Na Sum Balkek Kei In by Nangkhai

 Khai leh! Tu laitak leitungah mikim phattuampihna ngahna dingin a siampen, a haupen, a pil pen kua hiam? Sport lam ah bawhlungsuih a siampen, muhnop ih sak pen kua team hiam? Olympics  ah kua tai hat pen hiam cihte ong pulak kiaukiau i net ah om hi. Lungdam ka ko hi. Mailam ah ong zopsuakna dingin ka thum hi.

Hih ong kisuaksak thute ka simsim ciangin ahau penpen, ahat penpen  cih te lakpan ka lung ong himawhsak khat om hi. Bang gam, bang kum, bang khua cihte ka telnawnkei a, USA gam bel hipelmawh hi cih ka thei hi. Olympics  game khat ah numei taipawi 100m kidemna ah a khatna a ngah mi bangzah pha hiam? cih ka sin sungah  anlim tuilim bangin ong lut hi. 

 

Kidemna khat peuhpeuh aom ciangin a khatna ngah khat om leh, a innkuanpih anu le apa, asanggamte bek in nuampih hi. Tua Olympics game  tai kidemna ah   numei 9 kiging uh hi. Seminary sport day ni ong phawksak zawzen. Kei adingin Singunau Sang. No adingin koi Sang? he..he..he..

1..2..3..phung...pistol gin ngaih mahmah khat ong puakkham phau lianleh, numei, nungak vive hiam thei khang, 8 teng "vil"  sa, a 9th na nu thakhat thu in leitang ong bawhsuk thong. Bilpi banga atai vingveng ding kimlai muvanlai bangin leilak ong bawhvat ciangin a lawmteng in lamdangsa in, hehpihin, lainat pihin, a vekpi un kilenin leilakah a bawk dingdiang a lawmnu uh khut kilen kawmin ong phongto uh a, a vekpi un damdamin a tunna dinguh khaukhun goal liangko kikimin ong palsat uh hi. A khatna luak bangzah pha. A nuampih innkuan bangzah? Stadium sunga om khempeuh khat zong cianlo avekpi un dingto in khut bet ziahziah uh hi. 100m kidemna ah a khatna angah mi bangzah pha hiam? Numei 9 in a khatna la zen uh hi. Why?

           

 Thukham a lian penpen bang hiam?  Bangzah pha hiam? Ei sangin pawl dangten dawn masak ding ong tuh lanlan dingin um ingh.  Amau tumtakin A lian pen Thukham in "Ki itna" hi, ci laulau depin ei sangin thei kisa zaw, tel kisa zaw, zong nei kisa zaw uh ahih man hilel uh ka sa hi.

 

Bang hangin hih The Greatest Commandment cih thulu ong piangkhia hiam? Commandment "s" kibehlap samkei mate! Tuhun IT (Insein Thunginn) ahi

lo, information technology khantohna tawh kizui in internet ah upna tawh kisai pawldangte lai at ka ngaihtuahtuah ciangin amau leh amau zong a upna uh a kitukalh, a kici giapgiap, a kiko a kisel setsette hinapi uh in, bang dingin SDA ten lai a at ciangin kipawlin ong bawhhuan ngeingai thei uh hiam?

lamdang saman dektak zen ingh. Tusawngteng bang Thukham leh Sa nek vai.       

 

Phawkkhat leh kitehpih khat nei  ihih manin lamdang asalo bek hi hang mate! I pu bel Abram, Isaac, Jacob te hi in, i gang Moses leh Israel mite phawk hang. A khualzinna lamtawntung ah thukham singkuang mah zuisiangzo takei le uh manphasa, it, zahtak, deih, pom tinten in a paipaina, a giahphual satna uh hita leh mihonpite laizang thei penpen ah na omsak hamtang uh hi. Ei zong Israelte mah bangin tua ki itna thukham suangpek tegel mah ih lungtang sungah koihin mitsuan a Pasian abiate ihi hi. 

 

Santuipi leh Canaan gam kikal gam tuamtuam, khua tuamtuam te dawibia kaubia, singkhuah suangtum pasian bia in apaai ngekngek minam tuam tuamte ahih banah gal le sa a kidodo, sal dinga kimanman te ahi uh hi. Israel ten tua khuate ong nawkkhak uh ciangin khuakhat le khuakhat ong kileh pawlin Israelte "who are these outsiders" ci-in ong midangbawl, ong langpan, ong sim, ong do mawk uh hi. Galpi khatna.

 

Galpi nihna: Tua Thukham Apia ih Topa Zeisu Khazih mahmah ong langpan leuleu uh hi. Kuate hiam? suut kikkik dih ni!

 

Mark Gospel Laisiangtho bu mah zang ni. Gospel bu li teng lakah Mark gelhte mah tom, hilianlian, pehpeh nei khollo, debate a tamgelh pen hiphial hiam cidektak ingh. Mark 12 pan panni. 11 sungkhawng zong omsam naven.Mark 12:13. Later, they sent some of the Pharisees and Herodians to Jesus to catch Him in His words. walter martin makai in evangelical groups teng in SDA makaite sam in christian or cult koizaw nahi uh hiam cih dotna tawh kizom debate bawl uh hi. Desmond Ford in ngaihsun tawmtawm hetlo in a dotnate dawngkik ziahziah hi. Amawhmatna ding uh leh a nial ding asel ding uh theinawnlo uh hi. Atawpna ah hih tawh man theini ci-in, "na kamsangnu" uh ong cipuutsaat uh hi. Dr Ford in zong Laisiangtho sung mah lemin simkhiasak a, hun nunung ciangin kamsang ong piangding hi ci na pi, tua a umlo no! evangelical teng cult hizaw hilo nahi uh hiam ong cih tak ciangin a hun uh ong khakbawl uh hi.  

 

Later, tuakhit ciangin, they (kuateng) in Zeisu ama kampauna tawh a kimat theihna dingin Pharisees mi pawlkhat, Pharisees cih ciangin Samson bang a namdang nungak melhoih ningtui bang adawn ziauziau lo Hebrew pasal in Hebrew numei mah a tenpih ngiat, kahbia lo, Paul a kicihma Saul dan a Pasian thu leh Thukham a kan, a sin, buaih a ngah Judah sangnaupangte hita leh tua pilna tawh a nungta te, leh Herodians cihte pen Judah mi veve Rome ukna sungah nuam asa, Herod Antipas nasem, kumpi nasem suakve, Pharisees te tawh kikelki deuhse te pawlkhat  Zeisu kiangah thu dong dingin asawl uh hi.

 

Later, comma ommawk ahih ciangin earlier, tuama thupiang omloh phamawh hi. Tuama in Zeisu Jerusalem ah gualzawhna tawh ong lut hi. Biakinnpi ah biakpiakna tawh a kilawm hetlo sumzuak sumlei gamtatna teng khempeuh ong sumaimang hi. Laisiangtho sungah aomsa thugentehna teng ong gengen hi. Biakinn sungah ong kitom ciangin Siampite ong nuamlo uh hi. Thugentehna ong gengen ciangin Judah ulian ten amau akawkkawk lam thei uh ahih manin Zeisu a kimat theihna ding ong geel uh hi. Siampi te pen Levites minam biakpiakna khempeuh a uk, asai, a kampau khempeuh uh zuih ding thukhun a suak lianlian, sianthona ah zeh atang phadeuh, a sisa khat peuhpeuh a lawnglo, misi nangawn a kahlo dinga misiangtho te hizen uh hi.

Zeisu kimat theihna ding Pharisees te leh Herodians te asawl hih siampilian te leh Judah ulian teng hitazen uh hi.             

 

Bang dingin hih Pharisees leh Herodians te kikopkhawm sakin Zeisu thudong dingin ong sawlse khelkhel uh hiam, asawlte khuaktai sa ingh. Pharisee te pen minam it, a muhdah kumpi tungah tax siah piak kulkei acite leh kumpi tungah siah piakkul mah aci Herodian group nih Zeisu kampau mawhmat dingin mihonpi lakpan thukikum khinsa sitset in ong pai ngalhngalh uh hi. Mark 12:14. Akuazaw pau hiambel theikhang. Zeisu ong phatphot zawzen hi.

"sia aw, nangmah in thutang genin, midangte pauding phamawh na saklohna, uliante maitang zahtak tuanloin, Pasian in mite a gamtat dingin a deihna thute tangtakin na hihna ka theih uh hi. Thuduhding kisa a, phot zawzen cih bekin om maw,...Tua ahih manin Rome Kumpipa Ceasar tungah siah i piak ding kilawm hiam, piakloh ding kilawm hiam?  

 

Hihbang dotna a tuakkha ngei naom uh hiam? Kawlgam thungkiate thu akisit ciang, dawngkei le lah ong thusimlo maw, satkhat, dawngle lah ong zah taklo, vit,satnih, pengthei mahmahlo aidia. Zeisu bel tua bangin satkhale uh mihonpi in gawlmek ziauding lau ahih manun sat tawh panlo uh hi. Tua lai takin Zeisu in piak dingmah hi, cileh a pianuamlo Pharisee te tawh kisual tawntung ding. Piak kulkei cile lah Kumpipa Ceasar tawh kinuihsan lo ding, a dongten bel pengkenteh ci-a, a dot uh ahi hi. Zeisu in bel tulawlawm theilo, koisinvua, na sum uh. Aman sum pualo aitam alangte kiangpan ngensese citciat hi. Ih siate leh pawldangte akisel ciang ih siaten koisin awleh nang laisiangtho in bang ci gelh hiam simdih ni, acih kekkek dan e.

 

Tua ciangin Zeisu in hih sum tunga who's portrait hehpian ahih cianga mangpau bang zangkha zawzen, kua lim hi a, who's inscription, kua min ahi hiam?  ci-in ong lehdot ciangin, "Rome kumpipa Ceasar lim leh a min ahi hi" ci-in ong dawngluailuai uh hi. Tua ciangin Zeisu in, tua ahih leh, Ceasar neihsate Ceasar tungah pia un la, Pasian neihsate Pasian tungah pia un, ci-in dawng giap hi.  

   

Singunau sang ka kahlai un kawllai subject laivuan ding hita, school discipline tawh kisai essay atding hi in, question paper tungah lotngah at kei un, use your own language tawh answer pia un cih ahi hi. Lawmte khat in use your own language cimawk ahih teh, ci-in Zolai tawh answer at dendan pah mawk. Siapa nakbuai hiven. Lumletlet in a simsim hang simthei mahmahlo hi. Ken bangcih peuhmah ding, ong sak dinga mark bangzah piamawkding

Kiatsak dinga lah sangnaupang 3 bek himawk. Onsaknop leh bel translate ding siakhat kisam himawk aive. Nuih bekin om hiven. Tua sangnaupang leh kawllai siapa zong kibangcih uh hiam, ki ongsak hiam, kikiasak hiam tuni ciangdong ka theikha nawn kei hi. Thu dong Pharisee te leh Herodian e zong Zeisu dawnna hangin lamdangsa in buai mahmah uh hi. Mark bangzah pia uh hiam theikhang. En bel Mark 12:17 pia ziau hang. Tu ciangciang USA ah i sum te kumpi tungah tax piakdingte kipia in, Pasian tungah piakding sawma khat te manman in kipia ahih manin bangmah buaina omlo hi. Ong kimatnop hangin ong kiman theilo hi. Zeisu zong a matnop uh hangin man theilo uh hi.    

   

Tua banga Pharisees leh Herodians ten Zeisu kampau tawh amatzawhloh uh teh Jewish society sunga apil takpi, ahau takpi, namlian takpi bawng pan akhangkhia Sadducees te ong kipan leuleu uh hi. HIh Sadducees te pen biakna lamah siampite tawh kinehsawh zawdeuh banah gamvai minamvai ah zong kihtak zahtak nei mello kuamah athusim ngiatlo te ahi uh hi. Phariseete thu up dan leh thuzuih dan khawng zahpihin na neu muhsak mahmah uh hi. Laisiangtho zong Moses gelh bunga teng bekmah sangse uh hi. Tulai taka Christian pawlkhatten thuciamlui zangnuam nawnlo a, thuciamthak teng bek a zatnopdan uh tawh kibang mailo dia! Phariseete upna tawh kilehbulh upna nei sese ve uncin, vantungmi umlo, dawi umlo, thawhkikna umlo. A vanglian Pasian in ei ong bawlsa mihing maimai khawngte ong kin mahmah ken teh. Ih sih teh akisi paisuak ding hilel cih upna nei sese uh hi.

 

Hih Sadducess mi pawlkhat in na en vuau! Ko ong manziauding hi ung ei! Zeisu kiangah ong paita uh, "Sia aw, thawhkikna tawh kisai Pharisees ten ong nialzo ngeilo uh hi. Nang ong bangci dawnding na hi hiam?  Ong dong viavua leh!

Mark 12:19.  "Sia aw, mikhat in ta neiloin a zi sihsan......a unau sagih dongin ta neiloin a zi sihsan uh hi. A tawpna ciangin tua numei zong a si hi. Tua ahih leh, mi khempeuh a thawhkik ni ciangin a kua pen zi hi ding ahi hiam? Pharisee ten bel Zeisu in abangci dawn peuhmah zen tam ci-in a bil bang uh bilpi bil bangin, a dip uh ki boxing keeizenlo ding uh ahia mate.

 

Zeisu in bangci dawn ahia leh! :24. Zeisu in "Na khial mahmah uh hi. Laisiangtho ahi a, Pasian vangliatna ahi zongin na theihlohna hang un hih bang dotna ong dong na himawk viavua leh! Sihna panin mite a thawhkik ciangin vantung mite mah bangin zinei pasalnei cih omlo ding uh hi. Thawhkikna thu tawh kisai Moses laigelhna mun sim ngeilo na hi uh hiam? Tua laibu 5 teng bek mah na zatuh hilo aimaw! Tua sawlpang kuang thu a genna munah Pasian in Moses kiangah, 'kei pen Abraham Pasian, Isaac Pasian, Jacob Pasian ka hi hi. Pasian pen misite Pasian hiloin mihingte Pasian hi. Tua ahih manin na ngaihsun khial mahmah uh hi, ci-in kawlpau in a dawng kik hi.

 

Sadducees te pen laisiangtho amau tumtak thei akisa mahmah mite ahi uh hi. Zeisu in na kitheihsak mahmah uh hangin a theikeilopi na hi mawk viavua leh! Nak khialh mahmah uh teh, Pasian vangliatna zong no khuak ii ngaihsutna ciang tawh na tehkak khak mawk uh, na ngaihsutna uh toi mahmah hi. Pasian in a lik zawhloh ding suangtum piangsakin um na hi uh hiam? Vantung pen no mitmuh ciang beka dumdeda sa na hi uh hiam? Leitung leh vantung bang dingin tehkak mawk na hi uh hiam? Thuhilh dikdekna thuakkha uh aidia? Sathangsiahsiah khat sakhi in a nunglam pan siigawp peekgawp a dopbawlloh dan tawh kibangkha ding hi. Hih bang dotna niangnuang khawng nuihzakhuai lel hi..manzo pah kholkenteh maw..

 

Zeisu Ama kampauna tawh akimat theihna dingin CIA leh FBI agents asawl kuate hi zen ahia leh? Siampi, Levites minam te hizen hi.

 

Tua thukidotna a ngaingai Thukham hilh siate khat Scribe in Sadducees mite dotnate limtakin Zeisu in a dawn theihna a muh ciangin Zeisu kiang ong neh hi. Amah bel thangsiah dinga kisawl hihtuak kholkei. Thungai dinga mipi laka kihel hilel leh kilawm. Tulai hun hi leh Yale university hiam Harvard university hiam khat a,laws tawh kisai laihilh professor khat hiding hi. Tua lai-in zong Sang thupi Laws School mun nih na nei uh hi. Khat pen Hillel in Siapi semin, a khat ah Shamai in sem hi. Laws tawh kisai law code 613 bang nei uh hi. Hih lai a sangsia sem khempeuh bel hih law 613 nak theihlua naksiamlua, kinakmuanlua cih ding hi. Lawyer vive ahih manun amau zong debate bawlthei zel uh hi.

Tuunawi sunga tuusa huanloh ding thukham leh mithahna thukham koi thupi zaw, anih tuaka thukham palsatna veve cih khawng debate theizel uh ahih man a, Zeisu kiangah Thukham khempeuh lakah bang thukham a lianpen ahi hiam? ci-in a dong ahi hi.

 

Banghanghiam cih leh, Shamai laws hilhdan leh Hillel laws hilhdan kibanglianlo, kilamdang hih tuak hi. Mikhat Shamai kiangah ong pai in a khe lang khat bek tawh ding lenglang kawmin thukham laws ong hilh in a cih leh, Shamai in ciangkhut tawh tuapa zandelh hi ci. Shamai thu hilh dan.

Hillel leuleu in, nang tungah ong kibawlding na deihkei leh, mi tungah zong bawlkei in. cih dan in hilh hi.

Zeisu hilhdan leuleu, nang tungah ong kibawlding na deihmah bangin mite tungah zong na bawl in. Siatna bawlding cihnopna hilo hi.

 

Zeisu in thukham hilh siapa dotna ong dawngin ' Thukham a lianpen in Na Topa Pasian uh, na lungsim khempeuh, na nuntakna khempeuh, na pilna khempeuh leh na thahatna khempeuh tawh na it un. Zeisu in laisiangtho sunga kigelhsa mah tawh na dawngkik hi. Thuhilhkikna 6:4,5 sungah a ki at linlian bangin na dawng hi. Hih te ka theihtheihsa uh hilo maw, biakinnpi sung ka lutding uh ciangin ka lawh dandan dente uh hi. Anihna in Nangma pumpi na it bangin na vengte na it in. Siampilaibu 19:19. Hihte gel sangin thukham a lianzaw a dang om nawnlo hi, ci-in a dawng hi.

 

Hih Pasian it ding leh i vengte it ding tegel pen thukham khat bek ahi hi. Khenkhiat theih hilo hi. Tua sum tungah a tuang Ceasar lim leh Ceasar min mah tawh a kibang ahi hi. Tua sum phelkham in la, Ceasar lim tuanna lam bek tawh van valeisawm le cin, na vanleinop ngahlokha ding hi teh. Tuamah bangin Pasian bek itin, midangte mudah lecin, thukham zuikhin kici theilo hi. Mite itin, Pasian itkei leuleu leng itna bucing ong hitheilo leuleu hi. Sum pekkhat tungah a lim leh a min a tuankhop a kulden na hi hi. Alim leh a min atuankhop ciangin sum kici ahi hi. Tuamah bangin  Zeisu in thukham khat na palsat leh a vekpi a palsat na hi hi acih ciangin tua thukham khempeuh ii min pen 'ki itna' ahih man hi. Sum leh Thukham 10 gentehna tel tektek dingin Pasian in pilna ong pia kim ciat ta hen.  Thukham 10 cinawnkei ni, 'Ki itna' in lo ta ni.

 

SDA pawlpi simloh Christian dangten thukham 10 zuihzawh ding genloh zuihsawm vetlo uh hi. Thukham hilh siaten thukham 613 bang na zui tinten uh hi. SDA ong langpangten tua thukham khempeuh kuan zuizo ding ci uh hi. Zeisu deih thukham zuihding nam tampitak hizenzenlo hi. Khat bek hi. Pasian it ding leh vengte it ding, ITNA piakding hiziau lel hi.

 

Thukham hilh siapa in Zeisu dawnna bang aci ngaihsut a le! Zeisu dawnna thukim mahmah, lungkim mahmah, hisa mahmah hi. Sia aw, na gen mah bangin Topa bek mah Pasian hi a, amah simloh pasian dang kuamah omlo hi. Mite in a lungsim khempeuh, a pilna khempeuh, leh a hatna khempeuh uh tawh Pasian itin, amau pumpi a it bangin a vengte a it ding uh ahi hi. Pasian biakna dingin biakna tau tunga gan gawhnate leh biakna dang khem peuh sangin hih thukham nihte zuih ding thupizaw takpi hi, a ci hi.

 

Hih pen a simthamcih hilo dinga, mipi maiah a cih hiding hi. Hihmun santakah Zeisu in thukham hilh siapa convert hileh kilawm ka sa hi.  Bang hang hiam cih leh, lawyer te in puanvomtual silh hamtangin mite zahtak hopih ding deih hamtang uh hi. Mite hehpihna neilo uh a, sum ngahbeh theihtheihna ding vaihawmin upadi ayah in gamta mawk uh hi. Topa Zeisu in zong lawyerte gamtatdan phat hetlo hi. Herodian ten meigong numeite kankan uh a, tuate tungah income tax peuh, property tax peuh dongdongin apiakzawhloh uh ciangin lawyer te kiangah khiaden mawk uh hi. Lawyer te zong upadi ayah in thukhen mawkuh a, meigong numeite neihsa laksakin nursing home khawngah tengsak mawk uh hi. Tuabang gamtatna nuamsa uh a, itna themcik zong a lungtang sungah paaivetlo uh hi. Ahi zongin Zeisu tawh akimu lawyer pa in thukham ici tateu zongin itna tawh thukhen ding, itna neih dingin mipite mai leh Zeisu mai ah agenkhia thukham hilh sia amah bek om hi.

 

Zeisu in thukham hilh siapa thugenzia, ki apzia, te hoihsa ahih manin 'Pasian Ukna tawh na kigamla kei hi, na ci hi. Thukham hilh siapa in ama theihna

ama pilna, leh ama thukham hilh theihna, zuihzawhna tawh Pasian Ukna sungah omkhin kisakha hi. Ahi zongin Zeisu in na kigamla kei hi, a cih ciangin Zeisu in thuman gen ahihna um veve hi. Bang kisam? ITNA ih sungah ong tending kisam bek na hi hi.

 

Tua suangpek tunga ki at amasa li teng in Pasian itna danding ong lakin, a nihna 6 teng in i vengte it danding ong lak Alian penpen Thukham ahi hi.

Tualo a dang a lianzaw om nawnlo hi. Zeisu in ci hi.    

 

Hih ITNA lahna ding Thukham 10 teng paihkhiat neise kenla, avekin zuih sawm in. Zuihzawhlohna in thanemna hi a, zuihnoplohna in mawhna hizaw hi. Zeisu in nalungsim sungah ahoihlo khat na ngaihsut leh amawhzo na hi hi, ci hi. Mawhna pen muhtheih dinga kiikawng vemvam a ong kilak nahi khollo hi. Lungsim tawngah bukhikhe hi.

 

Tua hi in, na sum tungah Ceasar lim leh Ceasar min, Thanswe lim leh min a tuangphial zongin balkek se ken. Na khepnop leh khep sawm in khep in. Khep sawmin khepin khepkhat na balkek khak leh, tua sum in man neilo sum ong suak ding hi.

 

Israelte langpanga adodo kuate hiam?

Zeisu langpang kuate?

SDA langpang kuate?

 

ITNA balkekte ahi uh hi.