Laizom Zomi a kua maciat:
Tu kaal peen Easter Sunday weekend ci iin a diakdiak iin ni tumna gam te ah ki lim bawl pha diak hi. USA gam sung bang ah holiday dang khempeuh sang iin Easter Sunday ni iin business a tuamtuam te in khak kim zaw uh aa biak inn ah a kikhawm ngei khol lo te nangawn in hanciam iin kikhawm uh hi. Business a ki hong a om vet lo phial cih ding hi. Easter Sunday bang zah tak iin thupi hiam cih ih kikup kawm iin Good Friday leh Holy Sabbath te thu zongh tomno khat kikum ni.
Good Friday:
Christian te in Good Friday, Holy Friday, Great Friday or Easter Friday, ci iin ih Topa Zeisu Khazih in ei leitung mi te mawhna hang aa bawlsiatna, satna, ling lukhu a khukhna, singlamteh tung aa sihna hong thuakna te phawkna tawh a kiphuan tawm Christian te in thupi a sak mahmah uh ni khat ahi hi. Topa Zeisu hong sih ni peen Friday ni, kiginni (Preparation Day) hi. ("Now when evening had come, because it was the Preparation Day, that is, the day before the Sabbath----" Mark 16:42) Zomi te in Friday ni peen ni nga ni ih ci mawkmawk hi. Laisiangtho in Friday ni peen ni guk ni or kiginni ci hi.
Topa Zeisu hong sih ni, Friday ni ahihmanin kum khat iin Friday ni khat seh tawm iin kum sim iin khat vei phawkna bawl ding iin Laisiangtho sung ah Pasian in hong sawlna mun khat zongh ah om lo hi napi leitung mi te in a zat den kum sim aa kibawl pawi or ni thupi khat ahi hi.
Holy Sabbath:
Holy Sabbath day peen Easter Friday khit, Kiginni khit, a ziing ciang, hi aa kaal khat sung aa ni masak ni (the first day of the week), Easter Sunday, ni maa, Saturday ni ahi hi. ("--------it was the Preparation Day, that is, the day before the Sabbath----" Mark 15:42) -Holy Sabbath- "Now when Jesus was risen early the first day of the week, ----" Mark 16: 9 KJV
Saturday, Sabbath, seventh day, ni a thupitna Laisiangtho in teltak iin gen aa Pasian in ni sagih ni siiangtho sak iin tawlnga hi; Sabbath ni siangtho aa na tan ding phawk in; Sabbath ni peen mihing (ganhing a hi lo) te a ding aa kibawl hi aa Sabbath ii Topa ahi Mihing' Tapa, Topa Zeisu a um leh a muang te khempeuh in Pasian' ni sagihni sianthosak ding ahi hi.
"Then God blessed the seventh day and sanctified it, because in it He rested from all His work which God had created and made." Genesis 2:3
"Remember the Sabbath day, to keep it holy. Six days you shall labor and do all your work, but the seventh day is the Sabbath of the Lord your God". Genesis 20:8-10
”The Sabbath was made for man, and not man for the Sabbath. Therefore, the Son of Man is also Lord of the Sabbath". Mark 2:27, 28
Zomi te in Saturday ni peen ni guk ni ih ci mawkmawk hi. Laisiangtho in Saturday ni peen ni sagih ni or Sabbath ni ci aa Pasian in thupha pia iin siangtho sak hi.
Mihing te phuah tawm hi het lo, Pasian ngiat in a sianthosak leh siangtho aa kep ding hong vai khak, kaal sim aa ih phawk aa ih sianthosak ding Sabbath ni (Saturday) hinapi Pasian thu thei leh thu um mi a tamzaw in a thu don loh uh Pasian ni thupi mahmah khat ahi hi.
Easter Sunday:
Christian te in Topa Zeisu thawh kik ni ci iin a thupi ngaihsut mahmah uh, lei tung mihing te ii seh tawm pawi or ni thupi diak khat ahi hi. Biak inn ah a kikhawm ngei khol lo te nangawn a kikhop ni uh hi thei aa a ki thupi seh mahmah ni khat ahi hi. Gualzawhna tawh ih Topa Zeisu han sung pan aa hong thawh kik phawkna mihing seh tawm, kum sim aa a ki thupi bawl mahmah ni khat ahi hi.
"Now when the Sabbath was past, --- Very early in the morning, on the first day of the week, they came to the tomb ---Do not be alarmed. You seek Jesus of Narareth, who was crucified. He is risen! He is not here.---" Mark 16:1-6
Zomi te a tam zaw in Sunday ni peen ni pi ni ih ci hi. Laisiangtho in Sunday ni peen ni khat ni (kaal khat sung aa ni masa ni) ci aa Topa Zeisu thawhkikni ahi hi.
Topa Zeisu' thawh kik ni phawkna iin kum khat sung ah Sunday ni( kaal khat pan ni masa peen ni, the first day of the week, ni khat seh tawm iin phawkna bawl ding iin Laisiangtho sung ah Pasian in hong sawlna mun khat zongh ah om lo hi napi leitung mi te in a zat den kum sim aa kibawl pawi or ni thupi khat ahi hi.
U te nau te aw, ih Topa Zeisu Khazih in gimna thuak iin singlamteh tung ah hong sihna phawkna tawh Good Friday ih thupi bawl mah bang iin leh ih Topa Zeisu Khazih hansung pan gualzo aa hong thawh kikna pawi Easter Sunday ih thupi bawl te a thupi mahmah ahih zah khat iin mihing te seh tawm phuat tawm ni thupi te ih thupit bawl zah beek iin Pasian in a sianthosak, mihing te in ih zuih ding leh ih kep ding aa a hong piak, kaal sim aa siangtho tak aa ih zat ding Holy Sabbath Day zongh phawk ciat ni. A kua maciat in Easter Sunday nuam tak iin a zangh thei ciat ding in Topa'n thupha hong pia ciat ta hen.
Itna tawh
Mungno Gualnam
Riverside, California
No comments:
Post a Comment