Tg. Thawngpu (Tg. Kai Za Thawng Tawmbing) in Engineering degree tawh gualzawhna a ngahman iin lungdampihna

Kong it Zomi a kua maciat:

University of Florida, College of Engineering pan nung aa Sunday, April 6, 2012 ni iin Tg. Thawngpu (Tg. Kai Za Thawng Tawmbing)in a deih huai leh a angtan huai mahmah Electrical and Computer Engineering major leh Business Administration and Sales Engineering minor tawh Bachelor of Science degree gualzawhna manpha hong ngah khia zo ahihmanin Tg. Thawngpu, a nu leh a pa, leh a u leh a naau te tawh a kibang iin ka lungdampihna thu hong pulaak ingh. Thawngpu akipan a nu leh a pa leh amau unaau teng a thei kha aa a lungdampih nuam te ading iin zongh a hong pulaak khia ka hi hi.

Thawngpu peen Lei Lum veeng, Tedim khuapi, Zogam mi, Pa Daltawng (Pa Thang Khan Dal Tawmbing) leh Nu Niiang (Nu Zam Don Niiang Gualnam) te ii tapa nihna hi aa ama' laizom thum teng peen: a upa Tg. Cin Sian Khai (Khaipi), a naau Lia Niiang San Cing (Sannu) leh Lia Niiang Khaw Hau (Haulek) ahi uh hi. Tu laai tak iin amau innkuan peen Florida gam sung aa Gainesville khuapi leh Talahassee khuapi mun nih ah teng uh hi.

Tg. Thawngpu in hi bang aa gualzawhna lianpi a hong ngah ciang iin a tuam vilvel iin a nuai aa thu teng hang iin ka lungdam pih pha diak hi:

1. Ka pianna ka pa' tupa khat in gualzawhna a ngah ahihmanin ka lungdam pha diak hi.

2. A neu laai aa Yangon aa ka inn sung pan uh aa a khang khia hi aa lampai a kisin tuung iin tuuk mun phadiak iin a deek tath tath iin tath nim aa a deek bawk gawp iin a tawpna ah naaiphual gawp ahihmanin kei mah leh a nu tawh clinic khat ah vapai iin minor surgery bawl iin a naai ka va la khia uh hi. Tua bang hun te ka mit khaa iin mumu kawmkaal ah tu iin Electrical Engineer khat a hong hih mawk ciang iin lungdampih pha diak ingh.

3. Khangno sangnaupang dang te bang iin pilna bek sin semsem hi leh BS degree a ngah zawh sawt khin ding hinapi tapa dik mahmah khat ahihmanin a nu leh a pa te tawh inn maa lo maa a pankhawm man iin degree a ngah hun a kisot to ahi hi. Hi bang kawmkaal ah gualzawhna lukhu a hong khu thei Zotaang Thawngpu' gualzawhna ah ka lungdam pih pha diak hi.

Gualzawhna a ngah thak Thawngpu tung ah Topa Pasian in a thupha hong piak beh sak ta hen. Ei Zomi leh ih gam a tawi saang ding iin Zomi khangno te in pilna siamna atuamtuam te sin iin hong hanciam ciat unla, nu leh pa te, u leh naau te, sia leh makai te, khuapih tui pih te a it leh a domto siam te hong suak ciat un. A manpha Zomi te' zia leh tong leh cihtakna te, tu laai khang thak te in tuu bang ciing ciat iin khangsawn te tung ah zongh hilh sawn ciat ni. Zomi te maa zang iin hong khangto mengmeng ta hen.

Lungdampihna thupuak,

Mungno Gualnam

Riverside, California

Phone (C) 951-207-4237

Phone (O) 951-509-2370