MIHING HONG KI BAWLDAN
KHAA
MIHING TE NGAIHDAN
Taanglai ih pi leh ih pu te'n dawi abiak lai vua kipan in tuni ciang dong mah in,ih mihing lungsim ah, ih taksa ah muh theih hetlo ei mah tawh kibang, ih sih hang sih thei het lo khaa bang hiam aw khat om in ki um hi.Ih gam ah Khritian thu ahong lut khit ciang in zong , sing bul, suangbul biakna leh dawi biakna pen bei zuai lel hi.Ahih hang in khaa si theilo nei bang a kingaihsut na pen Pasian thu ih up khit nungsang ah zong hih upna pen kitai san thei nai lo hi.
Ih leh pu ih pi te ii up dan ah pen ih sih ciang ih khaa pen si lo in,ih sih tak ciang pusuak in misi khua ah pai cihi.Tua misi khua pan a gil kial ciang in hong ciah cihi.Tua mah bang in misi khat peuh om ciang misi kha ii nek ding ci in sa sin sa lung ahih kei leh an na koih uhhi.Tua bek hi lo in misi a om ciang han kuangsung ah ama na kikoih sak hi.Hih bang a thu kihilhna pan in Khristian ih lut hang in hih bang dan a updan pen mi tam zaw te in ki um to suak a,ih misi ngaih la te leh ih vangam ngaih la te in tua cih updan hong sulzuih in, la te ih phuah ciang nuamtak in ih sa zel hi.Na zaalna siam ang lai ah ,na lengna tung thangvan ah,tung thang van nuam ah tungta maw, kei hong ngai in kap kei un cih te a kipan kisa hi.
Hih la te pen dahna kahna atuak (misi ) inn kuan te heh nepna ding in zang in ki sa ziahziah leh na hi gige hi.Tua pen mann mahmah leh ahih mah ding in ki um ahih lam kilang hi.Pastor te leh Pawlpi upa misi vui te khem peuh in zong tua bang dan mah in thu gen uhhi."Tuni pen van gam khuapi lut ni leh a van gam kongkhak hon ni hi in, tulai tak in van ah Pasian kiang ah nuam sa mahmah leh lungnuam mahmah in om ta ding hi; ei leitung ah omte hong hehpih zaw ding uhhi" ci in adah akap inn kuan te hehnem uh a,mihing te in khaa si theilo nei bang in hilh zel uhhi.
Hih bang dan upna leh kithu hilhna te in Pasian thu tawh kileh bulh bek hi lo in,nak pi tak in langdo mahmah hi cih pen Khristian te in ih thei ding hong kul mahmah hi.Zeisu in ei mah bang in si leh sa nei in hong pai a mihing te hong tatna te,Kalani a sihna te leh hong thoh kikna te, van ah akah toh na te leh,Siampi ahih nate, atat sa te la kik ding a lei ah hong pai kik ding thu te avek pi in kilehbulh cih thei hi.Tua ahih man in hih bang dan a upna leh kithu hilhna man taktak pen thei ding in, ei ma upna koih phot in hoihtak in sin zel ni maw.
LAI SIANGTHO GEN DAN.
Tua hih leh mihing ii khaa ih cih bang ahi ding hiam?
Amasa a ih gen mah bang in,mihing in khaa aneih pen LST in hi bang dan in hong hilh hi.Mihing sung ah khaa om hi,na khempeuh ahih thei huih ahihi(Job 32:8)Manglai in,But it is the spirit in a man,the breath of Almighty, that gives him understanding(Job 32:8 KJV).Pasian in mihng sung ah nuntakna huih apiak pen mihing khaa na hi lel hi, tua huih pen nuntakna nei mi,luang hawm nei,taksa omlo in zong na khempeuh thei khin bangdan pen hilo hi.Nun takna huih pen gamsa te in zong na nei hi(Thu hilh kikna 3:19,20 sim in).LST sung ah mihing khaa gen na Hebrew pau in"Ruah" leh Greek pau in"Pneuma" acih uh pen 'Soul ahih kei leh Spirit'ci in kilet in 1,700 vei kim bang na om hi.Soul ahih kei leh Spirit cih pen ih LST ah pen khaa ci in kilet hi.Ahih hang in ih LST ah hih khaa v 1,700 vei alakna ahpen "Soul cih leh Spirit" cih pen taksa omlo a,amah bek a nunta thei leh si theilo,maimang theilo,tawntungna,sih theilo bang a genna khat vei mahmah zong omlo cih pen ih theician ding kisam hi.Tua lo ah mihing te in ataksa theihtheihna aneih simloh theihtheih na nei thei nadang a om zong na gen het lo hi.
Mang pau a"Soul" ci a pau pen thu ciam lui a Hebrew pau "Nehphesh" cih pan a aki let ahihi.Original Hebrew ah pen 745 vei om in,English LST ah 473 vei Soul ci in kilet a,120 vei pen nunna (lives or life)ci a akilet ahihi.Aki zatna kithu khat thei lo cih pen ih thei ding kisam ding hi.Sawltak 27:37 thu a,"tembaw a mi pen ka vek pi un mi 276 hi un" cih pen zong , khaa (Soul) 276 hi un cih na ahihi.Mi 276 cih tawh akibang ahihi.mang Lai siangtho K.J.V ah en in.Paunak 25:25 Adangtak mipa in tui vawt lim asak mah bang in gam-la a aom lawm te kiang pan thu zak nuam kisa hi acih zong soul na ci in mihing zong ahihi.
" Soul" cih pen mun khat khat te ah "nunna" cih te pawl in na kilet zel hi.Late 103:2 ah Aw ka nunna Topa phat in ci in soul na zang hi.(late 119:176;142:4 te en in).ISamuel 18:1. Jonathan in David apum pi zah a ait na pen Soul na zang hi.Lungsim zong soul na cihi.(John 3:20, Sawl 4:3).
SPIRIT:Tua mah bang in Spirit cih zong akilet dan thu khat khin lo hi cih thei ding kisam hi.Job in ka nak ah Pasian hu a om lai teng,(Job 27:3)ci hi.Hih lai ah "Spirit" pen "nunna" cih in na zang hi.Job 15:13 te akipan in.Atam zaw ah pen Spirit pen (lungsim) cihna ahihi."Piak nopna lung sim anei khempeuh"(Pai khiatna 35:21, Gamlak vakna 14:24;Joshou 5:1;Late 78:8;Isai 57:15;Mikah 2:11).Hih mun te leh mun dang te ah Spirit pen lungsim cihna in na zang hi.
Huih cih in zong na kilet hi.Huih a nungna,(John3:8,Pian.8:1;Pai.10:13;Gam.11:31;2Samuel 22:11) leh mun dang te ah zong Spirit cih pen huih genna in nazang zel hi. Luke 8:55 ah numei no si thoh sak kik pen Spirit cih pen ii LST pawlkhat te ah khaa ci in na let hi.Tua pen nunna aneih thu hong gen hi.Hih lai ah "khaa" ci a azat pen Mangmuhna 13:15 ah pen nunna(life) na kilet leh hi.Greek pau Pneuma cih hi in,ih LST te ah huih ci a na kilet hi.Hih bang dan in mihing khaa gen na leh hong hilh dan ahihi.
Khaa cih gen na'ng in kam pau khat pen N'shahmah' ci in 24 vei kizang a, hih zong akizat dan thukhat lo hi.Mangpau in "Breath"ci in 17 na kilet in tua pen huih cihna ahihi.(Pian 2:7;Thuhilh.20:161Kum 15:19;Job 27:3;late 150:6;Isai 6:22;Daneil 10:17 etc.).Spirit ci in nih vei kilet hi.(Job 26:4;Paunak 20:7) ah Soul ci in khat vek na kilet hi(Isaih 57:16).Ahih hang in mi pawl khat in LST sim uh a "khaa" cih thumal amuh ciang in alung sim ah mihing la hi lo khaa, khoih theih la hi lo si,bang hiam aw khat in ngaihsun hi.
Ahih hang Ih Pasian thu (LST) in, soul cih leh spirit cih leh khaa cih te pawl pen, si thei lo, tangthei lo,maimang thei lo bang in hong hilh ngeingei lo hi.
LST ah "si theilo"(immortal) kampau pen na khat bek ah na zang in, Pasian tawh kisai a genna leh hihna genna bek a zat ahihi. A mah bek Pasian hi a, akimu thei lo , si thei lo..(1Timothy 17)."Amah bek pen si theih loh na nei (immortal) ci in gen hi(1Timothy 6:16),ki cing lel hi.Mihing te in tua bang dan khaa kinei lo hi cih pen kitel mahmah hi.Mihing si thei, muat thei,maimang thei,(mortal man) ki hihi."Pasian mai ah a si mihing pen a cingtak mah hiam?(Job 4:17).Pual in mihing pen si thei ci in gen hi(Rom.2:23 en in).Tua ahih man in mihing khaa (soul) pen si thei hi.A mawh te si ding hi.( The soul that sin it shall die)(Eze.18:4,20).Pumpi leh kha anih a athat thei pa kihta zaw un(matt.10:28;Jacob 5:20 zong en in).
Khaa si theilo neih le hang ,Khrist hong tat zong kisam lo ding a,om zia nei hetlo ding hi.Si thei, maimang thei,gamsa bang lel ih hihi.Si thei ,maiming thei ih hih man in,si theih loh na pen hong kisamta a,tua pen lungdamna thu in hong musak ta ahihi (1timothy 1:10).Tua tawngtung nuntakna pen, thu ciam in upna tawh kingah a,upna tawh ih kep den ding zong ahihi.Asawtlo in Pasian thuciam hong tun hun ciang kicing tak in hong kipia ding hi(1cor. 15:52-55,John 6:46,!Thesalonikia 4:16 en in).Zop lai ding.. thulu..Sih khit ciang a om dan .
No comments:
Post a Comment