THOHKIKNA NAMNIH

Thohkikna adiakdiak in namnih in oma, mi dikte thohkikna leh Mi gilo te thoh kikna ahihi.Mi dikte thohkikna penkum 1000 khat mang kipan hun ah om ding hi.Mi gilo te thohkikna pen kum 1000 khat thukhen tawpna ah hi ding hi.Tua thohkikna nih te kikal pen kum 1000 khat kihal ding cihna ahihi. Mangmuhna 20:6- na ah pen,"Hih thohkikna masa ah akihel ding te pen Pasian mi siangtho hi a, a hampha mahmah ahi uhhi.Nih vei sihna in tua bang mite bangmah cih zo nawn lo ding a, amau te pen Pasian leh Khrist Siampite hiding uha, amau tawh kum tul khat sung ukna aana nei uhhi","tua midikte pen sapi te alim abia lo uha, akhut tung ah ahi zong,atal tung ah ahi zong in ciamtehna neilo te ahihi" ci in zong na tel genlai hi. Aneu 5 na ah pen,migilo te thu a gen nah ah " kum 1000 khat bei mateng adang misi te hingkik lo uhhi"(mang.20:5)ci in na gen hi.

Ni dang lai Jesu hunlai pek pan kipan in tuni ciang dong in misi taksa a thohkikna a om umlo te na om den hi.Tua te pen Saddusi te thuhilhna zui te hi deuh uhhi. Tua te kiang ah Zeisu in, note in Lai siangtho thu ahi,Pasian vang liatna ahi zong in theilo na hih man un na ngaihsun khial uhhi.,(Matt.22:23; 29;34; Marka 12:18,25) ci in hilh in nataii hi.Hih Saddusi te updan bangmah tawh kizui in tulai in; Khristian akilo thu um mi akici tampi te lak ah , hih ih taksa sikhin sa, leivui a asuak khinsa te pen tho sak kikthei ding maw cih upna nei tam pi tak ki omta hi.Korin khua a mite in zong , atam zaw pen hih bang dan a upna nei hi tuak uhhi.
Tua ahih man in zong hi ding hi,Paul in zong hih bang inah nasiatak in hilh in nataii bawl uhhi.
Sihna pan in Khrist kihing kik sak hi cih thei napi uh cin bang cih bang in note lak ah pawl khat in" mi si thohkikna limlim omlo ci na hi uhhiam?Mi si thohkikna omlo hileh ,Khrist zong thoh sak in omlo ding hi;Khrist pen thokiklo hi leh ka thu hilh pen amawkna hi ding hi, na up uh zong bang mah lo hi ding hi.Banghang hiam na cih leh misi te kihing kiksak lo ding hi leh Khrist zong kihing kik sak lo ding hi.Khrist kihing kiksak lo hi leh note upna amawkna hi ding a,na mawhna sung mah ah note aom lai na hi ding uhhi(1Korin.15:12;17-18) ci in.

Tua ahih man in , Pual in, Thesaloniakia khua a mite kiang ah pen "Sanggam te aw,lam etna aneilo mite bang in na dah luat loh na ding un asisa mite omzia ding thu na theih ding uh ka deih hi.Zeisu in thokik hi, ci in ih up mah bang in Pasian in Zeisu hong paipih kik ciang in amah um in asi mite zong hong tompih ding hi, ci in ih umhi.Topa thu gen note kiang ah kong gen uh thu in: Topa hong pai kik ni ciang in anungta lai eite pen asisa mite tawh akimuh ma in Topa tawh ih kimu kei ding hi.

Pasian thupiakna aw ging lianpi, vantung mi mangpa thu genna, leh Pasian pengkul hong ging ding a,vantung pan in Topa mahmah hong paisuak ding hi.Tua ciang in tua hunlai tak in anungta lai eite pen van kim lai ah Topa adawn ding in amah aum asisa mite tawh hong kila khawm ding a,Topa tawh ih omkhawm tawntung ding hi,cihna ahihi.Tua ahih ciang in note khat leh khat hih thu tawh na ki hehnem un(1Thes.4:13-18) en in.Hi kan a kitel ngen theih ding omlo hi. Hih lai a thu te ih sim ciang in thu guk akisam pha mahmah kitel taka ih theih masak ding a om sun te pen hih te ahihi.
1. Zeisu Khrist vanliatna tawh van pan in hong pai ding hi.
2. Midik (thu um misi te) taksa pen han pan in kitho sak ding hi.
3. Midik (thu um mite) ahing tang a Zeisu hong pai amute taksa pen muat theih pumpi pen amaut theilo pumpi in kikhel ding hi.
4. Tua te pen van tung ah avek un lak toh in omding uhhi.
5. Mi gilo sisa te hong tholo ding hi.
6. Mi gilo ahing laite Khrist hong paina vangtang in kaplum ding hi.
Hihte pen thohkikna masa a apiang ding thu te ahihi.A nungta lai a omte in misi sa te paisan lo in , misi sa te in zong a nungta lai mite paisan lo in, aki bang in van ah la to dong ci in Paul in Khasiangtho theihsakna tawh hong gen ahihi.

Tua mah bang in Korin pawlpi te kiang ah,"Kua mah kim ii atheih loh thu sim khat na ngai un.Eite khempeuh asi khin ding ih hi kei a,thakhat thu in kikhel vat ding ih hihi.Pengkul nunung hong gong ciang in mitphial kikal sungin ih kikhel pak ding hi.Banghang hiam cih leh pengkul hong ging ciang in misi te asi te asi thei nawnlo ding in hong to ding a, ih vek pi in ih kikhel ding hi. Amuat thei pumpi pen amaut theilo pumpi ah hong kikhel ding a, asi thei pumpi pen asi theilo pumpi in hong kikhel ding hi(1Korin 15:51-53) ci in deihsak na lianpi tawh na hilh gige hi.

Bang ni ah hiam Pasian hunciam ni thupi hong tung ding a, tua ni ah pen van a om eite tanga hong sihna leh misi khua tawh tang kempa, a vantung mi siangtho te vanliatna tawh hong pai kik ding uha, amah itna hang a haksatna nakhempeuh ah sihdong mah in muanhuai tak a oma athuakte tawh, leh lam etna lianpi tawh Amah alam en te leh Athu te hang a anunna nangawng pia a hong gup te pen a ihmutna uh han zing sung pan in Ahong thokik sak ding a,tua teh Karani maul a tatna Abawl sak mah bang in gup khiatna bucing pen tua mite kiang ah pia ta ding hi.

Tua ni hun pen ngaklah in,Pasian midik Job in,Natna in ka vun anek tun hang in , hih ka pumpi mahmah tawh Pasian ka mu ding hi(Job 19:26) ci in na gen khia zaihzaih mawk hi.Hih thu leh la agelh Job in zong tua ni lawp om mahmah pen ngaklah in hih leitung haksak na lakah pen nisim in na luum ngei mawk hi…. Zop lai ding.