Tu ni iin Anderson Adventist Seminary, Lawibual, Tedim, khua aa ih sang pi ah Topa Pasian hehpihna thupha hang iin Computer Training Center kinei cih thu, Siapipa Sia Kanglo kiang pan email leh photo mu kha kahihmanin tua bang aa khantohna hang aa lungdamna thupha te Zomi SDA akua maciat tung ah hong hawmsawn ingh.
Southern Asia Division khut nuai ah ih om laai iin Spicer Memorial College peen ih Division sung aa ih pawlpi ii neihsa pilna saangpeen sinna sang ahi hi. 1984 ciang dong Spicer huang sung ah ka om aa Spicer Memorial College bup in Vice-President of Financial Affairs office bek ah computer khat bek nei pan hi. A ki galmuh hiauhiau bek hi aa khat vei zongh ka lawng kha kei uh hi. Computer ka lawn khak masak peen 1996 kum hi pan zen aa ka lawn tung bang iin tawm khat meek khial lengh a sia sak pah phial ding iin kituat iin lawm ngam pha lo phial mawk hi'ng. Tu iin Spicer Memorial College ah Computer tampi om ta, Computer Center om ta, Major leh minor khawng na ngawn iin degree pia ta. Khangno te hampha mahmah kong sa hi.
Spicer Memorial College gen loh tu iin ih gam ih lei ih khua ih sang ahi Lawibual veeng, Tedim khua, Anderson Adventist Seminary ah Sia Kanglo' makaihna hang iin Computer Training Center ki hong ta hi. December 2010 aa Computer Training a kipat tuung iin mi 18 bang kah hih tuak hi. Pawl sung pawl pua in computer siamna sin thei cih hong za sak ahihmanin hi bang aa hong pian khiat theihna ding aa a vaihawm a hanciam Sia Kanglo tung ah lungdam ko hangh. Tua ban ah tua bang aa zat theih ding computer te a hong om theih nading sum leh paai $400 a vai hawm sak Sia Daltawng (Lei Lum) leh $3,000 a vai hawm sak Sia Mungno (Lei Lum) te leh pilna siamna, sum leh paai, leh thagui thatang tawh a maapang mi khempeuh te tung ah Zomi te ading a deihsakna uh hang iin lungdam ih ko hi.
AAS Computer Training Center hang iin ih Zomi te in manawtna leh maavanna iin hong nei thei uh hen aa Topa' gam zai na a hong pian na ding iin thungetna ah phawk ciat ni.
Tu ciangciang maa hong nawt pih aa gualzawhna hong musak Topa Pasian in minthanna tang tawntung henla leitung bei dong hong vaan den ta hen.
Lungdam thupuak
Mungno Gualnam
Gin S. Mung, Conference Auditor
Conference Auditing Department
Southeastern California Conference of Seventh-day Adventists
11330 Pierce Street
Riverside, CA 92505
Off: 951-509-2370
Fax: 951-509-2377
Cell: 951-207-4237
Email: gin.mung@seccsda.org
Email: mungno@hotmail.com
No comments:
Post a Comment