SIM DINGTE: Luke 8:22-25; Luke 4:31-37; Luke 6:20-
49; Luke 8:19-21; Luke 10:25-37; Thuhilhk. 6:5.
KAMNGAH: "Amaute in Ama thuhilhna lamdang asa uh
hi. Bang hang hiam ci leh Amah in ukpa
bang in thu hilh hi. (Luke 4:32).
"Zeisu leitung hong pai hun in mite zia tualniam pen
kha ding hi. Mihonte dinmun siasuak mang hi. Nuntakzia
ngiat dik lo mai hi. . . . Mite'n zuau thu nuntakpih uh hi.
Mite in leitung nate lunggulh in muantak cinglo in nungta
uh hi. Pasian tawh amai lam hun vai uh mangngilh in tu
tawm vaite tawh nungta uh hi.
"Pasian phawk kha lo uh hi. Mite ki pibawl nawnlo
uh hi. Thumann, thuhoih, cihtakna, leh hehpihna cihte in
leitung paisan ta uh hi. Huaihamna leh angsung vaite in
kimuanlohna piangsak hi. Mite ngah ding, piak dinga kilawm
thute mangmat bang bekta hi. Mihonte pen mi laka adawk
nuamte in ganhing bang in bawl uh hi. Noptatna, hauhna,
leh vang neihnate angimna uh ahihi. Amaute cidam lo uh
a, lungsim zawngkhal in, kha lam ah si uh hi. Zeisu hong
nuntak lai omzia tua bang ahihi." E.G. White, Pilsinna,
Ed. p. 74, 75.
Hih bang thute hang in Zeisu in athugente agen na
ding thu ih telsiam thei zaw hi.
NIMASANI (Sunday) May 24
Zeisu' Thutheihna (Luke 8:22-25)
Luke pen zatuimang leh thungaihsun siam mi ahihi.
Tua hi a thuneihna omzia thei hi. Rome te ki-ukna leh
nasepna ah thu neihna vai thei hi. Paul i khualzinpih
ahihna tawh apawlpi phuhte tunga Paul thuneihna zong
thei hi. Tua hia, Luke in thuneihna pen adinmun tawh
kisai hi a, siate zong asangnaupangte leh anungzuite tawh
kisai ahihi. Mi tuamtuamte tawh mun leh thuneihna
tuamtuamte ah Zeisu pen midangte tawh a thuneihzia teh
theih hilo cih thu Luke in hong theisak hi. Zeisu pen
khutsiampa inn a khang-khia hi a, kum 30 aphak dong
Nazareth khua ah teng a mi minthangte'n thei kha lo uh
hi. Ahi zong in Zeisu in mi khem-peuh-- Rome gam ukte,
Jew thungaihsunte, mi mawk mawk te, leitung leh biakna
makaite tawh-- Ama thuhilhna leh nasepnate ah kimu uh
hi. Ama kam pana aluangkhia kamhoih kamphate hang
in, lamdangsa uh hi (Luke 4:22, NIrV). Khat vei Nain khua
meigong nu tapa thawhkik-sakna tawh lametna pia hi (Luke
11:2-17). Akhua bup un, "mite huh ding in Pasian hong
pai hi." ci uh hi. (aneu 16, NIrV). Sihna leh nuntakna' tung
a Zeisu' thuneihna in Nain khua bek hi lo in, "Judea gam
leh akiim apaam a gam tuamtuamte zong lunglawp sak
mahmah hi (aneu 16, 17, NKJV).
Luke 8:22-25; Luke 4:31-37; Luke 5;24-26; Luke 7:49;
leh luke 12:8 sim in. Zeisu thuneihnate vai hih munte
in bangci gen uh hiam? Luke in alawm Theophilus ading
bek hilo in hong pai lai ding khang tampite ading a aciapteh
ahihi. Zeisu in Ama thuneihna pen atuam vilvel ahihna
alah thu zong hong telgen hi. Mihing pumpi tawh hong pai
Zeisu in midangte tawh teh theih loh thuneihna aneih lam
hong thei sak hi.
Mi tampite in Pasian min tawh na tampi sem uh hi.
Hih thu in amau gamtatna ah thu neisak hi. "Pasian in
hih thu semding bawlding in hong makaih hi," na cih ciangin
hong cih takpi ahihna na koici gen thei ding hiam? Sabbathni
kikhopna ah adawnna ki kum ni.
NINIHNI (Monday) May 25
Athupi Pen Khazih' Thuhilhna (Luke 6:20-49)
Mualtung thuhilhna (matt. 5-7) in "Christian te
thupuak gil lai" kici thei zel hi. Luke in tua thu pan pawl
khat Luke 6:20-49 leh mundangte ah hong lak hi. Luke in
tua thuhilhna pen "kilang tang a" nungzui telna khit phet a
thupiang bang in hong lak hi. Hih thu hang in Laisiangtho
siamte in 12 te tung a Zeisu' thuhilhna atuam vilvel bangin
ngaihsun uh hi.
Luke 6:20-49 sung a tua thu hilhna pen thupha leh
thusia 4 te tawh kipan hi. Hih te ah zong Christian te omzia
thupuak dangte zong hong thei sak hi.
Luke thubu sung a Luke 6:20-49 sim in la, tua thu na
nuntakna ah koici ciang dong zui na hi hiam cih ki dong in.
1. Christian thupha sanna (Luke 6:20-22). Zawnna,
gilkialna, kahna, leh muhdah thuaknate thupha
sanna koici suah thei hiam?
2. Buainate kawmkal a Christian te lungdam theihna
(Luke 6:22, 23).
3. Thusia dal' ding te (Luke 6:24-26). Thusia 4 te en
kik in. Bang hang in tua te Christian te in dal kul
se hiam?
4. Christian thupuak (Luke 6:27-31). Zeisu' hong piak
thukhamte sung pan kham khau itna thukham zah
a kinial leh haksa akisa dang om lo hi. Christiante
pen ahoih lama tat ding hia asia lam hi lo hi. Bang
sem bang bawl ding cih thu hi a, bang sem bang
bawl lo ding cih thu hi lo hi. Na galte uh "mudah
kei un" hong ci lo in "na galte uh it un" hong ci hi.
"Ha tangkhat ading ha tangkhat," cih tang in,
kham thukham in hoihkimna (pang lang khat
zong dawh ding") cih ahihi. Mahatma Gandhi in,
hih kham thukham pan ngaihsutna thak khat
hong phuangkhia a dikna tawh siatna nial ding
cih ahihi. A nungsang ciangin hih thu tungtawn
in British ukna pan suahtakna ngahna thu piang
sak hi. Tua bang mah in Martin Luther King Jr.
in zong khamm thukham mah zang in USA ah,
avom akang kikhena longhkhia hi. Itna in aukna
mun ah thupha in kumpi tokhom uk hi.
5. Christian tat dan (Luke 6:27-42) maisakna, piakkhiatna,
siangtho nuntakna, midangte amau
omom a san'na cihte ahihi.
6. Christian gah gahna (Luke 6:43-45).
7. Christian apiang khia sak te (Luke 6:48, 49).
NITHUMNI (Tuesday) May 26
Innkuan Thak (Luke 5:27-32)
Zeisu ma leh khit a siapi liante in kipum-khatna leh
kiitna hilh pi in nei uh hi. Ahi zong in Zeisu in mihingte
akhenkham nate susia in innkuan thak hong guan hi. Hih
innkuante in nidanga akhenkham thute awlmawh lo uh hi.
Agape kiitna dialkhai nuai ah Khazih in innkuan thak hong
piangsak hi. Hih innkuan in piancil lai a deih bang innkuan
hong lak hi. Hih thu in mi khempeuh Pasian lim leh mel
suun a hong kipiang sak cih thu (Pian. 1:26, 27) leh Ama muhna
ah ki kim cih thu ahihi (Luke 8:19-21 sim in). Innkuan
kinainate thupi hi. Nu leh Pa leh tate, unau sanggam numei
pasalte cih bang ahihi. Zeisu in ci leh sa innkuan kheng
in "vantung leh leitung innkuan khempeuh innkuan" khat
in hong mu hi (Eph. 3:15, NKJV). Christian nungzui
innkuan mimalte unau sanggam khat ihbat ding ahihi.
Zeisu' muhna ah "innkuan" lutna pen sisan kinaina pan
hilo in Pasian deihna bang sepna ahihi.
Luke 5:27-32; Luke 7:1-10; Luke 14:15-24; leh Luke
17:11-19 te in Khazih suksiat kikhenna kawmpekte vai bang
hong gen hiam? (Hih kawmte in mite khenkham in thusia
zong piang hi).
Zeisu masuan leh nasep, amaisakna lungsim leh itna
leh hehpihna lungsim in kuamah nial nei lo hi. Ama sapna
asangte khempeuh kihel kim hi. Tawntung hong itna in mi
khempeuh tawh hong kizom thei sak hi.
Pawlpi khat hihna tawh athupi hih thukhun koici
zuih thei zaw ding.
Nilini (Wednesday) May 27
Itna Kitelkheh: Samaria Midikpa Gentehna:
Khen 1 (Luke 10:25-28)
Lungdamna thubu 4 te lak ah, Luke bek in tapa
taimang leh Samaria midikpa ciamtehnate na ciamteh hi (Luke
10:25-37). Amasa pen in mawh neite tung a alamdang Pa'
itna hong lak hi. Anihna gentehna in midangte tung a ih neih
ding itna hong lak hi. Ih vek in "ih vengte" vai Zeisu gencianna
ih limh ngaihsut tek ding hi. Mite Pasian tate hi uh a, it in
akikim a bawl dingin kilawm hi cih thu hong gen hi.
Luke 10:25-28 sim in la, asung a dotna thupi 2 te
thuuk ngaihsut in. Upna leh nuntakna tawh ki koici zop
ciat uh hiam?
1. "Sia pha aw, tawntung nuntakna ka ngah nang in
bang bawl ding ki hi hiam?" (aneu 25, NKJV). Thukham
siapa in tawntung nuntakna ngah nang lampi khat azong
ahihi. Mawhna pan hotkhiatna ngah a Pasian gam lut ding
pen mite ngim theih lian pen ahihi. Ahi zong in thukham
siapa pen mi tampi te mah bang a tawntung nuntakna
pen sepna tawh ngah theih ding banga ngaihsutna khanpih
hi. Thukham siapa'n "mawhna thamanh sihna ahih lam
leh eite Topa Khazih Zeisu tawh nuntak tawntungna in
Pasian hong piak khong ahihi." (Rom. 6:23, NKJV).
2. "Thukham ah bang ki gelh? Nang bang ci simh na
hi hiam? Luke 10:26, NKJV). Zeisu hun lai in, Jew miliante in
akhut uh ah savun ip neu khih ding ngeina nei uh hi. Phylactery
cih pen savun ip no Moses at thubute (torah) pawl khat
koihna ahihi. Hihte sung a Zeisu dotnate dawnna ding zong
kihel hi. Zeisu in thukham siapa kiang ah thuhilhkikna sung
a (thuhilhk. 6:5 leh Siampi. 19:18) vai gen hi. Tua thukham
siapa'n tua lian mah akhut a abulhna ah om kha ngel ding hi.
Zeisu dotna dawnna in abandawn ah nei a, alungtang ah om
lo hi. Zeisu in tua thukham siapa kiang ah tawntung nuntakna
thu, tua thumann va phawk sak hi. Tua thumann in thukham
zuih ding vai hi lo a, Pasian leh apian sak "avengte" it ding thu
ahihi. Tua thukham siapa lung-khauh hi. Dotna dang khat
adot beh lai pen: "kavengte kua te hiam?"
Hehpihna tawh hotkhiatna na ngah lam bang siksan
nei takpi na hi hiam? Gentehna in upna tawh diktanna
(mai sakna leh siansuahna) na ngah takpi hiam?
NINGANI (Thursday) May 28
Itna Kitelkheh: Samaria Midikpa Gentehna:
Khen 2 (Luke 10:30-37)
Thukham siapa kidik tang sak nuam hi. "Ka vengte
kua" cih dong hi (Luke 10:29, NKJV). Jew te thukham vai
athei thukham siapa in adawnna thei mah ding hi. Siampi.
19:18, in thukham lian nihna hi a, "vengte" cih pen "na
minampihte" cih thu ahihi (NKJV). Adotna tang dawn a kinial
akul lo ding in Zeisu in tua thukham siapa leh athungaite
athupicing zaw a kahtopih hi.
Luke 10:30-37 sim in. Hih bang thu ah athupi munte
koi teng hiam? Midangte ih bawlzia ding bang hong lak
hiam?
Zeisu genna ah, "mi khat" in gutate khutlum thuak
hi. Zeisu in bang hang in aminam leh adinmun gen lo hiam?
Athu vekpi tawh et in bang pha mawh hiam?
Siampipa leh Levi mipa in mi liampa mu in paisan
uh hi. Ahuh lohna thu uh nei ding uh hi. Ahi zong in, eite
ading in adotnate in: biakna mann bang hiam? Koici lah ding
ih hi hiam? (Thuhilhk. 10:12, 13; Maicah 6:8; James 1:27).
Jew te leh Samaria mite kikal kizopna pen kimuhdahna tawh
dim hi. Zeisu hun in suuksan hi (Luke 9:51-54; John 4:9).
Tua hi a Samaria mipa mihoihpa a agen ciang in, Jew te kiang
diak ah agen nop thu khauh pai sak zaw lai hi. Samaria mipa
panpihzia limtak in gen hi. Miliampa Samaria mipa'n
hehpihuai sa hi. Akiang ah pai in, aliammate lenggah tui
leh sathau tawh sawp sak in tuam sak a zinbuk ah paipih in
azin tun man piak sak khol a acing lo teng apai kik ciang
piak beh ding in gen hi. Hih thu teng in itna amann bang
zah in thupi hiam cih alak ahihi. Jew mi khat ading in hih
teng ahih ciang in itna mann in ciangtan nei lo cih lak hi.
Siampite leh Levi mite amau akidot uh thu in: hih
pa huh leng ei tung ah bang piang ding? Samaria mi pa
akidot thu pen hih pa huh kei leng atung ah bang piang
ding? cih hi a hih dotna 2 te bang ci kilamda'n hiam?
KIGINNI (Friday) May 29
SINBEH DING: "Ama nuntakna leh athu-hilhnate ah Khazih
in angsung akhual vet lo masuan tawh Pasian kiang pan
hong kipankhia ahihi. Pasian pen Ama ading a anungta hi
lo hi. Hih leitung piang sak a akep adonnate khempeuh
ah, midangte ading a asem ahihi.
"Mi gilote leh midikte tung ah A ni tang khawm sak
a, thumann leh thumann lote tung ah guah zu sak khawm
hi. Matt. 5:45. Hih bang maban Pasian in Tapa tung ah pia
hi. Zeisu pen mite lutang a adin ding ahihi. Ama omzia
tungtawn in mite koici huh ding cih ahilh suak hi. Zeisu
nuntak buppi mite ading sepna tawh bei hi. Mi khempeuh
ading na sem in panpih hi. Tua bang in Pasian thukham
tawh nungta a eite in zong ih zuih ding in hong lak hi." E.G.
White, Khangcin Lunggulh, D.A. p. 649.
Samaria mipa gentehna thu in "ngaihsut tawm hi lo
in thupiang takpi ahihi. Tua mipa ataisan siampipa leh
Levi mipa thungaite lak ah om uh hi. Khangcin Lunggulh,
D.A. p. 499.
KIKUP DINGTE:
1. Nimasani Sinna tawpna a kidong dotna thupi
enkik in. Mi pawlkhatte in asep abawlte uh Pasian in hong
sawl a ka sep hi acih uh naza ngei hiam? Pasian in ei tung
ah thu hong koici gen hiam? Ih sep dik hi cihna tawh Pasian
tang a sem banga ih kingaihsutna vai ah bang thu lauhuai
om thei ding hiam?
2. Luke 2:24-26 sung a thusia 4 te enkik in. Tua
mun ah Zeisu genna koici telsiam thei ding? Ih nuntakna
ah ih kidop ding a adeih bang thute hiam?
3. Thu neihna vai apongpi in ngaihsun in. Thu
neihna ih cih bang hi a? Thu neihna tuamtuamte bang te
hi a? Bang thu neihna pen adangte sang vang nei zaw hiam?
Ih nuntakna ah thu neihna tuamtuamte tawh ki koici zop
ding ih hi hiam? Ih tungsiah thuneite hong kithukim loh
uh ciangin bang piang hiam?
No comments:
Post a Comment