Suahni Neipa Omna - Kskhaiboih

Hunkhat lai in ah mihaupa suahni pawi kibawl hi. Pawipi sungah  a zawng ahau, apil amawl kihel kim hi.. Tua pawipi ahih leh nopci mahmah in thupi kisa mahmah hi.

 

A kibawl ngei pawi khempeuh sangin nopci zawpeka, nek le dawn, alim a-al kicingtak in om ziahziah hi. Mipi akua mapeuh in zong nuamsa mahmah in gualnopna le lungdam kipahna awging vive kiza hi. Duh bang ne, duh bangbang dawn, awng in laam in hong sa ngeingai uh hi.

Tuabang hunlai tak in suahni neipa zong pawi innpi sung vel in hong pai kawikawi a, pawi sim dinga kilawm a omlai hiam ci-in innkim innpam en dingin innmai lamah khuadak in hong pusuakkhia hi.

 

Tuabang kawmkal tawh khua hong zan to pianta ahih manin pawi innpi kongte hong kikhak in innpua lama khudak suahni neipa kong hong kikhaksan kha hiau mawk hi. Suahni neipa in kong hong keuhkeuh hangin tumging tuamtuam le lasak lamna awgingte hangin kuaman hong zalo hi. Mipite ahih leh pawi I nopna sungah kidiah in suahni neipa zong phawkin hong kinei khanawn lo hi.

Khua zan semsem in vuuknelte hong kia a, huihvot hong hat semsem ta hi. Suahni neipa ahih leh innkong mai ah kong kihon ding ngakin avot mahmah vuuknel le huihdam kawmah ling keuhkeuh in hong om hi….

Sanggam aw hih a lungdam huai Christmas pawipi sungah suahni neipa hong om mah hiam lungngaih dih in. Ami zata lungdam kipahna hunin khattang khuavot daidam nuai ah om ding na phal ngam maw. Kongbiang ah hon ngakngak lai hi.

Mi khempeuh lungdam kipahna, suahni neipa ompihna anuam Christmas hunpha nang le na bangkua sungah hong tungsuk ta hen.

           

                                                                                                                           By: Khup Sian Khai (kskhaiboih)