Zo Phualva Thupuak - Volume 05, Issue 15

A Sung aa Om Thute:

NISIM A KA SIM LAISIANGTHO

CIDAMNA THU

• Air- Huih
  

Ted Wilson tawh Holimna

2016-2020 - GC/SSD Makaite

SDA Pawlpi & Neih Kibang Kitenna

KAAL SUNG NASEPTE

• Lungdam Pihna
  
• Nau Apna
  
• Special Thungetsakna
  
• LCD & Outset Apna
  
• Dahpihna
  

THU ZAKSAKNA

• Pawl Lutna
  
• ZSM / CDK
  
• Lungdam Kohna
  
• Church Address
  

NISIM A KA SIM LAISIANGTHO

 Laisiangtho pen Pasian lamlahna tawh ahong kipia hi a, thuman thutak hilhna ding, akhial-te taiina ding, aman lote aman in puahna ding, aman in nuntak theihna ding thuhilh nadingin a manpha mahmah ahi hi (2 Tim 3:16, 17).

Laisiangtho Sim Ka Kipatna Thu

          Ka neu lai-in ka pi le ka pute zu-le-sa nopsakna sungah kidiah in om uh aa, kei zong tua bang sung pan khang khia ka hih man leh kumpi sang ah kah kahih manin Laisiangtho thu theih ding gen loh kikhop ding na-ngawn haksa ka sa hi. Ka pa in ka et ding Laisiangtho tangthu limte hong pia ahih manin, Laisiangtho sungah naupang tangthu a om lam hong theisak hi.

Asawt lo in biakna sangah ka kah aa, tua tak-ah ka lawmte atam zaw pen upna kibatpih hong hipah in pilsinna zong adiakdiak in kha lam kipattahna hong hipah hi. Ahih hangin ka sangkah hun sung khempeuh ah Laisiangtho pen ka lawmte tawh sim dingin ka ngaihsun ngei kei uh hi. Tua bang hunte ka ngaihsut ciang ka phawk khak thu in Laisiangtho sim ding sang laibu dang khat peuhpeuh sim ding baih kasa zaw uh hi. Laisiangtho pen siate, pawlpi upate, nu-le-pate sim ding lel peuh in ka ngaihsun kha uh hi.

Tan 8 ka kah tak ciangin hun hong kikheel hi. Ka siapa in Laisiangtho simna in kha lam khantohna bulpi ahihna leh  athupit mahmahna thu hong genpih den hi. Tua ban ah amah mah zong aneu tung pan kipan nisim in Laisiangtho asim den khat hi-in kum khat in khatvei ta asim zopa ahihna hong gen aa, Laisiangtho simna tuntawng in lungnop suahtakna a ngahzia-te hong gen ciangin kei zong Laisiangtho sim ding tha ka ngah mahmah hi.

Laisiangtho Ka sim Dan, Ka Muh Dan

Hong kihilhna bangin Laisiangtho pen zahtakna tawh sim, thungetna tawh ki-ap in sim, ka sim khit ciang athute ngaihsun kik, ka nasep ma in sim, nasep man khit ciang atawpna pen in sim, nisim in sim, nipi nisial in sim in ka om ciang lamdang ka sak thu in lunglut tak in ka sim thei hi. Tua banga ka sim ciang Job tangthu gelhte siam ka sa a, adiakdiak in Pasian vangliatna agen dante, thu sung dan, kinial dan, ki dawng dante siam ka sa mahmah hi. Laisiangtho buppi ka sim khit ciang Pasian humop takpi hi cih ka santheih phatdeuhna in a gelhte kum 400 val bang aki hal in mi 40 val bangin agelh hangun khat leh khat a thugente uh kihual ka sa hi. Tua bang thubu te lak pan Daniel leh Mangmuhna bute in hun nunug a mite a ding thu tampi tak hong hilh ahih manin eite aa dingin theihhuai phadiak ka sa hi.

Laisiangtho Ka Simna Pan

          Laisiangtho ka simna pan hoih ka sakna munte pidan tawh git in, pawl khatte ka lot ngah hi. Tua bang ka gitte ka sim kik a ka muh ciang hoih ka sakna thute hong phawk sak kik in, ka lot ngahsate ahih leh haksatna ka thuak hun ciang tha hong pia hi. Tua bang ka lot ngahte lak pan Jeremiah 12:5 na ah "Topa in Jeremiah aw, mite tawh tai kidem a, nang hong gimsak zo ahih leh sakol bang cih dem zawh ding na hi hiam? A nopna mun ah tuktuk lai na hihleh Jordan gun sing kawm lah ah bang cih ding nahi hiam?" Hih Laisiangtho tho mun in ka nuntak na hong kilamdang sak in hong khelzo a, khamuanna hong pia hi.

Laisiangtho Ka Simna Panin Lamdang Ka sak Thu

Laisiangtho ka simna hangin ka nuntakna ah Pasian in hong keem hi cih ka phawk khak thu in: a hun in sang khak hun hi in boarder ah ka om hi. Ka lawmte nitak vak zel uh a, kei zong vak nuam in ka eng mahmah hi. Ahih hang ka vak ma in Laisiangtho sim masa ning ci a ka sim leh tua kal in ka lawmte in hong vak san hi. Kei zong ka omna khan ah lung nuam lo sa in ka om leh, lamet loh pi in siapa hong pai a, avak teng min ciamteh a thu mang lo ci in sang pan in hawl khia hi.

Hih bangin Laisiangtho ka simna hangin theih ding akisam thu-le-la phattuamna tampi tak ka ngah a, tua thute in ka nuntakna ah haksak hun, lungkiat beidong hun, guallel kisa in ka om hun ciang tha hong pia in ka khe adingin meivak hi. Ka sim kipat in siate hong sawlna hangin asim ka hi a, tun ahih leh lungnopna tampi ngah kahih man, sim nopna tha hong om den a, ka khualzinna peuh ah Laisiangtho keng in ka sim den hi.

Tua hi a, kum tampi sung ka sim Laisiangtho in ka nuntakna adingin akisam pen khat hong suak hi. 1992 kum akipan nisim a ka sim Laisiangtho pen tu in 23 vei sim khit ta ka hih man in lam hong hilh ka siapa tungah ka lungdam mahmah hi. Laisiangtho pen nisim in sim dingin ka ngaihsun hi. Tun ahih leh Laisiangtho pen asim nuamte a dingin mun khempeuh ah cih dingphial in computer, phone cih bangte panin baih tak in kisim thei hi. Laisiangtho in hotkhiatna, kha-muanna, lungnopna man, kha lam tha hong pia in, Pasian hong hopihna hong thei sak ahih man mi khempeuh a dingin thupi mahmah hi. Laisiangtho in akhangkhang in mite a dingin thupha ahi hi.

Amaute in lawp mahmahna tawh Paul' thugente ngai uh a, Paul' thugente man taktak hiam ci-in a theihna dingun nisimin Lai Siangtho a sim uh hi."  (Sawltak 17:11). 

? Sia Cin Ngaih Thang