KHAWKPI 5
KHRIS EITE' DIKNA
"Eite in ih mawhnate pulaak lehang, ih mawhnate hong mai saka, ih diklohna khempeuh pana hong siang sak dingin Amah muan huai-in thutang hi." 1 John 1:9.
Ih mawhnate pulaaka, Ama mai ah ih lungsim ih niam khiat ding Pasian in deih hi. Amah a muangte a nusia ngei lo ding Pa Pasian hi ci-a ih muan ding zong deih hi. Upna tawh kal suan lo-in muhna tawh a kal suan mi tampi ih om hi. Ih muh theih nate bek umin, Lai Siangtho sunga a manpha kamciamte ih um kei hi. Ama gen thute muang laha, Topa in hong cih takpi mah hi ding hiam, hong khemna peuh a hi diam ci-a ih lung kaat sangin Pasian ih thusim loh zawkna om lo hi.
Ih mawhnate hangin Pasian in hong nusia lo hi. Khialhna bawlin A Kha dah sak kha mah ding hi hang A hi zongin kisikin, kiniam khiatna lungsim tawh Amah ih zuat leh Ama'n hong pai san lo ding hi. Ih hep khiat ding kol-awknate om hi. Ih lungsimte maan lo-in, kiphatsakna, kiliatsakna, lungtomna leh phunhatnate ih nei hi. Tua te khempeuh in Pasian tawh hong kikhen sak hi. Mawhnate ih pulaak kula, lungsim sung ah hehpihna in na a thuk sep zawk kul hi. Thanema hat lo a kisate, Pasian' mi thahatte suak thei-a, Topa'a ding nasep thupi sem thei hi. Amaute in panmun sang ah na sem ding uha; ang sung ngaihsutna peuhmah nei lo ding uh hi.
Khris' sang ah pilna ih sin kul hi. Ama dikna longal in hehpihna thuciam sunga thuphate khat beek hong ngah sak thei lo hi. Tua thupha te ngah nuamin sauveipi ih hanciam zo-a, a hih hangin, tua thuphate ih ngah theihna dingin a pha ih bawl theih pawl khat om hi cih ngaihsutna nei gige ih hih manin, tua thupha te ih ngah kei hi. Jesu a nungta Honpa a hih loam um lo-in, ei bek ki-enin, ih khawdak nuam kei hi. Eima dikna leh siamnate tawh gupna a ngah dingin ih kingaihsun kei ding hi. Gupna ih ngahna dingin Khris' hehpihna bek mah ih lametna a hihi. A kamsangpa tung tawnin Topa in, "Mi gi lote in a lampi uh nusia hen la, mi dik lote in a ngaihsutna uh kheel hen. Topa' lamah kihei uh hen. Topa in amaute a hehpih ding hi. Ih Pasian' lamah kihei uh hen. A mawhna uh a mai siang sak ding hi," ci-in kamciam hong pia hi. Isaiah 55:7. Ei' ngaihsutna muang lo-in, kamciam ih muang zaw ding hi. Pasian ih muan taktaka, mawh mai sak Honpa hi ci-a Jesu ih belh taktak leh ih deih theih huhna khempeuh ih ngah ding hi.
Ei leh ei a kihon thei bang keekin ei' tha ih muang hi. Ei leh ei kihon khia zo lo ih hih man mahin Jesu hong si hi zaw hi. Ama hang bekin lametna, mawh mai sakna leh midik suahna om hi. Honpa a nei lo bangin lau-in lung kiat ding hi lo hi. Tua laitak lian mahin eite'a ding Amah in na sema, ih cihmawhna mah tawh Amah zuana gupna ih ngahna dingin hong sam hi. Ih Lawm hoih pen pa ih bawl dan, mawh nei belte zong a hon khia thei pa leh Ama hong itna lian a hong lak den pa ih muanna a neu dan lamdang sak huai mahmah hi.
Ute naute aw, Ama hong hong hot khiat theihna na muan ma-un mawhna tawh kipelh masak kul hi cih ngaihsunin, na thusiamnate un Pasian' maipha hong ngah sak ding ci-in lamen na hi uh hiam? Tua bang lungsim na neih den uh leh, thahatna ngah lo-in a tawpna ah lungkia-a na om ding uh ka lau hi.
Gamlak ah lang pang Israel mite a tu dingin Pasian in gul gu neite a khah ciangin, sumngo gul a khai kaang ding leh gul in a tuk liamte in a nuntakna ding un a en sak dingin Mose kisawl hi. Vantung in a vaihawm tua damna a phattuam pih lo mi tampi om hi. A kim a pam uah a si sa leh a si ding a dimin oma, Pasian' huhna a om kei leh a man a hih lam uh kithei hi napi-in, a husap dong uh a liamnate, a nat nate uh leh si ding a hihnate uh thumthum tautau-in, damna a ngah thei pah lian ding kimlai a mit kaang uh dawk sak lel uh hi.
"Mose in gamlak ah gul a khai bangin, Amah a um khempeuh kisia lo-a nuntak tawntungna a ngahna ding in Mihing Tapa kikhai kaang ding hi." Na mawhnate na kiphawk leh a thum a tau-in nitum kei in la, en in la hing in. Jesu bek mah ih Honpa hi. Damna a kitang sam mi awn tampi in Ama hehpihna nial ding uh a hih hangin Ama hehpihna a muang mi khat beek a sia dingin kinusia lo ding hi. Khris lo-a cimawh ih hih lam ih kitheih ciangin lung kiat ding hi lo hi. Kithat napi a hing kik Honpa ih beel ding hi. A cimawh, mawhna tawh cina-a a lung kia mi aw, en in la hing in. Jesu in hong kham zo hi. Amah a zuan khempeuh hon khia ding hi.
Jesu zuan in la tawldamna leh lungnopna ngah ta in. Tu mahmahin tua thupha na ngah ding hi. Na cihmawhna leh nang leh nang thupha na kipiak theih loh na Satan in hong gen hi. Hi mah hi; a cimawh takpi mah na hihi. Na mai ah Jesu laam to in: A hing kik Honpa ka nei hi. Amah ka muang hi. Lungkhamna hong thuak sak ngei lo ding hi. Ama min tawh ka zo hi. Amah ka dikna leh ka lungdamna lukhu hi,' ci in. Kuamah lamet bei kisa kei uh hen; bei lo hi. Mawhna tawh kidim a cimawh na hih lam na kimu kha ding hi. Tua san lian ah Honpa a kisam na hihi. Pulaak ding mawhna na neih leh ziakai kei in. Tua hunte kham zahin manpha hi. "Ih mawhna te ih pulaak leh, ih mawhnate hong mai saka, ih dik lohna khempeuh pana hong siang sak dingin Amah muan huai-in thutang hi," 1John 1:9. Dikna a duh a deihte kivaak kham ding hi, ci-in Jesu in hong kham zo hi. A manpha Honpa hi! Hong sang dingin a khut hong zan khia-a, thupha hong pia dingin hong itna lungtang in hong ngak hi.
Kimkhatte in a hun ngakin, Ama thuphate a saan ma-un, kipuahpha a hihna uh Topa kisittel sak phot sawm uh hi. Ama thuphate tu mahmahin zong kingen thei hi. A zawngkhalna uh a huh dingin Khris's Kha a hi Ama hehpihna a ngah ding uh kisam hi. Tua lo-in Khristian zia leh tong nei zo lo ding uh hi. Ih hi bang lian-mawhna a dim a cimawh a guaksuakpi mahin Amah ih zuat ding Jesu in hong deih hi.
Kisikna hi ta leh, mawh mai sakna hi ta leh Khris tung tawna Pasian hong letsong a hihi. Mawh ih hih lam ih kiphawkna leh mawh mai sakna kisam ih hih lam ih kitheihna pen Kha Siangtho' nasepna hang a hihi. Kisikna tawh lungsim kitam khamte longal kuamah ih mawh mai sakna ngah lo hi. Kisikna lungsim a piang sak zong Pasian' hehpihna mah a hihi. Ih thanemna leh ih zawngkhalnate khempeuh Ama'n hong theih piha, Ama'n hong huh ding hi.
Kisikna leh pulaakna tawh Pasian' kiang zuana, a mawhna uh kimai sak khin hi ci-a a um mi kimkhatte nangawn in Pasian' kamciamte ngen lo thei lai uh hi. Jesu pen hong om pih tawntung Honpa a hih lam mu thei lo uh hi. A kha uh a kem dingin Amah ap lo uha a lung sung uha a kipan sa hehpihna-i nasep a picing sak dingin Amah beel lo uh hi. Pasian a ki-ap khin a kisak lai takun, amau leh amau kimuang kenkan uh hi. A phel khat uh Pasian apa, a phel khat uh amau leh amau a ki-ap mipil pawl khat om hi. Ama vangliatna tawh a kem dingin Pasian beel lo uha, khemna a thuak lohna dingun vil zawhna leh Pasian' saan theih ding gamtatna neihna suang lai uh hi. Tua bang upna namte tawh zawhna kingah thei lo hi. Tua bang mite a mawk gim lel hi-a, a kha uh a kikol bulh den hi-in, Jesu' khe phung ah a van gik uh a ngak masiah a tawl uh dam lo ding hi.
Pilvang dena ki-ap cinten ding kisam a hih tei hangin, Pasian in ih kha kem hi ci-a ih up nak leh, tuate hong om ding hi lel hi. Pasian' hong pahtak ding in ih hih theih bangmah om kikeuh lo hi. Ei leh ei ih hi-a ih gamtat phate ahi zongin ih muan ding hi peuhmah lo hi. A mawh a khial mite ih hih mah bang in Khris kiang zuan lehang, Ama hong itna sungah tawldamna ih ngah ding hi. A kikhai lum Honpa' thusiamna pummuana Ama kiang a zuan khempeuh Pasian in sang hi. Lungsim sung panin ki-itna phul khia hi. Pum-lawp pong mawk cih om lo-in, muanna kip hong om kinken ding hi. Khris hong suat hakkol nuam a hih manin vangik khempeuh zang hi. Sep dingte nuam ki sa-in, kipiaknate zong nop sakna hong suak hi. Nidanga khawmial tawh a kibang lampi pen Dikna Nitang pana nizang in hong taan hi. Tua in khawvak sungah Khris a om mah banga khawvak sungah lam paina a hihi. 2TT, laimai 91-95.
* * *
Source: Mrs. White, Pawlpi Thu Lamlak - book 1
'' MIMAL KIKONA, KISELNA LEH APICING LO LAITE KIKHAKTAN HI ''
" ITNA LEH DIKNA TAWH THUMAN GENNI "
ZAC Tawh Mimal Kizop Nang : zomiadventist@gmail.com
ZAC Groups Ah Lai Na Khaknop Leh: zomi-adventist-com@googlegroups.com
ZAC Groups Laite Na Deih Nawnkei Leh Laikhak In: zomi-adventist-com+unsubscribe@googlegroups.com
ZAC Group Thukhunte: https://groups.google.com/forum/#!topic/zomi-adventist-com/Ukey4yzR9qc
ZAC Facebook1: https://www.facebook.com/groups/zomiadventist/
ZAC Facebook2: https://www.facebook.com/zadventist
AWR: http://www.awrmyanmar.org/
SSL: http://www.myanmaradventist.org/myum-report-2009/sabbath-school-lesson/
SSL_CiimNuai: http://www.ciimnuaiministry.info
SSL_PowerPoint: http://www.fustero.net/es/index_ci.aspx
---
You received this message because you are subscribed to the Google Groups "Zomi Adventist Communication" group.
To unsubscribe from this group and stop receiving emails from it, send an email to zomi-adventist-com+unsubscribe@googlegroups.com.
To post to this group, send email to zomi-adventist-com@googlegroups.com.
For more options, visit https://groups.google.com/d/optout.
No comments:
Post a Comment