VOKSA LEH DO KHUP THEOLOGY

Dear Zomi U leh Nau:
Ganhing nek ding leh nek loh dingte tawh kisai Laisiangtho tang pawl khat en did ni.

Pianc 1:29-30: “Pasian in, "En un, leitung maitang khempeuhah a om, tang a piangsak kungnote khempeuh leh a gah sungah tang a om singkung khempeuh note tungah kong pia khinta hi.  Tuate an-in na nei ding uh hi.  Leitung ganhing khempeuhte tung, huihlak vasate khempeuh tung, leitungah a bokvakte khempeuh tung, nuntakna hu a neite khempeuh tungah an dingin kung hing khempeuh ka hong pia khinta hi," a ci hi. Tuamah bangin a piang pah hi.”
An = teh le gah

Pianc 6:21 mihing’ an ding leh ganhing an ding guang sak hi. Alian 7:2 ah An leh anlo ahihkei leh asiang leh asianglo gen hi.  Asiangte “an” naci a, asianglote an naci lo hi. Ganhing asiang kop 7 leh asianglo kop 2 tembaw sungah aguanna ah Pasianin “AN” cih thu bek tawh nagen a,meihal biakna-in tembaw panin apusuah sak ciangin asiang gante azat hangin “zat ding” cih
ngimna anung amai ah mun khat bekah na pulaak kha lo hi.

Pianc 9:1-3: “Pasian in Noah leh a tapate thupha pia a, amaute tungah, "Pung un la, tampi pha-in, leitung dim un.  Note pen leitung ganhing khempeuh, huih lak vasa khempeuh, leilakah a bokvak khempeuh leh tuipi ngasa khempeuhin hong kihta-in hong zahtak ding uh hi. Note' khutsungah tuate hong kipia hi.  A nungta agamtang peuhmah, note-a' dingin an hi ding hi. Kung hing khempeuh ka hong piak bangin na khempeuh zong note ka hong pia hi.”

“Nungta a, agamtang” ahihkei leh (Douay-Rheims Bible, Darby Bible Translation, English Revised Version, Webster’s Bible Translation, World English Bible, Young’s Literal translation sungah “gawhtawm loh gansa neklo ding hong kawk muh hi.  Siampi 11 tawh kithuhual to pah hi.

Noah’ suan le khakte atuahbangbang uh neding aphal ahiphial zongin Israelte saltana Egypt panin suahtak (gupna) angah uhciangin an leh anlo akician takin Top’an vaikhak ding hi. Hotkhiatna angahte adingin asiangtho nuntakna Topa in deihsak ahihna hong musak hi.

Siampi 11: “Topa in Moses leh Aaron tungah, "Israel mite kiangah hih bangin gen un: Hihte pen leitunga om ganhing khempeuh lak panin na nek theih ding uh anungta ganhing ahi hi. Ganhingte lak panin a khecin a ka, eknel a hai peuhmah na ne thei ding uh hi.  Ahi zongin eknel haite lak pan hita leh khecin kate lak pan hita leh, note in na nek theihloh dingte uh: Kalaoh in
eknel a hai hangin a khecin ka lo ahih ciangin note-a' dingin a nin ahi hi… Note in tuate' sa na ne kei ding uh a, a sisate zong na lawng kei* ding uh hi.  Tuate pen note-a' dingin a nin ahi hi… A sisa a lawng peuhmahte a nitak mateng a nin hi ding a, A sisa themkhat a pua peuhmah in
a puan sawpin, anitak mateng a nin hi ding hi… A sisa a puapa in a puan sawpin, a nitak mateng a nin hi ding hi… Tuate a sisa a lawng peuhmah a nitak mateng a nin hi ding hi.Tuate a sisa khat peuhpeuh *a tukna nate, sing nazat, puan, savun, ippi leh na khat peuhpeuhin a kizang beel khat peuhpeuh hita leh anin hi ding hi. Tuate pen *tui sungah kidiah ding a, a nitak mateng a nin hi ding hi. Tua khit ciangin a siang hi ding hi… Tuate khat peuhpeuh lei beel khat peuhpeuh sungah a kiat leh, tua sunga om khempeuh a nin hi ding a, note in tua beel na sukham* ding uh hi.Tua lei beel sungah a om a kine thei ding an tungah tua bang tui a tuk leh a nin hi ding hi. Tua bang beel sunga om dawn theih ding peuhmah a nin hi ding hi. Tua bang a sisa themkhat a tukna peuhmah a nin hi ding hi.  Meibung hita leh beelpei hita leh kisuzan ding hi. Tuate a nin hi a, note-a' dingin a kihhuai ahi hi.  Ahi zongin tuinak leh tuibem ahih leh a siang hi ding a, ahih hangin a sisate a lawng peuhmah anin hi ding hi.  A kivawh ding khaici tungah tua a sisate themkhat a tuk leh, tua khaici a siang hi ding hi.  Ahih hangin khaici tui kidiah a, tua a sisate themkhat tua khaici tungah a tuk leh, note-a' dingin tua khaici a nin ahi hi." Note' nek theih ding
ganhing khat peuhpeuh a sih leh a sisa a lawngpa pen a nitak mateng a nin* hi ding a, a sisa a nepa in ama puante sawpin a nitak mateng a nin hi *ding hi. A sisa a puapa in zong ama puante sawpin a nitak mateng a nin hi ding hi. Bang hang hiam cih leh note' Pasian ahi dingin Egypt gam panin note a hong pai khiatpihpa pen KEIMAH TOPA ka hi hi.

Tua ahih ciangin kei siangtho ka hihmanin note na siangtho ding uh hi," aci hi. Hih pen a nin leh a siang, a nungta ganhing nek theih ding leh nek theihloh ding khenna dingin ganhing leh vasa, tui sunga a pai a nungta ganhing khempeuh, leh leitungah a hontat ganhing khempeuh tawh kisai-in ngeina ahi hi.”

Laisiangtho Thak ihlut ciangin a “context” a thunung thuma leh thugui kizom paisuak ihkankhiat ding kisam hi. Mark 7 ah Judahmite pupa biakna ngeina ah khut sil masalo a an nekloh ding thu tawh Jesu nungzuite akimawhsakna tawh kisai hi.  Anlian tawh kisailo hi. Khut sil masak ding
vai ahi hi.

Mark 7:18-19: “Jesuh in, "Note in zong bangmah a theilo himawk hilo na hi uh hiam? Apualam panin mite sungah a tum nate in mi ninsak theilo hi.  A lungsim ah tumloin a gilsung bekah tum ahihmanin tua panin kithakhia lel hi. (Hih bang agen ciangin an khempeuh nek dingin a siangtho ahi hi, ci-in Jesuh in a gen ahi hi.)”

Hih Laisiangtho aneu 19 (English ah)atawpna ah “dotna” tawh atawp hinapi zolai ah kitawpsak lo hi. Hih thu ah Jesu in “an” thu lian agen hilo a, khutsil-zeh vai agen ahizaw a, agen nop lian pen apuatham zehtanna in khalam siansuahna hong pia zolo hi, aci nuam hizaw hi. Tuhun kampau lengh tui ah kiphumna in kha ah siangthona hong pia hilo, Jesu’ si bekin hizaw, cih tawh kibang hi.(Commentary of MacArthur Study Bible, NKJV on Mark 7:19).

Sawltak 10:12-15 pen a “Context” ah: Gentile Cornelius in Judah mi Peter a innah thugen dingin cial leh sam dingin anasemte asawlna vai ahi hi. Cornelius leh Peter in nam Judahmite in Gentile adeidana thei tuak uh hi. Tua kideidanna ahi Judahmite in Gentile-te “mi maimai” = siangtho lo, pelhding leh paihding a akoih vai tawh kisai ahi hi.

Sawltak 10:12-15: “Tua a peek tungah ganhing namkim, a bokvak namkim, leh vasa namkim a om hi. Awging khat in ama kiangah, "Peter aw, tho in la tuate go-in ne in," a ci hi. Ahizongin Peter in, "Topa aw, tuate go-in ka ne het kei ding hi. Anninin a kingaihsun peuhmah ka ne ngei het kei hi," ci-in a dawng hi. A awging in ama kiangah, "Pasian in a siangin agensa khat peuhpeuh a ninin ngaihsun kei in," a ci leuleu hi.”

“Annninin” pen zolai bekah kizang hi. Manglai ah AN dawklo hi, “Anin” ahihkei leh “common” mi maimai cihna hi. Pasianin upna hangin asiansaksa mite nin ci kei in, aci ahi hi. Hih kaihdan maan ahihna alian 10:17-45 sim leteh, ei phuah tawm kullo in Laisiangtho in hong cian gen lel hi.

Rom 10: sungah Paul in Israelte in gospel kisam uh ahihna kikum hi.  Pasian’ dikna theilo uha, amaute septawm dikna tawh gupna zong uh hi.

Rom 10:4: “Banghang hiam cihleh upna a nei mi khempeuh Pasian tawh a kipawl theihna dingin Khrih in Thukham a beisak hi.”

Manglai ah sim lengh “a um mi khempeuhin dikna atan nadingin Jesu in thukham beina (mong, end) ahi hi. Zolai bekin asim hileng ahiding mah hi, kici kha ding hi. Ahizongin akawllai in simthei hibek lengh zong “thukham in Jesu hangin kicinna angah hi” na ci sam hi. Kawllai pen Greek panin akitei hia, Greek ah “kicinna” mah na zang hi. Jesu in kicing takin thukham azuihna ahihkei leh mawhna abanglo anuntakna tawh picing sak hilo zaw a, anuai a laigual simbeh lengh, “mawhneite in thukham zuihna tawh amau le amau gup ding ahanciamna uh Jesu in beisak hi, cih kilang sak hi. Thukham abeisak hilo hi.

Zolai-a “Thukham” zong manglai in “thukham” in “t” aneu tawh ki at hi. “Zomite thupha ngahte” ih hih takteh, Pasian’ kammalte utut in kideih kaih, kilakhia, kibehlap ziau ziau ta hi. Gentehna in, Kalawte 2:16 ah manglai in “sabbaths” pen zolai ah “Sabbath” “S” gol tawh hong at ve un, amal tawpna “s” te sel uh hi. Isaiah 66:22, 23 ah Manglai in “from Sabbath to Sabbath” pen zolai ah kila khia sitset zel, kidawk vet lo hi. Kalawte 2:14 ah Manglai a “handwritings” pen zolai in nusia in tei kha lo zel hi.  Adiakdiakin Lai Siangtho:Phuahphatna pen ah, hiphadiak hi.

Rom 14 sungah Paul in “suahtakna Thukham” thu na kikum hi. Upna thanem te leh upna tha hat akisate suahtakna pehtawi hi. Paul in kipumkhatna adeih ahi hi. Upna thahatte leh upna thanemte hangin akipumkhatna uh akisiat ding Paul khalau hi. Akihat sak Judah thu-umte in Jesu sungah asuahtakna phawkin,Mose biakpiak thukhamte in amaute khin nawnlo, cih mu uh hi.

Apicing akisa Gentile Christiante in Pasian’ mai-ah milimte in bangmah hilo cih mu uha, milim tau-ah akipiasa sate nek hangin bangmah poi sa lo uh hi. Hihsanah alang nih a athahatte in athanemte adingin tuk theihna hituak uh hi.

Rom 14:2-3: “Mi pawlkhatin na khempeuh ka nektheih ding hi, ci-in ngaihsun uh hi; ahizongin upna neute in anteh bek ne ngam uh hi. Tua ahihmanin ane mite in atang mite simmawh bawl [thukhen] kei hen la, a tang mite in zong ane mite simmawhbawl kei hen. Banghang hiam cihleh ane mite zong Pasianin asan' mite mah ahi hi.

Zolaia “upna neu” te pen Jesu umkhin napi uh milim tau ah akiap sa kizuak kik sate sianglo hi, ci in anteh ne zaw in sa angawlte ahi hi. “Na khempeuh ane theite” pen upna thahatte hi a, a upna uh picing khancin ahihmanin milimtau ah akiapsa akizuaksate pen alimlim in “an” sa ahihmanin
anete a hi hi. Hihsanah an ahilo sanekna leh an ahi sanekna akikum hilo, upna khauhtah ci in mi khat peuh tuk nadingin omding hituanlo ahihna Paul thugen ahi hi.

Rom 14:14 panin Paul in ki-itna thukham thu hong gen hi. Hotkhiatna vai-ah gupna angah mite lungsim sungah Pasian’ Ukna thu agen ahi hi. “Nekna leh dawna” acihciangin apuatham zuihna leh nuntaknate agen hia, Khasiangtho in ahong piak itna, kipaakna, kilemna leh dikna ahi Pasian tawh kizopna thupizaw ahihna hong tell ah hi. Tua ihcih ciangin thumanna kisam lo aci
hilo hi.

Rom 14:17: “Bang hang hiam cih leh Pasian' Ukna [gam] pen nek leh dawn tawh a kisai thu hilo a, Kha Siangtho hangin i ngah Pasian' deih bangin gamtatna, kilemna,lungdamna, cihte hizaw hi.”

Hihsanah “nekna le dawnna” pen zuihna le tawnna agen hia, Khasiangtho eite sungah aom ciang bekin apusuak tatnate ahi hi. Tua tatnate apiangsak, agahsak, sungnung nuntakna thupi masa pen ahihna agen hizaw a, Jesu upna tawh tatna adeihlo, aci hilo hi.

Efesa 2:15: “Amah tawh kipawlna hangin minam nihte pawlkhat a suahtheihna dingin minam adei Jew Thukham leh a ngeinate khempeuh phiatin, eite pawlkhat hong suahin a hong kilemsak hi.”

Paul in, Ephesus khua-a lampialna Timothy ahilh ahi hi. Mihing’ sepna tawh gupna athalawh mite lampialna pulaak hi. Zi leh pasal neihna khamna leh an pawlkhat nekding khamna pen Judah biakna sungpan aka Essenes leh Greekte sandan ahi pumpi sia a, kha hoih (dualism) cih aum ascestic lampialna genpha diak hi.

1 Timoti 4:1-4: “Nidang ciangin a upna panun mi pawlkhat pialin, zuauthu gente leh dawi thu a kigente a zuihna ding uh Kha Siangtho in teltakin a gen hi. Tua bang zuau thuhilhnate pen zuau genin mi akhem, sik emsa tawh tatgawp bangin alungsim un ahoih leh ahoihlo akhenthei nawnlote' kam panin hong gingkhia ding hi. Tuabang mite in zi neih leh pasal neih ding, leh an
pawlkhat nek ding hoihlo hi, ci uh hi. Ahizongin thu umin, thuman thutak athei mite in lungdamna ko-in anek dingin Pasian in tua ante a bawl ahi hi. Pasian' bawlsa na khempeuh a hoih hi a, nialloin, lungdamna pulakin san' ding ahi hi.”

Kikup nasa bangin Topa in ahong piak AN hoih hi. Topa in AN acihloh, en ihcih tawmte lungdam ihko phial ahizongin “hoih” theilo ding hi.

Atomin:

1. Pasian’ Micilte’ AN pen ta’ng leh gah ahi hi (Pianc 2).
2. Noah’ Tuicin khit ciangin Piancil AN banah ganhing siangtho anungta gawhtawm ganhingte zong AN sungah kihel to hi (Pianc 9).
3. Mawhna leh si le sa koltanna pan asuakta Pasian’ teeltuam Israelte adingin Noah hun a asiangtho leh asianglo (AN leh anlo) akicianzaw in na khen sak kik hi (Siampi 11). Biakna leh cidamna akizom ahihlam Pasianin na lak hi.
4. Pasianin gangawh biakpiak bekin asiang leh asianglo hong khen sak hilo hi. Haltum biakna adding leh nekdingin AN ahi gansa pen an ahilo gansa pan hong khenkhiat sak hi. Pasian in mihingte adinga ahong ngimsakna pen Adam panin Jesu sungah Pasian’ innkuanpihte adingin thu lumletlet lo hi. Pianc 3:21, 4:3,4 te pen biakpiak nading bekin asiang leh anin khen hi, cih lah
nadingin kizang theilo hi. Asiangtho gante bek biakna ading leh nekdingin siang hi. Israelte kum 430 Egypt ah sal atan ciangin biakna ah alu ataw meel uh thei nawnlo ahihmanin Adam pan Noah hun dong siang leh sianglo ganhing acian zaw in hilh kik kisam uh hi.

5. Moses tungah Pasian thupiakna pen khen(4) hi: Moral law, ceremonial law, health law leh civil law te ahi hi. Jesu in ceremonial law picing sak a, bei sak hi. Gam khatin aom laiteng civil law om ding hi. Pasian’ tate ahihlaiteng uh moral law leh health law om paisuak ding hi. Ganhing’ si
tawh akikip sak Thuciam Lui pen Jesu’ si san tawh akikip sak Thuciam Thak in suankhia hi.
6. Isaiah 66 ah Messiah sungah nuntakna athak angahte in tawntung nuntakna neidinga, Jesu upna in tawntung ding bek hilo, Jesu mahmahin Tawntung ahihmah tawh kituakin Jesu’ zia le tong zong tawntung a, upsa mite khempeuh sungah tua zia le tong atawntung dingin khaici hong vawh hi zaw hi. Upna tungtawnin Hehpihna ihsan ciangin kei’UBB hinawnlo a, Jesu’ UBB tawh anungta ka hi ta hi.
7. Messiah, Jesu Krist leh gupna pen Adam’ suan leh khakte ading hikhin vek a, upna bek tawh Pasian’ mai akimu thei ih hivek hi. Pasian pen tangteuh banga akhangkhang ameel kikheel zualzual hi lo hi. Zanni, tuni, le zingciangin zong akikhellopa ka hi(Mal 3:6).
8. Laisiangtho pen Piancil alian khat panin Mangmuhna alian 22 aban banin phento lecin, thumanglo dingin Pasianin hong cial ngeilo hi. Bekthamlo in, Hebia 11 sung sim lecin, Piancil 1 panin Mangmuhna 22 ah upna loin gupna angah kuamah omlo hi. Pasian akikhel ngeiloh mahbangin gupna hong piakdan leh mawhneitein sanna angahdan na kibang to pai suak hi.
9. Laisiangtho Lui ah Thukham 10 aom bangmahin, Laisiangtho Thak ah Thukham 10 kimu to to hi. Lomkhatin akidawklo bek ahi hi.

Gal 5:19-20: “Numei tawh mawhna, thangtatna, lanluat mana khialhna, milim biakna, mibumna, kilangbawlna, kitotna, hazatna, hehna, huaihamna, kikhenna, pawltuam lungsim neihna, en'na, zukhamna, leh biakna pawi-ah zukhamna-a kipan adangdangte ahi hi. A beisa hunah ka hong hilhkholhsa bangin tu-in ka hong genkikin-ah: Hih bangin agamta mite pen Pasian' Ukna sungah omkha hetlo ding hi.”

Diktanna leh sianthona pen ngimna siangtho tawh zanglengh maan napi, milim ahi keima’ gawlduhna biakna adingin kazat ciangin, Pasian kiangpanin thukhenna asam kisuak hi.

Isa 66:17: “Biakna huan sungah apai dingin amaute kisian'suahin akisiangthosak, alaizang a aom pen azuite, voksa leh kihhuaina leh zusa anete beimang khawm ding hi, Topa in ci hi.”

Efesa 2:8-9:“Note' upna hangin Pasian' hong hehpihna tawh hotkhiatna a ngah na hi uh hi. Note' thalawhna hangin a ngah hiloin Pasian' hong piakkhong ahi hi. Note' hanciamna tawh angah hilo nahihmanun na kisialhna ding uh a thu omlo hi.”

Aneu 10 simsuak lengh: “Eite in Pasian hong bawlte ih hi a, Jesu Krist tawh ih kipawl ciangin ih nuntakna ah gamtat hoih aneidingin ahong bawl ih hi hi. Hihpen eite omzia dingin a na ngaihsut kholhsa ahi hi.”

Phil 2:13 “Banghanghiam nacih uhleh, note in utna lungsim na neih nading uh leh Ama’ deihna na zuihzawh nadingun note sungah Pasianin atawntungin na ahongsem ahi hi.”

Hebia 11 tawh na saikak dih un. Upna galhangte in Upna vive tawh gupna kamcian nangah uh hiveh aw, Pasian in maipha kuamah pia tuan sa keiveh.
by - Dr. Dalmang