A kuamaciat in ihlung hihmawh thu, Pa Ngaih Pau & Nu Cing Za Do(Zampi/Kalay) te ii tapa Tg. Neng Khan Muang( Muangpu ) vai pen, tuni April 18, 2011 in Sia Dai Khan Mung (Mungno) Apu Hungpi, a Ni Cinghoih te tawh zing sang tung in KL, Kotaraya maiah kituah in, ACR zum ah ka pai uha, makai te hongpanpih natawh,ki kankhia theita ahih man, athu ombang tun ongzasak hi-ing.
ACR zumpan makai te-in, phone set aa ongkanpih natawh Muangpu pen, GHKL ah lum ahih lam kithei khiahi. Tua pan in koteng 4, zatopi lam manawh in kapai pahuh a, Zatopi(GHKL) katun uhciang in Registration department ah kakan pah uh hi. Muangpu pen April. 13, 2011 ni a zato tung nahi a, Bed no. 11, Ward 13, floor 3, ah na lumsak uh-in, a lupna gei ah tutphazal te khat tungah mitsi dieu deu sa, azalsa in natu hi. A ma om zia(condition) pen upmawh sangin na hoih zawthamtham hi. Banghang hiam cihleh ihzak cil-in, ahusan ihlap laitam maw cihzah dong dingin kipatau mahmah hi. Siavuan tetung kadot uh ciangin, honghoih dinghi cih onggen a, lungmuan na tampitak kingah hi.
Aliam mapen a awm ataklam, a nawinuai letmatkhat na khawngah khat, a veilam nawi sanlian ah khat, leh a veilam pang anakguh nuainung khawng khatah khat, aki dal na akhut me tezong tawm tawm liam in ki khui hi. Siavuan te honggen na tawh kizui in, a sungkua (organs) tebel hoihlel hi, ahizong atuap sungah sisan om (kicing) ahih manin tun kikhaih khia hi, ongci aa, a veilampang (a lenuai) anakguh kikal pan-in pipe khutmecia khawngkhat tawh zomin lupna nuaiah thawl in dawh uhhi. Adip nuaideuh pan-in alai nuaideuh ciang ki-at in, kikhui suk aa tuapen siavuan te'n operation a bawlna hi hongci hi.
Muangpu pen, aliam zawh tuciang kalkhat dektak phakhin ahih hangin, an ki neksak nailo aa, tui leh niangtui(milo) khawngbek ki nesaklai hi.
Muangpu honggen na tung tawn in, MIGILOPA (ko bel BAHKUNG te cise ve ungin, Bangladesh pa) in a na sepna Taman desa, Klang Lama Restorant tung a giah na room ah, a suamlum ding a temta tawh a dawtgawp dan pen,hi bang hi. April 13,2011 ni pen amau gel offday kituak aa, a nasep pihdang teng tuani nasem kuan khin uh hi. Nidang a ki thutuah loh na hang hi ding hiam aw, MIGILOPA pen zingan lei aa pai zingsang nai 10:30 AM pawl, ong tun kik tak ciang Muangpu sam aa, apuanak kawm a asel temta pikhat khawng a sau tawh daawtpah in, asi lianding in thum vei adawt khit ciang thakhat thu-in tai mang vingveng hi. Muangpu zong deih takin a otsawm leh a awmpi munthum bang vang a, awsuak thei lo ahih man, aliamma te akhut tawh humkawm in, inn nuai ah tuaksuk a, a sai sungah alut leh a manager te, sai a nasep pih teng in mupah hi. A manager(boss) te in thakhat in ZATO AMBULANCE sam in zato puak pah uhhi. A na sepna kim a zato te mun nih ah va puak ma sa aa , a tawp na ah GHKL ah puak uh hi.
Gim lai pian ahih man in thunget na mah tawh mapang khawm ciat ni. Topan cidam na thupha ong piak sak tahen.
Khazih sung ah
SB Ngaih Cin
KL, Malaysia
No comments:
Post a Comment