May 6, 2009 kum in New York ka tung-a May 7, 2009 ni-in, Jefferson City, MO ka tung hi. MO ah kha khat sung ka om-a Sya, Thangsiangh kiangah khat vei ka hawh hi. Tua khit ciangin, May kha bei kuan in Ka sanggam te omna Guymon, OK ah ka pai hi. Amau kiang ka tun ciangin, ei mi na tamnai hetlo-a kithutuak in na ki-it thei mahmah uha, Friday ni nitaak sim in anasep man khit uh zan 12:00pm khit ciangin, Na sepna pan pai suak in Ka U te inn ah biakpiakna hun nabawl khawm den uha zangiak suak in zingsang Sabbath ni kikhawm den uh hi. Friday nitaak hun bawlna ah Zogam-a Pasian na sep nading ci-in, sum kidong uh-a, pawl khat in $1,2...10 dong amau ii thangah dan leh kipiak zawh zah khia ciat uh hi.
Tua bangh teng tawh asum kidon teng uh pawl khat pha ta ahih manin kizangh thei at ding hi ve aw.. I hi cih koih2 sangin Pasian na kisep na pahpah leh ci uha, bangh ci zat ding cih kikupna ong nei uh hi. Kei pen nasep nei nailo sum khia zonailo hing. Azat dan ding uh ong kokum totot uha, pawl khat in khau khat ah acimawh zawdeuh te Second hand puan leisak in hawmsak leng ci, Pawl khat in, Laibu bawl in amawkna in hawm leng ci, Pawl khat in Sangnaupang sangkah zolo teng panpih leng ci, Pawl khat in Gospel pai sak leng ci uha, atawpna ciangin Gospel paisak phot ding ong kithukim uha, apai sak ding uh ong lunghimawh uh ciangin, Ken Gospel paisak ii hih leh kei om lai in Ngente Khawk Gospel (NKG) cih khat kinei-a, Kum khat in atawm pen khat veita khawk sungah Gospel pai uh hi. Khawkpawi nei den uh hi. Amau leh amau hanciamna hi. NKG in atam hetlo sum bul tengh 1 nei uha, ameet bawl dingin Khawk sungah Pawlpi khat ta kum 1 khat vei ta kikhel in zangh uha, kum cin ciangin, tengh 1 azangte in tengh 1 ½ tawh loh kik cih danin hanciam uh hi. Tua angah uh sumte gospel pai na leh kawakawa aneih uh ciangin zangh uh hi. Khawkpawi te ah innteekte tul 50 tawh huh cih dan pian hi. Tua hi in amau tawh kizom leng Pasian na kisem thei kha ding hi ka ci hi.
Tua teng khit ciangin, lawm teng in zongh hoih sa uha, tua leh amau tawh kizom leng ai ve ci uh hi. Tua ciangin khat in ei zongh bangh mah pi ii hih nailoh hangin, ahanciam toto ding ii hih teh kiminvawhna khat nei leng hoihlo dia? cih ong pulaak-a, hoih kisa tek in bangh ci ding cih ciangin, Zomi Adventist Association (ZAA) ci dia? cih ciangin hoih kisa kithukimpah-a, tua ni June 27, 2009 Sabbath ni in ZAA minvawh kikipsak hi.
Tua ciangin, ZAA in NGK te tukum gospel pai nadingin Kawlsum tul 50 tawh panpih ni alem aa leh mailam ah kisam asak uh te ong pulaak uh hen la, en ii huh zawhzah in panpih ni cih thukimna kinei in, NGK makaipi Phaiza Pa Mung hopih dingin kei ong seh uha, Kawlgam phone card $ 10 man khat ong pia pah uha, Azingciang June 28, 2009 ni Sunday ni-in, Guymon SDA biakinnpi puah kawm dingin kapai na vuah NGK makeup Phaiza Pa Mung ka hopih pah hi. Hoih takin kiho thei in Pa Mung in nuam mahmah ingh ong ci hi. Ken zongh hoih tak in hanciam ni Topa’ na semkhawm ni thu kingetsak2 ding hi hang ka ci hi. Tua khit ciangin, ZAA in NGT leh ZAA in Pasian nasep khop nading ah kisam na sak uh te ong gen un ong ci uh hi.. ka ci hi.
August 26, 2009 ni ciangin, NGK makaipi Phaiza Pa Mung in Tedim, Myomah veng Pa Denghau te internet sai LEO pan in hih anua-a lai ong khak hi.
from Leo Denghau <leodzhau@gmail.com>
date Wed, Aug 26, 2009 at 9:38 PM
subject NGENTE KHAWK
mailed-by gmail.com hide details 8/26/09
lai tawh ong hoh pih ung nang zong sang gam teng tawh dam ding ong lam en ung ko zong a kua mah ciat dam tek ung no kiang ah bang thu lam dang om a hiam ko kiang lam gen ding thu lam dang om kei.
Tua ciang nung a nong hoh pih na vai te zong khawk miting nei pah ung nong thu gen teng ka gen ciang tha ngah in lung dam thei mah mah ung.Gospel pai ciang a zat ding a nong khak ks/-50000/-pa tung pan kim tak ung na ngah ung lung dam mah mah ung khawk thu ki kup khen sat na a nuai a bang hi
(1)khawk gaspel pai hun ding pen nong pan pih na uh tawh tha ngah in khawk sung teng bek hi lo in Tedim gamsung teeng bang zong pai nuam ung. TU leh tu a pai ding lem sa keiung. a hang pen Khamtung nuntak na natheih sa bang mah in na sep tam na Annek tuidawn haksatna mun a hih man hi Pasian in ong thukim pih leh Anlak khit nasep man hun November 20, 2009 pan ki pat ding nagel ung.
(2)Keyboard pen khawk in thangah in nuam thei mahmah ung. ka ki kupkup uh ciang Sai Sangpi te'n ong vaihawm sak vet un. number 700 te ngenleng tu hunpen mi pilna hauh na te khang in vanzatte zong sensang thei mahmah hi. Pasian in thupha on gpiak sak leh kumtampi kizang ding a hih man in Pasian leh No teng kong muan man uh hi.
550 tepen Ks 950000
700 tepen Ks 1400000
(3)Khawk sia pen kisam mahmah ka hih man un lungdam in thangah mahmah ung bang hun a kipan kiding a khasum bangzah tawh na zong ding cih zong thei nuam ung. Nong thukimpih uh leh ka kikup na vuah Khawk sung a it a vei kisam sa ka hih man un, Sia Suan Khup bang hi leh deih ung. a hi zongin no nongdeihsak zawkuh a dang a om leh zong no hoih sak bangbang lungkim hi ung.
Hih a tung a bang teng in na ki kum ung ka kikup na te uh lian lua na sak khak uh leh Pasian leh No Unau teng kong muan man uh hi. Keyboard zong Gospel paiciang zat thei ding in na lamen nung i gel na te a tang tung theihna dingin no a dingin thu na gen den ung.
Topa'n thupha ong pia ta hen.
Hongit NGENTE KHAWK
Pa Vungh Sian Mung Pa Kap Khan Pau Sia Thang Za Mung
Chairman Secretary Treasurer
Phaiza Ngente Thalmual
Hi bangh lai ong khak ciangin, ZAA te kilungdam mahmah aa, Khawksia ding leh Keyboard ding pen vaihawm sak kisawm pah in hih anua-a lai ka khak uh hi.
from Zomi Adventist Association <zaa27609@gmail.com>
to Leo Denghau <leodzhau@gmail.com>
date Mon, Sep 14, 2009 at 3:37 PM
subject Re: NGENTE KHAWK
mailed-by gmail.com hide details 9/14/09
NKG makaipi teng,
dam in nong lai khak uh na ngah ka hih manun lungdam ungh. No gen thute uh ka sim khak uh ciangun, tha na ngah mahmah ungh.
Gospel pai vai ding tawh kisai pen Topa'n thupha ong piak leh tu-a kipan in no Ngente Khawk Gospel (NKG) te leh ko hi lam-a om Zomi Adventist Association (ZAA) teng kipawl khawmin na sem toto dingin gelna tampi ka na nei uh hi. Tua ahih manin No tawh Pasian na sem khawm thei ding ka hih manun, Lungdam pha diak ungh.
Tua ciangin tutung Nov. 20 ni-in kipan in Tedim Gambup Gospel napai nung nong cih sawn2 uh ciangun, lungdam sem sem ungh. Tua hi-in, Topa' adingin, na kipiakkhiat nopna uh na lungsim uh Topa'n ong thei khin ding ahih manin, ong kamciamsa mah bangin athupha tawh ong tuam ciat hen!
Na pai uh ciangun, Na tuntun na uh khua tawh, Pawlpi mite tawh, na hun bawllai uh, na lam paina uh cih danin ahoih thei2 dingin, Maan ong kila unla, athu ala akim tak-in nong khak kik nadingun zong ong thum lai lai ungh. Maanbu pen ahih theih leh Digital Sya, Genmung in nei-in cin na kawm mai un... Ks. 10000/- tawh sum pen tu-a kong khak sa uh pen kicinglo thei ding hi ahi zongin, NKG fund na zang phot unla, Kum Thak khit ciangin ong vaihawm kik ding hi ungh. Hong hanciam un... mai lam ah Khawksya, Keyboard, Meiset, gospel uniform, computer, maanbu, video zaihna cih te Pasian thute laibu tawh bawl ding zong vaihawm toto nuam lai i hih manin Thunget hahkat tek ni. Topa'n ong sik ding hi.
Anih veina ah atawm pen in Khawksia, Keyboard, Uniform leh Na sermon bu ding uh manglai pan zo laibu tawh nei zo dingin lamen hang.
Lai nong khak kik uh ciangun, E-mail ID ong bawl unla, tua tawh ong khak un.
Kithu za zel ni.
Ong it Khazih sungah
ZAA
Tua khit ciangin, internet azatna dingun, Tedim ong pai uh kul ding ahih manin, ci in lawmte in Na Pate tawh na kiho uh ciangin vaikhak pah leng ii Fund sum zongh nem tuam ding acih uh ciangin, Ka Pate kahopih kawm uh athu om dan ka gen den uha, Aman zongh NKG te na zasak den uh hi. Phone atuam in hopih ding pen baihlo hi bangh hang hiam cih leh nai khat sung deih tak in na ii sep ciangin, $ 10 kingahlo hi. Amau kiangah Phone om pahlo ahih manin sap sak na leh ii meek kik ciangin lut pah2 loh teng tawh ii hun kihawm thawh leh sum kihawm tawh ahih manin Ka Pa akivai khak den ahi hi.
Khawksia ding tawh kisai pen Phaiza Sya, Khup ong nget uh ciangin, khat bek kicial sawmlo-a aut leh alawp adang zongh om kha ding ahih manin Pawlpi mikiim in thei leh ki-ut ahih manin, Nov. 15, 2009 ni-in, NKG sia ding ZAA in cialsak ding cih tawh kiton in ZAA in NKG te Nov.20, 2009 ni gospel apai ciangin, Pawlpi kiim ah application na hawm uh henla, tua pan in en NKG te tawh kikum cial leng cih na in form te kikhak/kipua sak hi. Tua ban ah ong nget uh Keyboard zongh YAMAHA 550,700 te hi-a, atawm man zaw pen YAMAHA 550 te khat gospel pai ciangin, azat theih pah dingun kileisak pah hi.
Application form ong ten te in Tedim ah Ka Pa kiangah na puak ding uha, Ka U Pau ahih kei leh Syapi, Genmung in internet tawh ong khak ding uha, abei teng ZAA in piak dingin kikhensat hi. Anunung pen March 2010 dong kingak ding kici hi.

Second hand hawm ding leh Laibu bawl ding vai zongh tua kikaal in kivaan-a Ka Pa tungtawn in MUC lai-atpi Sya, Kammung tawh zong kithuzasak uh hi. Lai lam pen Kei mah in Sya, Mangbawi tawh ka kiho-a amah pen Translator dingin, ka deih uha, Kawlpi ahih kei leh Tedim ah om dingin, aman lai teitei ding-a, aman masak2 ZAA in abu in bawlin, Sangnuapang leh Gospel pai dinga kicial te hawmsak ding cih geelna kinei hi. Sya, Mangbawi pen ZAA in kha sum tul 50 pia ding-a ken tul 50 piak beh ding cih tawh ka kiho uha, Aman zongh ut mah ingh… Lai tawh kisai pen ka lunggulh ngiat hi ci-a ahi zongh in tu le tu in senpi nai keng ka sang ong man phot ning May kha sungah man thei kha ning ong cih ciangin, awh ci in amaa man hun ding kingak lai hi.
Tua kawmkaal ah aman Delhi pan hih in, Delhi Refugee sung tengah na sem leng cih ong ngen-a ka lawmte in hoihsa mah uha ahi zongh in buaina ong kipan2 ta ahih manin dawn na kician ka nei thei nai kei uh hi.
NOTE: ZAA IN PAWLLUT DINGIN MI ZAWL SAWMLO UH HI BANG HANG HIAM CIH LEH USA AH SUM DON PEN TAM MAHMAH IN HAKSA KISA TEK HI. AHI ZONGIN ZAA TE II NA SEP HOIH ASA AOM AA ONG LUTNOP UH LEH PAWLMI DING SANG DING CI UH HI.
ZAA IN MUC LEH MYUM TE BUAISAKNA OMLO IN ZAA ABUAISAK ONG OM HI ZAW HI. ZAA IN MUC LEH MYUM TAWH BUAI PEUH MAH LO IN KIPEL PEL ZAW HI.
ZAA IN PASIAN NASEPNA THUPI NGAIH SUT PEN IN NEI UHA, M HI TA LE C HI TA LEH LUNGDAMNA THU AH KHEN TUAM NEILO UH HI.
Kei Mimal theihna tawh
Sangpi
No comments:
Post a Comment