Zomi SDA te Leh U.S.A. Gam Thak Keekna Tangthu Tomno

Laisim a kuama ciat:

Ih biak Topa Pasian hehpihna thupha hang iin khuamial sung a bang ih Zogam pan leitung aa a minthang peen leh leitung mi khempeuh ii lunggulh peen gam ahi USA ah Zomi tampi ih tun theih ban ah SDA pawlpi mi sung pan zongh ih tam nai het kei ahizongh’n pawl khat mah kitung ta ahihmanin Topa min kapah tawi hi. 

Thu om teng a tom iin:

v  Ih Pianna Zogam

v  Zomi SDA te ii USA Gam Thak  Keekna

v  Zomi SDA te leh 1995 Kum ASI Convention

Ø  Pawlpi Nasem Nih ASI Convention Ah Painuam

Ø  Pawlpi Mite Nga ASI Convention Ah Painuam

v  Thukhupna

Ih Pianna Zogam

Ih pu sawnsawn te, ih pu ih pa te khang pan aa ih luah tohtoh Zogam peen ih lam kiatna, ih naau tual kaihna leh ih khankhiatna mun leh mual, ih gam, ahihmanin ih it mahmah ciat hang iin mipi in inn leh lo a hoih zaw nei phial mah ta leh ih gam peen tu maa kum 30 or 40 laai pawl sang iin khangto zaw het lo iin kiam suk zaw mawk ahihmanin dah huai mahmah hi. 

Khangluui laai iin Zogam ah singkung lopa gol iin limci mahmah aa guahzu ni taang te zongh a hun hun iin a kicing iin kingah hi. Ko neu laai tu maa kum 40, 50 laai te iin khamtung gam Tedim, Thuklaai, leh Tonzang khua kim khua paam te ah sing kung khang haam pipi, lianpi pi te om iin an huan nading singkhuah akipan neek ding dawn ding kicing laai mahmah mai lel hi.  Tua hun laai te iin inn sing aa suih ding cih loh taak sing kung te bang an huan nading iin a kizangh nuam vet lo hi zawzen hi.  Tu hun iin taak sing kung gol khat zongh muh ding om nawn lo cih zah phial ding hi ta hi.  Singkung te khepi cia, khut dawh cia pha leh an sing ding iin kitom pahpah aa a zung dong iin ki zung loth mai hi. Tu iin ih gam keu mahmah ta aa guah zong kingah kician nawn lo, lo kikho thei lo, an kicing kician thei lo cih zah dong hi ta mai hi. Tu maa kum 30 or 40 laai te iin khamtung gam bup ah motor a gol leh a neu a kigawm iin 30 zongh pha lo phial ding zah iin tawm mahmah hi.  Tu maa kum 20 laai pawl iin Zomi te sung ah motor cycle 10 zongh om nai lo kha ding hi.  Cycle (setbi) nangawn 400 or 500 ciang a om nai diam cih zah dong iin tawm mahmah hi.  Tu iin bel motor, motor cycle, bicycle cih te tampi mah bel om ta hi.  Hih te peen Zogam a khantohna khat ahih sam hang iin Zogam a khantoh man hi zaw lo iin Zogam a khantoh loh luat man aa a khangto gam a zuan Zomi a tam man iin Zogam a zep uh ciang iin Zogam a khangto tawh a kibang bek ahi hi. Zogam sung pan vanpiiang (production) hang aa amah leh amah aa a khangto ahih kei leh gamdang pan aa sum kikhak man bek aa Zogam aa a teng laai pawl khat te in nuam a sa lel ciang peen ih gam a khangto hi tuan lo hi.

Zomi SDA te ii USA Gam Thak  Keekna

Ih Zogam in khantoh lam manawh gen loh kiam suk zaw mawk ahihmanin Zo lia leh taang te iin tui leh lounona zuan iin kipekk khia ciat uh hi. Thailand, Malaysia, Japan, Singapore, South Korea, India, Sweden, Norway, Germany, France, UK, USA, leh gamtuamtuam te ah lampi om bangbang zongh iin kipu suak ngeingai hi.  Kawl, Kachin, leh Kayin te khawng peen Zomi te tawh tehkakna iin gamdang a na tun uh sawt mahmah ta hi.  Zomi sung ah gamdang tung aa a na teng suak masa te Dr. Langh Khen Thang (Sezang, Germany), Dr. Vum Son (Thuklaai, Germany leh US), leh Dr. Vai Do Pau (Vangteh, US) cih te pawl bang kei theih ah a masa pawl te a hi uh hi.

Gamdang pusuah leh gam thak keekna ah Zomi SDA te peen kikhang moi mahmah hi. Indianapolis, Indiana State, USA, ah 1990 kum, General Conference Session ah Myanmar Union Mission Executive Committee in lay delegate ding iin Sia Paupu (Sia Pau Za Khan) teel ahihmanin tua GC session ah Sia Paupu va pai iin kha 3 sung a taam khit ciang iin hong ciah kik hi.  Tua hi aa 1990 kum peen Zomi SDA te in tuipi gaal, USA gam ah ih gam keek ding ih kipat khiat masak kum ahi hi.

Zomi SDA te leh 1995 Kum ASI Convention

1990 kum aa Sia Paupu, USA ah a pai khit zawh Zomi SDA sung pan 1995 kum dong USA ah kua mah a pai om lo hi. Tua zawh kum 5 khit ciang iin 1995 kum iin kikhoppi khat siim ding iin Sia Kap Pau (Sia Do Kap Pau) USA ah pai hi. Sia Kap Pau peen Zomi SDA sung pan USA gam keek ding aa a sik nihna ahi hi. 

ASI (Adventist-laymen’s Services and Industries) Convention meeting peen kum sim iin a khangto leh a hau gam aa Local Conference, Union Conference, leh Division te ah a om den ahi hi.  NAD (North American Division) ii ASI Convention peen a nop ci peen, a thahat peen leh a lawphuai peen khat ahihmanin leitung bup mun tuamtuam pan SDA pawlpi mi sum bawl paai bawl te (lay businessmen) leh pilna siamna tawh nek zong te (professionals) kimu khawm aa amau omna nasep panmun ciat uh ah Topa’ min thansak nading kikupna leh tha thak kihopna leh lakna aa a nei uh ahi hi.  Tua hi aa ASI convention peen laymember businessmen te leh professional te' kikhopna leh kipawlna ahi hi. 

Pawlpi Nasem Nih ASI Convention Ah Painuam: North American Division aa ASI Convention leh Far Eastern Division sung, MYUM aa ASI a kisaina om lian lo ahihhang iin USA ah a sangkah nading vaan kawm iin ASI Convention ah Sia Mungno pai nuam hi.  US aa ASI Executive Secretary-Treasurer a sem Dwight L. Hilderbrandt Jr. kiang ah sapna ngen iin August 9-12 sung kikhopna ding sapna April kha 1995 pek iin a ngah khinsa iin kikhop ding hun a tun ding a ngak bek iin om hi. Sia Siangh in Myanmar Union Mission ah Associate Director of Church Ministries a sep sung hi aa Personal Ministries, ASI, leh Family Life te len kha hi.  Union Mission ahi aa Local Mission ahizongh’n, Union Conference ahi aa Local Conference ahizongh’n ASI Department a lente Division dang aa kibawl ASI Convention ading iin kisam tuam cih bang om ngei lo hi. Union leh Local Mission or Conference te in amau huam gam sung ah ASI promotion a bawl ding uh tavuan nei uh hi.  Officially iin a kisap loh zenzen hang iin hun leh sum nei aa a pai nuam te in ASI office pan sapna ngen aa pai theih hi lel hi.  Tua hun laai iin ASI Convention ading iin a ngen te sapna pia kim lel uh hi.  Sia Siangh zongh ama' ngimna khat tawh USA ah pai nuam ahihmanin NAD-ASI zum ah sapna ngen iin sapna ngah hi.

Sia Mungno leh Sia Thang Siangh te ASI Convention, USA, ah pai nuam tuak uh ahihmanin a pai theih nading uh vai hawmtawm tuak uh hi.  Sia Stephen Sein peen Singapore zin nuam aa Sia Tin Tun peen South Korea ah  1000 Missionary Movement vai iin zin nuam hi.  Amau vai ciat ding geel tek uh hi.  Worker te khual a zin ding kahihmanun Union EC ii phalna ngah nading iin 1995 Union EC midyear committee ah kikup pi khat iin kinei aa hamsatna lianpi ka tuak khawm uh hi. Pai theih leh pai theih loh ding simtham (secret) vote tawh khentat ding hong hi ta hi. 

Sia Ba Hla Thein, Chairman,  Sia Sandy Dee,  Secretary leh Sia Muller Kyaw, Treasurer, te sep laai tak ahi hi.  Committee a kitut ciang iin chairman in vote pia ngei lo hi. Banghang hiam cih leh a zenzen iin yes or no vote te kikim lian kha leh chairman vote in a khensat ding cihna ahi hi.  Chairman lo buang in vote masa aa a vote nuam lo te in vote lo thei uh hi.  Ahizongh'n vote a kisim khit ciang iin chairman lo buang in vote nung piak pan thei nawn lo hi.  Secret vote kikhia khin ta, khon (khawm) khinta, khat khit khat sim toto iin majority a kingah zo lo ding dan iin hong om mawk ahihmanin ka patau mahmah hi.  Ko a zin nuam 4 teng in bel 'yes' vote pia hamtang ding cih theih sa ahihhang iin a kua dang teng in 'yes' hong piak pih bilbel uh hi ding hiam chairman ii vote kihel nai lo iin vote khat tawh zo lian bilbel kahihmanun Sia Mungno, Sia Siangh, Sia Stephen leh Sia Tin Tun te Union Committee' phalna tawh a zin thei ka hi uh hi.  Sia Stephen leh Sia Tin Tun te a zin nop uh tawh a kituak zenzen man aa amau te geel leh ko te geel hong deihsak te kigawm khawm hi kei le ungh Sia Mungno leh Sia Siangh bek a zin khia ding hi leh vote tawh a zo vet ding ka hi kei uh hi. 

“SIHNA GUAMSUNG PAN. 5” a cih sung aa “Policy ngeina bangin kalsuan hileh Department director mintawh kisam ahihmanin confirm pah ding ahi hi. Stephen, Tin Tun, kei mithum secret vote la ding ci uh hi. …………..Hong peikhia nuam kisa-in Unionmen teng bang amai 45* sawisakin khe tatkikkik uh hi. Me kikhia a, Stephan hong tawmpen hi. Tin Tun leh kei hong kidemsak leuleu hi. Sia Stephan me teng kangah khit keileh lamet omlo hi. Kakhiat thadah ta hi. Metang kikaikhawm a, kikim hi. Kua in sam! A kisam tangkhat pen kei kahi hi. Zumlo hialin kei leh kei kipia-in me khatin kazo hi. Tin Tun leh Ba khin hong kihuau hi. Ma-tat-nai-bu-le!!!! kici uh hi. (Thang Siangh, March 11, 2010, SIHNA GUAMSUNG PAN. 5) ci aa Sia Siangh gelhna ah a khialhna tam peuh mah hi.  [Hilhcianna: North American Division aa ASI office pan Far Eastern Division sung Myanmar Union Mission aa ASI director peen department a let man iin ASI in sam cih bang om ngei lo hi.  Gamdang khual zin nuam 4 te kikaal ah vote tawh kidemsakna om lo aa ko a khual zin nuam 4 teng pai sak ding maw pai sak lo ding cih bek Union EC in a vote ahi hi. Vote a kisim khit teh chairman lo buang in vote khia/pia ngei lo hi.  Hih hun iin Sia Ba Khin in SDA pawlpi sung ah nasem nawn lo hi.]  Hi bang iin hamsatna kawmkaal ah Topa Pasian thupha hang iin Union EC ah vote tang khat tawh ka zawh liai man un ASI Convention a zin thei ding ka hi ta uh hi.

Pawlpi Mite Nga ASI Convention Ah Painuam: ASI Convention peen lay member businessmen leh professionals te kipawlna ahih ban ah Sia Siangh in ASI vai a let laaitak ahihmanin ama kisapna te ah a panpih zo ding, US ah zin nuam aa a up leh a zin zo ding, sum hau a muan a suan khat leh nih te kiiang ah tuam theih sak hi.  1995 kum aa ASI kikhop pi ah a pai nuam pawlpi mi 4 te (lay members) peen Pa Kap Lian, Sia Paupu, Pa Thangno, leh Pa Thang Lam te ahi uh hi.  Pa Kap Lian leh Pa Thang Lam ading Sia Thang Siangh vaihawm pih hi.  Myanmar Union Mission secretary a sem ahi Pr. Sandy kiang ah ASI pai ding iin Sia Paupu leh Pa Thangno te’ min kipia hi.  Pr. Sandy Dee in “Saya Thang Siangh sii hma namyi sayin ath laik byi” a cih hi napi Sia Siangh in Silver Springs, Maryland, aa ASI zum ah sapna ding a ngetna min gual (list) sung pan Sia Paupu Gualnam leh Pa Thangno Sumkip te' min na thun lo or na hemkhia vinven ahihmanin ASI zum pan sapna lai ngah lo pah lian uh aa Sia Siangh deih bang lian tangtung iin Sia Paupu leh Pa Thangno te peen ASI kikhopna ah a pai thei lo ding hi ta uh hi. 

Hi bang bilbial kawmkaal ah Pa Kap Hau zongh ASI Convention pai nuam hi.  Pa Kap Hau peen ka lawm it mahmah khat ahih ban ah businessman khat ahihmanin a man zongh thei kha lo ding ahih teh ci in ka deihsakna tawh Yangon khua sung Kanna Lam (Strand Road) aa Burma Airways ticketing office ah ka kimuh khak vat uh ciang iin US ah a pai nop leh lampi khat a om lam ka gen leh sum bawl khual zin hoih pianpian laai hun ahihmanin lawp lua pha lo iin hong koih nilnel pian hi.  Ka genzawh kha nih vaal bang khit ciang iin pai nuam pan hi.  Yangon pan Pa Kap Hau leh Maymyo aa Sia Mungno te phone tawh kiho uh aa Sia Mungno in "Pu Hau aw a pai nuam takpi nahih leh Yangon ka inn uah tu mahmah iin na pai in.  Inn ah U Pau a om lian laai tak ahihmanin inn aa motor tawh hong kha thei pah ding hi.  U Pau tawh Sia Siangh kiang ah huhna na ngen pah un.  Hun tom mahmah ta hi" a cih ciang iin Pa Kap Hau zongh paipah vinghvengh iin Sia Paupu va zawn iin Sia Siangh inn ah vahawh uh aa Pa Kap Hau ading huhna va ngen uh hi.  ASI Convention ah a pai nopna thu Pa Kap Hau in a pulaak ciang iin Sia Siangh in "a hun zongh tom lua mahmah ta ahih ban ah mi mai ah zongh mai zum huai" na cih san ziau mawk ahihmanin Pa Kap Hau in zongh thuak hak sa iin naa sa mahmah hi.  “Nang hong mai zum pih ngam kei le cin midang te’n hong maizumpih ngam lo zaw kan di hi ven” a cih kawm iin kong biiang lam manawh iin Sia Paupu tawh pusuak iin ciah khia uh hi. 

Hi bang iin a muan mahmah Zomi khat ahi Sia Siangh in a na deihsak khol loh lam leh a na maizum pih ngam loh ciang iin a lungsim tawng ah naa sa velval ahihmanin ASI Convention a pai nopna khang semsem hi.  Hi bang teng tawh Pa Kap Hau a lung nuam lo aa a om ciang iin Sia Paupu in “tua bang aa lung hih mawh leh lungkham nading om kei. Sia Siangh peen ih sanggam khat, Zomi khat hi aa hong deihsak aa ih lamet man leh ama department hi laai ahihmanin amah kuppih lengg kilawm deuh ding ih cih man hi ven Pr. Sandy kiang ah gen lengg hong panpih peuhmah lel in ciai” ci kawmkawm iin a nih un Pr. Sandy Dee' inn ah vahawh iin ASI khawmpi ah Pa Kap Hau a pai nopna thu a va gen uh ciang iin Pr. Sandy in “ko bel ASI meeting leh worker te a kisaina om khol lo ahihmanin worker te' pai ding kisam a sa khol lo hi ungh.  Ahizongh’n ASI ih cih peen laymen te kikhopna ahihmanin no teng mah na pai luat ding uh hi” ci iin na hanthawn iin na panpih biambiam hi. 

Zomi makai khat ahi Sia Siangh in a panpih nop loh leh a maizumpih ngam loh pa, Zomi khat mah ahi Pa Kap Hau Gualnam peen Karen te ahi Pr. Sandy Dee in na mai zum pih ngam bilbel ahihmanin Sia Siangh in a hepkhiat kalhtang ahi Pa Thangno Sumkip leh Sia Paupu Gualnam te tawh kigawm khawm iin Pr. Sandy Dee in Pa Kap Hau ading zong tawh sapna a bawl sak ding hi ta hi.  Passport tung aa na min bang lian or na zat ding min bang lian hong pia in ci in Sia Sandy in Pa Kap Hau kiang ah ngen aa Union office pan fax tawh sapna (invitation) nget sak hi.  Pa Thangno leh Sia Paupu te in bel passport in hand iin a nei den uh ahihmanin buaina haksatna om lo hi. Pa Kap Hau peen passport tawh gamdang zin ngei nai lo, passport a cih nei nai lo ahihmanin ama adingin buaina thak khat hong kipan leuleu hi.  Passport nei nai lo, hun tom lua ta, passport ngah man ding iin ki um lo ahihmanin Pa Kap Hau a pai thei nawn lo ding hong hi ta zel hi.  Ks. 60,000 ($400 @150 kim) ki pia leh kaal 3 sung iin passport a ngah sak ngap agent khat a om thu Pa Kap Hau in a lawmpa Sia Mungno kiang ah gen hi.  Ahizongh'n ASI khawmpi pai hun ding lah kaal 3 khawng bek mah om laai ahihmanin Pa Kap Hau in ama thu iin bang mah khensat thei lo or ngam lo ahihmanin “Mungno aw, passport ka bawl ding hoih na sak aa leh nang thu, hoih nasak kei aa leh lah nang thu; nang hoih sak bangbang lungkim ding hi'ng” ci iin passport vai pum ap ngiau mawk hi.  Sia Mungno in tua agent pa a ho khit ciang iin Pa Kap Hau kiang ah “a hun lap iin passport na ngah zawh kei leh zongh na sup ding Ks. 60,000 bek hi lel aa ngah thei kha zenzen le cin a hoihna lian zaw tham ding ahihmanin Ks. 60,000 piak ding aa passport bawl ding iin ka vaikhak khin hi” cih teng tawh kiho uh hi.  A hun a cin ciang iin ASI kikhop siim ding iin Pa Kap Lian, Sia Mungno, Pa Thang Lam, Pa Thangno, leh Sia Thang Siangh te Kawlgam pan amau geelna bang ciat iin leeng khia uh hi.  Sia Paupu in US visa la khin ngah khin hinapi manlahna dang hang iin ASI Convention kikhop siim man lo hi.  Pa Kap Hau kia kinusia ta aa a passport ngah nai lo iin visa ngen thei nai lo ahihmanin amah kia lungkia leh lungneu mahmah iin om hi. Hi bang bilbial sung ah Pasian in Pa Kap Hau leh a inn kuan pih te ading a hoih peen ding mu khol ahihmanin ASI Convention a kipat ni, August 9 ni iin Yangon pan hong leeng khia thei lemlem iin tua ni mah iin Seatle khuapi, California ah hong tung iin Spoken, Washington State, ah ASI Convention a kah thei lemlem ahi hi.  ASI Convention ah a pai teng peen Sharaton Hotel ah zin tung uh aa Wednesday pan Saturday, August 9-12, 1995 ni dong Pa Kap Hau, Sia Mungno, Pa Thangno leh Pa Thang Lam te va kikhawm takpi uh hi.  Sia Mungno leh Pa Thangno te bel Kawlgam ah ciah kik uh aa Pa Kap Hau, Pa Kap Lian, Pa Thang Lam leh Sia Thang Siangh te US gam nuam gam khangto ah gamthak keek iin tu ni dong ih biak Topa Pasian' thupha tampi saang iin nuamsa iin teng suak uh hi. 

Thukhupna

Zomi SDA sung ah 1990 kum iin US gam a sik masa peen Sia Paupu hi aa Zomi SDA sung ah gamnuam gam thak keek aa 1995 kum pan US ah a teng masa peen teng Sia Kap Pau, Pa Kap Hau, Pa Kap Lian, Pa Thang Lam leh Sia Thang Siangh te a hi uh hi.  1996 kum ciang iin Pa Daltawng (Pa Thang Khan Dal) zongh kikhop siim ding iin USA ah pai aa Florida ah tu ni dong teeng hi.  1996 September kha ciang iin La Sierra Univeristy ah MBA degree la ding iin Sia Mungno zongh Riverside, California, USA, ah pai kik leuleu iin tu ni dong Riverside mah ah teeng suak hi.  Zomi  bup sung pan sawtpi laai pek iin US gamnuam a na keek aa a na teeng khin pawl khat a om uh hang iin Zomi SDA te sung pan US ah gamthak zuan or keek aa nuntak ih kipat peen 1995 kum hi pan aa kum 15 a cing ta hi pan iin USA ah ih khang sau nai het lo ahihhang iin Topa Pasian in lam tuamtuam hong hon sak ahihmanin kum 2010 ciang iin Zomi SDA pawlpi mi 100 bang kivaal ta ding ahihmanin Topa’ min ka phat hi.

Kong it Zomi SDA pawlpi mi a kua mapeuh aw koi koi ah Topa Pasian’ thupha te ih saan man iin Ama tung ah cih takna iin nei semsem zaw ni.  Leitung nopsakna sung ah mangthang kha kei ni.  Topa’n a kua maciat A thupha namkim hong buak suk ta hen.

Itna leh deihsakna tawh thupuak,

Mungno Gualnam

Riverside, California