SIHNA LEH ASITHEILO KHAA UPZIA

by- Lian Kap Sang (Sangpi)

Mihingte ii sih khit ciangin bangh piang hiam? Cih dotna pen mitampi tak-in, akoici bangh hiam cih theilo-a akibuaipih mahmah khat ahi hi. Tuni-in, Eite in ngaihsutna/tuatna (theories) tampi ii nei hi. Pawlkhat in, ii sih khit ciangin vantung kitung pah hi ci uha, Pawlkhat in, ii sih khit ciangin Hell (gawtmun) kitung pah hi aci zongh om-a, Pawlkhatte leuleu in, ii sih khit ciangin thawhkikni mateng hansungah ihmu (the dead sleep) ci-in, leh Pawlkhat in, sunglut/mihing bangh-a piang kik cih danin um uh hi. Ahi zongh in, LST sungah Zeisu in ong bangh ci gen hiam cih ii en ding hi. Rev. 1:18, “Nidang lai-in, Ka sih ngei hangin, tu-in en un, atawntungin Ka nungta a, sihna leh sihnagam (Hell) kong honna tawhtang (key) ka nei hi.” aci hi.

Akipatcil in, Eden huan ah Dawimangpa (DMP) in mihingte lungbuai nading amasa pen dingin sihna thu ong zangh hi. DMP in Eve kiangah hi bangin dotna ong dong hi, Gen. 3:1, “Pasian in, Huansung-a singgah khat pepeuh nelo ding ong ci hiam?”ci hi. Eve in manlangtak-in, dawng pah-a Aneu 2-3 “Huansung-a singgahte ka ne thei ding uh hi; ahi zongin, Pasian in, Huan laizang-a om singgah na ne kei ding uh hi, zongh na lawng kei ding uh hi hong ci hi,” aci hi. Tua khit lian ciangin, LST sung-a zuau kigen masa pen pen ong piang hi. Aneu 4, “Gulpi (DMP) in ‘Na sitakpi kei ding uh hi’. ” Bangh zah-in, Zuauphuah siam hiam! DMP in Na si ding uha, ahi zongh in NA SITAKPI KEI DING UH HI (NOT SURELY DIE) ci se hi. Hih Zuauphuah siamna hangin, leitung mihingten tuni ciang dong in, ii sih ciang in, kisitakpilo (khaa kinei ) hi cih a-um tampi tak ki om hi. Bangh hang? Khuamial peuh leh misi han kiim pai ding lau uh hi. Ahangin, DMP zuauphuah siamna pen um uh ahih manin, ii sih ciangin, kisitakpilo agamtaang2 khaa kinei hi cih thu a-up man uh ahi hi.

Tua banah, Pasian’ kammal thumaan thutak kimlai, DMP in zuauphuak in, “Na Sitakpi Kei ding uh hi” ci ahih manin, DMP pen Zuauphuakbupa ong hi hi. LST sungah, John  8:44, “ DMP pen zuauna khempeuh te’ ii pianna Pa ahi hi.” ci-in John in na gen hi. Tua leh Nuntaakna akipatna enkik leng.. Gen. 2:7, “Topa Pasian in leilak pana leivui tawh leivuipumpi bawl a, a nak sungah nuntakna huu muan/sang suk hi. Tua leivuipumpi pen leitung nuntakna anei khaa (mihing) hong suak pah hi.” Pasian in Leivui tawh leivuipumpi bawl hi. Tua tawh kituak-in, pawlkhat in, mihing khat sungah Iron, Iodine, Zinc cih atuam2te atuaktak ciangin, mihing khat pen 93 pia (cents) bek man hi.

Hi lai-ah, eite in elements nam nih i mu thei hi: Leivuipumpi leh 2. Pasian’ nuntaakna huu hi tegeel akigawm ciangin, anungta khaa(Mihing) ong piang hi. Theih ding athupi mah mah khat ah Mihing pen leivuipumpi leh Khaa atuam tuak/akikhen in ong kibawllo hi. Ahi zongh in Mihing pen leivuipumpi leh Pasian’ nuntaakna huu akigawm ahi hi. Theihpak nadingin, Leivuipumpi + Pasian’ huu = Mihing (anungta khaa). Mihing (anungta khaa) - Pasian’ huu = Sihna. 

Apaizia en sung pak leng: Ps. 104:29, “Na maitang na seel ciangin, amaute khasia uh hi. Amau’ huusanna na lakkhiat ciangin, amaute si-in amau’ pianna leivui-ah a ciahkik uh hi.”  Huu akilakkhiat ciangin, sihna hi. Aneu 30, “Na huu na san'khiat ciangin amaute a kipiangsak hi a, Nangmah  in leitung na bawlthak hi.” 

Tua ah, Pawlkhatte genna ah, “Asitheilo khaa” cih tawh kisai ensuk leng: Pawlkhatte in i sihkhit ciangin, ii khaa vantungah ahih kei leh hell ah tung pahpah hi acih pen za mun mahmah ding hi hang.  LST in hong hilhcian  hi. LST buppi sungah, Khaa (Soul) cih kammal pen 1,700 vei bangh kizangh in ahi zongh in, asitheilo khaa cih pen mun khat bek2 ah kimu hi. Tua LST mun khat bek mah ah asitheilo khaa cih kammal kizangh hi. I Tim. 1:17, “Amah bek Pasian ahi, a kimu theilo, a sitheilo, tawntung Kumpipa in minthan'na leh pahtawina ngah tawntung ta hen. Amen.”  Asitheilo Pasian bek om hi. Tua leh asitheilo khaa (immortal soul) acih bangh hiam ci kha ding hi teh. LST in asitheilo khaa (immortal soul) cih ong hilh ngeilo-in, Hintawntungna (immortality) cih Li vei na gen hi. Asitheilo khaa (immortal soul) leh Hintawntungna (immortality) kibanghlo hi. 

Tua leh Khaa i cih in bangh hiam? Naphawk lai hiam? Gen. 2:7, sungah “leivuipumpi + huu = Khaa. Eite pen khaa hi hang tua ahih manin, effort bawl ciang khawng in khaa tua zah kingah ii ci hi. Khaa i cih pen mihing khat sungah aom ii sih ciangin ataikhia hilo hi. Khaa ii cih cih pen Mihing cih na hi. Acts 2:41, “Mi tampi (Khaa tampi) in ama thugen umin tui kiphum uha, tua ni-in mihing (Khaa) tul thum bang kibehlap uh hi.”

LST ong hilhcianna ah,  Ezekiel 18:4, "Behold, all souls are mine; as the soul of the father, so also the soul of the son is mine: the soul that sinneth, it shall die." (Mi khempeuh (Khaa khempeuh) keima-a' hi a, pate ahi a, tate ahi zongin keima-a' ahi hi. A mawh mipa (Khaa) bek si ding hi.” ) Khaate (Mihingte) si thei hi bang hang hiam khaate (Mihingte) pen pate, tate tawh akibang nuntaakna anei hi. Adang LST mun tawm ensuk lai leng hang Khaa acih taktak in bangh hiam cih ii tel theih ding-a; Mihing ahi zongh Ganhing ahi zongin akipiansak/akibawl ciangin leivuipumpi leh huu kigawm tawh akibawl/akipiangsak ahi hi. Pian. 2:19, “Pasian in gamsung hanhing khempeuh leh Huihlak vasa khempeuh leivui tawh bawl-a…” na ci hi. Ei mihingte bek hilo in ganhingte zongh leivuipumpi tawh akibawl ahi hi. Mihingte pen leivui tawh a form nei-a kibawl hi-a, ganhingte pen thu (piang hen acih leh piang) tawh kibawl hi… ci-a a-um zongh om hi. Mihing tawh akibangh in form nei in ong kibawl/kipiangsak hi.

Mihingte ii sihkhit ciangin bangh piang hiam? Oltak-in (Simply) LST in ong hi ci gen hi… Eccl.12:7, “I pumpi, lei suakkik ding a, i nuntakna a hong pia Pasian' kiangah i huu (Spirit) ciahkik ta ding hi.” Hi lai-ah, Spirit cih kammal pen Hebrew kam in “Ruach” ahi hi. Hi pen manglai in 117 vei kitei na ah, “Wind” or “Breath” (Huu) tawh 33 vei kitei hi. Hi “Spirit” kammal pen concordance leh dictionary pawlkhatte ah “Breath” na zangh uh hi. Tua ahih manin, “Nuntakna ahongpia Pasian kiangah aciah kik pen Huu ahi hi.” Adang LST mun tampite ah zongh tua bangh mah in na gen hi. Job 27:3, “Ka sungah nuntakna huu a omlaiteng, Pasian' huu, ka naakah ka diik laiteng,” na ci hi. 

Tua leh Pasian’ in mihingte naaksungah bangh muam hiam? Gen. 2:7, “Nuntakna huu muan hi”. Singlamteh tungah Zeisu thu en ni: Luke 23:46, “Tua ciangin nakpi takin Jesuh kiko a, "Pa aw, nangma khutsungah Ka nuntakna huu (My Spirit) kong ki-ap hi," a cih khit ciangin a si ta hi.”  “Na khut sungah Ka nuntakna huu (My Spirit or breath of life) kong ap hi” ci hi. Zeisu asih khit ciangin vantunggam (Paradise) pai pahlo-in, ani thum khit Sunday ni zingsang ciangin thokik hi. Amah pen simply tak in si in, Amaa huu Pasian’ kiangah ciahkik hi.

Na thei hia lawm, Nuntakna huu anei khempeuh mihing leh ganhing na khempeuh ii nuntakna naak pen Pasian bek ahi hi. Mihingte in hanciamna ii nei-a, ahi zongh in Pasian in nuntakna naak len hi.

Hi gentehna khat tawh kibangh hi: Mihingte in huu ii diik-a, Sakol leh Vasa te in zongh adiik ciat uh hi. Muhtheihloh meithahatna (Electricity) tawh kibangh linlian hi. Computer ah kizangh, Puantaihna ah kizangh, Meivaakna ah kizangh atuam tek ah akizat hangin, anaakpi pen mun khat bek mah ahi hi. (Khangluilai-a Galkap khuan ciah khat in meikhau, meikhalauh(meihonna) leh meibulb pua in, akhua uh atung ciang-a Nitak ciang meipi vaak kullo dingin, mei ong pua ingh ci-a ameikhalauh meikhau leh meibulh zopsa aa koih in khuamial ciangin ahon leh taanglo cih dan khat zangei ingh…) Electricity tawh akizoploh man hih tuak hi. Adang khat in gen leng Meibulb pen ADAM, Electricity pen Pasian’ huu. Hi tegeel gawm leng Meitang thei/ nungta (life). James 2:26, “Tua ahih manin huu a diiklo, huu a sanglo pumpi pen a si ahih mah bangin sepna tawh a kizomlo upna zong asi ahi hi.”  Tua ahi-a, Mihingte ii sih ciangin, ii nuntaakna huu pen Pasian kiangah ciah kik-a, ii pumpi pen lei ah ciah kik hi. Bang hang hiam cih leh amau kipatna tuak ah aciah kik uh ahi hi. Ganhingte zongh tua dan linlian mah in LST in ong hilh hi: Eccl. 3:19-20, “A tawpna-ah ci lehang, mihingte leh ganhingte in a tuah ding uh kibang a, ganhing mah bangin mihing zong a si ahi hi. Mihing leh ganhing in a kibangin nuntakna hu nei a, mihing leh ganhing nuntakna a kiman'na bangmah omlo ahih manin, mihing pen ganhing sangin a hoihzawkna bangmah om tuanlo hi. A nih tuakun mun khatah tung khawm ding uh a, leivui panin a piang uh ahih mah bangin leivui mah suakkik ding uh hi.”

Zom om lai……