PAU LAMDANG OR KAMTUAM PAU

                                              PAU LAMDANG (OR) KAMTUAM PAU 

 

                                                  KORIN KHUA A PAU LAMDANG                     

 

                  

 

    Hih pen Korin mite laka pau lamdang zat tawh kisai thu a,Paul in ahilhna leh asawlna thu hi in,Paul ii thu piak hilo in,Topa thupiak ahihi.14:37 na en in.Tu lai a piangthak kici alawp mahmah pawl khat te in sep uh, khuang neu tawh lasa uha, Mangla zong hilo,Vaila zong hilo,Zola zong hilian lo,Dumka te pau zong hilian lo,bang pau teng tawh gen hiam mumal leh khiatna vetlo in laam tawh thuah uha,Pasian phat maw,lungdam thu gen maw,amawhdan te uh leh a angkawnna thu maw,mithat simna uh gen uhhia cih zong theithei loh, athu gen uh leh alasak thu zong theithei lo in mi dang na laam ziahziah lel uh leh , tua bek zong hilo in, pawl khat nangawng zong deihnawnlo,deih nawnlo, ut nawnlo ci zawtzawt sa in deihlo kawmsa leh utlo pipi in liingliang in nabuai uhhi.Mi dang,nopsa mahmah a laam te zong na tokbuai gawp vet khin hi.

 

     Pawl khatte  pen, pau lamdang in na dak zukzuk uha, a ut thu uhzong hilo in na asem khat oma,deihlo in utlo phial mah le uhzong,nasem pa in asawl tak takciang kisiing nawknawk sa in na awng nawknawk uha, utlo leh deihlo pipi in tum vakvak uha, cilo in om thei silo uha, atawpna ah tu cip lel uhhi.Hong phawk kik uhtak ciangin zong tua bangzah a a awt gawpna te uh pen innkim innpam leh pawlpi leh Pasian adingin zong phattuamna dingzong na om tuam hetlo hi.Amau mahmahin zong bang gen uhhiam cih zong na theituan lo uha,akiang a om mite inzong nathei tuanlo uhhi.

 

     Hih bang namte pawl hi,Paul in Topa thupiak  agensiatsak acih pen "Pasian in eite ahi zelzul dingin hong sam hilo a, hoihtak nuamtak in omding hongs am hi zaw….misiangtho Pasian pawlpi mite laka akizang ngeina bangin,"1Korin 14:33 ci in hih bang buai na pen na mawhsak mahmah hi.

 

     Ahih hangin hih pau lam silpiak pen na om ngei mahin, kham ekh theih zong nahi hetlo a, amann leh mann lo te teltheihna khempeuh hoihtak in  kitel tak in hih ding ahihi.Ih gen sasa mah bangin,  aki tel zaw deuh na dingin gen kik leng.Zeisu' Ka min in dawite nahawl khia dinguh a, pau thak (Kainais Glossa) napau ding uh a acih pen kamsang Isaiah zangin ahong gen khawlsa mahbang in pau dang a pau na ahihi. "A mantak in note in ka thu gen na ngaih kei uh leh Topa in apau na theihloh uh  gamdang mite , note tung ah thu hong hilh sakding hi" Isaiah 28:11,12.Mi namdang pau na cihi.Hih thu mah pen Paul in Korin khua mite kiang ah hong la suak ahihi."Lai siangtho sungah, alamdang kampau na tawh amau te hopih in mi namdang te pau tawh thu ka gen dinga,tua bang nangawngin hih mite in kei ma thu hong ngai lo ding uhhi, ciin Topa in gen hi, ci in kigelh hi".1Korin. 14:21.

 

     Tua ahih man in hih thu pan in,Pasian Kha Siangtho pau lam silpiak pen  omzia nei theih ding a kihilh thei pau nam ahih cih ih thei cian thei hi.Tua mahbang in Kaisari khua  Kornelia leh  alawmte tung ah  Kha siangtho a tuikiphumna ngahna atung lai in zong hih pau lam silpiak na ngah uha,tua zong omzia nei ahihi.Pasian naphat uh cih kithei uhhi.Sawl.10:46.

 

     Tua mahbang in Ephet khua a mite in zong hih pau zong nangah uha Pasian thute gen in thu na hilh uh cih kimu hi.Sawl 19:6 en in.Hih thu Zo LST ah ,"pau lamdang  or kamtuam pau " cih pen LST ki at masa Greek leh Mang LST te ah pen kamtuam pau (un known) hih pen na omlo in, pau (tongues) in Pasian  naphat cih hi mai hi.Kam tuam pau (unknown) cih pen aki behlap tuam ahihi.

 

     Tua ahih man in Zo  Lai Siangtho thak bu a kamtuam pau or pau lamdang ih cih te pen Greek pau Glossa cih hikhin mai hi in, athu paidan tawh kizui in nam tuamtuam in kikhia hi.Khat veivei ciang in glossa cih pen"Leii" kam sung a lei genna in zang a, khat vei leuleu ciang mi nam pau genna in zang in, khat vei ciang la silpiak genna in zang hi. Greek pau Dictionary ah pen Glossa cih limlim pen" pau"  cihna na hihi.Tua ahih man in theihtheih hetloh a seideina leh mumal neilo a pau nading a zat khawp theih na hi hetlo hi.Topa kamsang  khat EG White in hih bangin ah gen a, "Mi pawl khat pawlpi te lakah  pau lamdang silpiak  ngah bangin kigen uha, a pau te uh pen mau te in zong a theihloh alawm te leh vantung mite leh Pasian inzong theilo ci hi.1 Testimony p.412.

 

     Tua hi in hih te pen pau lamdang or kamtuam pau thu te pen Khristian hilo te kiang ah zong ahong om to zel dan leh ahong zatdan te, taangthu (history) te pan in leh LST hilhna te lakpan in tom kim cing thei bel dingin sim theih dingin ih muhthei te pen ahihi.Pau lamdang tawh kisai,LST hilh dan mann taktak leh thutak theician nuam te adingin pen  thutaktak leh kihilh mann leh Kha amann taktak omzia pen muh khiatna ngahna tham hiding in ngaih sun ing.

 

     Tua hi in, pau lamdang pen Kha lam silpiak te lak ah thupi pen leh poimawh bel hikhawl lo in, pau nam khat bekbek zatna ah leh Zomi te bekbek omna ah maw Vai te bekbek omna ah maw Mangkang te bekbek omna lak ah pen hih pau lam silpiak pen kisam khawllo hi.Ahih hang in  nam tuamtuam omna leh pau nam tuamtuam omna, pau lam ah haksatna omna ah pen akisam bek zong hilo in kisam kizang mahmah ding hi.Abangbang ah ahi zongin, pau theihtheih loh in thu tampi tak gen sangin theihtheih a thutawm bek genna pen metna omzaw a, zong thupi zaw hi.Topa kamsang khat Ellen Gold Hermon in hih bangin na na gen,"Na sem ding tampi tak na om in, pau nam tuamtuam leitung ah pen na om in, ahih hang in pau dang a thu genna in na sem kizo ding hilo in, Kha lam piangthakna leh Singlamteh thu zang in hi zaw hi" ci hi.1Testimony 424.p.

 

     Bangbang ahi zongin ih theih zawh ciangciang pan in mai nawt ciatni.Phillip 3:16, thu hilh pa  pen pau lamdang a thu gen pa sang inthupi zaw limlim ahihi.1Kor.14:5.

Pastor. P.L Biakchhawna