Christmas ong tungding hita aa by Nangkhine

Christmas, ko neulai-in lungdambawl ciziaulel ve ungh in, Zeisu suah lungdamna, Zeisu hong suah lungdamna, thupha hong tungta hen. Zanvakna ah gawlkhak liangin la kisa ziahziah hi. Lungdambawl ong tunding kilawp petmah hi.

Banghang? Sang kikhak ding, nekngei mengmeng kholloh kine kha ding, ha...gen vanglak leng gending tawmsanlo ding hi. Lawibual biakinn gamla lua ahih manin Sakollam ah ka
kituamkhop kum uh ahi hi. Kiim le paam ah pawldangte apawl pawlun vuu..dung.vaa..dang sa, nopcilua keei. Tua masaih eipawlten bel abawlnuamlo ih hihiam? abawlzolo ih hiam? ong cinuam phial ingh a cihmah bangin pawlpimin tawh kilimbawl mello mawk hi. Inn khatlenih kikumin aak peuh kigo niangnuang hi. Tua kawmkalah satang peuh om thei sawnsawn. Tua leh tua kum (bang kum hiam?) tua kum in upa teng ong kikum uh. En zong lungdambawl bawl ni. Ih kikhopna biakinn lah mission huang hisam lo aih teh keel go ni, ong kici uh hi. Keeltal khat ong go petmah uh maw. Bawnggawh aa ong go mawk uh. Asa nek ciang namphalua kisa, nek dinga lah namsia, paih dinga lah keelsa acih linlian,  tua-a kipan keelsa peuhmah asim kihtak giugiau (agimneih) ka hi hi.

Tua banga agimnam phingphengteng mah alimna hi ih cih leh thukhat, agim namlo ahi silsial ding i deih leh, keel pen bungbukhai ding in, a gawl at, asi luangkhia khinsak pah leng, a pa ahih leh a ciltang at khiatsak pah leng, asa ih huan teh masala cihkhawng kulpeuhmah lo hi. Zo ngeina dan suankang; lothangkang, siing, aisan, ci (ci omlo, sa limlo) sathau tuateng tawh nuai dikdekin mei phat phalo ding, atui emem mai ani. Lungdambawl cianga keel gawh ding khawng a sawm giugiau i omkhak leh cihna e.ee..e.    

Tuucingte leh Vantung Mite tangthu Luke 2:8 sung phendih ni. There were shepherds living out in the fields near by keeping  watch over their flocks at night. Laisiangtho sungah tuucing hoih akici khempeuh in gamlakah a tuuhonte giahpih tek uh hi. Munkip lokip cih bang neilo in a tuuhonte tawh lonona mun zuan uh a, a tuahtuahna inn banga anei pahpah te hi. Neihlelam cih zong nei mello uh hi. Pawlkhat in watch tower galvilna ding tausang leh kulh khawng anei bel omsam uh hi.  Atam zaw tuuhon tawh giakkhawm zaw uh hi. Banghangin tuu cin kul hiam? Tuute pen manpha ahih manin ngiate, humpite, vompite, gutate' guk ding, nek ding kiphal ngiatlo ahih man hi. Tuuten zong a cingpa it mahmah uh a, a 'aw' thei-in, ngai uh hi.

  

Tuute in a cingpa' nung bek zui uh hi. John 10:3. Tuukong cingpa in a tuute a min ciatin a sap ciangin a tuute in a thu mang a, amah in tuukulh panin a tuute a pusuah khiatpih hi. Tuute mai ah tuucingpa pai a, a cingpa' aw theiuh ahih manin tuute in amah a zui uh hi. Aneu 5 ah Tuute in midangte' nung zuilo uh hi; banghang? midangte' aw thei theilo uh ahih man hi. Tualeh bangci? lau-in taisanzaw uh hi. Tuupilte hipah hi. Tuuhai a omtam? Tuuhai midang nungzui a om diam? Omtuak mawk hi. A cingpa aw a theinawnlo te ahi uh hi. A cina uh himai thei.

Zan laitakin gamlakah a tuuhonte a giahpih tuucing pawlkhat a om uh hi. Tuunote ong suahkuan hun ahi hi. Amun zong David tuucin ngeina mun mah ahi hi DA page 47. Tua tuucingte in David mah bangin ciangkhut, sailii, thungiip, savun puanbuuk, puanzaa mah kivom hamtang ding uh hi.

Tua tuucingte abangci mite hiam cih leh; kiphatsakna cihbang aneilo migi mi, lungnemna tawh tuute a makaih mite ahi uh a, a nasep bulpi uh tuu te thukhualtak a cinding a lunggulh tuucingte ahi uh hi. Tuucing hoih in a tuute sihpih ngam hi. Ngia khawng, humpi khawng amuh ciangin a tuu te taisan lo-in thukhualna tak tawh a tuute dalin gumkhia hi. Sihding ahih leh zong simasa ngam, a nuntakna pia ngam ahih manin ih Topa Zeisu ong si nahi hi. Tuucingpa khat bang in a tuuno humpinelkai kamsung pan sut kikin humpi' kam balkhap sak hi.

Tuuno suahkuan a tuucingte' nuntak dan baihtuaklo hi. Nisa khuadam namcin thuakin gampalak ah om uh hi. Tuucin thaman sum tampipi zong ngahtuak khollo uh hi. Tuu nei siampi ten hamphat lawh bek uh hi. Biakinnpi sunga teng siampite bangin nuamtakin annne, kisil, lum hithiat cih bang neikha ngeilo uh hi. Siampite bangin minphatna maipha ngahding cih sangsik kineumuhin, zahpihna thuakte vive hisawnsawn uh hi. Adiak diakin tuucingte kineumuh phadiak hi. Banghanghiam cih leh, tuucingten siampite bangin temple rules and regulations ahi; annnek ding ciangin khutsil masak ding cihkhawng neithei ngeilo uh hi. Keugawgam gampalak a tenguh hiven. Thukham palsatte cihna ngah zawsop mawk uh hi. Ahi zongin tuucingten siampite or pawlpimakaite tungah phunding ciakding cih peuhmah lungngaihin neikha ngei vetlo uh hi.

Hih i laisiangtho Luke sunga tuucingte ahih uhleh siampite' cial, siampite' tuucingte ahi uh hi. Jerusalem leh Bethlehem khua kikal, Bethlehem tawh kinai zaw deuh munteng a tuucinga om ahi uh hi. Tua siampite' tuute pen biakinnpi sunga biakpiakna dinga gawhding angak ngak tuute ahi uh hi. Siampite' sum metbawlna tuunote suak ve. Acii hoih, agen baanglo tuuno, siampite' recognized lambs, he..he..he... Mrs White in bangcigen lai hiam cih leh, all the lambs were out there to provide a continuous supply of perfect lambs for the temple. Tua tuucingte leh tuute tua munsan takah hong omkha citciat uh hi. Tua tuunote biakinnsung, biakinn huangsung tektekah biakpiakna dinga kizuak tuunote vive ahi hi.

Tuucingten tuucin bek hilo-in, kamsangnu in bang ong genbeh lai hiam cih leh, 'through the silent hours, they talked together of  the promised Savior, and they were praying for the coming of the King to David's throne" David kumpi tokhum luahding gumpa khat ong pai mengmeng theih na ding zankim zankhang gamdaih simin kikumkum kihoho uh a, lunggulhna lametna tak tawh thungen niloh uh hi, ci hi.

      

Tua Christmas zanlai takin pawlkhat ihmu hithiat hi. Pawlkhat ihmu theilo-in vantunga aksitang enen uh hi. Zeisu ong pailai takin biakna makaiten

mukhalo theikhalo uh hi. Tuucingten mukha biakha uh hi. Luke 2:25 Israel mite honkhia dinga ong pai Kumpipa ong suah a tuakkhate pen pawlpi sungah a thuman, acitak biakna miteng bek ahi uh hi. Honpa Messiah ong paiding hi, ci-a Tuucingten Vantungmi amuh khakuh lamdangsak ahuai loh mah bangin Pharisees ten amuh khakloh uh zong lamdangsak huaihetlo hi. Messiah ong paiding tuiduh banga aduhten dawnkha uh hilel hi.  

Isaiah 44:3. I will pour water upon him that is thirsty. Khuadam laitak dangtakin tui ong kibuak ngeilo hi. Messiah ong pai khualum hun hiding hi.

Luke 2:9. Tuucingte kiangah Topa' vantung mi khat hong kilang a, Topa' minthanna vang in amaute hong taan ahih manin a lau mahmah uh hi.

Gabriel mah hizello dia, Mary tungah a kilat in zong Mary lautuak ngel hiven, mataw. Tulai thu-um mi pawlkhat in Topa' aw kaza, vangtang khat kamu acih uh hang a lauluatlam uh genin neingeilo uh hi, kibang phalo aitam, ci simsim ingh. Tua leh Vantung mi in, 'lau kei un. Mi khempeuh a lungdam sak ding thuthakhoih khat note a' ding ka hong puak hi. 

Thuthakhoih goodnews, hisantaklian hi, goodnews= gospel, lungdamna thu ih cihcih. Tuni -in David khuapi sungah, note a hong honkhia ding Khazih Topa a suak hi. Ani bel tuucingte bek in thei ding hi. Vantung mi tampitak Pasian phatna la choir sa dingin kigingsa-in om uh hi. Biakna makaite zong thumanin citakin om uh hileh, tua lungdamna la kisa za khading uh hi. Zakhalo uh hi. Kiging mello uh aitam? A ngeina bangun nitak a lupding uh teh Messiah ong paiding thu ngen, Amen. Zing  sang a thawh uh teh Topa aw, Messiah ong paisak mengmeng in, Amen. Messiah ong suakkhin, na tungkhin  hi. Theikhalo, phawkkhalo mawkuh hi. Messiah in kingei na seh banga biakpiakna neite pelhin, lungsimtak tawh azong abiate' tuahkhak muhkhak dingin ong suakkhia hi.  

Aneu 13. Thakhatin vantung mihonpite hong omin Pasian phatna la sa uh a,

              Van a sang belna ah a om Pasian' min thang ta hen,

              Ama deih leitung mite tungah nopna om ta hen' ci-in Choir sa zuahzuah uh hi.

Tua hun laitakin leitung ngeina bang hileh naungek khat a suah teh pawlpi makai ten naungek muakna in musical group te samin tumtheih tuam tuam tawh muakna a bawldet uh ahi hi. Ih Topa Zeisu a' dingin bangmah kivaihawm lo hi. Ahi zongin Pa Pasian in A it a Tapa' suahni in Vantung mihonpi tawh namuak uh in Choir nasa sak ziahziah hi. Kuaman avaihawm noplohuh hangin Pa Pasian in na vaihawmlua veve hi. Tua vantung  mi

honpite lasak kuan mukha a, kuateng in zakha hiam? Messiah alunggulh taktak tuucingte bek hikha ding hi. Isa 9:2. Khuamial sunga a pai mite in khuavak lianpi mu khinta a, khuamial thukna gamsungah a teng mite tungah khua vak taang khinzo hi. Kua mite tungah eh!  Topa minthanna vang in amaute taan hi. Amaute kua te? Tuucingte. LST dotna leh dawnna hipahpah. 

Late 112:4. Lungsim thutangte a' dingin khuamial sung panin khuavak hong taangkhia hi. Lungsim thutangte Tuucingte or pharisees kuazaw?

Cimphawng dotna: Bangdingin mikhat asuah teh kinuam a, mikhat asih teh kidah hiam? Unndawnpian: Asuakpa lah kihilo, asipa lah kihilo. Tu O. Christmas ong tungding hita-in Innsung, innpua, singkung, kongzing lampi, etc.. khempeuh meivak namkim tawh kizemin khua ong mial ciangin meitang in lawm mahmah hi. Gentile mite khuamuhna dinga kivaak Christmas meivaktang taktak Zeisu Khazih na hizaw hi Luke 2:32. Vantung mite vangtungah ciahkik uh hi. 

Tuucingte zong tua naungek en dingin Bethlehem khua ah nawhpai mahmah uh hi. Naungek amuh uh ciangin David bangin The Lord is my Shepherd cihamtang lodia, manger sunga naungek khephung ah biapah uh hi. Abiak uh Nu Mary hilo hi. Amau biak Naungek Zeisu Khazih ahi hi. A tuute uh kuan cinsak aitam? A tuute un nungzuihlo aitam? October khabei kuanin Spain khuapi Madrid ah tuuhon bebeka theisa 5000 ding kongzing lampi dimin pai heethaat keei hi. Tuucing tamzensi inteh kacih leh a tuucing khat in tuutal kiikawng khat khau tawh kaai-in makaih a tuuhonpiten tua nung azui heethaat uh nahilel ngel hi. Thudiksi, thumangsi uh, tuu leh keel khentakmah ei, ka ci hi.

Tuucingte in naungek a muh uh ciangin vantung mi gensate a gensawn uh hi. Zeisu ong suah teci pang masate ahi uh hi. Ngabengte sangin ki zang masa zaw suak uh hi.  Vantung mite tawh kiho kha, Zeisu vamu kha, Zeisu' thu teci pang masa kha. Laisiangtho hunlai-in leitungthu hileh tuucing maimaite khawng thukhen zum ah eyewitness dinga  azat khak uh leh illegal hizen hi. Legally taka eyewitness news jounalist dinga kiphal vetlo hizen hiaumawk uh hi. Pasian in tuucingte it-in, pakta zenzen, mataw!

Adiak diakin Pharisees ten tuucingte neumuh phadiaklai uh hi. Sabbath palsat, Sabbath ni-in nasem, voksa lawng, Aisa khoih khoih cih bangin selpho, zahpih, zungkawkkawk mawk uh hi. Tuucingte zong amau utzawk hilo kha thei hi. Gamlak ah a tuute mah uh acin kul nahi hi. Siavuan te Sabbath ni-in tawlnga mawkle uh Sabbath ni a intenship care unit cina te kuanveh ding. Firefighter te ee, meikanglo dingmaw. Galkapte, Palikte Sabbath ni-in gallesa leh gutate tawh kipelhthei tuanding hiam?. Daniel te hunlai a, milim maiah kunloh ding leh, Naaman in a topa tawh milim maiah kun ding Kamsangpa' phalna tehtheih ding hilo hi. Nero in Christian te abawlsiat hunlai a, Christian te' sunday ni tandan leh tu a Christian te' sunday ni tandan zong genteh theihding hilo hi. 

Ahi zongin tuucingte kiangah lungdamna thu gen dingin vantung mite asawl kua hiam? Pasian ahi hi. Pasian in ei' hoihsak leh upmawh tawh kileh bulh theithei a piansak honkhat om hi. Kei' hoihsak mawkmawk bangin piangthei hileh Zeisu ong suahna amun leh ahun leh tecipang ding tuucing te sangin hia taka Pharisees te khawng hizaw leh kilawm kasa hi. Pasian' zialetong mihing khuakmaimai tawh sansat theihding hilo zelkhong hi.  

Ngaihsun pakleng! Tuhun tulaitak hileh, Bethlehem khua sungah tuucingte bangin ih nawhlut thei diam? Utbang bangin kilut ziauziau thei nawnlo ta hi. Khuapi kulhpi asang mahmah tawh ki-uumin gate ah Malaysia lut mahmah bangta hi. Aw!!!Ih Topa Zeisu ahun hoihlian laitak ong suahkhak citciat hampha mahmah hihang. 

Tulaitak ong suak phingphing ding hileh, Israel leh Palestine te kawmkal ah baih hetlo khading hi. Adiak diakin  tuucingte a' ding mahmahin hamphathuai phadeuh leh hunhoih hunlem tawh kituak mahmah citciat kasa hi.

Christmas ong piankhiat cilna bulpi na ngaihsun kha hiam? Tuhun a mite lop banga kilawm ziazua ding limcinna dinga ong piangmah ahi hiam? Letsong kikhai ngeingai in, tua letsongte kemcip or ih cimtak teh paihlel letsong khawng kipiakna dinga zatna Christmas ahi kha hiam? Atam zaw letsongte bel kikemcip theiden khollo zaw hi. Cimtakhuai hetlo kepciptheih ding letsong leitungah bang aom tam? (Model thak) repeat hiden keei. Na ngah masak penpen Christmas letsong bang hiam cih na phawklai hiam? Tulai tak koiah aom tam? Kemlaithei/kemnawnlo thei, maw.  

Tua dingmah theikhol a, Pasian in apahtak mite tungah letsong hoih penpen ong vaihawm sak hi. Atultheilo, athak tektek, lungsim takpi tawh tua letsong asangten deih tektek, bangmah dang tawh khektheihding a ngaihsun theilo tektek, Apammaih mahmah tua letsong Pasian in A it, A tate ong piakhia hi. Nuntak tawntung a ihman theihding letsong ong pia hi. Swiss Bank peuh, Bank of America peuh cihte khawng nahi maimai lo hi.

Tua letsong in Zeisu ahi hi. Adeihlo ten susia zenmah ven cin aw. Anial omleh bangzahin Pasian lungtang a khoihkha tam? Tua letsong ong piak zankim laitakin pawlkhat in na ihmutsan uh hi. Herod in tua letsong suksiatmang ding sawm hi. Singlamteh tung ong paii uh hi. letsong ong pia Pasian, bangzah takin dahin a khitui aluangzen tam? Kuama deihloh, kuama awlmawhloh, tua Christmas Gifts tuucingten ong nasangkha likliak zenzen uh hi. A piapa in a koici muh zentam? Mihing hileh tua bawngcingte sangin bawng neite peuh kipiazaw kha ding hi. Pasian in thuman thutak mite thei-in, tuate' tungah tua letsong a pia nahi hi.  Tua ahih manin ih lungsim takpi tawh Pasian' ong piak tua letsong ahi:

                      Zeisu Khazih

                      Honpa Gumpa

                            in

             ...........Sangni.........

Letsong manpha ong pia Pasian' tungah lungdam ko ni. I nuntakna ah tua letsong ong zangsiam sak hen.

Abeisa hun a letsong ong piak bek hilo in, zanlam teh khat vei ong piakik lai ning ci-in, ong kamciam lai hi. Lawpna leh lametna lianpi tawh

tua letsong sang dingin kiging ciat ni............Merry Christmas to You All.........
Post by Nangkhine Src:ZAC