phoneman, cableman, motorman sehsa-in koihkhia in. Tua khempeuh
piakloh phamawh hi. Sangnaupang naneihleh sangsap aakipan a phamawh
khempeuh phawk masa in. Tua teng khakhat sumtum lakpan dok lecin, a
omlaiteng nang khensatna zuiaa zattheih nasum ahi hi.
1. Nakhut aa om sumte nazeekkhiatma in, Biakinn sumding atawm-atam
cilo-in na kipiak zawhzah khenkhia in. Pawlpi tuamtuam in Tithes ci-in sawmahkhat
lakhia hi. Tua lian nazui zokei zongin hanciam limlim in. Pasian in khuthawm aa
biakinnpai deihlo hi. Pasian in thupha hongpia ding aa na-an nem ding hi. Naci damin namapai ding hi.
Elijah leh Sidon meigongnu taangthu phawk in. Amau neekding buhnel
khutkhat leh sathau themcik aneih kamsangpa nesak masa hi. Tua ni aa kipan abeel
sungah buhneel kitawlnga lo aa, um sungah sathau kang ngeilo hi. Nungzuite in
pongmoh lumnih leh nga tawngna bek nei uh a, a neding pasal tulguk bang pha hi.
Numei-naupang kisimlo hi. Topa Jesu kiang kipaipih hi. Jesu khutsungpan kihawmkhia a, khamtakin aneekkhit uh ciangin seng-12 val zawsop hi. Innkuansung sumzeekna zong kilamdang lo ding hi.
2. An aa beiding sehkholhsa-in nei in. Banzat mawk kei in. A omlo aa
phamawh teng lei in. Tua banah nasum aval tuakleh adang ngaihsun pan in. Maikha aa
nangahding sum muang in maneekkhol kei in.
* Sum ahi aa, an ahizongin it inla cilzat mahmah in. Abei theilo ding bangin zang phuak
phuak kei in. Hong pia Pasian in hong mu dingin bawl in. Kemthiamthiam inla, ne thiam
thiam in. Mawkpaih kei in. Neihsa sumleh-pai pen zin bang hi-a, omtawntunglo thei hi.
Cidamna leh sum pen tomno sung bek hithei hi.
Gamsate ngiate inzong aneekvalte mawknusiat lo hi. Lei khuatin phum hi. Aneek ding
amuhlohhun ciangin pai-in valuhkik zel hi. Ganhingte tungpanin zong pilna tampi kingah
hi. Michigan, Sterlingheight ah Pasian thu-um mihau khat om hi.
Bryan Mattson Co ci-in
Sualphah tawh kisai setvan tuamtuam bawlna nei uh hi. Amautawh kha-6 sung ka-om
khawm uh hi. Nikhat nitak-anin Pizza kane uh hi. A tapa Andrew in, anipnateng ne in, a
monghial khauhpian teng koihkhia hi. Apa'n amuh ciangin, "avekin nekhin in, avekpi a,
sum a kipia hi," ci-in nesak hi. Mihau icihte ettehhuai natam mahmah hi. Akhamval them
tawmciauciau in seng hi. Pasian aa-in zong lungkimhuai mahmah hi.
* Ahihtheih laiteng innkuan neek kibangleh hoih hi. Innkuan kitelkhelhna tawmsak beklo
sumbei zong nemtuam hi. Alim-a-al nekhawm innkuante pen bangkuahoih hizaw hi. Ahi
zongin nasepdan zui-in a pianlohhun om ding hi. Hihtheih tawpin kibatkim nading
hanciam ding ahi hi. Sumzekdan seh-ol tuam mahmah hi.
* Anneekhun ciangtan ding hoih hi. Mi pawlkhatte tatsatlo-in khakhai uh hi. Tua pen
zongsatna hoihlo ahi hi. Mipilgamah nai-4 kihallo-in an mawkneek lo uh hi. Neekhun
maanleh gilpi cidamsak hi. Ankam limsak tawntung hi. Leitungah alimpen cih omlo hi.
Kawlpaunak ah" Mingyaa hinkaung, khinyaa swe miu" " lim ihsak leh mehlim, ih
ngaih pepeuh sanggam" naci uh hi. Ankamlimna pen sumtawh kilei
theilo hi. Hunman leh gilkial hun aa neek pen leitungah anlimpen ahi hi.
* Anhuan laih (Rotation) tawntung in. Mizawnggamah an kiteng theilo hi. A om bangbang
neekloh phamawh hi. Alimna bek ngaihsun kenla, pumpi aading ahoih thupiseh zaw in.
Guihloh khempeuh naneektheihna dingin hanciam in. Annamkim naneektheih manin
hunkhat ciangin ahoihna namu ding hi.
3. Donghu sum tuamkoih hamtang in. Dammawhhun leh tuahsiathun ding kitheikhol lo hi.
Ginneilo-in sumlom aa kisapna om thei ding hi. Kamsia aa nasep tasamaa omhun om
thei hi. Sumtum hoih khempeuh hau tuanlo hi. Duhduh nezo khempeuh cidam kimlo hi.
Kidawmsiamte leh kikhual siamtak aa sumzeekte khut sungah sum kikhol thei bek hi.
Tua bang mite dongtanhunin tama ngeilo ding hi.
Kaneulai-in Kawlnupa sangsia hong om hi. Hong lengla tawntung hi. Ka
kingai mahmah uh hi. Khasum ne simtak mahmah uh hi. Khasum sanni
nipikhat sungteng pen sameh namnih, mehtui, zasan limmahmah hiden hi.
Khabei ding nipikaalkhat sapin gatamtui hong la hi. Kanu in, " Sia no
gatui nethei maw, umkeng .." cisamsam kawmin umta khat tawh thunthun
hi. Anau tawh kikhoplua aa,"va kha oo khei, sianu kikhoplua" ci-in
hong khasak hi. Inntun ciangin gatui sathau tawh kangin ngapik khahsuk
hi. Kalungsim sungah, " nasumsan cil aa meh namnih namthum nabawlte
tun omleh maw? " kaci hianghiang bek hi. Gatamtui sathau aa kan
kamuhcilna ahi hi. Ih sepzawh laitak, sumtum ahoih laitakin abeitheilo
bangin ngaihsun kha kei in. Tawm lua kholtak kei cikei in. Dawnkai
cia a takkeuhkeuh tuimal in khuakhat vaakzo cih thei in. Na kisik kei
ding hi.
By Mr.Siantuang
Spicer College
INDIA
No comments:
Post a Comment