Hih Christmas tangthu tomno sau na sim sak un. Lungdam hi.
Adam leh Eve hong mawh lian uh teh Vangtung aa emergency meeting kisam pah hi. Job sung ih sim ciangin Pasian in Meeting samngei lua aa vantung mi khempeuh ban ah Satan na leng leitung aitang in na pai ngei cih ih thei hi. Job 1: 6.
Vantung khempeuh dahna tawh kidim hi.Adam innkuan pih teng si ding beklo leitung ah natna, hamsatna te in tuamta aa suahtak nading omlo cih zong vantung mi ten thei hi. Tua lai takin Topa Zeisu hong ding khia aa Khuavak in atuam Pa Pasian kiang ah hong nai in Pa tawh naitak in hong kiho uh hi. Thum vei vangliatna khuavak in thuam hi. A 3 veina ciang in maitai sa, lungmuan maipuak tawh hong pusuak khia hi.
Vantungmite tung ah Topa Zeisu in tangko na khat hong nei hi. “Hih asi ding Adam te hotkhiat na ding kei mahmah PA maiah ka kipia zo hi, hotkhiatna lampi ki hong ta hi. Tua in amau te ading kei leitung ah katuaksuk ding aa amau te sihdingtang in ka si ding hi. Amau te ka honkhia ding hi. Amau te in mawhna ki siikin Pasian thukham te a zuihkik theih na ding (Pasian ukna sungah lutkik na) ka sisan tawh mawhmaina ka ngetsak ding hi ci hi. Tua hihman in amau te Eden huansung ah lutkik in nuntakna singkung gah ne kik thei ding uh hi” ci hi. (Story of Redemption Pg 43-44)
Vantung mi te in tua thu a zak uh ciang in lungdam zolo uh hi. A it mahmah uh Vanmang pipa Satan khutsung ah sih ding cih pen ngaihsun zolo uh hi. A hi zong in mawhna hang aa Pasian hehna leh mihing te kikal ah amah in palai sem ding. Leitung, vangtung vangliatna te nusia in, mihing bang in kiniamkhiat ding. Satan ze et nate mah thuak ding aa ahizong tua ze et nate gualzawh ding. Leitung ah asia pen sihna tawh si ding aa leitungbup mawhna te pua ding, tua zawh ciang bek in hotkhiatna te picing thei pan cih gupkhiatna geelna (plan) hong genkhiat tak ciang in vantungmi te sung pan tawm in sang thei pan lai uh hi. A tamzaw in sang theilo uh hi. Tua ciang in amah pen sihna khutnuai ah si suaklo ding aa nithum ni ciang in Pasian in sihna pan thokiksak ding hi. Sihna gualzo,Satan guallel ding hi cihzong vanmisiangte tung ah tangko hi.
Vantung mi te in Topa maiah kun in amua te nuntakna mihing tatkhiat na ding in pia uh hi. Topa in piangsakpa, amah pumpi simloh vangtung mi te nuntakna in tua sihna lohzolo ding cih thu gen hi. Bang hang hiam cihleh Pasian thukham in Pasian zahmah in siangtho hi. Pasian bangmah in kikhel mawk theilo hi. Tua ahihman in Pasian thukham palsatna hang aa mawhsut na in Pasian zahmah tawh kizakim mawhsutna hi ding hi. (PP p63)
Topa in mihing pianzia ka lak ni ciang in no te sang in thanem zaw ding ka hihman in ka thanem hun ciang thanong piak , nong panpih ding uh hi ci'n vantungmi siangtho te tungah thuum zaw hi. Tua gupkhiatna nasep kizawh ciang in vantung kumpi gam leh kumpi za Pa pasian in kei tung ah hong ap ding aa( Mat28:18 “ Jesu in amau te kiangah , vantung ahizong , leitung ahizongvanliatna khempeuh kei hong kipia zohi) Satan leh a nungzui teng ki sumaimang ding a hihna te zong gen hi. Tua zawh ciang bek in vangtung ah angei bang in nopna tawh hong ki dim kik thei pan hi. Adam leh Eve sihna pan atan khiapen Topa Zeisu a hi hi. Hih geelna pen BC bei, AD pat khawng aa geelna hipan zenzen lo hi.
Mang 13:8
“ Leitung a cilpan thatna athuak khin tuuno laibu nuntakna laibu sung ah ami uh kigelhlo leitung mi khempeuh in sahang a bia uh hi.”
John 1:29 “ En un Leitung mawhna a puakhia Pasian Tuuno”
1. Nang leh kei zong i pianma, Topa zeisu in tatna sisan, a nuntakna hong piaksak khin zo hi. 1Peter 1:19-20
“Tuuno bangin paubaan'na a omlo, a manpha mahmah Khrih, biakna-in a hong kipiakna tawh Pasian in note a hong suaktasak ahi hi. 20 Pasian in hihbang dingin leitung pian'ma pekin Khrih a teelsa hi a, note a hong khualna-in tuhun nunung ciangin Pasian in note kiangah amah a hong lakkhia pan ahi hi”
Adam tungah Pasian in leitung buppi hotkhiatna ngah na ding zia teng hilh khol hi. Calvary mualtung aa Topa Zeisu in leitung mi tang dingin sihna tawh tatkhiatna hong piak zia ding te zong lakkhol hi. Adam in mawhna , thukham palsatna ii siatzia leh Pasian hotkhiatzia , mawhmaina ngetzia leh mawhsuut zia te theihtel na ding in Pasian in sisan, nuntakna tawh mawhsut zia Adam hilh hi. Adam mawhmai na ding in tuuno tawh mawhsuutna a bawl ding a hi hi. Adam in tuuno tungah akhut nga in a ma mawhna te suuta, ganno agawh ciang in si ding aa kitom lekek tua ganno a muh ciang Calvary mual aa Topa Zeisu sihna te galmuh thei hi.
Adam in mawhsuut biakna hong piak a ki pan in leitung ah hong suak ding nuangeek lam en tawn tung uh hi. Ani ahun amun te bel theilo uh hi. Pasian in gupkhiatna geelna a neih lampen Satan in theilua hi. Messiah naungeek hong suak ding cihzong thei hi. A hizong in ani, amun leh bangci in hong suak ding cih theilo hi. Satan in zong na pang gige hi. Israel te Egypt pan hong pusuak khiat ding uh ciang in Satan in Topa Zeisu naungeek in hong suak ding sa aa Pharaoh kumpi zang in hong suaknapang lak ah pasal no teng na that sak hi. A hizong hong suak ding Messiahnaungeek sukha lo hi. Tua khit Bethlehem khua ah Messiah naungeek hong suak taktak ciang in zong Satan in Herod kumpizang in that ding in na zong aa Pasian kepna tawh sukha lo zel hi.
Satan in messiah naungeek hong suahna ding tawh kizui in Pasian ta te Aman Pasian biakna pan paikhialh theihna ding lampi Babylon pan dawibiakna tawh mapang khin zo hi. Baal pasian or Nimrod te nupa zang in pasian dang biakna ding lampi hong pan khiaaa, Nimrod zi in pa kitheilo, zawta a neih Tammuz naleng pasian in mite bia uhhi. Ezekiel 8:14. Tua Tammuz pasian suahni pen DECEMBER 25 ni hi aa Messiah naungeek hong suak ma kum 1000 a sim peekpan Holiday aa dawibia ten hong neihtohtoh sa uh hi. Hih holiday hun ciang in Baal pasian mite lak ah taksing ( pine or fir) tawh hong kilang hi ci'n um uh hi. Tua hihman in taksing tungah pasian nek theiding tuamtuam khai uh hi. Galmat te lutang khawng pasian biakna in khia uh hi. Tu'n bel meibulb peuh ki khia hi.
Hih December 25 holiday pen Roman kumpi te Christian hong suakuh ciang Christian sungah hong lutpih uh a hihi. Satan khemna mah hong hi zel lel hi. Taksang kei ni. Topa suahni pen December kha sung bek phawk aa gualnop na tawh mawk beisak theihna ding Satan khemna kidawmni. Topa Zeisu suahni pen December khasung bek hi lo kumtawn,khatawn, nisim, naisim aa phawk na ding Deihsak na tawh,
Mangpi
No comments:
Post a Comment