1) SDA ahi lo pawldang khat in SDA tangval khat tawh ong kiten ciang buaina lungsim galdona kipan pah hi. Bang ci solve ding hi problem pen?
Biakinn ah kikhop ong zuihnop pah leklek leh lungdam tak a sim nuih2 ding hi phot hi. Ki ten khit phet tui kiphumin khong na mawt cih leh bel MIZO ten pathlawi acih te pawl kitang thei hi. Biakna pawlpi ihcih pen kei sanna ah Pasian leh mihing te kizawpna ah updan sandan kibang teng kithuhual a kikhawlkhawpna tua ahih manin kua mah ki force theih hilo hi. Nupa kikhenna nadong piang thei ding hi.
2) SDA kikhopna pen pawldang khat aa ding in cimtak huai mahmah khading hi. Hun ukdan pen ngeina (tradition) zuitaka apai ngiat2 biakpiakna paizia zui ahih manin pawl dang aa tawlip seuseu khutbeng ziahziah pawlpi pan khonga tenbel hamsa sain cimtak mahmah ding hi. Bangcih ding?
Bang hang in SDA pawlpiin hibang biakpiakna zang hiam cih dam takin tel phot sawm in. Pasian biakpiakna ah tawnna, lamnate akisap hun aom tei hangin zahtak kai tak aa zatna ah daidi de aa om pen kilawm hi cih telsak kul kha ding hi. SDA pawlpiin ngeinakip Divine Service leitung bupah kizang ciata autut amai ah dinga phialvat ziahziah pawlpi hilo hi cih tel phot kul ding hi. Gen tangtang zong kul loin tamvei pi kikhop pih lecin ong telsiam lel ding hi.
3) Nazi in SDA kikhopna sungah khukdin thunget khong ah ong ut lo kha ding hi. Hih pen kiten cil sungtengin om hamtang zaw hi. Bang cih ding?
Ama sain naziin ong zahtakna dingin it bawl inla hap lala ngei ken. Pawlpi vai tawh kitawt kiselnain kikhenna masuan naisak baih mahmah hi. Na kiten ma aa SDA pawlpi nasan theih ciang tenpih pan ning cih ngaihsun lo leh ong san theih hun ding ngak zolo na hih man in ongsan pih theih dong lungduai tak leh ittak aa na ngak kul hi. Pasian azahtak zi ahih nak leh khukdin thunget teah khukdin nuam ding hi. Aut hetkei leh lah amah leh Pasian kikal ahih man in nang on bia hilo ahih teh nangthu hi ei cih ding himai phot hi.
4) Zomi pasal ten pen zi lel kiut vetlo tek nong hi. Ahih hang leitung bup ah numei(zi) lello kua mah omlo hi. Ki pasalsak mahmah tekin zite ong lungkim kei taktak leh bel bingphut theih om tuanlo hi. Na ziin SDA upna ong san zawh nangin nang tun ong tenpih nahih teh naki tuiphum kul nacih aa ong man pah leh nuam lua ken lau hua zaw tham ding hi. Utlo a ong thal nial pah leh lah heh pah ken, nazi pen thuman deih mi khat hi ding hi. Bangcih ding?
Mittangah muh leh tuah khak ngei te sung panin, SDA pasal aneih phet amaikal khong a tuikiphum pah te pen cikmah in SDA upna len nupi hingeilo hi. Aminin ong lungkimsak ding a azongsat ngei teng ong zangzang lel ding hi. Tui kiphumna in pianthakna himasa lo hi. Na ziin upna thu a telsiang masiah tuikiphum nuam ta ing ong cih hun ngakzawh sawm in. Tui kiphum leh kiphum pah loh in nazi melhoihna hemsak deklo hi. Tua ahih kei leh tui kiphum limlim lung kim ing nacih leh kipansak lecin aban ding theihsa hilel hi. Kikhelna aom ciang in ong ngen lel ding hi. Kei muhna ah tuikiphum nasangin upna lungkim tak aa amahmah in asan theih hun pen ngak huai pen hi. Hih dinhmunh tuntheih nangin nang example na lah kul hi. Pawl khatten azite khong SDA suak pahin cisansan in aman SDA thukhun khat zong zuilo vetse cih zong om thei hi. Ong sau zizen in gen ding tam mahmah ding hi. Atom in upna pen khathu ahih man in kuamah force huailona nazi/ na pasal in upna ong san zawh nangin thungetna leh Bible study tampi na pai pih kul ding hi. Khasiangtho in alungsim ong hei dinga nainnkuan sung nuam ding hi. Tua hilo tui na kiphum kei leh ciah khong nacih leh bel ong ngaih mahmah leh tui kiphumpak pong ven cin phumloh mah tawh kilamdanna omlo ding hi. Deihsakna tawh hizah ciphot ni. Asangsiam ding ong lamen ciat ingh.
Itna tawh,
Muang Muang( It Sang leh Sian Zo te pa)
Spicer, Pune
No comments:
Post a Comment