April 24, 2011 ni aa kong khah khiat peen ih SDA group pan bek hong suak aa ZAC sung pan technical issue khat hang iin hong suak thei lo hi. Ei adventist sung thu khat peuh kizaksakna cihna tawh SDA group sung ah a om kha lo te in ngah lo ding ahihmanin khat vei ZAC sung ah hong khah khia kik ingh. Storage limitation hang iin photo 3 hong khah ingh.
Kapteel khua ah RB khawmpi Silver Jubilee kibawl iin pawlpi mi te in Kha lam kipum khat iin tha a lak laai tak leh Spicer College ah ih Zomi SDA lia leh taang 9 te in gualzawhna lukhu neelkaai khu iin lungdam kipakk iin a om laai tak un kei zongh ka zi Maangno leh ka tanu Kyim Kyim tawh Indiana state, Ohio state, Washington D.C., Maryland, West Virginia, leh Florida cih teng ah hiiang kawm iin ka na zin kawi kawi hi.
1. March 25 ni ziing tung iin Riverside pan vanleeng tawh ka ding khia uh aa Indianapolis ah suun kim pawl iin ka tung uh hi. Ka sunghpa En Hau Thang te inn ah suun an ka nek khit uh ciang iin ka sunghnu Pi Ngai Za En peen a Pu Thang te inn ah nusia iin Maangno leh Kyim Kyim tawh Columbus, Ohio lam zuan iin ka pai phei uh aa a ni Donno kiiang ah nitak an ka nek khit uh ciang iin Maryland State zuan ding iin ka nitak din phei suak uh hi. Friday zan kim, zingsang nai 2 pawl iin Maryland ka tung uh hi.
2. March 26, Sabbath ni ciang iin Mizo SDA Church ah ka va kikhawm uh aa lawm leh gual luui tampi tawh ka va kimu kha thei uh hi. Pr. Hluna' in tua laai ah pastor sem iin om aa tua laai ah ka lawm luui te John Clyde te innkuan, Pr. Rualchinna te nupa leh a tanu a tapa te ahi Ziri, John cih te, Pu Runremliana leh Florence Biakdingliani (Pu Rualchina ta nu Mami), Pr. Zen Do Lian' tanu Cingkhek, Pu Za Nawl tanu Zo Hlupuii (Zopi), Pu Roremliana te innkuan, cih bang te tawh ka ki mu kik khawm thei uh hi.
3. Sabbath sun ciang iin nai 3.00 p.m. pan 5:30 p.m. dong General Conference of Seventh-day Adventists Headquarter aa Vice President ahi ka lawm pa Pr. Geoffrey Mbowana' inn ah ka hawh uh aa thu tuamtuam ka kikum khawm thei uh hi.
4. Sabbath ni tak ciang iin ka pu Thang Lian Pau' tapa Khai Mang' zipina mopawi ah ka va pai uh aa Zomi vive, meel theih lawm leh gual vive na om uh ahihmanin Tedim khua aa a ciah ka bang phial uh hi.
5. March 27, Sunday ni iin Pu Rema(Runremliana leh Pi Mami (Florence Biakdingliani) te innkuan tawh kithuah khawm iin Washington D.C., West Virginia, cih te ah ka va hawh uh hi. White House, Capitol, Cherry Blossom festival, Arlington Cemetary, cih te khawng ah hong vakpih kawikawi uh hi. Ni tak lam ciang iin General Conference office of Seventh-day Adventist Headquarter ah ka va hawh uh hi. Rema leh Mami te nupa hang iin ka vak kawikawina uh mazang tuam mahmah ungh.
6. March 28, Monday ziing sang 10.00 a.m pawl ciang iin Florida ah sanggam meel theih te kiang ah hawh ding iin ka ding khia uh hi. Lam kaal ah Dr. Dal Khan Mang tawh sawt veipi ka kihopih man uh hi. Jacksonville aa ka sunghpa U Pum Khan Kham kiang ah a hawh ding ka cih uh peen Malaysia leh Thai aa a zinna pan hong tung kik nai lo ahihmanin Vero Beach aa a tapa Lian Sian Tung Nung kiiang dong ka pai suak uh aa March 29, ziingsang 2.00 a.m. pawl iin ka tung uh hi.
7. March 29 ni ciang iin John F. Kennedy Space Center ah Apollo Rocket te a kikhahna leh space station tawh kisai tuamtuam te ka va et khit uh ciang iin sanggampa Go Khen te tawh zongh ka kimu thei uh hi. Tua ni zan Gainesville aa U Daltawng te inn ah ka lum uh hi.
8. March 30 ni ciang iin U Daltawng in lei sung pan aa tui phuul ziahziah aa guunpi a suakna, cik tui naak, Silver Springs a cihna ah hong paipih aa nuam tak iin hun ka zat khit uh ciang iin John F. Kennedy Space Center ah a ni nihna ka va pai kik uh hi. Space Center a kikhak hun 6.30 p.m. dong ka om uh aa ciah ding aa ka kipat khiat uh ciang iin vann ging, khua phelep iin keek kia ziazua iin tornado huihpi hong nung heethaat vat hi. Tua kawm kaal ah ka ciah kawmkawm uh iin Nu Nokek tawh kiho ho kawm iin ka paipai uh aa a inn vuah ka va hawh uh hi. No Kek te nuta teng tawh nuam tak iin ka kimuh theih ban vuah a inn thak hoih mahmah sung ah ni tak an lim mahmah hong vaak sawnsawn uh hi. Tua khit ciang iin U Kap Pau te inn ah ka va baang samsam uh aa Cingpi tawh ka ki muh pak khit uh ciang iin U Thang Lam tawh a nasepna mun ah ka va kimuh pak khit uh ciang iin Florida khuapi, Tallahassee aa U Daltawng te kiiang zuan iin ka pai uh hi. Nuam tak iin March 31 ni sung, Tallahassee ah U Daltawng te innkuan tawh hun ka zangh khawm uh aa Khaipi in Tallahassee khua sung teng hong vakpih kawikawi hi. Ka khualzin nading uh lam sau aa a gamlat tawh zankim iin ding khia iin Columbus, Ohio ah Friday ni, April 1, ni iin tung iin Sabbath ka va om thei uh hi.
9. April 2, Sabbath ni tak lam ciang iin Indianapolis ah pai phei iin sanggampa Kham' mopawi va siim kawm iin tua zan ciang iin ka nu phal Ciin (Cin Khan Ciin) te kiiang ah ka hawh ka giak uh hi. April 3 ni ka sungh pa, a pu Thang te kiang ah kigiak uh aa April 4 ni iin Indianapolis pan Riverside, California ah cidam iin ka tung kik uh hi.
Meel theih lawm leh gual, pawlpi mi te, Kawlgam aa khuapih tuipih te tawh kimu kawikawi iin sanggam laaizom te tawh ka kimuh kawikawi theih ban ah ka lawmpa tawh ka ki muh loh zawh uh kum 29 sung bang a pha ta, tu iin General Conference ah Vice President a sem Pr. Geoffrey tawh va kimu kik thei ungh. Ahizongh'n ka kimuh pih nop, muh ka sawm ngiat ka sungh pa U Kham (Pum Khan Kham) tawh ka kimu thei kei hi. Ko bel kankan keei sam napi ungh U Kham phone tawh kizom thei lo, aman lah hong kan man khol lo ahihmanin a ki mu thei lo suak ungh. Tua sim loh a taangpi iin tu tung ka khualzinna uh peen ka lungkim mahmah hi. Motor car tawh ka khual zinna uh tai 4,139 sung tawntung hamsatna om het lo iin Topa'n hong om pihna tawh gualzo kahihmanun Topa' min ka phat uh hi.
Lai at,
Mungno Gualnam
Riverside, California
No comments:
Post a Comment