Na Tangthu Ding - by Nangkhine

A neu lai a ka theih Timothy, a neu lai-in neu mahmah, ong tangval teh lian khialua sang zeuzau laimawk. Malaysia ZAC ah Sabbath ni sun hunpi ka zat ni lianin a it, a ngaih a duangzen tawh ka maiah Pasian' khut siangtho sungah kitenna ong neih sawnsawn ciangun kei a' dingin Timothy thumna ong suak hi. Hih Timothy thumna in zong khat vei sun hunpi zang hiding hiven, a hun manteh kilen ngeingai in, ''''''''''ciai, U Nangkhai dan kici hihtuak. A cihnopna uh bel a tomin hun sauvei zanglua cinuam uh hi. Sabbath ni tun teh ngeina dan a kikhawmpong ten bel hun tom thei thei leh utmahve un cin, ei hun ngah kha ten bel lawpin, angtangin, zingsang kisil sitset, shampoo bang nihvei thumvei nuh, satpiang bang thumvei bang a kizut setset hi. Pharisees ten ong zakei peuh leh Malaysia bel vot khollo in, khua ul den, tuivot penpen tawh ih kisil hangin ih neh dupvom zotuan khollo sam hi. Timothy masa tegel  suutphot dih ni. A thumna bel amah a aap hing. Tua leh hih Laisiangtho sung a Timothy ih cihcih kua hiam? A pa Greek mi, a nu Judah thu um mi. A thumna pa tawh ki valaak leh kilawm maw. Pawlpi piancil kiphuhcil a amapang mahmah khat hinapi in a nasepdan nengcik khat zong lai a ong at kilkel loh zawzen a bangci mi hiam cinuam phial ingh. A man at takei leh Paul in zesan meh bangin ong ne sak hi. Timothy pen tulai ei pawlpi paizia dan a kum nga sung a sepna ah om kenkan hilo in, a ki sapsapna ah pai kawikawi, ahih manin pawlpi kiphuhcil tangthu sungah ama nasepna ciapteh tak, gengen tak cing khat ong suak hi. Nasep a kipatcilin nak khangno tuak mahmah hi. Lawmngaihnop cil hun pawl hihtuak lai sawnsawn hi. Ahi zongin amah in Pasian sawltak ding lungsim ong khensat takciangin thu um mi ahi anu, api leh adiakdiakin Paul mahmah in itin, pakta mahmah uh hi. Pau bangin ka tapa ci zawzen hi.    Tangvalcil, awhuut cil laitak mi lakah na ong kisawl leh ih kam tawh ih nialloh hangin sem pong hih pong, lungsim sunga kam in bel "zen mahmah" kici hamtang in um ingh. Mi hau mi lian a maiet sauhsauh thei pawlkhat ki om ta leuleu hi. Bang a hia khat hih sak sauh sauh maibiak maiet keei, ama' phattuamna ding a zong na hi gige hi. Timothy in zong sila lungsim, sawltak lungsim pua hi, ci hi.  Ahi zongin ama' sila lungsim puak in ama' phattuamna ding hipeuhmah lo, mi tampi te phattuamna ding sila nasep nopna lungsim pua na hi gige hi. Amin mahmah zong Greek min hi-in, "Pasian Pahtawi ding" "to honor God" hih tuak gemgam zen hi. Ei mi ah zong Pasian min a tam ki om tham hi. Bangci tapsak uh hiam cih bel a mau' ap mai ni. Timothy in bel a min ii khiatna tawh kizui-in na sem pah ngiatngiat hi. Koi ah bang sem, bang bawl, kua tawh cihte ka theihsa vive hi, a ci nuam vive tek ki hi dingin kilamen ingh. Ahi zongin ken' thupisa, khangno dingin vaat si ee ka cih pawlkhat ka dipah ong phuphuin phulet ahih manin a sungkua kimu hi. Timothy leh leitungah evangelist a minthang penpen Paul khual zinkhawm uh hi. Pastor Ngul Khaw Pau leh Sia Tuan Za Kham ka mitkha ah mu in tehpih zen ingh. Kizui helhel, tulai dana khutbom tawmkhat suukziau or khepi dawn tawmkhat tuankek, hipeuhmah lo, Gupkhiatna ding lungdamna thupuak tangko dinga huihlak guahlak nisa nuaiah khe tawh pai ngiatngiat a a luzang a kipan a pumpi pan uh a aluangkhia khua ul te tu ni dong keu nailo hi. Paul ih cih kua hiam? Chritian ong suahma Christian te a natheithei a bawlsiat ding a ut ngiat a kitaklah mahmah omkhong theilo a vak kawikawi Pharisees mi a hi hi. Zeisu tawh ong kimuhkhit tak ciangin tua Zeisu thu gen dingin a manlah mahmah pa ong hikik zel hi. Timothy tua bang mi tawh ong kithuah na hi hi. Hibialbual keei in teh mate. Timothy' ministry kipatcil dan hih bang dan a hi hi. Tua ma in bel pawlpi sungah a kizahtak mahmah khangno khat na hi hi. A nu leh a pi ten a pattah uh hi zel ei. SDA pawlpi sungah a diakdiakin ih sangsiate pen effort bawlna tengah a suksia teng na hi uh hi. Atua tengmah SDA ong suak uh, a tangthu a pianthakna thu uh ong gen uh teh zak nop zawzen cih ding hi. Paul in zong Timothy kiangah a pianthakna thu gengen suutsuut niloh ding hi. Pawl dangte crusade bawlna tawh ih kilamdanna dan. Pawldangte pen a lang pang vauvau kitammuh phalo hi. Thangah in, nopci sa uh in, khasiangtho kham in, tukgawp, kipingpavei keei cih hilel ngel hi. Lystra khua church meeting khatah Paul thugenna pan Timothy tawh a kimukha uh na hi hi. Paul in a missionary paina peuhpeuhah Timothy tonpihnuam pah hi. Judah minamte lak ah a paiding na hi uh hi. Timothy' pa Greek mi himawk ahih cianga Timothy vun na ki-at kha lo sese hi. Bangcih ding? Judah mite lakah lungdamna thu tangko ding himawk. Vun at ding hipah mawk hi. Singlamteh tungah kikilh khinsa hilello maw? cihnop huai. Khankhit liatkhit a vun at ding zong thuakkhop omkha ding hi. Tu lai medical advance huna cihikza cihlah ommel nai khollo ding cileng, mataw. SDA sungah zong nu leh pa upna kibang khollo ten na vun uh hoh at maiding naivua, cihding lah hikei deuh. Timothy vun atna in a pianzia cilesa kikhek hi. Judah miten a vun at uh kiphatsak pih mahmah uh hi. Gentiles ten a at loh, a khawi hilhel uh kipakpih mahmah uh hi. Hih bang tangthu tawh na buai lua mahmah ngei zen uh hi. Timothy vun atna hangin a pa tawh ki koici muh ding, ki koici ngaihsut ding, ngaihsutpih tak huai nasa uh hiam? Tu hun teh a ut pepeuh in ih atkhiat ziauziau hangin tua hun lai-in a vundawn paihkhiat lel sangin a thu mahmah na thupit ngaihsut zaw uh hi. Lawmte khat in a tapa kiangah na nu pau nazuih leh na gawl ong meek ding hing, a ci om ngei hi. Timothy leh a pa aki koici et giaugiau zen tam? Greek nam pipi Judah minam suak hiau cileng. Bangbang a piangphial zongin: a lungsim lah na, a pumpi ci le sa lah na sa taphial leh Timothy in thuak keeikaai in Zeisu a thei nailo Judah mite mah lungtupin nei in, haksa sa pipi mahin khua khat pan khua khat pawlpi kem dingin zin kawikawi hi. Lampai dan bel noplua ken teh maw. Tua bek hilo, Paul in Timothy hanthotna na pia den keei lai hi. Tu huna ei ong kihanthotna tawh a koici hiam, tehkaak pak leng. Lawmte khat, a innkuan pih ten na kum cingta, vaihawm zekkhat nei lo ding maw? a cihuh leh, laizang tangval kimlai zi nei dinga kihan thawnthawn cihsan mawk hi. Timothy a' pen ki tuacih hanthot lam na hihiaulo mawk in, na tangval lungsimte paikhia in, ki khangno sak in, khangno lungsim vom in, teklam manawh hathat ahi tam bel theihsak khang, mataw. Ahi zongin mipi in khangno muh mahmah uh hi. Hih bang thu ong hilh dingin na khan zong cingnai taktak ahi maw, cih khawng bel tuak ngeizelleh kilawm hi. Thung na kia ngei uh hiam? Thumanlo pi-in thung ong kitun ngei hiam? Midangte tawh na upna akibatloh manin khoih ong kisawm ngei hiam? Ka khangno lai-in Sia Pau in Sakollam ah thu ong gen laitakin, inntung khawng, innkaa khawngah suangtum ong leng zeuhzeuh hi. Vantungmi makaihna tawh veng tangvalteng in va nawhkhiatsak uh hi. Pawpi mi zong hilo, khuapihte zong hilo, mi mawkmawk tangvalte mah Pasian na zang hi. Singunau sang kahlai-in Sia Liandal in sangnaupang pawlkhat tawh Pyidawtha ah Nipi siim dingin ong paipih hi. A kum bel gendah ni, senzakhee te sda suahma hi. Kigin ni a kipan thu gen ong panpah ngekngek maw. Khuamui khit teh biakinn tung aw, kawm aw tek.. te.. dek.. dek..... ong cita maw. Siapa zong dualtuanlo aidia.  Kei Pasian' thu gen dinga pulpit tungah ading hing, no! simmawh dinga pulpit tungah om ong sakei un, na ngap uh leh ka hun mankhit ciang na ngak un, a cih leh the betkhiat bang hiau. Pasian in ong huu mahmah lai hi. Timothy na tuacilo hi. Khangno mahmah. Lawp mahmah. Pasian na sem mahmah akisak laitak thungsung kidenna hi. Tua ci kha lecin na lung a kiatngap hiam? Pasian' thu gen kimlai. Mite' a dinga na semsem kawmkal ah thungkia ding in leilak tutkawm kawmtung ki ngam kawm ann ne ding. Mimawh mithatte banga sikkol ong kibulhlai ding, Thungcing ten ong hih gawpgawp laiding, ong kimudah ong ki ensan lai ding. AW!!!! Timothy in Khazih nungzuihna ii thaman na sangkha baih mahmah hi. Pasian mit tawh thu khenna leh leitung mite' mit tawh thukhenna aki lamdanna tua thungsung kawmpangah a kingaih kawmin telmuhkhia mahmah ding hi. Pasian' nungzuih cih mite upmawhna tawh ki kelkii cih nak tel mahmah ding hi. Pasian' na sem tatak cih pen ollo, baihlo tatak, kua ma pahtak ngeeiloh cih mukhia kha ding hi. En phapha sim phapha leng, Timothy pen a beh a phung a minam nusia taisan, vundawn atkhia lai. leitunga evangelist lian penpen pa nung zui in thungkiat beh lai. Khangno lailai. Kei dingin kibulh ngam kei mai ingh. Timothy pen khangno lai in, Paul tawh khual zin khawmkhawm uh in a tuntunna khua ah nungakte kiang tung pahpah ahih manin Paul in tua ci nawn ken aci hipeuhmah lo hi. Timothy pen tua bang ahilo dingin kiap khin, kipiakhia khin sitsetsa a neutunga kipan a nu leh api ten tua bang dinga apattahsa na hi hi. Pilna sang pipi zong a neihlam ki genlo hi. Thuaksiatna lianpi a thuak lam kigen bek hi. Tua bang sepna hangin mi tampite in Zeisu thu theihlawh zaw na hi hi. Khangno hangsan mahmah khat hi. Banghang hiam cih leh Paul nung zui ngam hi. Paul ong pianthaktak ciangin miten bawlsiat ding, samsiat ding, suang tawh denlup ding, khuasung pan nawhkhiat ding, satgawp ding in na ngimngim den uh hi. Paul tua cihnuam ahih uhleh a nungzui a tonpih pa zong maptuan ding uh ahi hiam? Timothy in zui ngam mawk hi. Timothy in a thuaksiatna, a khuisatna bangmah agen a at loh hangin tampitak thuak kha veve dingin ka um hi. Banghanghiam cih leh Paul in Timothy aw, na khitui luan luan lam ka thei hi, ci hi. A vun atkhiat a kipan mahmah a beh a phung a minam kiphiat khia hi, Pasian' na sem dinga a kiapna hangin a khangno nopsakna dingteng taanlawh, Paul nung azuih tentanna hangin anunna lauhuai dipkuathuai den hi. Hih te pen Pasian minthanna hang ding na hi hi. Mite' a dinga Pasian' nasep dan na hi hi. A lawmte, a innkuanpih te, a pawlpi mite' mai a vun atkhiat ding Pasian sawl na hi hi. Na sa mahmah ding hi. Ahi zongin Pasian in damdamin atkhiat sak hi. A nuntakna lui teng at khiatsak hi. Nuntakna thak pia hi. Pasian' sep vive ahi hi. Pasian in ei' a ong atkhiatsak nai hiam? Ih koilai ong atkhiatsak leh mite etteh dingin i om thei ding hiam? Khancin khita vunat ding pen lungsim bek hilo pumpi in zong thuaklah mahmah kha ding hi. Ahi zongin ettehtakcing dinga Pasian bawl na hi hi.       Khangno Timothy tungah Paul in thuhilh zel, hanthawn zel, Lai khakzel hi. Deihsakna lianpi tawh a na hih na hi hi. Khangnolai khat a dingin khuaizu bangin khum vangvang khollo thei kha ding hi. Pasian' deih thuman thutak kigengen kihilhhilh na hi uh hi. Na neu nungsanga na theihsa, na upsa thu, ong kihilh ong kipattahna laisiangtho mah nisimin simsim in la, kip paisuak in. Laisiangtho pen Pasian' lamlahna tawh ong kipia hi a, thuman thutak hilhna ding, a khialte taiina ding, a manlote a manin puahna ding, a manin nuntak theihna ding thuhilhna dingin a manpha mahmah ahi hi.

Timothy bangin khangnolai na kisa hiam? Kihilhhilh, ki hanthotthot ding kul na kisalai hiam? Khangnolai na kisak leh tua na khangnona mah pom inla, lencip, hum tentan inla, na lawpna, na thangahna te khempeuh hopkhiat ding sawm in. Ih hih theihna khempeuh ah

midangte phattuamna ding mitsuanin na sem ni. Pasian' minthanna ding, Pasian min pahtawina ding hizaw ta hen.

Midangten khangno lua laiteh, na theihna kicing nai kei, hih nasep nang tawh kituaknai kei, ong cikhain ong zahpih ong simmawhbawl theikha ding uh hi. Pasian in na min dingin Christian ong phuahsak khin hi. Christian na hihnak leh na sep ding hilel hi. Khangno lua laiteh ong kicih leh, pau theita ingh na cih ding hi. Na pilna na theihna kicing naikei, ong kicih leh, pilna nei, theihna kicing mite' nasem ding pilna kicing nailo, theihna kicing kicing neinailo mi tawm lualai mah, ci-in dawn kik ziau ding hi.

Na guallelhna a tam hangin, na gual zawhna tamkan zawlai ding hi. Pasian' vangliatna kibehlap sak in.

Timothy in Pasian'na a sepna ah khangnolai lua ingh na cilo hi. Paul nasep leh pawlpi masa te nasep na huh na panpih tawntung hi. A zenzenin Timothy in anu leh a pi leh Paul thu na nial na manglo na zuinuamlo hi leh tu a bangin upna sungah khangkhia in kizang kha hethet lo ding hi. Paul laikhak tawpna zong ama min hikha hetlo ding banah pawlpi masa lam ten hih banga mihoih khangno makai neikha hetlo ding uh hi. Tulai taka pawlpi sungah a diakdiakin khangnolai makai te aw, na tangthu dinguh na geelgeel laitak uh ahi hi.