Lampi sial huai lua ta….lampite neu lua….tou lua…kawilua hi ven….kua in lampi ong sial sak ding???? GZA te in ong sialsak ding maw.?? Kumpi te in ong sialsak ding maw.?? Khuasung hausa ulian te in ong sialsak ding maw.?? KUA IN LAMPI ONG SIAL SAK DING?? Them cik en suk pak ni…
Khamtung gam khuata lam khawng ah ii zin ciangin lampi neu ban ah tou/suk iin kenn lailai hi. Tua bang lampi te ah ii pai ciangin ii lampai na bek hilo ii launa ii ki khuangkhohna tengin zong ong gim sak tuam mahmah hi. Khua lam khawng ah Makai Ulian khat ong pai ding ciangin taangtha ki kuan in nakpi takin na ki sem iin lam ki sial hi. Lampi gol henla totnop leh ki gimlo tuam zen hi. Tua hi aa lamgol leh lamnuam ki tawn nuam ciat ahih manin lampi pen nak sial huai mahmah hi.
Lai Siangtho sung ii et ciangin aminthang lamsialpa khat na om hi. Luke 1:17 “Amah pen kamsang Elijah mah bangin thahatna leh vangliatna tawh Pasian mai-ah hong mapai ding hi. Pate leh tate kilemsak kikin, mihoihte' lungsim bang a neihna dingun thumanglo mite' lungsim heisak ding a, Topa-a' dingin a kilawm dingin mite a bawlkhol ding hi," a ci hi.”
Zeisu ong suahna ding, ong pai na dingin lampi sial kholh kul dan hih tuak hi. Lamsialpa nasep Pate leh tate ki lemsakcih ii et ciangin a lungkhauh, a genhak, a philcin, leh a lehdo mi te a lungsim uh tamzan sakin mualte tokhia in guamkuak te vukh ding aa lampi kawi te tangsak iin totaam ding a hih tuak hi. Mihoiht’e lungsim bang a neihna dingun thumanglo mite’ lungsim heisak ding cih en leuleu leng, amau leh amau pil ki sa tei kisa aa a ki gen thukhat mansawmlo phadeuh paupeeng, thumanglo, a lehtat mite a lungsim te uh heikik ding na sep na hihi. Topa-a’ dingin a kilawm dingin mite a bawlkhol ding hih a tung aa te a zawhkhit ciangin mi te Topa a ding ki lawm pan ding hi.
Zeisu ong suah pawi ong tung ding hita aa (ani aki theihloh hangin khuadam hun sung) Zeisu ong suahna dingin ei Zeisu a it anung zui mite in lampi ii sial kul ding hi. Zeisu ii lungsim sungah ong suah theihna dingin ei mahmah in zong ii lungsim lampi ii sial kul ta ding hi. Ei leh ei ki en kik iin ka pa, ka sanggam, ka lawmte leh ka khuapihte tawh a ki lemlo mi ka hiam….ka ki lemlohna bang hang hiam….ka lungsim a khauh luat man hiam….kei leh kei ka kiphatsak luat man hiam…za deihlua, min deihlua, sum en lua….lua tampi takin ka nuntakna ong tuam lua kha hiam…Hoih tak ki sitpha kik ni… Tua bang lungsim gitlohna, huaihamna leh ki elna lungsim ii neih lai siah Zeisu ii sungah ong suak theilo ding hi.
Mihing pen k icing omlo aa…ii lungsim ngeina taktak tawh ahoih kua mah om hetlo hi hang. Mite lungsim puah dingin kua in ki cing aa kua hoih hiam..ci in khat leh khat zong ki thanem suah thei lua hi. Ahi zongin mite lungsim apuah dingin ii ki cing zo kei zongin ei mah leh eimah lungsim ki puah hun lua ta hi….Zeisu na lungsim sung, na nuntakna sung, na innkuan bangkhua sung, leh na khuasungah ong suahna dingin KUA IN LAMPI SIAL DING HIAM???
Ih biak Topa in a ki cinglo ahuaiham, a ngongtat, a langdo, leh ahoihlo ii lungsim te ii ki puah zawhna ding tha ong guan henla, tuni in ii nuntakna sung, innkuan sung, khua sung leh mimal khat ciat nuntakna sungah thupha ong puak naungek Zeisu ong nungta ta hen. Amen!
Happy Sabbath...
Khaineu Hatlangh
Spicer Memorial College
No comments:
Post a Comment