Gen Khiat Pak Theih Loh Mangmuhna
1890 Kum November Kha-in New York khua Sala manca ah kikhoppi khat oma, Mrs. White in zong mipi mai ah thu gen zel hi. Tua khuapi hong paina loam kalah khuavot tuakin a tha zawm mahmah hi. Kikhopna khat a man ciangin a ci na-in a lupna zuan hi. Pasian' mai ah a kha bung khia-a hehpihna, cidamna leh hatna ding nget ding ngaihsun hi. A tutphah gei ah khuk dina, bang teng hih cih thu hih bangin hong gen hi.
"Ka omna sung teng khuavak neem tawh hong ki dima, ka lung kiatna leh ka tha kiatna teng hong bei mateng kam khat zong ka pau kei hi. Khris' lungnopna a hi hehnepna leh lametna tawh ka kidim hi," ci hi.
Tua ciangin mang muhna khat kipia hi. Tua mang muhna khit ciangin ihmu nuam nawn lo hi. Zong tawlnga nuam nawn lo hi. A tawl dam in, a ci zong dam ta hi.
Zingsang ciangin khen satna khat a neih kul hi. Kikhopna mun ah pai zaw ding maw, Battle Creek-a a inn ah ciah zaw ding? Kikhopna uk pa Pastor A. T. Robinson leh Mrs. White' tapa William White te ama kiangah a khen satna thei nuam in pai uh hi. Cidamin kizem sa-a om mu uh hi. A pai ding hi ta hi. A dam na thu zong gen hi. A mang muhna thu zong genin, "Tu zana kei hong kilak thu kong gen nuam hi. Battle Creek-a om bang ka hi-a, kamtai vantung mi in, 'hong zui in,' hong ci hi," ci hi. Mangngilh a hih manin a ban gen thei nawn lo-in khawl hi. Gen dingin kipan kik napi, a gen ding thei nawn lo zel hi. A zing khawng ciangin a mang muhna teng lai-in gelh hi. Tua pen The American Sentinel kici biakna lam suahtakna tawh kisai laihawm bawlna ding vai a hihi.
"Tua zan ka mang muhna ah kikupna tampi ah ka kihela, American Sentinel sunga 'Seventh-day Adventist' cih laimal kipai khia hen la, Sabbat thu zong bang mah gen se kei leh, leitung miliante in tua laihawm angvan ding uha, hong min thangin, a zai zawin na sem thei ding hi, ci-in makaite in a gengenna uh ka za hi. Hoih sa mahmah uh hi."
A mai taina uh ka mu-a, Sentinel min thanga a mai nawtna dingin sep dan ding geel pah uh hi. A thu teng, a lungsim tawtawng uha thumaan a kisam lai mite' gen na bangbang a hihi."
Tua laihawm a bawl dan ding kikuma om mi hon khat a mu hi gige hi. 1891 kum March kha General Conference kikhoppi ah zingsang nai 5½ siala sia kikhopna-a thugen ding leh mi tul li val mai-a Sabbat sun thuhilh dingin Mrs. White kicial hi. Sabbat suna a thuhilhna ah, "Na khuavak uh mite' mai ah tang sak un. Tua hi leh amaute in na gamtat phate uh mu in, vana om na Pa uh a phat ding uh hi," cih Lai Siangtho teel hi. Seventh-day Adventist-te in a upna uh kician taka a kilat khiat sak ding uh hanthotna hi pi pen hi. Salamanca-a a mangmuhna kikhop hun sunga a gen dingin 3 vei kipana, khat vei mahmah zong gen khia thei lo hi. A mangmuhna sunga thute phawk nawn lo lel mawk hi. Tua ciangin, "Hih thu nung sang cianga ka gen ding hi'n teh," ci ho. Nai khat sung bang hoih takin thu a hilh khit ciangin, kikhopna kiman hi. A mang muhna gen khia thei lo a hih lam mi khempeuh in thei uh hi.
General Conference president hong pai-in zingsang cianga hun zang dingin cial hi. "Hong zang zo kei ning. Gim lua ing. Teci pang khin zo ing. A dang khat sawl in,' ci-in dawng hi. Mi dang khat kisawl hi.
Mrs. White a inn ah ciahin, zing sang kikhop pai zo lo ding a hihna a innkuanpihte gen hi. Gim ah ih manin a tawlnga hithiat ding a hihi. Sunday zingsang dong a lum hithiat dingin vai kihawm hi.
Tua zan, Conference kikhop a man uh ciangin Review and Herald zum sungah pasal pawl khat tu khawm uh hi. Tua kikhopna ah American Sentinel a hawm khia te zong kihel hi. Religious Liberty Association kici biakna lam suahtakna vaihawm pawl zong kihel hi. American Sentinel laihawm bawlte' zuih ding policy a kikum ding uh a hihi. Kong kisung kalhin, a thu a zawh masiah uh kong hon loh ding uh thukim uh hi.
Sunday zingsang lam nai 3 sat madeuhin kikupna man uh hi. Biakna lam suahtakna makaite' genna bang in Pacific Press in 'Seventh-day Adventist' leh 'Sabbat' cih kammal Sentinel sung panin a paih khiat kei uh leh tua lai pen Religious Liberty Associationte' laihawmin kizang nawn lo ding hi, ci-in khen sat uh hi. Tua lai hawm khia nawn lo ding cihna a hihi. Kong hongin ciah uha, lumin ihmu tek uh hi.
A lusu, a ihmu ngei lo Pasian in, zingsang nai 3 pawlin Ellen White omna ah a van-kamtai pai sak hi. Ihmutna panin khanglo-a, nai 5½ in sia kikhopna ah pai-n, Salamanca-a a kilak thu a gen dingin kisawl hi. Puan silhin, Salamanca-a a kilak thu a ciaptehna lai a biru sung pan la khia hi. Tua thu a lungsim ah hong phawk sema, lai sungah gelh beh lai hi.
Siate a thungetna uh a man lian lai takin, lai lom khat tawi kawmin biakinn sungah Mrs. White hong tum a mu uh hi. Thugen pen General Conference president hi-a, a muh ciangin:
Sister White aw, nong pai lungdam ung. Gen nop na nei hiam?" ci hi.
"Nei mah ing," ci-in a mai ah kah pah hi. A zana gen dinga kipan napi gen thei lo-a a khawl kikna pan in a thu pan pah hi. Zingsang nai 3 pawlin a ihmutna panin kiphonga, nai 5½ a sia kikohpna ah pai-a, Salamanca-a a kilak thu a gen dingin kisawl a hihna thu gen hi.
"Ka mang muhna ah Battle Creek-a omin ka ki seh hi. Review and Herald zum ah hong kipai piha, van-kamtai in 'hong zui in' hong ci hi. Pasal hon khat thu khat kilim kup mahmaha a omna mun ah hong pai pih hi. Lawp mahmah uh a hih hangin theihna nei lo uh hi," ci hi. American Sentinel editorial policy ding a kikupna dan teng uh a gen khit ciangin, 'Pasal khat in Sentinel bu khat la-in a lu tungah laam to-in, 'hih lai sung panin Sabbat thu leh Kumkikna thu a kipaih khiat kei leh Religious Liberty Association laihawmin kizang nawn lo ding hi,' ci-in gen hi. Tua ma kha tampi lai-a a mang muhna sunga a kilak kikhopna thu sik sanin thuhilhna nai khat sung a neih khit ciangin Mrs. White tu hi.
General Conference president in a cihna ding thei lo hi. Tua bang thu kikupna a om lam zong thei lo hi. A sawt lo-in a thu hong kipulaak hi. A nung lam peka tu pasal khat hong dingin, 'Tu zana thu kikupna ah kei ka om hi,' ci hi.
Mrs. White in, 'Tu zan e! Tu zan maw? Tu ma kha tampi lai, ka mang muhna sunga hong kilah hun lai muh hi'n teh ka cih hi ven,' ci hi.
Tua pa in, "Tu zana tua thu kikupna ah kei ka om hi. Ka lu tungah a lai tawi to-a kam a pau pa kei mah ka hihi. A khial lama om ka hih manin ka dah hi. A hi zongin a maan lamah om theihna ding hun pha ngah ka hih manin ka nuam hi,' ci-in tu kik hi.
Mi dang khat zong hong ding hi. Religious Liberty Association President hi. Ama'n zong, "Tua kikhop na ah ka om hi. Conference kikhop man ciangin pawl khat Review zum sung tum in, kong kisung kalhin, tu zingsanga hong kigen thu teng kikumin ka om uh hi. Zingsang nai 3 dong ka tu uh hi. Tua lai ah bang teng kikuma bang lungsim teng kinei cih a gen ding hi leng, Sister White gen zaha kicianin ka gen thei kei ding hi. Khial ka hihna leh ka panna maan lo a hih lam tu-in ka thei hi. Tu zingsanga hong kipia khuavak panin, ka khialhna kong pulaak hi," ci hi.
Tua ni-in midangte zong hong pau uh hi. Tua zan a kikhopna sunga kihel khempeuh ding kimin, zum sunga a kikhopna uh leh a lungsim uh Ellen White in a hi bang lianin gen khia a hihna teci pang uh hi. Tua Sunday zingsang kikhop a man ma-un, Religious Liberty pawl kituahin, a den nai 5 lai-a a thu khen sat uh phiat kik uh hi.
Tua thu kikupna kinei nai lo a hih manin, Sabbat ni suna gen a sawm lai-in Mrs. White in gen khia Thei lo hi kei leh, Pasian' deihna bangin a thu in bun zo lo ding hi.
Bangbang a hi zongin Sabbat suna a thugen pen tua mite in zang lo uh hi. A thei zawin kingaihsun uh hi. Tu huna mi kim khatte mah bangin, "Mrs. White a thei lopi hi e," "Amau' hun leh tu hun kibang lopi," 'Tua pen tu ma pek thu hi in, tu hun tawh kisai kei,' a ci uh zong hi kha ding hi.
Tu huna Satan in mite a huau simnate, 1891 kuma mite a khemna mah tawh a kibang a hihi. Pasian in Ama hun leh Ama thu-in Ama nasepna hong kilang sak hi. Amah in makaihin, cingin, a hawlna len hi. Ellen White in, "Amah hong kikham zel a hihna a kilat sak theihna dingin, haksatna hong tun ding Pasian in phal zel hi. Israel mite' lakah Pasian om hi cih tua bangin kilang khia sak zel hi," ci hi.
Source: Pawlpi Thu Lamlak
No comments:
Post a Comment