Lei Lum Sang Inn Thak Thu Kiholimna (https://vimeo.com/117608219)
Kong it u leh naau a kua maciat:
Lei Lum sang peen tan 4 sang hi aa sang inn lam a kizawh khit phet iin sang kahna iin a kizangh pah ahi hi. Kei mahmah zongh Lei Lum tuiphum biakinn peen sang inn aa a kizatna pan ziingsang sang kipat, ki gualh khit, ciang aa sang naupang khempeuh ka khe uh tawh Lei Lum sang inn thak zuan aa ki gual diudeu sa aa ka pai ni uh, Monday, May 20, 1963, ka mitkha ah phawk tawntung ingh.
Hih sang innpi a luui luat ciang iin Lei Lum sang ading a deihsak, Lei Lum hausa upate leh sang makai te in 2002, 2009 leh 2012 kum iin thum vei vilvel huhna a nget uh hang iin huhna a ngah vet lo uh vai khua hausa pa Pa Suan Lian Mang in November 13, 2013 ni aa a hong gelh lai pan iin ih mu khin zo hi.
A tuung a pat aa ih neih Lei Lum sang huang a golna peen 4.157 acre hinapi, Lei Lum naailung huang vai hang iin khua sung mi pawl khat te ii neihsa leitang kumpi in a suh ciang iin Lei Lum sang huang lampi dung, bual tung teng, ah inn mun hawm sak ahihmanin ih sang huang tampi hong toi tuam hi. Tua ban ah tu laai tak aa sang siapinu in sanghuang kiu, sang paitohna lampi bul ah ama inn lam ahihmanin ih sang huang a hong neu semsem, toi semsem hi. Mai lam hun ah Lei Lum ah sang siapi dang, sang sia dang te in hong tungtung laai ding ahihmanun sia te khempeuh in sang huang sung ah inn hong lam ciat le uh ih sang huang a sawt lo iin bei ziau ding ahihmanin mailam ah khua sung hausa upa te vakhu bang iin migi iin guul bang iin na pil kei leh tu aa ih neih laai sun ih sang huang teng nangawn lalthaang thei kha ding cih lauhuai sa ingh.
2014 September leh October kha sung iin Kawlgam ka va ciah uh ciang iin Lei Lum khua sang iin thak en iin October 1, 2014 ni iin ka va pai uh aa khua sung upa muanhuai Pa Tuan Khan Dal in hong makaih iin ih Lei Lum sangthak thu ka kikum uh hi. Ka kihona uh a tomno, minutes 18:42 sung bek a sawt khat hong khah khia ingh. Hih link pan na en un. https://vimeo.com/117608219 Ka kiho bangbang un kong khah khiat hi aa edit bawl man vet lo hi'ng. Sang huang sung ah vok kikhawi see mawk ahihmanin video sung ah vok music ngaih mahmah zongh hong kihel ding aa gam lum lua peuhmah ahihmanin hong telsiam un cih hong thuum masa ingh.
Theihhuai thu pawl khat a tombunkim iin hong gual sung ingh.
1. Khua sung hausa, upa te leh sang makai te in sang lam nading sum kum pi ah a nget nget uh hang un huhna ngah zo mahmah lo iin cimawh iin om uh hi. Tua ciang iin Japan gam kumpi huhna om ding cih khawng lamen uh hi napi tua zongh ngah tuan lo uh hi. Beidong (cimawh) iin a om laai tak un gamdang a tung Zomi te kiang ah huhna ngen lengg ih gam khantoh nading hong huh nuam om ding hi cih lametna khat bek nei ta uh aa huh ngetna lai zongh hong khak kawi2 uh hi.
2. Lamet loh laai tak iin kumpi pan iin hih Lei Lum sanginn lam thak nading sum hong kia vat hi. Hih huhna sum peen khua sung makai te nget man aa kingah hi lo hi. Sangsia makai te nget man aa kingah zongh hi lo hi.
3. Lei Lum ah kum nih sung khawng bek sangsia a hong sem, tu laai tak aa Zogam bup makai te lak aa a kihel Chin State Minister Sia Nang Mung in hong deihsak luat man aa ama thu aa a hong phuut sak ciang aa a kingah kha zenzen sanginn lam nading sum hi ci uh hi. Hih Lei Lum sang inn thak a kilam theih nading iin kumpi pan huhna sum Ks. 180,00,000 (Teing 180) kingah aa tua bulphuh aa hih Lei Lum sang inn thak a kilam ahi hi. A nektum sak lam hi lo iin ih gam ih lei ading aa kumpi huhna sum hong nget sak Sia Nang Mung tung ah Zomi pi te leh a diakdiak iin Lei Lum khua mi khempeuh te ki lungdam mahmah hi. Lei Lum sang pan tan 4 dong pilna a sin ngei, kei mah Mungno Gualnam ngiat in Sia Nang Mung tung ah lungdam mahmah ungh cih hong pulaak ingh. Sia Nang Mung bang iin ih gam ading phattuamna a pia nuam leh a pia zo, Zomi paallaai tampi hong khang ta hen.
4. Lei Lum sangsiapi Ning Khaw Man leh Lei Lum hausapa Suan Lian Mang te ii makaihna khut nuai ah hih sang inn thak a kilam hi aa kizo ta iin sangkahna iin kizangh ta hi.
5. Pa Tuan Dal tawh kiholimna pan ka zak thu ah innlam company (contractor) te in Lei Lum sang inn peen teing Ks. 150 tawh lam nung ci aa a ngen company om hinapi sang lam makai te in semsak nuam lo hi iin amau leh amau iin cial tawm, zeek tawm uh hi cih gen hi. Contractor te a piak theih lohna uh paulap peen midang khat kiang pan ka zakna ah hih sang inn lam nading sum kum pi in a piak peen sang thak lam nading hi lo aa sang puah thak nading bek ahihmanin contractor te ki lamsak thei lo hi cih thu hi. A pua lam aa business contractor te sep khuan pia lo ahihmanin sang siapinu in contractor sem cih na ahi hi. Hih paulap peen a ki paulap takpi ahih zenzen leh santheih paulap cingtaak hi lo hi cih peen ka muhna hi.
6. Khua sung upa makai pawl khat te in sang inn luui phiat lo iin kipuah beh leh a deih uh hinapi ki thukim kim lo ahihmanun Lei Lum sang inn luui zongh a kizuak hi aa teing 10 bangzah hiam khat khawng ding uh hi cih ki ummawh hi.
7. Lei Lum sang vai ah sum luut tawh kisai iin Lei Lum sang inn lam nading iin kumpi hong piak sum teing Ks. 180 ci uh hi.
8. Tua ban ah sang inn luui zuak man peen teing 10?? bang zah hiam khat hi laai ding hi.
9. Tua ban ah Lei Lum khua leh Zogam a it Europe lam Norway gam aa om Zomi te in Lei Lum sang makai te kiang ah teing Ks. 30 bang khak hi ci iin Pa Nang Sian Thang in hong gen hi. (Teing bang zah lian cih peen Norway pan Na Cin in tel theih ding hi.)
10. Kyat teing 220??? vaal bei iin Lei Lum sang inn thak a zo khin ihih mawk sam hang iin Grade 5 te in classroom nei zo nai lo uh aa sia inn luui neu khiukheu, a zum huai buukno khat zangh laai mawk uh hi. A hong kigen bang lian ahih leh innlam contractor te in tu aa bang lian inn teing Ks. 150 iin hong lam sak henla, kumpi hong piak a omlaai teing Ks. 30, Norway lam pan aa teing Ks. 30 leh sang inn luui zuakna sum kyat teing 10?? Bangzah hiam teng tawh grade 5 te ading iin inndei khat leh a kisam a dang inndei zongh ki lam zo laai mai lo ding hiam cih peen ka zakna tungtawn iin ka lungsim sung ah dotna hong phuul den hi.
11. USA gam sung aa a om Lei Lum khua ading a deihsak Lei Lum tuailaai te in a kidon uh sum lak pan tu ni ciangciang Kyat teing 352.58 (Ks. 3,525,800.00) kikhak khin aa Lei Lum khua sung lam mei bawlna leh Lei Lum han lampi puahna iin a kizat ban ah Leitawhtanh han lampi puah nading iin zongh a kisamh bang iin kizangh laai ding hi.
12. Pa Tuan Dal kiang ah sang inn thak lamna iin sum bang zah bei hiam cih ka dot leh hausa upa te leh khua mi te in bang zah bei hiam cih thei kei ungh a cih mawk ciang iin lamdang ka sa mahmah hi. Sang inn lam makai te pil lua uh maw, Lei Lum khua sung hausa upa te thukhual lua uh maw, hai lua uh aa khua sung aa thupiiang zongh vaan zo lo uh maw? Na sang inn lamna uh teing bang zah bei hong ki ci leh hausapa akipan a kua ma tek in thei lian kei mawk ingh ci mialmual tek ding maw? Bang hang aa 2014 kum aa a kilam sang inn thak ah sum bang zah bei cih ki thei lo, sazian sit khuan om lo, report om lo, cih peen mi mal ciat in na lungsim sung ciat vuah limtak iin ngaihsun un.
Banghang ahizongh'n tu aa ciang sang thak khat a ngah zo lemlem suak ihihmanin Lei Lum hausa upa te, khua sung nu leh pa te khempeuh leh sang siapinu tung ah lungdamna ih pulaak hi. Tua ban ah Lei Lum khua ading a hong deihsak aa kumpi sung pan huhna hong nget sak Zogam Minister Sia Nang Mung, leitung tuamcip aa a om Lei Lum vontawi khempeuh leh a hong panpih khempeuh tung ah lungdamna ih pulaak hi. Zogam sung aa Lei Lum khua a khantoh theih nading iin mailam ah a kisam a om te ah a kua matek maapang khawm diamdiam liailiai laai ni. Ih gam ih khua ih tuui, a ne tum a dawn kang te hi lo iin a puah a vaan zo te hong suak sak ciat zaw ta hen. Genkhialh a om leh hong maaisak un. A kua matek ading iin thupha dim kumthak 2015 hong hi ta hen. Happy New Year 2015!
Thupuak,
Mungno Gualnam (Gin Sian Mung)
Riverside, California, USA
Phone (Cell) 951-403-8319
Phone (Office) 951-509-2370
Phone (Office) 951-509-2370
No comments:
Post a Comment