Khatvei lai-in unau pasalno thum ong kiho uh hi. Bangsem bangbawl kawma kiho uh hiam bel theihsak khang. Sailungtang hualkawm uh hin teh. Ahual kawmkawmun khat in: tua leh gamlakah vasa bengin ih pai teh singkung hoih mahmah khat suaknuam ingh. Banghanghiam cih leh, galkap bute' inn sung ka et ciangin a dolsingkuangte eng mahmah ingh. Limtakin suai hiam sumngo sumsan hiam tawh kizemin a sungah amanpha theithei koihnain kinei-in guahnuai meinuai hiuhlak tawh kisawhkha ngeiloin galkap bute lupna khan ah nuamtakin omhithiat ding ka eng mahmah hi, ong cih leh..
Keizong! singkung suak leng, limtakin ong kizem dinga, leitungah aminthang penpen tembawpi in ong kibawl leh mipil milian mihau kumpite tuanna in ong kizat ding ut mahmah ingh, ci-in a nihnapa in ong dembawl leuleu hi.
A thumnapa, a upen hiam, a naupen hiam theikhang, tuapa in zong kei! singkung suak zenzen leng bel, kuaman bangmahin ong bawlsedah henla, kei' tumtakin Himalaya mualsang pen dawn ah po viuveu leng singkung minthang penpen suak ding hing, ong ci leuleu hi.
A sailungtang hual venvan ong hualkhituh ciangin lawhpi sungah ong gualgualuh a, solar panel bangin innka dawn nisalam ngatin ong phokeu uh hi. A zingciang zingsang tungin a unau thumun a temtawng temtateng leh a saili sailungtang teng tawh gampalak lam zuan dingin ong manawh ta uh hi.
Gampalak ong tuntakuh teh,a unau tengun thakhat thuin singkung suakin ong po takpi uh hi.Tuk leh, khal leh, phalbi zuiin huihpi guahpi, nisa, khuadam a thuakuh hangin singkung dangte banglo in a khan ngeina in ong khang uh hi. Hoih mahmah, mam mahmah, deih huai mahmah uh hi.
Hun le ni ten hai bangin ngaklo, ong tan zel, ong liapsan zel, a kumin kumsawm mahmah ong cintak teh a unau tengun khuadakin ong lungngai uh hi. Cikteh ih ut penpen ih suakzen tam? kicikeei zenlo dinguh a hia!!!
Tua banga a lungngaihlai takun sing kibik tawmnuam, a singat, a kawlhei uh liangko mualsuan a lopa kawm lakah ong pai chiapchiap pisal thum ong galmuh uh hi.
Tua pisal thum teng zong khuadak kawmkawmin ong paipai uh a tua singunau te' phung ong tung uh hi Singunaute' liimnuaiah sunsiah ong ne uh hi. A sunsiah nek kawmkawmun tuahpha kisalua uh ahih manin akiim apaam uh zong enman nawnlo vantunglam singdawnlam bebek mehnuih hiuhiau kawmkawmin tanggai salsain ong tung et et uh hi. Vaphualin a ek peeksuk ek!leh, bang lawh ding uh hiam? Sunsiah nekkhit pimpiam khit ciangin a thumun ong kisapah uh a, hih! singkung thum khattekin hawm ni.
Khatnapa in: ken hih phukpah ingh ei' phukkhalian! hih singluang innah ciahpihin hileng, lettama pa in vangil, vanmanpha mihau miliante' deih ding suah thei ding hi ci kawmkawmin veisat taksat, hoi, puk, singkung zong a tupna tung kisa mahmah in nui ziazua sa-in lei kidenna hi.
Anihnapa: ken hih ciahpih ning ei' zi...zit...zi..zit..at tukpah. Hih singluang pua leng, hia tembaw bawlbawl ten nakdeihlua ding theihsa, singkung zong nui hiuhiau in tupna tangtung kisa mahmah hi.
Athumnapa: A lawmte dana manna ding leh zuakna ding mun theisamlo, ansingcih dinga lah pammaih sa, puakloh dinga lah pammaih, banglebangleh phuk veve ding ong sawm laitak, singkung ong dahlua, veiletak ong hoi keei, kiphukkei henla po viuviau leh a ut kimlai, ong kiphuk veve hi. Kapkawm khitui luangkawmin leilak ong kidenna hi. Inn tun ciangin manna ding theipaklo ahih manin kongbuka, singluang kisuisa dangte lakah kiholhnelh hi.
A khatna singluang zong homedepot ong tungta. Ong kizuak lenlan keeita. Lettama khat in ong lei. A bawng annnekna ding kuang 'bawngkuang' ding in ong sui ta. Innpua a, bawng annnekna ding mun ah ong kisial hiau. Van manpha ngun, kham, suangmanpha koih ding cih thadah, lopa keu, singteh suangkang, anngiam bengiam kohna dingin ong kizang ta. Guahlak meilak zankim zankhangin innpua ah lungnemin ong thallup ditdiat ta hi. Bang a ngaihsun tam?
A nihna singluang leuleu tembaw bawlna munah ong kipuak vanglak. Tembaw lamlam ten tembaw lamna ding singpek kisam nawnlo ahih teh ci-in ngabengte zatding gunkuangin ong suita uh hi. Kumpi te a tuang mah diam?
Khatveii khualzin nupa tagaipha mahmah kopkhat a La uh tawh tua bawngkuang gei ah ong tawlnga uh a, thakhat thu-in a Tapa uh ong suakkhia mawk hi. A sialna dinguh mundang omlo ahih manin tua bawngkuang sunga lopakeu tungah a Tapa uh ong sial uh hi. Mipil te in letsong manpha mahmah ong tawi in tua naupang biakawmin ong pia uh hi. Tuucingte zong lungdam kipakin gamlakpan ong taingeingai uh a, tua Naupangno ong muh uh ciang in bawngkuang kiimah ong khukdinin ong bia damdam uh hi. Tu dong tua Naupangno tangthu akigen simin tua bawngkuang genloin kiomlo hi. Bawng kuang in Aw! khamlengun te tawh tehtheihloh dinga amanpha tua Zeisu ka sungah ong kikoih ong kisial hi ci-in, phawkkik kik hi.
Tua Naupangpa ong gol ciangin tangval ong hi a, a nungzui sawmlenihte tawh tua gunkuang sungah ong tuangin khual ong zin uh hi. Tuipi laizang ong tun uh ciangin huihpi guahpi ong zu ong nungin gunkuang in puazolo tuisungah ong tuppih dektak laitakin tua TANGVALPA in huihpi guahpite hopihin, thu pia a, huihpi guahpite in A THU ngai-in ong dai uh hi. Tua gunkuang in zong bang ong phawkhiam cih leh, Aw! kumpite' KUMPI, topate' TOPA a pua ka himawk ve leh! nak nuam singggggg. Leitung kumpi mihau milian te a pua hileng bangzahta in a kuku aawngawng zongun Titanic tembawpi bangin tuisungah piu sa in tumsukmang khinding hi ungh. Zeisu tuanna gunkuang ka hih khak zenzen!
Mihonpi ten tua Tangvalpa zawhthawhthu tawh cilphihin, kobawlin, satin, linglukhu khusakin, kongzing leivui lakah sukkaih tokaih, talkaih gawpin, a ot na awte un khuaihon leng bangin, a khedapkate un leivui sat dapdapin leivui tungkhut ngengngangin lum henhan keeiuh hi. Bawlsiat theih, bawlsiat tawpin bawlsia uh a, azumhuai, a tawpna penpen bawlsiatna tawh bawlsiatna bawlna dingin singkhuam ong zongzong uh hi. Zuakna ding leh manna ding aki theilo singkhuam ong mankha uh a, tua singluang tawh Calvary mualdawn ah tua Tangvalpa ong khai in ong thatlum uh hi. Tua manneilo sing khuam in a leh ngaihsutsut ciangin Aw! kei tungah ong kikhaipa Pasian Tapa hangin mannei mahmah kai mawk ve leh! Kei lim cingin ngunlekham tawh kibawla, pawlkhat in ok in, leitungah a tamzaw gamte in mualsang theithei hita leh biakinnpite ah hita leh po sak zinzen uh hi. Zeisu hangin man nei ka hi hi.
No comments:
Post a Comment