UNITY IN CHRIST - Dothang

"Zeisu sungah ki pumkhatna

tawh

    Mapang khawm ni"

              Thupatna:

             Zomite sungah ki pumkhatna om thei ding hinapi, om thei ngiatlo ahihmanin zomi mipil tampi in ki pumkhat nading thu tawh kisai veina leh lainatna tawh khuak tui liangin a lai gelh uh ka sim khak tawm nawn lo ding hi. Ki pumkhatna thupi sa-in  lungsim in thei napi hang; a tangpek nuam den, a theihna a suang, a hauhna a suang, aliatna a suang, a degree a suang  min nungah ( A pan Z ki leh bulh),  peuh, zomite lak leh Zomi SDA te lakah om ih hihmain ki pumkhat thei lo-in ankhing lom bang in ngimna tangtung loin ki pilkhkhia pahpah hi. Mihingte nuntakna dingin huih leh tui a kisam pen khat ahihmah bangin Zomite leh Zomi SDA te sungah ki pumkhat theihna dingin “ITNA” a kisam pen leh akul pen ahihi.

          Ganhingte enleng amau nam mah ki khawl liailiai in, sing kungte enleng amau nam ki batpih mah tawh khawl po uh hi. Vasate enleng amau nampih mah tawh leng khawm liailiai uh hi. Mihingte pen ganhing leh singkung  lopate sang ngaihsutna ki cing hi zaw napi I ki gawm thei kei hi. Tua ahihmanin Zeisusungah ki pumkhatna cih thu a hong gelh khia ka hihi. Zomite leh Zomi SDA te lakah ki pumkhat theihna dingin “ITNA” hi cih ka mukhia hi. "ITNA" a om kei leh cik mah ciangin i ki pumkhat thei ngiat kei ding aa, Leitung hun bei dongin Satan leh Zeisu a kido den mah bangin unau sanggamt, beh leh phung sung,  ki gal neih den ding hi hang cih ka um lai hi. Ki itna om kei iin; ki pumkhatna om thei kei leh ki langneihna tawh hunhong bei lel ding aa, gupna I tan lawh ding zong ka kha lai hi..  Zeisu sungah I ki pumkhat theihna dingin kei deih kaih ahilo laisiang tho en suk dih ni…

                1.     Inkuan ki itna: Pasian in, innkuan a ki pumkhat dingin mihing masa Adam leh Eve na piang sak hi (Gen1:27, 28). Innkuan sungah itna om loin Eve in ama theihna suangin, apasal sangin hauhna, liatna melhoihna, ki saktheihnate, na suang ahihmanin mawhna sungah na puk hi (Gen3:5-7). Innkuan sungah itna na neih kei leh ki pumkhatna  om theilo ding  aa, inn sungah ki galneihna om den ding hi. Cik mah in innkuan nuam na hi ngei kei ding hi. Laphuak siam khatin, Innkuan nuam van gam valep hi ci hi. Innkuan sungah itna a om kei leh vangam tawh ki gamla hi. Tua ahihmanin ki pumkhatna zomite sung, zomi SDA te sungah om theihna dingin innkuanpih te it masak kul hi. Ki pum khatna dingin innkuan sungah sanggam itna zong I neih kul leh behlap toh a kul khat hi (IIPet 1:7). (Ipet1:22 ) ah lungsim ki neih khem loin na ki it un ci hi. Zeisu sungah unau bangin na ki itna uh na zom suak in khat leh khat ki itin ki zahtak bawl ding hi na ci lai hi.( Heb13:1, Rom12:10). Kha lamah en leng i pawlpi mite zong i innkuanpihte i unaupihte hi uh hi.. Na sanggamte khat tawh na ki lem kei leh biakna huang sung zong lut ken la, ki lemna va bawlma sa in Zesu in ci zen hi..Pulpit tungah Pasian mi hi kisa in Laisingtho tang 10 tang 100  man in thu na gen hang innkuan sung leh pawlpi sung ah itna neiloin kilemna na neih kei leh  Pasian thu a gen na hih hang a mawkna  hi lel hi.....

                 2.   Lawmta ki itna: Ki pumkhatna dingin lawmta ki itna zong a thupi mahmah khat a hihi. Lawmta ki it zen leng mete guai I pawl sung nak nop mahmah ding hi ven. Johnathan leh David te lawmta ki itna lungngaih ding thupi ka sa hi. (I Samuel13,14,15,16) sim in. Pawlpi sungah maikaipite lawmta veve hi uh aa, hong ki lem zen leh uh mete guai, ut zen sing ee,!!! Ki itna nei in mapang khawm liailiai zen leng, tu zawh kum 5 khit ciang Zomi SDA bangtzah takin nop ci ding cih ka sunmang in ka gel aa, nuam sa mahmah khin-in ka nuinui hi..Paunak 27:10 ah “Lawmte it ban ah, Pa’ lawmte na ngawn it ding” cih ciang na dong in mipil pen Solomon in na gen hi. Ki pumkhat na ding in lawmta ki it na zongh neih ding a thupi mahmah  bang in pa' lawmte na dong in itna zong nak thupi san hi. Lawmte ih it zawh kei leh Zeisu sung ah ki pumkhat theilo ding hi hang. Zeisu in a nungzuite kiang h itna neilo te’n ka nung hong zui theilo ding  ci’n thu na hilh hi. Zeisu nungzui hing ki ci aa, lawmte ih it theih kei leh, Zeisu nungzui ih kicih pen a khiatna omlo ding aa, Satan nungzui ki hi zaw thei ding hi.

            

                3.   Agape itna: Pasian hong itna pen "AGAPE" itna hi aa, leitung itnate, nu leh pa ong itna, lawm leh gual itna tawh teh theihloh itna hi John 3:16.  Galte nangawn dongin it ding zongh thupi hi cih , Zeisu in na hilh beh lai hi. Tu laitak aa ih ki eelpihte pen ih gal zong hi nai beeklo in, unau khat leh gam khat, minam khat, pau ki bang khat hi lai hi hang. Tua a "AGAPE" itna ei a dingin koi ah om hiam? Tua in ong taisan ahiam? En a taisan ih hiam? I John 4:7 ah “Itna a nei mi peuh mah Pasian tate hi aa, Pasian a thei uh hi” na ci hi. Itna na neih kei leh Pasian ta hilo in, piangthak na kisak hangin Pasian zong a theilo na hi hi.  "AGAPE" itna in sihzaang, saizaang, teeizaang, zo, tedim etc. cih deidan na omlo in a vek in it kim  hi.Ki pumkhatna in Zeisu sung bek ah om hi.Zeisu na neih kei leh ki pumkhatna deih lo ding hi teh. Late laiat siampa in "Mite i muan sangin Pasian muan ding hoih zaw hi ci hi.. Pasian sungah na khem peuh om hi, Ama lam ah ki hei in zuan leng khazih sungah i ki pumkhat thei ding hi. Ki pumkhat thei nailo i hihmanin Zeisu a nei nai lo i hihi.

             Thu khupna:

                  Zeisu sungah ki pumkhat in, thupha ih ngah theih nadingin kamsang pi Isaiah in ong thuhilh hi. Isaiah 40:3,4 sung na sim in. Zeisu' leh a thupha  ei lak ah ongtual bial theih nadingin mualngiamte ih vuktam kul aa, mualsangte ih tawhtaam kul hi. Cihnop na ah, ih ki hihsakna, ih kiphatsakna, i ki pilsakna..etc.. teng zong niamkhiat kul aa, cimawhte leh beidongmite, a ki nengngaimmite phawng to in ; a zawng a hau , apil a hai, ki itna tawh ki lemna, a om mateng Zeisu hong lenna nuam lo ding cih ahihi.  Zeisu hong pai in hong lennat theih nading ki itna leh ki pumkhatna tawh lam sial khawm  ding hi hang.Na suanglungtangte satkham inla, lungsim hoih tawh na gam na lei na minam puah in zuun in kem in. "A" pan "Z" ki lehbulh zihziah na degree ki kisaktheih pih in tapkual kalkak in kampaupau nawn ken!!Topa gam leh lei a dingin sep khiatna thupi mahmah hi. Sem khawm ni ci'n hong zawn ing. Zeisu sungah ih ki pumkhat mateng, Zeisu ih sungah hongten mateng, thupha guah ong zuu theilo ding aa, tua ong zuk theih nadingin a tung aa ih gen  "ITNA" teng ih neih kul hi. Colossians 3:8 “Tu in hehna, thangpaihna, muhdahna, gensiatna, kamhoihlo pauna cihte nei nawn kei un” Vs. 23 ah “Mite nasem bang in ki ngaihsunlo in Pasian nasem bangin ki ngaihsun unla, na sepna peuh uh lungsim takpi tawh lawp  in  sem un”. Ui leh zawhngeu ih batlaiteng khamang thang lah man ngei kei ni, Zeisu lah ih sungah ong teng ngei ngei lo ding hi. A sim mimal khempeuh Topa’n a ma nasem ding nang leh kei hong tel hi cih a theitel dingin thupha ong pia henla, khut khat tawi khe khat khai bangin Topa a dingin na semkhawm ciat ni cih ka thu nget na ahihi. Amen! Gen khialhte note leh leh i biak PASIAN in hong mai sak ta un..Veina leh lainatna tawh kong gelhkhiat hi.............

--

"ITNA NEITE IN  KAMPAU ZIAU TAWH IT ING CILO AA,  SEPKHIATNA (ACTION)  TAWH LAK ZAW HI"

ITNA BUL PHUH:

Dothang

Spicer Memorial College

Pune- INDIA

Ph: +919762354452