Daniel - Nuntak Siangtho Etteh Huai
Daniel' nuntakna in siantho sakna a ngah zia leh tong lim khat a hihi. Mi khempeuh, a diakdiakin khangnote'a dingin etteh huai a hihi. Pasian' deihna zuih cintenna in lungsim leh pumpi cidamna piang sak hi. Gamtat hoih leh pilna a sang theithei ngah theihna dingin, Pasian kiang pan pilna leh hatna zon ding kisama, zongsatna khempeuh zong kikhal a kul a hihi. SL, laimai 23.
Daniel' gamtat kawk banna a om loh semsem ciangin, a galte in amah a muhdahna hong lian semsem hi. A gamtatna ah hi ta leh a nasepna ah hi ta leh a gensiatna ding uh mu zo lo uh a hih manin, amaute heh mahmah uh hi. "Amaute in, a Pasian' thukham tawh kisai-in amah kawk theihna ding ih muh kei ngal leh hih Daniel ih kawkna ding khat zong ih mu kei ding hi, a ci uh hi." Daniel 6:5.
Hih thu ah Khristian khempeuh in ih theih ding thu hong kilak hi. Hazatna mittangte in ni khat khit ni khat Daniel sal uh hi. Muhdahna tawh vil gige uh hi. A hi zongin a kampauna ah hi ta leh a gamtatna ah hi ta leh khial hi cih theihna ding om thei mahmah lo hi. Hi napi amah in sianthona ngah zo ing, ci tuan se lo-in, a hoih zawsemin gamta-in, cihtakna leh kiapna tawh nungta hi.
Kumpipa kiang pan thupiakna hong pai hi. A galte in amah suksiat ding a sawmna Daniel in thei hi. A hi zongin a gamtatna them khat zong kilamdang sak lo hi. A ngei bangin a sep dingte sem hiathiat lelin, thunget hun ciangin a inn dei sungah tumin, Jerusalem lama a tawlette hong sa-in vantung Pasian kiangah thu ngen hi. Amah leh a Pasian' kikal ah leitung pavua khat zong lut zo lo ding a hihna a gamtatna tawh lau lo takin laka, kua' kiangah thu nget huai-a kua' kiangah nget huai lo cih zong gen hi. A citak mahmah mi hoih pa! tu lai mite'a dingin Khristian hanna leh cihtakna ah etteh tham cing takin na ding hi. Pasian a biakna hanga a thuak ding sihna a hih lam thei napi-in a lungsim khempeuh tawh Pasian' lam nga hi.
"Tua ciangin kumpipa in thu pia-a, amaute in Daniel pai pihin humpi kua sungah a khia uh hi. Kumpipa pau-in Daniel' kiangah, A tawntunga na biak na Pasian in nang hong hon khia ding hi, ci hi." Taang 16.
Zingsang tungin humpi kua ah kumpipa pai-in, "A nungta Pasian' nasem Daniel aw, a tawntunga na biak na Pasian in humpite' kiang panin nang hong hon khia thei hiam? ci hi. Taang 20. Kamsangpa' aw hong kiza-a, "Kumpipa aw, na khan sawt hen. Ka Pasian in a vantung mi hong pai saka, humpite' kam hum cip sak a hih manin, amaute in kei hong su lo uh hi. Amah in ka tungah mawhna hong muh loh mah bangin, kumpipa aw nang' tungah zong siatna ka bawl kei hi, ci hi.
Tua ciangin kumpipa nuam mahmaha, humpi kua pan Daniel a la khia dingin amaute thu pia hi. Tua bangin humpi kua panin Daniel kila khia-a, ama tungah liamma khat zong a kimu kei hi. Bang hang hiam cih leh Daniel in a Pasian um hi." Taang 22,23. Tua bangin Pasian' nasempa kihon khia hi. A galte in ama siatna dinga a thang siah uh tu-in amau' siatna ding hong suak hi. Kumpipa' thupiakna tawh humpi kua ah amaute kikhia-a, sapite in amaute ne tum pah uh hi.
Kum 70 salawkna hun bei kuan ta-a, Daniel in zong Jeremiah hilhkholhna thu lim ngaihsut mahmah hi.
Daniel in Topa' mai ah ama cihtakna tangko lo hi. A siangtho a kician a hi dinga a kigen sangin Israel mite' mawhna tawh a kisim khawm khat bangin kiniam khiat zaw hi. Aksi taang kiaukiau sangin sun lai a vana nitang a phat zawk mah bangin, leitung miliante' pilna nasia zaw hi. Vantung in a paktak mahmah mi-pa' muk pana thungetnate ngaihsun dih in. Kiniam khiat didiaina leh lungsim kitam khama khitui luanna tawh amah leh a mite'a dingin thuum hi. Pasian' mai ah a kha lui khia-in, ama cihtaak lohna kipulaakin, Topa' liatna leh thupina gen khia hi.
Daniel in thu a ngetnget lai takin, ama thungetnate kiza-in kisang a hihna a gen dingin vantung zumpi panin vantung mi Gabriel hong kum suk hi. Siamna leh theihna Daniel a pia ding, mai lama piang ding thute a lak dingin tua vantung mi hong kisawl a hihi. Tua banga thumaan thei tel nuama a hanciam lai takin, vantung in a sawl kamtaipa tawh Daniel kiho hi.
A thuumna kisanga, Daniel in amah leh a mite' kitangsapna lian bel a hi thumaan khuavak a ngah bek tham lo-in, mai lama thupiang ding, leitung Tanpa hong pai kikna ding dong mu to lai hi. Lai Siangtho tel kan nuam lo-a, Lai Siangtho thumaan a kician zawa a theihna dinga thu a ngen cinten lo mite in sianthona ngah khin ung, a cih uh hangin sianthosakna taktak bang hiam cih a thei lopi uh a hihi.
Pasian tawh Daniel kiho hi. Ama mai ah vantung kihong hi. Ama kiniam khiatna leh a hahzonna hangin pahtawina lianpipi amah a kipia a hihi. Lungsim taktak tawh Pasian' Kammal a um khempeuh in Ama deihna zong thei tel nuam mahmah ding uh hi. Thumaan phungpi Pasian a hihi. Amah in theih cian lohnate theih cianna pia-a, Ama hong lah thumaante a tel theihna dingin mihing' lungsim hon sak hi.
Leitung Tapa in hong lah khiat thumaante, a kiseel sum banga thumaan a zong mite'a a ding a hihi. Daniel teek ta hi. Lawki zum a nopcite lakah khang khia khina, gam lianpi thute tawh a lungsim gik khin hi. Hi napi tuate khempeuh kiheisanin, Pasian' mai ah a kha niam khiatin, Sang Belpa' deihnate a theihna dingin hanciam hi. Ama ngetnate hangin hun nununga mite'a dingin vantung zumpi panin khawvak hong tang suk hi. Tua a hih ciangin vantung pana hong kipia suk thumaante ih theih tel theihna dingin deihna taktak tawh Pasian' huhna ih nget ding kilawm hi.
Daniel pen Sang Belpa' nasem muan huai khat a hihi. A khan sungin a Topa'a ding nasep thupi mahmah vive sem hi. A lungsim kiniam khiatna leh Pasian' mai-a a thuumna hang bekin ama zia leh tong sianthona leh cihtaknate a kikhaikim pan a hihi. Daniel nuntakna in siantho sakna a ngah zia leh tong lim a hihi. SL, laimai 42-52.
Ref: Pawlpi Thu Lamlak, Zop Lai Ding.
No comments:
Post a Comment