna nengneng te kidop phahphah sak le'ng tua in Khristian kipawlna susia hi. Ih galpa eite tungah zawhna ngah sak kei ni. Pasian tawh kineh zawin, eite khat leh khat zong kineh zaw lai ni. Tua hi leh eite in Pasian in a suan dikna-kungte bang ih hi dinga, nuntakna gun tui in a vaak-kungte ih suak ding hi. Tua ciangin bang zah ta-in gah pha gah thei ding ih hi hiam! Khris in hong vaikhak mah hi lo a hi hiam? "Tua bangin gah pha na gah uh leh, Ka Pa min a thang sak na hi uh hi," hong ci hi. John 15:8.

            Mite in Khris thungetna hong up taktaka hong hilhnate Pasian mite nuntakna ah a om ciangin, eite lakah kipawlna nasep hong om phing ding hi. Khris' itna kham khau kual tawh sanggamte khat leh khat hong hen khawm ding hi. Pasian' Kha Siangtho bek in hih pum khatna hong pe thei hi. Amah a kisiangtho sak thei pa in, Ama' nungzuite zong siangtho sak thei ding hi. Amah tawh kipawl mite in, amaute khat leh khat zong upna siangtho sungah a kiguang khawm a kipawl a suak uh hi. Pasian in hong deih sak bang in hih kikopna ih hanciam leh, ih ngah ding hi. 8T, 242,243.

            Pasian' deih sang leh zato lian pipi, inn lian pipi leh puatham kihauh saknate hi lo-in, Pasian in a teel tuam a manpha mite, a nuntak uh Khris tawh Pasian' sungah kiphum khawma khat leh khat a kipum khat, mi tumdangte' sep khawm diamdiamna hi zaw hi. Mi khempeuh in ama munmun ah ngaihsutna, kampauna leh gamtatna a maan a kilat khiat sak ding a hihi. Pasian' nasemte khempeuh tua bang hong hih tak uh ciangin Ama nasepna hong picingin hong cidam ding hi. 8T, laimai 183.

            Topa in upna citak leh lungsim kician, a maan leh a maan lo a khen tel mite hong sam hi. Ei leh ei kikemin, John phung 17 sunga thute simin zui-in, tu hun'a ding thumaan upna-hing ih neih ding a hihi. Ih zangsatnate Khris' thungetna tawh a kituak sak thei ding ei leh ei kikhalna zong ih neih ding  kisam hi. 8T, laimai 232.

            A nungzuite in Pasian' deihna a sanna zahzah leh a thukna zahzah a picin ding uh Honpa in lungsimin nei hi. Leitung mun tuamtuam ah a kitheh thang uh hangin Ama sungah amaute pum khat a hi ding a hihi. Ama deihna a zuih theihna dingun amau' deihna a paih khiat nop kei uh leh Pasian in amaute Khris' sungah pum khat suak sak thei lo ding hi. 8T, laimai 243.

Sep Khopna

            Mun thakte ah sang khawng zato khawng ih phuh ciangin nasep dan a kim taka a thei nai khol lo mite tavuan piak hong kul thei zel hi. Tua bang mite' nasepna in phattuamna lian piang sak khol lo hi. Amau leh a naseppihte un Topa' nasepna ah lawpna taktak a neih kei uh leh nasepna a mai dong sak na tampi hong piang ding hi.

            Mi tampi in amau' nasep amau bek mah tawh kisai a hih ciangin kuamah in hong kup pih se dah hen ci thei uh hi. Tua bang mite in amau' nasep a hoih pena sep zia ding a thei nai lote hi zaw hi. Khat peuh in kup pih mah leh zong hehin amau' cih bang bekin hih kaltang zaw lai uh hi. Nasem kimkhatte in a naseppihte uh huh nuam lo, hilh nuam lo ta lelleu uh hi. Nasep siam nai lo kimkhatte in lah a siam lohna uh a kitheih ding ut lo uh hi. Hilhna za nuam lo uh a hih manin hun leh na tampi sup lawh zah dongin khial thei uh hi.

            Buaina a piang sak thu a theih hak hi lo hi. Nasemte in kimanna a nei dinga a kigan khawm ding khauzang a hih lam uh kiphawk lo-in, khauzang tuam khat bangin om uh hi.

            Tua banga omna in Kha Siangtho dah sak hi.  Khat leh khat ih zia ih kitheih pih ding Pasian in deih hi. Thu tangpeekna in eite tawh Ama'n na hong sep khop theih lohna mun hong tun hi. Tua banga ih om ciangin Satan lungdam mahmah hi.

            Masem Khempeuh Topa' nasepna a mainawtna dinga a sem takpi mah hiam, ama phattuamna ding bek a sem lel hiam cih kisittel ding hi.

            Lamet bei-a a kidam sak thei loh zah dong ding mawhna in kiphatsakna, kihihsakna a hihi. Tua in khantohna lampi teng khaktan hi. Mi khat in zia leh tong gina lo nei-a, tua a ginat lohna nangawn a kiphawk kei leh;  ama khialhna a kumu zo lo ding zahin amah leh amah thupi kisa lua leh, amah bang ci sian theih ding hiam? Cidamte in za-to deih lo-a, cinate bek in deih hi." Matthai 9:12. Ama gamtatna kicing khin a kisate bang ci kipuah phat nawn ding hiam?

            Lungsim khempeuh tawh Khristian a hi te longal kuamah mi gina taktak hi thei lo hi. 7T, laimai 197-200.