Nuntak Zia A Khel Thu

Nuntak Zia A Khel Thu

            Michigan-a Bushnell khua ah evangelist khat in crusade bawl hi.  Tui kiphum a om hangin upna ah zung kha nai lo pi-in nusia hi.  Amaute damdamin lung kia uha, a zongsatna hoih lote uh a zang kik zong om hi.  Mi 10 khawng 12 khawng bek om lai-a, pawlpi-in ding zo nawn mahmah kei ni, ci uh hi.  A nunung pen a kikhopna uh hi dinga a up mawh uh kiman ta-a, a ciahciah lai takun, lai taite hong tunga, laikhak lomte lakah Review and Herald zong hong kihel hi.  Pastor White-te nupa khual zin kawikawina ding geelna ah, Bushnell khua pen 1867 July 20 ni ding a hihna mu uh hi.  Tua pen kaal khat bek in sam lai hi.  A ciah khin sate, naupangte sam kik sak uha, kikhopna mun dingin sing nuai mun nuam khat a hah ding mi seh uh hi.  A nung tolh sate deuhdeuh leh mi dangte zong kikhopna ah zot ding vai hawm uh hi.

            July 20, Sabbat zing sangin Pastor White-te nupa tua sing nuai mun nuam mihing 60 a kikhopna hong tung takpi uh hi.  Pastor White in zingsang lam thu hilh hi.  Sun kikhopna ah thugen dingin Mrs. White ding to-a, a Lai Siangtho mun a sim khit ciangin buai gawpin om hi.  Thu dang a zop ma-in a Lai Siangtho khupin a mimal om zia zui-in thu gen hi.

            "Tu-in note' mai ah ka din lai takin, tu ma kum 2 lai-a ka mang muhna-a ka muh sa maitang pawl khat ka mu hi.  Na mai uh ka muh ciangin na gam tatna uh ka tel muh kika, note' a ding Topa' thupuak gen ding ka nei hi.

            "Hua taak sing phunga tu sanggam pa, nang tawh kiho nai lo ih hih manin na min kong lo khia thei kei-a, a hi zongin na meel kong thei-a, na gam tatnate ka mai-ah tel takin hong kilak hi," ci hi.  Tua panin sanggam pa' nung tolhnate gen khiat sak hi.  Hong kihei kika, Pasian' mite tawh a ton khawm dingin hansuah hi.

            Tua ciangin mipi lak mun khata om numei khat lam nga-in, "Greenville pawlpi mi Sister Maynard kiang a tu sanggam nu, na min hong kihilh lo a hih manin ka lawh khiat theih loh hangin, tu ma kum 2 lai-in na thu teng hong kilak zo-a, na om zia tel takin ka thei hi," ci-in Mrs. White in tua nu hansuah leuleu hi.

            "Tua banah tawsaw phunga tu sanggam pa zong, maitang kimu nai lo ih hih manin na min kong lo khia thei kei hi.  A hi zongin na om zia tel takin hong kilak zo hi," ci hi. Mipi' zakin tua pa' om zia leh a lungsim teng gen khiat sak hi.

            Tua bangin khat khit ciang khat, tua kikhopna sunga om mite, tua ma kum 2 lai-a a mangmuhna teng gen pih hi.  Tua bangin thu hilha, taaina leh hansuahna a neih khit ciangin Mrs. White tu kik hi.  Mipi lak pan khat hong ding khia-a, "Mrs. White in tu suna hong thugente a maan mah a hi hiam thei nuam ing.  Bang hang hiam cih leh Pastor White-te nupa hih lai-ah hong pai ngei lah hi lo-in, amau tawh a kimeel theih lah ih om kei hi.  Sister White in ih minte zong thei nai lo napi, tu ma kum 2 lai-in mang muhna tawh ih pian zia teng ama tungah kilak hi, ci-in khat khit teh khat ih om ziate hong lakin ih lungsim sung tawnga om thute nangawn hong pho laak khia khin hi.  Tua a gente khempeuh a maan kim takpi mah a hiam?  A phuah tawm peuh a om kha diam, thei nuam ing," ci hi.

            Khat khit khat hong ding uh hi.  Taak phunga pa ding to-in, Mrs. White in kei leh kei ka kipulaak ding sanga a tel zawin ka om zia khempeuh maan takin hong gen sak hi, ci hi.  A mawhna teng kipulaak hi.  Hong ki hei-a Pasian' mite tawh ton khop ding a khen satna pulaak hi.  Greenville pawlpi mi Maynard kianga tu nu in zong teci hong pang leuleu hi.  Amah leh amah a kipulaak ding sangin a tel zawa Mrs. White in a om zia teng gen khiat sak a hihna gen hi.  Tawsaw phunga tu pa in zong tua mah bangin ama om zia khempeuh ama'n a gen khiat theih zah sangin a tel zawin Mrs. White in pulaak sak thei a hihna gen hi.  Mawhnate nusia uh hi.  Pasian' Kha Siangtho hong lutin Bushnell ah khanlawhna hong om hi.

            Pastor White-te nupa Sabbat ni kik teh hong pai uha, tuiphumna kinei-in, Bushnell-a pawlpi hong kipin hong hing hi.

            Topa in Amah a lamen khempeuh a it mah bangin Bushnell-a om mite zong it hi.  "Ka it mite taai-in ka thuhilh hi.  Thanuam un la kisik kik un" (Mangmuhna 3:19), cih thu in mite' lungsim lawng hi.  Pasian in amaute a muh bangin mite amau' lungsim uh hong kimuh uh ciangin a om zia uh hong kithei-in a gam tat uh hong kikhel nuam uh hi.  Mrs. White tunga a kipia mangmuhna tampite tua ding tanghial a hihi.

            Pastor White sih zawh a sawt lo-in Healdsburg College kiangah Mrs. White teeng hi.  Nungak tampi mah sang kah kawmin ama inn ah om uh hi.  Tua lai hunin numeite in sun niloh a sam uh a phiah lohna dingin dial pa vang silsial tawh a lu uh tuam thei uh hi.  Ni khat nungak khat in Mrs. White omna a nawk leh lim taka kibawl sam tuamna dial khat mu-a, deih gawh mahmah hi.  Lak loh theih loh dingin ngaihsuna, la takpi-in, a bumgua sungah koih hi.  Tua zawh a sawt lo-in Mrs. White in vak khiat sawma a kisep leh a sam tuamna mu lo hi.  A nitak innkuan a kim uh ciangin Mrs. White in a sam a tuamna a muh lohna gena, kuamah a pau a ham om lo hi.

            Tua zawh ni 1 ni 2 khawng ciangin tua nungak' omna nawkin Mrs. White a pai leh, aw khat in, "Tua bumgua hong dih in," ci hi.  Tua bumgua ama'a hi lo a hih manin hong nuam lo hi.  Nih vei a kisawl ciang-in vantung mi a hih lam thei hi.  Bumgua a hon leh a sam tuamna mu takpi hi.  Innkuan a kim tak uh ciangin Mrs. White in a sam tuamna kanin, 'Ama thu-in mang thei lo ding hi,' ci hi.  Kuamah a pau a om loh ciang-in Mrs. White in zong gen nawn lo hi.

            Ni tawm khat khit ciangin a lai gelhna pan Mrs. White a tawl ngak lai takin, mang muhna tawmno khat mu hi.  Nungak khat' khut in sam tuamna khat meivak tungah bi suka, a sam tuamna kuanga a kang tum a mu hi.  A mangmuhna tua teng hi ziau hi.

            Innkuan kikhopna hong om kik ciangin, tua dial om loh hiau mawkna thu gen kik leuleu-a, kuamah a pulaak om lo, thei ing a ci kuamah om lo lailai hi.  Tua zawh a sawt lo-in Mrs. White in nungak nu samin aw khat in hilha a bumgua sungah a dial a muhna leh mang muhna tomno khat tawh meivak khat tungah tua dial kihal a muhna gen hi.  Tua thu teng a gen cingin numei nu in a dial laak gena, hal tum kei leh a kitheih khak ding a launa pulaak hi.  Mrs. White tung leh Pasian' tungah thuum hi.

            Hih sam tuam lel thu neu mahmah khat a hih teh Topa'a dingin bang buai tham hiam, ih ci kha ding hi.  Tua nu Seventh-day Adventist khat a hihi.  Amah leh amah a hoih kisa kha-a, a gam tat khialhna kimu lo hi.  Gukna leh khemna a zang sak a huai hamna kimu lo hi.  Tu-in amah in tua na neng them khat ah Pasian in Ama kamsang kicinglah kawm kalah, mang muhna tawh lak helzen cih ciangin bang zahin phamawh a hih lam thei ta hi.  Tua nungak in thumaan khawvak hong mu ta hi.  Tua thu in a nuntakna kikhel saka, Khristian nuntak kician nei pai suak sak hi.

            Tua a hih manin Mrs. White tungah mang muhnate kipia hi.  Mrs. White in a gelh teci panna tampite in kawk tang tuam a neih hangin, leitung bupa pawlpi' kitang sapnate zong a hong lak a hihi.  Teci pannate in kawk mun leh tupna nei a hih lam Mrs. White in hih bangin hong gen hi:

            "Ka gelh teci pannate khawvak thak hi lo hi.  Hong kilak sa thumaan in mite' lungsim a but theihna ding hi zaw hi.  Pasian' tung leh mi pihte' tung a ih tavuan Lai Siangtho in tel takin hong lak hi napi, mi tawm bek in na mang uh hi.  Thumaan hong behlap hi lo hi.  Hong kipia sa thumaante 'Teci pannate' tung tawnin Pasian in hong hilh tel hi zaw hi.  'Teci panna te' in Lai Siangtho a thu neu sak ding hi lo-in, thumaan in mi khempeuh' lungsim a but theihna dingin, Lai Siangtho a pahtawi ding leh a lawp huai sak ding hi zaw hi."

            Mrs. White in a khan tawnin Pasian' Kammal mite' mai ah hilh hi.  A laibu masa a tawpna ah hih bangin gelh hi:  "Hih lai a sim ka it mite aw, na upna uh leh na gam tatna uh Pasian' Kammal uk sak un, ci-in kong sawl hi.  Tua Kammal tawh thu hong kikhen ding hi.  Pasian in tua Kammal sung ah, hun nunung ciangin mang muhna piak ding hong khaama, tua in upna thak neihna ding hi lo-in, Ama mite' lungnopna ding leh, Lai Siangtho thumaan a khialte puah kikna ding hi zaw hi," ci hi.

Source: Pawlpi Thu Lamlak, Book 1