Topa Khat Bek Ih Nei Hi....!

Thum=Pasian Khat: Pa, Ta, le Kha Siangtho

           Christian te thuhilhna khempeuh te lak ah Pasian upzia, ngaihsutzia, ih telzia te ki lamdang thei mahmah hi. Hihpen mihing lungsim-in ciangtanh nei i-hih manin Ciangtanh aneilo Pasian' thu akicingin ih tel thei kei hi.

            Hitakpi mah hi, thum gawm Pasian "Trinity" cih kammal Lai Siangtho sungah ki mulo takpi hi. Christian te-in Pasian khat bek om cih um a Pasian' thum ci-in ki um lo hi. Ahizongin Pasian khat bek ahih leh, koici bangin Trinity om ding hiam?

Trinity om ahih leh zong Pasian khat bek ci-in koi ci uptheih ding ih hi hiam? Lai Siangtho sung en in kikumh suk ni:

The Oneness of God: Pasian Khatbek hihna

           Lai Siangtho inPasian Khat bek om hi ci hi,"O Israel, ngai un! Topa in Pasian hi, Topa Khat bek om hi. ThuHilhkikna 6:4; 1Cor. 8:4-6). Hih Pasian khat cih kammal ih tel ding ki sam mahmah hi. 

           Pa, Tapa,le Kha Siangtho thu en suk pak ni: Pa Pasian ci-in Matt.27:46; 1Cor.8:6 te ah na gen hi. 

Tapa/khazih in Pasian hi. John 1:1;20:28;2Peter 1:1. Kha Siangtho zong Pasian hi. Acts 5:3,4; 2Cor. 3:17,18.

Hih te ih gen ciangin Godhead ihcih Pa, Ta, le Kha Siangtho ahi Pasian khat ahih na hong ki dawk hi. 

Pasian plural hi: Thuciam Lui

          To thum gawm Pasian cih kammal pen OT in teltak leh kician takin na gen lo hi. Ahizongin kihel kim cih ki thei hi.

"Ei ma lim, ei mah hongsun mi bawl ni..." Pian.!:26.  "En un mipa Eite khat tawh ki sun hi. Pian.3:22.  Moses mai ah sawlpaang kuang sung ah "Vantungmi" ki langh hi.Pai.3:2. Tua meikuang suangah Topa Pasian ahihna gen hi.Pai.3:15.Moses in :Kua na hiam" acih teh "I AM" "Kei mah Ka hihi Pai.3:14. Pasian in Israel te apai pih dingin Vantungmi sawl hi.Pai.23:20,21:Pai.5:15:Late 45:6-8.

            Isaiah 63:16 ah kote Pa na hihi. ci hi. PA ci-in na sam uh hi. Thuhilhkikna 32:6; Isaiah64:8. Tua ahih man in hongpiangsak Pasian ahi Pa khat bek ih nei hi. Malakhi 2:10.

Tapa thu agen na ah Hebia 1:8,9 "Ahizongin Tapa thu agen ciangin Pasian in, Pasian aw, na kumpi tokhom khang tawntungin kipdinga, thuman thutang tawh na gam sung na uk dinghi.... Nangma Pasian in nang mah hong teelin.." na ci hi. Hih kammal ah Pa leh Tapa gen khawm hi.

            Pasian Tapa tawh thu ensuk kik ni: "Banghang hiam cih leh eite adingin naungek khat hongsuaka, eite tungah tapa khat hong kipia hi. Amahpen eite hong ukpa hi dinga, ama min pen: Lamdang thulakpa, Vanglian Pasian, TawntungPa, Nopsakna Kumpi, kici ding hi. Isaiah 9:6. Tua Topa in eite mawhna ama tung ah suan hi.Isaiah 53:6,10. Tua Tapa pen Pa in nasempa khat in na zangh hi, aneu 11. Na sempa Tapa in agen na-ah: "Tua thu apian akipan in kei ka om hi, tu-in Topa Pasian in Keitungah avangliatna hong pia-a, Kei hong sawl hi. Isaiah42:1;48:16.  Thukhenpa leh mihing tapa hi-a tawntung kumpi gam amah ki pia hi. Sathau kinilhpa Messiah Daniel 9:25.  Puanpaak silh mipa hi Daniel 10:5,6.  Michael hi Daniel 10:13,21. Hih khempeuh in mihing tapa cih hong lak tel hi.

          Kha Siangtho zong atuam in gamtaangin na sem hi cih ki mu thei hi. Pian.1:2;6:3:Isaiah48:16.

Pasian Plural hi: Thuciam Thak

            Thuciam thak sungah Pa, Ta, le Kha Siangtho atuam tek in om hi.

Pa Pasian agen na pen mun tampi ah om hi. Atel nop mahmah ahih man in tawm en ni.

Jesu in agen na-ah: Ka Pa in kei hong sawl hi John 5:36,37.

Pa Pasian in Atapa khat neihsun apiak dongin leitung mite it hi, tua Tapa a um mi khempeuh ahon ding hi. John3:16,17. 

Tapa in a Pa thu mang hi. Matt.26:39-42. Topa Jesu in Pa pen Ka Pasian ci-in sam hi. Matt.27:46.  Jesu Christ pen Pasian' tapa hi.Luke 22:70. 

           Pa le Tapa in Kha Siangtho sawl thei cih Lai Siangtho ah ki mu thei hi. Sawltak 2:33. Tua Pa le Tapa in asawl uh Kha Siangtho pen Pasian ahihi. Sawltak.5:3,4.   Kha Siangtho Gamtangin nasem hi. John16:7-13;Sawltak13:2,4;16:6,7.

Mi pawl khat te in Pasian khat om cih upna nei-a, ahizongin Trinity or To thum gawm Pasian cih pen nial uh hi. Pa, Ta le Kha Siangtho te-in amau mun tek ah semkhia ciat uh hi. 

            Et theih pak ah: Jesu aki Tuiphum na ah, Vakhu bangin Kha Siangtho kumsuka, Pa in Tapa' thu pulaak hi. "Ka it, ka lung hongdam sak Ka Tapa..." Marka 1:11. 

            Trinitarian te ngaihsut dan ah: To thum te pen ki zaakim in omtawntung hi ci-in um uh hi. 

Ki zaakim cih sangin ki thuhual hi cih ki mu thei aa mihing te hotkhiatna nasepna ah mapangkhawm tek uh hi.Matt.28:19;2Cor.13:14;1Pet.1:2;Jude20,21.  Tuiphum na ah: ei zo lai te tawh ki banglo manglai ah: "The name of the Father and the son and the Holy Spirit" ci sese hi. Hih min (name) pen Plural hi lo aa singular hi. min khat bek genna hi-a min thum genna hi lo ahih man in To thum te ii min khat bek ahi Godhead Pasian Khat bek min ahihi. Tapa Jesu Christ in hong hehpih, Pa Pasian in hong it-in, Kha Siangtho in hong ki kholsak thei hi. 2Cor.13:14.  Pa Pasian in hongteel-a, Jesu' sisan tawh siangthona na ngah theih nadingin Kha Siangtho in hongbawl hi.1Pet.1:2. Ih tel dingin Siangtho tak in agamtangden na asemden Pa,Ta, le KhaSiangtho pen Thum hinapi in Godhead Pasian Khat ahi hi.

Sepdan le Kizop dan

           Banghang hiam cih leh Pa, Ta le KhaSiangtho pen thumgawm Pasian Khat ahihna amau sepna leh kizopna te ah ki mu thei hi.  Pa in Tapa sawl hi. John 3:16,17.  Tapa in asep ding akisawl bangin kician takin sem hi. John19:30.KhaSiangtho in Tapa' sepzia teng hong zom suak hi.John 14:26. Jesu hong suah ding kigen khol aa hongsuak in Jesu' Pa pen KhaSiangtho hi tuan lo in Pa Pasian ahi hi. Hih in pumkhat ahihna uh leh asepkhopna uh hong lak hizaw hi.

Thu Khakna

           Pa Pasian pen akimu thei lo le asi ngei lo Pasian ahi hi. 1Tim.1:17.

Tapa pen kimu thei ngei in zong si ngei aa, kivui in zong thokik zo-a nungta kik hi. 1Cor.15:3,4.

Amau te pen Piansakna Lei le Van, na khempeuh, ni, kha, aksi te le mihing mahmah aki piansak na-ah mapangkhawm uh hi. Paunak 8:22-31;Pian.1:3-31;2:1-3.Kolose 1:15-17;John 1:1-3,10,14.   KhaSiangtho tawh zong ki thuah khawm uh hi.Piancil 1:2.

           Pa, Ta, le KhaSiangtho ki thuahkhawm in ni 6 sung piansakna nasep te semkhawm uha, ni 7 ni in Tawlnga, Siangtho sakin Thupha pia hi. Hih ni 7 ni tawlngakhna in piansakna pen Pasian sep leh ei mihing mahmah hongpiangsak ahihna hong telcian sak ahihi. Ih phawk ding khat ah, Pa Pasian in Tapa Jesu zanghin nakhempeuh bawlin piangsaka ani 7 ni-in Tapa zong tawlnga hi. Hih thu a umlo te pen LaiSiangtho a umlo ahi hi.

           Tua ahih manin Jesu pen tangtawng pek panin Pa tawh a omsa hi-a Micah5:2; John 17:5. Mary sung pan in hong omphing pan hilo hi. Mihing lim le mel sun in hongpai hilo a, Ama' lim le mel suun in abawl mihing te ahonkhia dingin A Vantung vangliatna te nusia in hong kiniamkhiat hi zaw hi.

            Lai Siangtho pen Pasian' humop hi-a up ding le zuih dingin amuanhuai hi. Pasian um le muang ih hih takpi theih nadingin Pasian pen koi banghiam cih ih telna tawh upding tel dingciang tello umlo te hilo in Pasian' hihna bang atel thei le a um thei tek dingin Pasian ngimna ahi hi.