Khawkpi 6 (Azom) : Kitheihna Bek Sianthosakna Lim Hi Kei

Kitheihna Bek Sianthosakna Lim Hi Kei

 

            Lungdam theihna, a hih kei leh lungdam lohna cihte pen sianthosakna a ngah leh a ngah lo a kitheihna hi lo hi. Sianthona ngah paksai cih om thei lo hi. Sianthona taktak pen nisim nasep hi-a, nuntak laitenga zop suak ding a hihi. Nisimin zia-etnate do-a, mawh nopna lungsimte zo zela, lungsim leh pumpi sianthona ding a hanciamte in, siangtho khin ta'ng ci-in kisial ngei lo hi. Amaute in diktatna lunggulh mahmah uh hi. Mawhna pen siahuai sa mahmah uh hi. SL, laimai 10.

            Ih mawhnate hangin Pasian in hong nusia pah lo hi. Khialhna nei-in A Kha zong ih dah sak kha thei ding hi. Kisikin, kisuantakna lungsim tawh Amah ih zuat ciangin Ama'n hong kiheisan lo hi. Ih hep khiat ding kol-awknate om hi. Ih lungsimte maan lo-in, kiphatsakna, kiliatsakna, lungtomna leh phunhatnate ih nei hi. Tuate khempeuh in Pasian tawh hong kikhen sak hi. Mawhnate ih pulaak kula, lungsim sungah hehpihna in na a thuk sep zawk kul hi. Thanema hat lo a kisate, Pasian' mi thahatte suak thei-a, Topa'a ding nasep thupi sem thei zaw hi. Amaute in panmun sang ah na sem ding uha, angsung ngaihsutna peuhmah nei lo ding uh hi.

            Kimkhatte in a hun ngakin, Ama thuphate a saan ma-un, kipuah pha a hihna uh Topa kisittel sak phot sawm uh hi. Ama thuphate tu mahmahin zong kingen thei hi. A zawngkhalna uh a huh dingin Khris' Kha a hi Ama hehpihna a ngah ding uh kisam hi. Tua lo-in Khristian zia leh tong nei zo lo ding uh hi. Ih hi bang lian - mawhna a dim a cimawh a guaksuakpi mahin Amah ih zuat ding Jesu in hong deih hi.

            Kisikna hi ta leh mawh mai sakna hi ta leh Khris' tung tawna Pasian' hong letsong a hihi. Mawh ih hih lam ih kiphawk leh mawh mai sakna kisam ih hih lam ih kitheihna pen Kha Siangtho' nasepna hang a hihi. Kisikna tawh lungsim kitam khamte longal kuamah in mawh mai sakna ngah lo hi. Kisikna lungsim a piang sak zong Pasian' hehpihna mah a hihi. Ih thanemna leh ih zawngkhalnate Ama'n hong theih piha' Ama'n hong huh ding hi. 2TT, laimai 91-94.

            Khuazing leh lungkhiatna ih tungah khat veivei hong tung dinga hong lungkham sak ding a hih hangin, ih muanna ih khah suah kei ding hi. Kitheihna ih nei-a ih nei kei a hi zongin Jesu ih mit suan gige ding ki sam hi. Sep ding mah hi cih ih theih khempeuh muan huai takin ih sem dinga, Pasian' kamciam muangin ih om ding hi.

            Ih ginat lohna ih kiphawk ciangin khat veivei patau gawp ngingei thei ih hih hangin tua pen ei' lamah Pasian hong kikhelna, ahih kei leh Pasian' lamah ei ih kikhelna lim hi tuan lo hi. Lungsim a hong phawng gawp thei ding khat peuh hih hamtang ding hi lo hi. Zan ni-a ih neih lungnopna leh lungdamna tu ni-in ih nei kei kha thei ding hi; a hi zongin upna tawh Khris' khut lenin, khawvak sung (nopsakna hun) a Amah ih muan mah bangin khawmial sung (dahna hun) ah zong ih muang ding hi.

            A gual zo mite'a dinga a kikoih lukhute upna tawh en in; kithata Pasian' a dinga eite a hong tan Tuuno manpha hi, manpha hi, cih tatsate' lapi ngai in. Tuate a taktak mah hi na cih theihna dingin hanciam in.

            Ih lungsim in Khris leh vantung khua a ngaihsut phat semsem ciangin Topa' galte ih do pihna ah tha leh pan pihna ih ngah zawsem ding hi. A sawt lo-a ih ten na ding a hi tua gam hoih zaw ih ngaihsut ciangin kiphatsakna leh leitung iplahna hong bei ding hi. Khris-a it huaina longal leitunga a iplah huai khempeuh a  mawkna hong suak ding hi.

            Rom thong inn sungah kikhuma, vantung khawvak leh huih kingah sak lo-in, gospel a tangkona kikhamin, thah dinga mawh sakna bek ngaka a om lai takin Paul in lunghianna leh lungkiatna nei tuan lo hi. Tua kulhbiing mial sung panin, a khang a khanga mi siangtho te leh upna hanga thahna thuakte' lungsim a khauk sak, upna leh hanna a dim sih kuan teci panna hong ging khia hi. Ama kammalte in hih laidalte sunga ih gengen sianthosakna hanga a kingah thaman hong gen hi:  "Biakna-a kilui dingin ka kiging zo hi. Ka pai ding hun hong tung ta hi. Galdona a pha ka do zo hi. Taina ding kung dongin ka tai zo hi. Upna thu ka zui zo hi. Tu-in dikna lukhu kei'a dingin kikoih zo-a, thumaan thukhenpa in tua ni ciangin kei a hong pia ding hi. Kei bek hi lo-in, Amah hong kilat ding a ngaklah khempeuh zong a hong pia ding hi. 2 Timothy 2:6-8. SL, laimai 89-96.

(zop lai ding)