Zo Phualva Thupuak - Volume 06, Issue 03

A Sung aa Om Thute:

PIANSAKNA LE TATKHIATNA PHAWKNA

THUNGEN NI

MARTIN LUTHER LE SATAN KIMAITUAHNA

CIDAMNA THU

Numeite Khasim Laihuan

Mit Ading

Kawng Natna

LUNGDAM PIHNA

Tui Kiphumte

Mopawi

THU ZAKSAKNA

Pawl Lutna
ZSM / CDK

Reach the World Sport Shirt Kingahta

Lungdam Kohna

Church Address

PIANSAKNA LE TATKHIATNA PHAWKNA

                Piansakna Phawkna ~ Laisiangtho buppi sungah athupi penpen mun khat ahi Piancilna 1:1 ah, "A kipat cil in Pasian in vantungte le leitung apiangsak hi." Hih akhiatna in na khempeuh apian ma in Pasian om khin cihna ahi hi. Piansakna tangthu in mihingte omna mun leh omna ahangte hong gen hi. Pasian pen ciangtan neilo, saangpen Pa hi aa, mihingte ihih leh ciangtan nei, ei-le-ei ding zolo napi, Pasian' melsunte hi hang.

            Pasian in hih leitung abawl khit ni sagih ni atuam koih tak ciangin kaal khat ni sagih in Laisiangtho pan hong kipan khia ahihna kimu thei hi. Piansak nasep aman khit ciangin, Topa Pasian in ni sagihni in tawlnga a, thupha pia in … siangthosak hi" (Piancil 2:1-3). Hih bangteng hangin leitung piancil in Sabbath na om khin a, ni le kha le kumte dan a, ama thu a apiangtawmte tungah kinga lo hi.

            Thukham number lina in Sabbath pen piansakna phawkna in hong lak hi: "Sabbath ni asiangtho a zat ding phawk in … Ahang inTopa in ni guk sungin vantungte le leitung bawl hi" (Paikhiatna 20:8,11). Sabbath in Pasian biak akulna ahang; Ama mai ah pasian dang ih neih loh ding; milim biak huai lohna; le Ama min zangkhai zat loh nading hong gen hi (aneu 1-7).  Ahang pen tel ham lo hi: Amah in Piangsakpa ahih man hi.

            Tuateng ban-ah piansakna ih phawk sem nading hong huh dingin, Sabbath in hotkhiatna le tatkhiatna phawkna zong ahi hi. Moses in, "Note Egypt ah sila na hina uh le TOPA note Pasian in tua lai pana a thahat khut le a zankhiat ban tawh hong paikhiatpih ahilam phawk un. Tua ahi manin TOPA note Pasian in Sabbath ni na tan dingun thu hong pia hi" (Thuhilhkna 5:15).

            Tatkhiatna Phawkna ~ Ih phawk ding athupi khat in, Jesu singlamteh ah asih khit ciangin Sabbath ni-in han sungah tawlnga hi (Luke 23:54-56). Ni gukni (Friday) in Jesu singlamteh tungah kithat aa, Sabbath ni (Saturday) in han sungah tawlnga in, ni masa ni (Sunday) zingsang in sihna pan tho kik hi. Ama nungzui tading Sabbath athupina khat ah, numeite in Friday ni-in Jesu luang paknamtui nazut manlo uh aa, "thukham zui-in Sabbath ni na tawlnga uh hi" (aneu 56).

            Ellen White' labu kikhongpen ahi, Desire of Ages bu sungah, "A kipat cil in Pa le Tapa in piansakna Amau nasepte azawh khit uh ciangin Sabbath ni tawlnga uh hi … Tu in Jesu zong tatkhiatna nasep panin tawlnga hi … A ngei bangkik piansakna, a tatkhiatsa mite, … Christ nasep zawhna pan hong luang gah hoih … hih thupiang panin Jesu tawlngak ni in kizom tawntung hi." Jesu in tatkhiatna nasep zo khin ta hi.

            Piansakna le tatkhiatna phawkna Sabbath in Piangsakpa le Tanpa ahi Jesu kawk hi. Hih thu in eite koi panin hong piang cihleh ei mawhna tangin Jesu hong sihna tawh hong zawhsak sate kaal sim in hong phawk sak hi. Tuni in zong eite in alamdang Piangsakpa le Tanpa tungah itna thuhkikna le lungdamna lahna in Sabbath ih tang hi. Sabbath in ih nasepnate pan leh gupkhiatna adingin Ama sungah ih tawlngakna lim ahi hi (Hebrews 4:9,10). 

            Eite Koipan aa Piang? ~ Nuntakna pen amah le amah thu apiang hilo aa, abeisa hunte zong kitello cih omlo hi. Eite khempeuh itna Pasian in Ama lim bangin hong piansak hi aa,  ngaihsun thei, deihteel thei, gamtang thei dingin hong bawl ahi hi. Eite in hih mun ah geelna tawh aom ihi a, amah le amah in hong piangtawm thu hilo hi. Thukhun bangin nuntakna ki khuasa aa, kamphatna tawh cih bang hilo hi. Tua ahih manin piansakna phawkna Sabbath in Thukham sawm lungtang mahmah ah kikem bit hi.

            Banghang Eite Hiah Om? ~ Eite Pasian tawh a kipawl khawm dinga hong kipiangsak ahi hi. Sabbath in kaal sim in eite suahna phawkna ding, Piangsakpa biak ding a kisapna, le na khempeuh tungah Amah masak det nading ahi hi. Mite in angsung khual in Pasian sangin nate masak zaw ahih manin tu in leitung buahthang hi. Mawhna ii suksiat Pasian tawh ih kilawmtatna pen Christ singlamteh tunga hong sihna tungtawn in kha thu ah a ngei bang kik khin a, Amah hong pai kik ciangin ataktak in angei hong bang kik ding hi. Sabbath ii thupitna bulpi in Jesu pen eite hong Tanpa le hong Piangsakpa in ih muanna limla ahi hi. Upna tungtawn a, Jesu' kicing kipumpiakna asaang khempeuh Pasian tawh kilawmtatna ah kigawm kik ding uh hi. Tua bang mite ading nuntakna in khiatna nei ding hi.

            Ei Koilam Zuan aa Pai? ~ Mai lam ding pen bangmah omlo cih hilo hi. Sabbath in Eden a ngei batkikna kawk hi. Jesu Topa in asaang khempeuh Pasian tate hi uh aa, vantung gam mite (Philippians 3:20) ahi uh hi. Jesu nih veina hong pai kik ciangin Amah tawh amaute atawntung in nungta ding uh hi. Vantung ih tun ciang bangzah in nuam ding cih kam tawh kigen zolo hi. Tua khit teh, eite in Pasian' mai ih mu dinga, Sabbath khat pan Sabbath khat ah Amah ih bia ding hi (Mangmuhna 22:4; Isaiah 66:23).

Source: Signs of the Time, February 2015, pp 8-10.

Translated by Editor, Jerry Mung

.    

 

 

 

 

 

KHAWKPI 8 - HIAH OM ING, TOPA, HONG SAWL IN.

Na Talen A Kizat Theihna Mun Om

 

         Ama vaihawmna sungah Topa in mikim' mun ding om sak hi. A kisam lo talente kipia lo pah hi. Talen khat cihtaak het lo ci ni. Tua nangawn Pasian in zatna mun ding om saka, tua talen khat hoih takin kizang peuh leh Pasian' sehna nasep a om bangin hong sem khia ding hi. Bukno sunga a om mite' talen zong inn khat khit inn khat nasepna ah kitangsama, talen nasia pipite' sangin hih nasepna ah hong kimang thei zaw ding hi. 9T, laimai 37,38.

         Mite in a hatna uh Pasian' sawlna bangin a zat uh ciangin, a talen uh hong khang dinga, a siamna uh hong zai dinga, a mangthang mite a hotkhiatna ding uh vantung pilna hong ngah ding uh hi. Mite tunga a hop sawn ding uh, Pasian' piak a tavuan uh pawlpi mite in awlmawh lo-in a thudon kei uh leh, vantung hauhna a ngah dingin kilamen ngam mawk ding uh hiam? Khristian hi'ng a cite in khawmial sunga a om mite khawvak a puak nop loh uh ciangin, hehpihna leh thutheihna a gen sawn nawn loh uh ciangin, pilna hong nei nawn lo-in, vantung in a piak hauhnate zong hong pakta nawn lo uh hi; tuate a manphatna thei nawn lo-in, midangte kiangah gen sawn ding a kisapna zong phawk nawn lo uh hi.

         Mun tuamtuam ah pawlpi gol pipite om hi. A pawlpi mite un thumaan theihna zong nei uha, nuntakna thu a zakna uh tawh mi tampi lungkim lelin, gen sawn ding don lo uh hi. Nasepna a khantohna ding tavuanin ngaihsun khol lo-in, kha gupkhiatna ding zong kin se lo uh hi. Leitung nate kin mahmah uh hi napi-in, a biakna uh pen nasepna in hong zang lo uh hi. "Biakna pen biakna hi-a, nasep pen nasep hi," ci uh hi. Amau' mun a tuam tek a hi dingin ngaihsun uha, " a tuam tekin om hen," ci uh hi.

         Tavuan awlmawh lo-in, sep dingte don lo uh a hih manin tua pawlpi mite, "hehpihna leh ih Topa leh Honpa Jesu Khris theih telna ah" khangto lo pah uh hi. 2Peter 3:18. Tua a hih manin upna ah thanem uha, theihna ah kicing lo-in, muhna ah moi lai uh hi. Thumaan ah zung kha lo, lei man lo uh hi. Tua banga a om suak uh leh, thumaan leh thukhial khentelna ding khalam khuamuhna ngah lo ding a hih manin, hun nununga khemna tampite in amaute zo taktak ding hi. 6T, laimai 424-425.

 

On Fri, Jan 22, 2016 at 11:27 AM, Mung Tong <mungtong@zomi.net> wrote:

KHAWKPI  8

 

HIAH OM ING, TOPA, HONG SAWL IN

 

         Hun bei dek ta, zankim lai-a guta hong pai khiankhian bangin phawk loh kal, theih loh kalin hong khengkheng hi. Midangte a ihmut bangin eite ihmu nawn lo-a, navak pilvang taka a om dingin Topa'n hong huh ta hen. A sawt lo-in thumaan hong gualzo dinga, tu-a Pasian tawh na a sem khawmte khempeuh tawh hong gualzo ding uh hi. Hun tom mahmah hi; zan hong tung pak ding hi, kuamah in na sem thei nawn lo ding uh hi. Tulai thumaan khawvak sungah nuamsa-a a om mite in midangte kiangah tu-in thumaan gen sawn mengmeng uh hen. Topa in, "Kua sawl ding ka hiam?" ci hi. Thumaan'a ding a kipumpiak nuamte in tu-in, "Hiah om ing, Topa, hong sawl in," cih ding a hihi.

         Ih veng ih pamah ih sep dinga Topa ina deih lungdam thu tangkona tawm bek ih sem pan hi. Ih gama khawpi khempeuh ah thumaan a thei lo mi tampi om hi. Leitang lai-a khaici ih vawhna ding tuipi gal khat leitung zapi ah zong lo thak tampi om lai hi. "An Appeal to Ministers and Church Officers."

         Gimna hun sung a tung ding ih hi ta-a, manga zong kiman khol lo lungkhamnate ih mai ah om hi. Vantung a sim dingin nuai lama vanglian khat in mite makaih hi. Pasian' thukham a phiat dingin Satan' mite tawh mihingte kipawl uh hi. Leitunga a teeng mite, Noah hun lai-a tuiciim in a nawk mang mite tawh hong kibang semsem uha, van pana meikuang in a kaat tum Sodom khua-mite tawh hong kibang semsem uh hi. Tawntung nate pana mite' lungsim a hei khia dingin Satan' mite manlah mahmah uh hi. Ama deih bang a pian theihna dingin galpa in geelgeel hi. Leitung sum zonna, kimawlnate leh tulai kizepnate in numei pasalte' lungsim luah khin ta hi. Ciamnuih bawlnate leh lai hoih lo simnate in pilna susia khin hi. Tawntung siatna mun tunna ding lampi ah mite a honpi-in kizui deudau uh hi. Ngongtatna, kitomna leh zukhamna tawh akidim leitung in pawlpi lumlet khin hi. Dikna tehna piciang a hi Pasian' thukham zong a kimanna om kei ci ta uh hi. 9T, laimai 42,43.

            Hun beina tawh kisai genkholhna thute a hong tangtun ciang beka a gen dingin, khat zong gen khol lo-in om mawkmawk ding ih hiam? Pasian' thukhenna tawh a kipelh theihna dingun mawhneite gen khol lo-in mawk om ding ih hi hiam? Pasian' kammal ih upna koi ah om hiam? Ama gensa thute um masa lopi-in hong piang ding ci-a kigen khol thute hong pian cianginmu thei mawk ding ih hiam? Eite' tungah siang sinsenin khawvak hong taang khina, "kong biang dongin," Topa' nihong tung ta hi cih hong kilak hi. A ziakai luat ma-in a thu kanin thei ciat ta peuh ni. 9T, laimai 20.

KHAWKPI 8 - HIAH OM ING, TOPA, HONG SAWL IN.

KHAWKPI  8

 

HIAH OM ING, TOPA, HONG SAWL IN

 

         Hun bei dek ta, zankim lai-a guta hong pai khiankhian bangin phawk loh kal, theih loh kalin hong khengkheng hi. Midangte a ihmut bangin eite ihmu nawn lo-a, navak pilvang taka a om dingin Topa'n hong huh ta hen. A sawt lo-in thumaan hong gualzo dinga, tu-a Pasian tawh na a sem khawmte khempeuh tawh hong gualzo ding uh hi. Hun tom mahmah hi; zan hong tung pak ding hi, kuamah in na sem thei nawn lo ding uh hi. Tulai thumaan khawvak sungah nuamsa-a a om mite in midangte kiangah tu-in thumaan gen sawn mengmeng uh hen. Topa in, "Kua sawl ding ka hiam?" ci hi. Thumaan'a ding a kipumpiak nuamte in tu-in, "Hiah om ing, Topa, hong sawl in," cih ding a hihi.

         Ih veng ih pamah ih sep dinga Topa ina deih lungdam thu tangkona tawm bek ih sem pan hi. Ih gama khawpi khempeuh ah thumaan a thei lo mi tampi om hi. Leitang lai-a khaici ih vawhna ding tuipi gal khat leitung zapi ah zong lo thak tampi om lai hi. "An Appeal to Ministers and Church Officers."

         Gimna hun sung a tung ding ih hi ta-a, manga zong kiman khol lo lungkhamnate ih mai ah om hi. Vantung a sim dingin nuai lama vanglian khat in mite makaih hi. Pasian' thukham a phiat dingin Satan' mite tawh mihingte kipawl uh hi. Leitunga a teeng mite, Noah hun lai-a tuiciim in a nawk mang mite tawh hong kibang semsem uha, van pana meikuang in a kaat tum Sodom khua-mite tawh hong kibang semsem uh hi. Tawntung nate pana mite' lungsim a hei khia dingin Satan' mite manlah mahmah uh hi. Ama deih bang a pian theihna dingin galpa in geelgeel hi. Leitung sum zonna, kimawlnate leh tulai kizepnate in numei pasalte' lungsim luah khin ta hi. Ciamnuih bawlnate leh lai hoih lo simnate in pilna susia khin hi. Tawntung siatna mun tunna ding lampi ah mite a honpi-in kizui deudau uh hi. Ngongtatna, kitomna leh zukhamna tawh akidim leitung in pawlpi lumlet khin hi. Dikna tehna piciang a hi Pasian' thukham zong a kimanna om kei ci ta uh hi. 9T, laimai 42,43.

            Hun beina tawh kisai genkholhna thute a hong tangtun ciang beka a gen dingin, khat zong gen khol lo-in om mawkmawk ding ih hiam? Pasian' thukhenna tawh a kipelh theihna dingun mawhneite gen khol lo-in mawk om ding ih hi hiam? Pasian' kammal ih upna koi ah om hiam? Ama gensa thute um masa lopi-in hong piang ding ci-a kigen khol thute hong pian cianginmu thei mawk ding ih hiam? Eite' tungah siang sinsenin khawvak hong taang khina, "kong biang dongin," Topa' nihong tung ta hi cih hong kilak hi. A ziakai luat ma-in a thu kanin thei ciat ta peuh ni. 9T, laimai 20.

Zo Phualva Thupuak - Volume 06, Issue 02

A Sung aa Om Thute:

PUM KHAT SUAHNA : KITENNA

NUMEITE' LAMETNA

PASALTE'N NUMEITE AMUH DAN UH

THU ZAKSAKNA

Pawl Lutna

ZSM / CDK

Laibu Neu Athak Thum

Lungdam Kohna

Church Address

PUM KHAT SUAHNA : KITENNA

 

          Kitenna Hong Pianna ~ Pasian mahmah in na khempeuh "hoih mahmah hi" (Pian 1:31) acih hun lai-a Pasian mah in nupa kitenna abawl ahi hi. "Tua ahih manin pasal in a nu leh a pa nusia in, azi koppih dinga, amaute sa khat ahi ding uh hi" (Pian. 2:24). "Pasian in nupa kitenna a masapen hong bawl hi. Khua vannuai Piangsakpa in nupa kitenna hong phuan khia hi. 'Nupa kitenna pibawl huai hi'; tua in Pasian in mihing a piak silpiak masapen khat hi a, mawhna sungah atuuk khit cianga paradise kongpi pan Adam in apai khiat pih ngeina nihte lak ah khat ahi hi" -The Adventist Home, 25,26.

Nupa Kitenna In Sa Khat Suahna Hi ~ Pasian in Adam le Eve kitenna pen a nung cianga kibawl ding kitenna khempeuh ading etteh dinga angaihsut hi a, Christ in zong na thukimpih hi: "A cil a amaute a bawlpa in, 'numei le pasal bawl hi' cih thu le, 'Hih thu hangin pasal in a nu a pa nusia in a zi koppih dinga, a nih un sa khat suak ding uh hi,' cih thu sim kha lo na hi uh hiam? Tua hi a, amaute in nih hi nawn lo in, sa khat hita uh hi. Tua ahih ciangin Pasian in a gawm khopsa, mihing in khen kei hen" (Matt. 19:4-6).

Nupa Kitenna Atawntung Ding Ahihna ~ Nupa kitenna in zi le pasal khat le khat khantawn a kigawmna leh nupate le Pasian kikal a khantawn kigawmna ahi hi (Mark 10:2-9; Rom. 7:2). Pawlpi tawh Christ hong kigawmna pen zi le pasal kikal aa kizopna ding lim hi, ci-in Paul in hong gen hi (Ephe. 5:31,32). Pawlpi tawh Christ a kizopna a tawntung ding ahih mah bangin nupa kitenna zong a tawntung dinga Pasian in ageel ahi hi.

Nupa Kitenna Ah Lupkhopna ~ Nupa kitenna ah lup khopna in Pasian in mihing ahong piak silpiak siangtho ahi hi. Tua in nupa kitenna a kicinna hi-a, nupa kitenna bek tawh kisai thu ahi hi (Pian. 2:24). Tua in zi le pasal ii zat khop ding bek a kigeel hi-a, a tawntung aa kinaina, nopsakna le galmuanna piangsak in, mihing khang kizom sak hi. Tua in Pasian' geelna banga zi khat bek, pasal khat bek neihna ahih ban-ah numei le pasal a ngeina banga lupkhopna ahi hi (Matt. 19:4,5).

Lunggulhna zui-a tat thithena tawh bang piang hiam? ~ Pasian bia-a kineite nangawn in zong  a lunggulhna kamkaih uh khahsuah in, a hatna uh amawk zatna uah Pasian in thu sit ding ahih lam ngaihsun lo uh hi. Tua banga thatang zatna in khantom sak a, pumpi tha kiam sak hi. Pasian' van mite a omna ding mun ahi lupna pen a siang-tho lo gamtatnate tawh kininsak hi. A zum huai ganhing lungsim in uk ahih manin pumpi nate kisia hi. Luaksuah huai gamtatnate in luaksuah huai natnate piang sak hi. Pasian in thupha dinga hong piak kimlai samsiatna kisuak sak hi.

Numei kuamah in pumpi suksiatna nasepna ah a pasalte uh ahuh ding uh hilo hi. Hih thute thei-a a pasalte itna taktak aneih leh numei in tua bangte hih lo ding hi. Cidamna leh nuntakna susia zah dong dinga zi in a pasal a lungkim sakna pen itna siangtho hilo hi. "Mawhnopna lungsim sih sak ding ahi hi. Ngaihsutna siahuaite paih khiat ding ahi hi. Ngaihsutna khempeuh Jesu Khris uk sak ding ahi hi. Pasian' hong itna thupi pen sak ding hi. Ih pumpi Ama hong leisa ahih lam phawk kul hi. Pumpi nate pen dikna ii lum leh tei suah sak ding ahi hi" -Adventist Home, p 121-128.

Nupa Dinga Kitenpih ~ Nupa kitenna ah kipumkhatna pen ki-itna le kizahtakna panin kingah hi. A lian zawsang kuamah om lo hi (Ephe 5:21-28). "Khantawn a kipawna ahi nupa kitenna in, Christ leh a pawlpi a kipawlna lim ahi hi. Pawlpi tunga Christ in a neih ding uh lungsim ahi hi" 7 Testimonies 46. Khat le khat kizopna ah kingawh bawl ding hilo hi (Pian. 6:11,1; Late 11:5; Isaiah 58:4,5; Rom. 13:10; Gal. 5:19-21). Midang te simmawh bawl, neu bawl zaw lo a, it ding, ngaih ding, kipsak ding le laptoh ding pen Christ' lungsim ahi hi (Rom. 12:10; 14:19; Ephe. 4:26; 5:28,29; Col.3:8-14; 1 Thess 5:11). Aana tawh ukcip gawp a, thatang tawh zawhthawh bawl ding pen Christ' thuzuite' gamtat ding hi lo hi (Matt. 20:25-28; Ephe. 6:4). Nupa kikal leh innkuan sungah ngongtatna in kihhuai mahmah hi. -The Adventist Home, 343.

"Zi hileh pasal hileh in ukna aana zang lo ding hi. Hih thu ah ih zuih ding thukhun Topa in koih zo hi. Christ in pawlpi a pahtak bawl bangin pasal in azi a pahtak bawl ding ahi hi. Zi in a pasal zahtak a a it ding ahi hi. A nih un migit a kituh ding uh, khat le khat a kiheh a kidah sak loh ding uh a hanciam ding uh ahi hi." - 7Testimonies 47.

Nu Ahi Dingte ~ Nu ahi dekdek numei khempeuh in, lungdam, maitai, lungkim in a om den zawh na'ng hanciam ding ahi hi. Nu ahi dinga kilamente in Pasian' itna sungah a kha uh kem ding hi. Nu ih cih pen Pasian tawh nasem khawm ahih lam phawk ding hi. Nute khempeuh Pasian biakna tau ah ki-ap hen! Hebrew nupi (Manoah' zi) tunga Pasian in agen thute tuhun in zong Nu khempeuh tungah hong gen hi. "Kidawm hen, ka thugen khempeuh zui hen," ci hi.

Ref: SDA Church Manual, 16th Ed.

Mrs. White, Counsels for the Church.

 

Zo Phualva Thupuak - Volume 06, Issue 01

A Sung aa Om Thute:

AIR HEAVEN FLIGHT NO. 2016 ALENG KHIA DING HITA

ATHEIH HUAI IHMUT TAWH KISAI DOTNA LEH DAWNNA

LAISIANGTHO SUNGAH IHMUT SUAK MAHMAHTE

CHRISTMAS & NEW YEAR

THU ZASAKNA

Pawl Lutna

ZSM / CDK

Laibu Neu Athak Thum

Lungdam Kohna

Church Address

AIR HEAVEN FLIGHT NO. 2016 A LENGKHIA DING HITA

 Zing nitak ciangin Air Heaven Flight No. 2016 pen leng khia tading hi. Tua ahih manin, zing nitak ciang dong a dam khuasuak nahih leh na ut in na ut kei zongin hih Vantung Vangleng (Air Heaven) pen na tuan kul ding hi. Tua vanleng tung a tuang mi khempeuh theih ding kisamte a nuai a bangte ahi hi.

          1. Hih Air Flight No. 2016 vanleng kuama tuan' ngei nailo vanleng himah leh lui mahmah ta ahih manin na puak theih loh ding leh na paihkhiat ding vangik pawlkhat om hi. Tuate in (i) KIHUATNA (ii) HEHNA LEH LUNGTOMNA (iii) KI MUHDAHNA (iv) MI DANGTE HAZATNA LEH ELNA, (iv) HUAIHAMNA (v) LEITUNG CILESA MAWHNA (vi) HUKNA LEH LANNA (vii) ANGSUNG KHUALNA (viii) ZUAU GENNA (ix) THUMAAN LO A KIKHEMNA LEH KI KHIATNA.. hihte ahi hi.

2. Mi tampite in hih vanleng Air Flight 2016 tuang nuam mahmah napi, a nuntakna un cin zolo uh hi. Nang-le-kei in ihih leh Pasian' hong piak ticket tawh tuang thei dingin ih kilamen a, lametna tawh ih NGAK hi. Ih hih theih zah in eite kiging in kipuah ding hihang. Checking hun hong tung dinga, letmat tawi mah leng zong asung a security te in ih vante hong sit kik ding ahih manin a kisamlo vante guang kha kei ni.

3. Passenger te' lungdamna ding leh nopsakna ding ka deih pen uh hi a, hih vanleng pen kha 12 sung aleng ding ahi hi. Hih vanleng sung atuangte minam tuamtuam leh pau nam tuamtuam ih hih manin eite lak ah kilemna, lungsim kituahna, ki-itnate kisam mahmah ding hi. Tua hikei leh lampi ah mite tawh kibuai sak in ih sawmna gam ih tun loh ding lauhuai mahmah hi.

4. Hih vanleng tung tuang mite in bang hun bang hun in kituahsia thei ding ahih manin, khualzinte in a gamla kihona (phone=thungetna)te nong ken tek nading un hong zasak ung. Bang huh bang hun cilo in ih tunna gam ciangciang atung lam ah zaksak den ding kong hilh khol uh hi.

5. Vanleng tung tuang peuhmah in ih tunna koimun tak cih ih theihna dingin, ih et theih ding gamlim (Lai Siangtho) hong keng tek un, tua sungah na tunna ciangciang uh leh tua vanleng in mailam atuak ding thute kigelh ding hi. Ahih hangin tua laibu sung mah ah lamman zuat dan ding hong kilak ding hi. Hih Laibu in note lam-etna thak hong pia ding hi.

6. Tu in ih vanleng lenkhiat hun hong cingto ta aa, vanleng hat tak in hong tai ding ahih manin, bang mun cilo eite in a tuahsia thei ih hi a, tua bang tuak leng zong hong kihotkhiat theihna ding omsun ahi ih kawnggak (Jesu Christ) atawntung in kiptak in na gak den nading un kong zasak uh hi.

7. Hih ih tuanna vanleng tungah leitungna leh nopsakna khempeuh sep ding kiphal ahih mah bangin, kha lam tawh kisai zong a ut-te in sep ding zong kiphal hi. Ih ut bang tek a om kiphal dinga, ahih hangin, CCTV tawh hong ki en den ding hi. Tuate khempeuh ih tupna gam ih tun ciangin tua video pen mikhempeuh muh dingin hong kilak kik ding cih phawk ni.

8. Vanleng tung tuang mite lungdam tak leh nuamtak a na tuan na ding uh hong deih kahih manun, siatna khat peuh ih tuah khak leh zong ka kiging kei uh hi na cih loh na dingin tu in na vekpi un kiging dingun kong hilh khol uh hi.

9. Kuamah tun nailohna gam hong paipih ding kahih man un, nidang a na tuah ngei nailoh uh nopsaknate le lungdamnate na tuah mah bangun, na tuah ngeinai loh uh siatna lipkhap huai tampi zong na tuak kha ding uh hi. Bangbang dinmun ah na om in bang siatna na tuak uh zongin lungdam tak a maituah thei dingin kiging khol tek dingin kong vaikhak nuam uh hi. Kote in zong hih gamthak pen pai ngei nailo kahih manun, ih kingakna ding pen tunglam pan thuvaikhak leh thupiak ih ngah bangbang in mainawt ding ih hih manin, mun gamla tawh kihona (phone=thungetna) pen nungtasak (battery full) den ding hi hang.

10. Innkuan kim le lungdamtak in hih Flight No. 2016 pen na tuan ding uh kong deihsak uh hi. Khat veivei ciangin ze-etna meii sahpite ih phut tan kul dinga, khat veivei ciangin khemna huihpite ih nawktan kisam ding ahih manin, kong vaikhak nop thupipen in na kawnggak uh ahi (seatbelt= Jesu Christ) kiptak in na gak un cih thu kong vaikhak kik uh hi. 

11. Flight No. 2015 zong nuamtak in hong gualzawhpih leh hong kantan pih zo PA mah in tu a Flight No. 2016 zong eite ih tup ih sawmna gam hong tunpih dingin ih lamen hi. Topa'n thupha hong pia ta hen.

Lai-at.. Note hong it,

Captain Pilot

AIR HEAVEN Flight No. 2016

NGETNA: Hih Air Heaven Flight No. 2016 a tuang dingmi khempeuh te kiang ah, hih thuvaikhak poimawh mahmah na kikhak sawn un. Lungdam mah mah hi.

By Pastor PL Thlenga (AIIAS, Philippine) 

(2016 Kumthak muakna aa kigelh Daniel Shoute letkhiat article hi).

 

Zo Phualva Thupuak - Volume 05, Issue 22 [1 Attachment]

 

[Attachment(s) from Mung Tong included below]

A Sung aa Om Thute:

A SANG ZAW MUN AH

CIDAMNA THU

Sikhum Zunkhum

KAAL SUNG NEWS

Gupna Bucing Crusade

Maranatha Phatna Labu

Dah Pihna

THEIH HUAI NONO

THU ZAKSAKNA

Pawl Lutna

ZSM / CDK

Youth Alive Camp

Laibu Hoih Pawlkhat

Lungdam Kohna

Church Address

"A SANG ZAW MUN AH"

 Tu hun aa Christian tampite in amau dinmunte ngaihsun in, pilna siamna leh laitan neilo kahih teh hisang a dinmun sangzaw kahto theih nading om kei, (ahk) kei bang numei khat a' ding in tua kan a panlak theih nading om kei, (ahk) singtang khuaneu papi khat a' ding in tua dinmun kan a hihtheih ding bangmah om kei, cihte tawh lungkim sawmin khantoh sawm nawnlo uh hi. Mi tampite in tu a dinmun sanga khantoh nading lampi theilo in a sep ngeingei mah uh sem in om uh hi. Pawlkhatte in ahih leh tulaitak a atuah uh taksa leh kha dinmunte ah lamet bei, thanem in om uh hi.

Ahih zongin sanggam aw, hih thu phawk in: tulai takin na si kei a, na nungta hi. A ihmu na hibek a, hong phong ding leh hong khanglosak ding na kisam hi. A nungta nate ciamtehna khat ah "A nungta nate khangto hi" (Living things grow) kici hi. Thu-um mite zong ih up sungteng ih khantoh ding kisam a, ih khantoh nawn kei leh a si (ahk) a sikuan ih hi ding hi.

  Khat vei lai in ukeng-no khat tuikhuk thuk mahmah sung-ah om a, tui pek zialzial in a lungkim mahmah hi. Ni khat ni ciangin, "Nuntakna pen kei ading in hikan bang om nawn ahiam, hih tuikhuk ah ka u ka nau teng tawh om in, ka duhduh kane a, ka utna mun tengah pai in hih sang anuam zaw bang om mawk diam" ci hi. Ahih hangin, nikhat  tuikhuk tungpan khuavak hong taang sesa mu in banghiam cih thei nuam ahih manin tuikhuk bang tungah a kahto kankan hi. A tung atun ciangin a et leh tua a omna tuikhuk sang' azah zakhat val banga zai zaw bual khat va mu hi. Damdam in tua bual lam ah va kin phei a, tua bual atun ciangin a pam lam a va et lai leh tuipi zai mahmah mu lai sawnsawn hi. Bual pan in tua tuipi lam zuan in va pai a, tuipi gei atun ciangin, "Aw tuma lai a ka omna tuikhuk pen hih tuipi tawh teh leng phelkhai gol khat sunga tui dim pan tui taak khat bang bek na hi mawk" ci hi.

Hih ukeng tangthu mah bangin ih Pasian in nang hong lamsang nopna dinmun ii alang lang lang(12.5%) zong atung nailo nahi hi. Pasian in dinmun sangzaw ah hong koih nuam a, na lungsim na-ngawn in na ngaihsut ngei nailo dinmun ciang nangwn hong tonpih thei hi cih um in. Gam laak beh ding tampi na nei lai a, na sik ngei nailoh gamthak ah Topan hong tonpih ding hi. Tu laitak na omna in mailam na dinmun ding tawh na teh ciang tui phelkhai gol dim sunga tui taak khat bang bek hi cih um in. Mihingte bek pen Pasian in ama' lim-le-mel sun a hong bawl ih hi a, piansak na dangte neih ngei loh talent, siamna leh vangliatna thupitak nei a hong bawl ihi hi.

Neurologist (khuak lam asin mi) te in mi mawkmawk khat in ama neih pilna leh siamna pen sawm ah khat (10%) zong zanglo hi ci hi. Sawm ah kua (90%) pen a muhkhiat nailoh leh zatnai loh in om hi cihna hi. Israelte zong Egypt gam pan in Canaan gam a paina uh lampi maan tawn le uh ni sawm kim bek sawt ding hi kici hi. Ahih hangin kum 40 bang a paikhit uh ciangin zong, Egypt gam sangin Canaan gam neh zaw tuanlo uh hi. Ahang in upna a kisap man uh ahi hi. Pasian in a piak sawm gam pen upna tawh mu banlo uh hi. Tu laitak a, amai ah a phutkhak uh haksatna bek mu in phunhat uh a, apai khitna gamte ah kileh kawikawi uh hi. Horeb mual kim ah kual pai kawikawi uh a ni 10 khawng a tun theih ding pen kum 40 hong sawt mawk hi. Tua bangin Horeb mual kim ah a ki vialvial lai un, Pasian in Moses hopih in "Hih mual kim ah sawt na om khin ta uh hi, kithawi in kalsuan khia un la, Amor te mualtung gam leh a kim a gamte va la un, note kong pia khin ta hi" ci hi (Thkna 1:6-8). Tua bang mah in eite zong ih Christian nuntakna pen singlamteh mah lungdampih in singlamteh kiim teng ah ih pai kawikawi hi. Tuni in ih Pasian in "Hih uplahna mual, ki lungkimsakna mual leh lungkim a tawlngak hithiat na mual ah sawt na om khin lua uh hi, ki thawi in kisuan khia un. Gamthak na luah ding uh kong geelsak khin zo hi", hong ci hi. Tuni in nithak, kumthak ahi hi. Hih nithak hong piak sungah Topa in DINMUN SANGZAW AH hong koih sawm hi. Tua sanga zah tampi in Topa'n hong zangh thei a, hong zang nuam hi. Tua na dinmun sang' ahoih zaw ah nang hong koih thei in hong koih nuam hi. Tua thu pen na up ding kisam a, na up kei leh cikmah hun in apiang kei ding hi.

Gualzawhna pen na Lungsim pan Kipan Masa

Kumli hal a kinei den Olympic games kimawlna a tai kidem mi khat in taikhat pen minute 4 sanga tawm zaw in ki tung zolo hi ci in misiamte in ngaihsun uh ahih manin, "Four minutes Theory" na ci uh hi.  Ahih hangin, Roger Banister in hih "Four Minutes Theory" pen sang zolo in, "taikhat pen minute li sang tawm zaw in atun theih lam ka lak ding hi" ci hi. Hong kisin toto in, tai khat pen minute li ma in hong tung ziau mawk hi. Roger in azawh khit ciangin mi 336 tak in minute 4 ma in hong tung theita uh hi. Banghang hiam? Tulai khangthakte nidang a mite sang ahat zawk man hi lo hi. Nidang a mite lungsim ah hi theilo cih lungsim ngaihsutna in na hencip hang bek hizaw hi. Pasian in eite hong piak pilna leh siamnate zangin dinmun sangzaw ah hong koih thei, zong hong koih sawm hi cih ih up masak ding kisam hi. Na lungsim in gualzawhna a ngah masak kisam hi.

Khat vei zan khuamial lak ah papi khat nawhsa takin inn lam zuan a ciah, tungbaih nuam lua lamdawt atawt leh tuikhuk alui thukpi khat mu kha lo a, sik khial in a kia hi. Zan thapai tua sung pan pai khiat ding hanciam napi diang khia zolo ahih manin, zing khuavak ding ngak in a kiu khat ah a tu hi. A sawt-lo in papi zukham khat zong tua tuikhuk lui sung mah ah hong kia hi. Amah zong tam veipi pai khiat sawm napi a paikhia zo pak kei hi. Tua laitak in a kiu a tu papi masapa in aw ngaihtak in a ot san leh, zukhampa lau lua in a tha neih zah tawh apua lam hong diang khia zo hi. Tamveipi a sawm azawh zawh loh pen a lauh luat man in hong diang khia zo mawk hi.

Hih thu pan in eite phawk loh siamna, hihtheihna leh thahatna tampite Pasian in hong pia khinkhian hi cih ki thei hi. Pasian in Ama minthan nading in, tuate zang in dinmun sangzaw ah hong koih nuam hi. Tua ahih manin hun beisa aa Satan hong buaisakna hang tawh haksakna leh thanemna tampi om mah leh mai lam ah Topa hong piak ding dinmun hoihte mu khol inla lungsim khauh takin pan la kik in. A taktak in Satan in na mailam a Pasian hong koih sak dinmun sangzaw pen mukhol ahih manin tu in lamet bei in hong koih nuam hizaw hi. Na hun beisa a minsiatna, haksatna leh zahkona na tuahte pen na mailam a Pasian hong piak ding thupha leh hamphatna na ngah nadingte susia khasak kei in. Pasian pawlpite zong Satan ii hong do-na ahang in mailam hun a Lungdamna thu tangko zo ding dinmun sangpen nei ahih lam thei ahih manin hong do leh hong buaisak ahi hi. Tua ahih manin Satan in nang pen "dotak" hongsakna hangin Pasian tungah lungdam ko zaw in. A sawt lo in nang a' ding zingkhua hong vak ding hi. Na nuntakna ah buaina khuazing a sah semsem leh zong gualzawhna khuavak nai semsem cih phawk in.

          Kongit ute naute aw, hih thute um in na san nak uh leh na nisim nuntakna ah mainawt a khantohna na mu ding uh hi. A hih zongin na phawk det ding thu khat in: tu laitak a na nasep (dinmun) in na mai lam a' ding hong ki tawikhai laitak hi a, Pasian in nang hong sittel hi cih phawk in. Tu laitak a na nasepte lungkim huai tak a na zawh nak leh mai lam hun ah na khantohna ding pen kuamah in hong khaktan zolo ding hi. Na makaite, na seppihte, na galte leh Satan nangawn in hong dal zolo ding hi. Tu a nasep muanhuai tak in na sep nakleh, a hun hong tun ciangin Topa in " Hong kah tota oleh" hong cih hun hong tung takpi ding hi. David zong a gancinna ah muanhuai lua mahmah in, a nasep a zawh zia Topa'n mu ahih manin, Israel kumpi dinmun ah Pasian in  zakhan to mawk hi. Tua bangmah in, Joseph zong  a nasep khempeuh ah muanhuai tak in asep manin, gamdangmi bek thamlo sal miginalo a ki ngaihsut dinmun pan in gam-uk (Prime Minister) ah tungto ziau hi. Tuni pen nang a dingin a lungdam huai ni hi. Hun beisa a na lungsim hong nasakte mangngilh in. A bul pan pan pha kik in. Lungkia kei in. Hih lungdam huai ni pha sungah Pasian in hong koih sawmna dinmun sangzaw lam ento ni. Ih nung lam a haksatnateng mangngilh in, ih mai lam a Pasian in hong makaih nading ah mitsuan in mainawt ciat ni. Topa'n mimal kim thupha hong pia ta hen. Amen.

? Pastor PL Thlenga, Translated by Daniel Shoute

 

 

 

__._,_.___

SABBATH SCHOOL LESSON 12 - EGYPT ZUAN KIK

Sinna 12                                                                                               Dec. 12 - 18

Egypt  Zuankik

 

Nipini (Sabbath) Nitak lam                                                                   Dec.  12

Sim Dingte:  Jere. 40:7-16; Jerem. 41 - 43; Paikhiat. 16:3; Gamlakvakna 16:13; Jerem. 44.

 

Kamngah:  "Topa na Pasian in kote' ading a, nang tung a hong gen bang bang ka zuih kei tak mah uh leh Topa in amann tak in thei ta hen" (Jere. 42:5).

 

Tu kal sinna in kamsangpa Jeremiah thu ih sinna tawpna ahong tunta hi.  Ahih hang tua khit lam ciang "lungdam tak in nungta den uh hi" cih tawh tawp lo mawk hi. Thu khat pan in Jeremiah thubu tomkaih ding hi leng hehpihna' bat theih tan zong kici thei ding hi. Cihnopna ah hehpihna thu asang nuamlote hehpihna in honkhia lo ding hi cih thu ahi hi. Topa in bang zah in hopih cih thu hi zaw lo hi. Pasian in hotkhiatna, lungmuanna, gualzawhnate pia in, liah in dal hi. Ahi ta zongin tawmno khat in Pasian hotkhiatna thu san ding nial uh hi. 

            Jeremiah vai ah e leh? Asep thamanh omlo suak mai hi ven! "Atau den kamsangpa" in thum nang tau nang tampi nei hi.  Jeremiah piak vauhilhna leh hilhkholhnate khempeuh tung hi. Mihonte in lah mawhna mah len tentan uh a, milim bia in lehtat uh hi. Kamsangpa leh Topa kammal akilangtang in langdo uh hi. 

            Bang zah in kidop huai hiam? Hehpihna ih cih pen mi khempeuh kipia ahih man in hehpihna ahi hi. Kuamah piak kalh tang omlo hi.  San nopna lungsim neih kul hi.

 

Nimasani (Sunday)                                                                               Dec.  13

Ut Bang Taka Taa (Pheng tat gawpmang) (Jerem. 40:7-16)

            Jereusalem lah siacip a Babylon te'n lah zo pikpek ta ahih man in mite khempeuh pil vang ta buang lo dia, peuh zong kici kha thei ding hi. Adah huai thu ah, tuaci lo mawk in kizom toto lai hi. 

            Jeremiah 40:7-16 sim in. Mihonte kiang ah bang thupuak kipia hiam?  Aneu 11 ah abeibangg cih kammal in bang khiatna thupi nei hiam?

 

            Lungmuanna thupuak kipia khin ta hi. Gualzawhna zong akhom ciang khat mah kingah hi (Jerem. 40:12 sim in). Ahi zongin mikim pen tu lai aomzia uh tawh lungkim lo uh hi.

            Jere. 41 sim in. Abeibang mi tawmnote in bang haksatna tuak uh hiam?

 

            Ulian kisuamna vaite ah ahang zong kigen beeklo hi. Asem abawlte lah "kumpi namte leh kumpi uliante mah" hi zaw lai hi (Jere. 41:1, NKJV). Hih bang omzia pen kumpi nam uliante sung ah Baabylonte' tung a teltuamte lut a kiaap ding cih thu sang zo nailo cihna lak hi. Gedaliah pen Babylon kumpipa'n kumpi tokhom ah tu sak ahih manin (Jere. 40:5 sim in), mihonte in mipi tung a thumann lo kumpi diklo bang in mu kha ding uh hi. Tua thu hang in amaute in Gedaliah leh apawlte thah kul in ngaihsun uh hi. 

            Azom ento leng, hih abeibangte in vaibuai thak khat phu uh a: Babylon mite lau uh hi. Athu telsiang lo pi in Babylonte'n Gedaliah leh Babylon galkapte sihna vai (Jerem. 41:3 sim in) phuu la nuam kha ding cih lau uh hi. 

            Ishmael leh amite mawhnate in tua mawhnate tawh akisai khalote lauthawng sak hi.  Hih thu in mawhna neilote tung ah  Pasian thu ih manhlohna tungtawn in natna satnate leh dahna kahnate ki tung sak kha thei cih vai hong bang ci theih sak hiam? 

 

Ninihni (Monday)                                                                                   Dec.  14

Pasian Makaihna Zong (Jere. 42)

            Jerem. 42 sim in. Thungetna tungtawn a Topa leh ama tung ah kinga mi honte leh mi khat peuh adingin hih mun ah athupi bang thupuak kimu thei hiam?  

 

            Babylon mite kihta uh ahih man in mihonte in Jeremiah kiang ah pai uh hi.  Tu ngawngaw ciang bel, Pasian kamsang ahih takpi lam thei buang ding uh hi.  Topa min tawh athu gengen tangtung takpi ding cih thei uh hi. 

            Mihonte'n Pasian hong sawl bang sem nung ci in kamciam uh hi. Sim suksuk leng sinna angah khin tawh kibang uh hi. Pasian deihna athei nuam, azui nuam ahi uh hi. Akammalte uh in a upmuanna uh nasia tak in lak hi. "Na thu gen te ko deih dan ahih leh ahih loh bang mah phamawh lo hi. Topa Pasian tung ah thu nong nget sak ding kong thuum uh hi. Tua hi leh athu ka mang ding uh hi. Topa Pasian thu mang ding ka hih man un ko mapai ta ding hi ung (Jere. 42:6, NIrV). 

            Jeremiah gen masak thute tawh saikaak in: Gamdangte vang muang kei un.  Topa muang le uh cin gualzawhna hong pia ding hi. Ahunpha ah hong honkhia ding hi.  Hotkhiatna pen mundang midangte kiang pan hi lo hi. Nidang in zong gamdangte hong huh hi lo hi. Tun zong hong panpih lo ding hi. 

            Amaute lungsim thanemna thei ahih man in avauhilh ahi hi. Amaute aliah adaal ding in Egypt zuat kik sawm uh hi. Tua hi a, atua cih loh nang un limtakin thupia hi. Egypt zuan le uh siatlawh ding uh hi.

            Hih ah zong atel ding uh kician mahmah hi!  Hih pen eite zong ih tuah ding thu hi a: 1.  upna tungtawn a Zeisu thumang a nuntakna leh lung muanna, ahihkeh  2.  upmuanna leh thuman'na lo tawh zawngkhalna leh sihna cih ahi hi. 

Atawpna ah ih vekpi ading in vai khat ahi hi. Israel te bang in kician tak in hong kivau hilhna aom lo tawh kibang hi. Ahih hang in hilhna tainate akibang mah ahi hi. 

            Nuntakna maw sihna, thupha maw hamsiat. Nisimin bangci telna ih bawl tek hiam?  Nuntakna ading maw sih na ading zaw? 

 

Nithumni (Tuesday)                                                                               Dec.  15

Egypt  Zuankik (Jere. 43:1-7)

            Na sim kholh khak kei leh, Jere. 42 pen lunglawp huai mahmah hi.  Mite in bang acih ding uh hiam? Thuman'na lam a amakaih upmuanna tawh Judah gam ah om suak zaw ding maw? Ahih kei leh nidang a khialhna bang mah in khial kik lai ding maw? Topa thu azuih sangsik un amau ut bang peuh in ta zaw ding maw? Topa in akician tak in vauhilh khin zo a alian 42 ah Egypt azuat kik uh leh bang thu in na dawntuah ding cih thu pia khin zo hi.

            Jere. 43:1-7 sim in.  Amau bang sem in bang bawl uh hiam?

 

            Pasian kammal leh ei deihna kituak kei kha leh ama vaihawmnate ah lungheinei kha ding hi hang. Tua bang keek mah in mihonte leh makaite in Jeremiah muang zo lo uh hi. Israel gam ah hun omzia akilaih hang in, amite' ngaihsutna uh leh alungsim uh kibang lai mawk hi. Kamsangpa Jeremiah do bawlna tawh akamciamnate uh pan kisiangsak uh hi. Atek ahaam Jeremiah tangdo sawmlo uh hi. Tua hi a alawm leh alai at pa ahi Baruch mawh sak uh hi.  Ama tung ah ahehnate uh suan uh hi. Amaute in Baruch in kamsangpa pen amau tawh sutuah hi ci in ngawh uh hi.

            Paikhiat. 16:3 leh Gamlak. 16:13 sim in. Jeremiah tung a mite gen thute leh Moses hun a mite gen thute saikaak in. 

 

            Mihingte pianphung pen, avai buaite uh midang khat peuh ngawh ding ahi hi. Tua bang in Baruch in amipihte Babylonte khutlum tuak ding leh Babylon ah kipuak ding in deih hi ci in mawhsakna thuak hi. Jere. 43:1-7 sung ah, bang hang a tua ci bang in piang leh deih cih thu ki gen lo hi. Moses in zong Israelte'n Egypt a nusiat khit uh ciangin gammang tulak ah bang hang in si leh deih cih zong kigen lo hi. Mihingte in alung so lai tak un kingaihsun siang theilo kha ding uh hi. Tua ziak in ih ngaihsutzia-te Topa makaihna nuai ah ih koih ding thupi mahmah mawk hi! 

            Bang tan vei ih ngaihsutzia tawh ih khentatnate huzaap sak kha in Topa thupiak awlmawh lo kha zel ih hi hiam? Ih ngaihsutzia ih kihuzaap sak khak loh nang in koici kidop thei ding ih hi hiam? (2 Cor. 10:5). 

 

Nilini (Wednesday)                                                                                Dec.  16

Egypt ah Kipaipih (Jere. 43:8-13)

            Jere. 43:8-13 sim in. Jeremiah tungtawn in Topa in bang gen hiam? 

 

            Tahpanhes pen sak lam pang, nisuahna lam Egypt gamgi lam a khua khat ahi hi. Tua khua pen amuanhuai gal nan'na mun zong hi a Jew mi gam sung vai ukkte tenna mun zong ahi hi.

            Hih mun ah zong, Topa in genkholhna thu Jeremiah gamtat tawh lak sak hi. Kammalte in vang nei ih cih hang in gamtat tawh akilah ciangin khauh pai sem hi. 

            Pharoah kumpipa innpi lutna mun ah Jeremiah in koici bang in suangte va phum ding cih ih theih loh hang in; akician mahmah thu in:  Topa in, avang lian Pharoah te tawh teh theih hi deksuai lo hi. Topa in acih bang in athu tangtung sak ding hi. Israel mite in Egypt ah paina tawh kidalna leh zalenna ngah ding in kingaihsun kha uh hi. Egypt te hong pai  leh suakta in launa tawh kipelh ni cih a aum te mah tawh ki bangin khial uh hi (Jerem. 37:7, 8).  Egypt mite Pasian te zattak cing omlo hi. Pasian umlote thutak aphawk mawh sak milimte ahihi.  Eite in zong tua ih theih ding ahih mah bangin, Israel mite'n zong  amau kidalna leh suahtakna diktak pen Topa thuman'na (Topa thu bang a tatna) ahi hi. 

            "Pumpi deihna nialna pen ih biakpiakna vai khat hong suah ciangin Pasian hong deihsakna thu tel in tua tawh kituak in ih nungta ding hi. Tua bang  in ih mite mitza nuhsa suak in ama thukham (thupiaknate) pan in alamdang thu tampi ih mu thei ding hi. Thuman'na pen amuanhuai lampi ahihna ih mu ding hi.  Mite in thumann telsiam zah tungtawn in mawhpuak nei uh hi. Thukham kalhnate thuamann in ngaihsut picing hi. Khazih hehpihna tungtawn in ama deihna atangtun ding in hong lamen hi. E.G. White, Adventist Tangko, R.H., Feb. 25, 1890.

            Israel mite in lungmuanna ngah ding in Egypt ah akileh kik nop vai uh limm bang in ngaihsun in.  Kha lam thu in ngaihsun leng, thutuampi hi!  Topa sung a muh theih loh bang a ih ngaihsut, mu ding a "Egypt zuankik" cih mahmah zong!? 

 

Ningani (Thursday)                                                                              Dec.  17

Akilangtang  Langdona (Jerem. 44:1-10)

            Jeremiah 44:1-10 sim in.  Israel te in Egypt ah bang sem uh hiam?

            Egypt ah a om sung un Jeremiah in amite tawh Judah gam ah aom lai vua atuah uh vai buai bangteek mah tuak kik hi. Tua hun lai in Jeremiah in makaite tawh akikup kul hi. Tua khit ciangin, hih haksatnate atuak sak mawhnate teek mah mipite in bawl uh hi. 

 

Jeremiah tung ah mipite in alamdang bang dawnna pia uh hiam? (Jere. 44:15-19 sim in). 

           

Alung  khauh toto zia uh pen lamdang liang hi. Jeremiah in "Topa min tawh" kitalsik a agen thute mang nuam tuanlo uh hi.

            Ahang pen kitel mahmah a:  Josiah' puahphatna vai ma in thu umlote' Pasian te biakna vai ah thuuklut lua khin uh hi. Amaute in (vantung toonu) tung ah paknamtui na ngawn hal uh a zu leh sa te tawh biakna pia uh hi. Mapai zong kisa lel uh hi. Nuntak nuam in patauh omlo hi. Josiah kipuahphatna hun khit ciangin vai buai hong kipan hi. Tua hi a, bang hang in amaute in Jeremiah leh avauhilhnate awlmawh peuhmah ding uh hiam? 

            Jeremiah' dawnkikna ah, (Jere. 44:20-30) na telsiam loh man uh ahihi.  Hih bang teng gamta na hih man uh a hih bang vaibuaite atuak hi uh teh.  Asuuksia zaw thu ah, lungkhauh tak in nial nahih man un akhawkk zaw vai buaite hong piang lai ding hi. Note in Egypt ah lungmuanna mu ding na kisa uh a, ahi zongin tuate in khemna zuau thu hi in, thu umlo te biak Pasiante bang mah ahihi.  Atawpna ah thumann na thei ding uh a, ahi zong in zekaii lua ta ding hi. 

            Mawhna leh uplohna sung ah athuuklut om uh a, a mapai  mahmah ding bang uh hi. Tua kawmkal mah ah, tamveipi Christian diktak tampite in thu haksa atuak uh hi.  Koici tel gen in hih vaibuai ah koici kalsuan mawk ding ihi hiam? 

 

Kiginni (Friday)                                                                                    Dec.  18

Ngiahsut beh Ding:  

            "Jeremiah thubu bup leh Laisiangtho bup mahmah ah zong, sialehpha kawmkal buai lawh in ih om hi. Christian ih hihna tawh asia apha ih khen thei hi.  Pasian in akilamdanna vai tuamtuamte pan (gentehna in, Rom. 7:7; Micah 6:8; Joshua 24:15; Matt. 22:37-39; leh Thuhilhk. 12:8 sim in.) hong siang gen ahih man in ih thei hi.  Pasian na up kei leh bel gen theih loh? Asia apha koici theih thei mawk ding?  Pasian um lo lai at siampa Sam Harris in Ngaisut piakna khat (The Moral Landscape) cih laibu khat gelh hi. Asia apha pen nate thu tungtawn in ki thei thei bek hi. Cih nopna ah nate thu in asia apha leh amann leh akhial ih theih nang hong huh kul hi. Sam in a upmawhna ah nate thu in asiate abawl phat hun hong tung ding cih thu ahi hi. Mite siathuaina damsakna kimu leh bang piang ding cih ngaihsun in Kinialna peuh in muanhuai tak in mite khuakk bawl theih hi leh bang ci ding ngaihsun ni. Midangte awlmawh lohna pen ann lak ah Vitamin D bangin koih theih hi mawk leh, siatna ih cih pen anneek tui dawn vai bek hong hi ta ding hi." -- Adapted from The Moral Landscape, (Simon and Schuster, Inc., Kindle Edition) p. 109. Ahi zongin Pasian a umlo scientist te mahmah in nate thu theihna in bawl pha thei hi cih umlo thei khalai ding hi. Pasian a umlo na hih leh zong hih vaibuaite' vai koici dam'sak thei ding? 

 

 Kikup Dingte:   

            1. Eite adingin na khempeuh pen Pasian deihna koici san' cih tung ah kinga hi.  E.G. White, Teltuam Thupuakte, 1 SM. p. 118.  Hotkhiatna pen adan khat omlo pi in hong piang ding bang ci cih thei mawk ding?  Adan khat peuh ih cih pen nasep khat peuh tawh zong kibang tuan lo hi.  Tua te in Pasian'  hong san  nang in hong huh thei lo hi.  Hotkhiatna pen sepna bawlna tungtawn hi cih upna adik loh zia leh hotkhiatna in paidan cih nei kei cih ngaihsutnate' kilamdanna koici theih in koici gen thei ding? 

            2.  Ningani (Thursday) sinna a dotna haksa lim ngaihsut pha lai in.  Khat peuh  in: "Zeisu um keng, Pasian cih zong um keng ci na pi ka nuntakzia bang ci ciang cih en zel hi.  Kei nuntak pen nang nuntak sang hoih zaw, nang lah Christian hi sawnsawn" hong ci leh nang bang ci dawn ding? 

==========================

Khawkpi 7 : (azom) - Khris' Nungzui Taktakte In Ama Thu Gen

Khris' Nungzui Taktakte In Ama Thu Gen

 

         Note khempeuh a nungta missionari hi le-uh cin gam khempeuh, nam khempeuh, pau khempeuh leh mun khempeuh ah manlang takin tu hun'a ding thupuak kitangko khin ding hi. 9 T, laimai 438.

         Pasian' khawpi sung a lut nuam khempeuh in hih leitung ah a nuntak sungun a gamtatnate uah Khris a ki lat khiat sak ding uh a  hihi. Tua in amaute Khris' kamtai, Khris' teci suak sak hi. Gamtat holh lo khempeuh kician takin, hi sinsenin langpanna thu gen ding uha, leitung mite' mawhna a la khia Pasian' Tuuno, mawhneite lak ding uh hi. Amah a sang khempeuh Jesu in Pasian' ta suah zawhna pia hi. Pian thakna  bek mah Pasian gam tun theihna lampi a hihi. Tua lampi toi-in ih lutna kong kawcik a hih hangin, naupangte-a kipan nupi papite tua lampi ah ih kha dinga, gupna a ngahna dingun lungtang thak leh lungsim thak a neih ding uh kisam a hihna amaute ih hilh ding hi. Zia leh tong ngeina luite a nusiat uh kul hi. Pianpih lunggulhnate zong a kheel uh kul hi. Khemna khempeuh, zuauna khempeuh, kam sia pauna khempeuh a paih khiat uh kul hi. Numei hi ta leh pasal hi ta leh Khris a suun nuntakna a neih ding uh a hihi. 9 T, laimai 23.

         Ute naute aw, no hong len cipte na hem khia nuam uh hiam? Misi banga gamtang lo-a thadahna panin na diang khia nuam uh hiam? Nuam na sak tuak uha na sak tuak kei uh a hi zongin kuanin sem khia phot dih un. Jesu' kiang leh thumaan theihtelna ah mite tun pih ding hanciam phot dih un. Sem khia phot le-uh cin tha ngah ih, nuam sa-in na lawp ding uh hi. Sep khiatna tawh na kha lam thate uh hong hat zawsem dinga, nomaumah suahtakna ding na sem khia zo zawsem ding uh hi.  Khris ka um hi a ci mi tampi misi tawh kibang hi. A khanlawhna dingun na hih theih zahun hanciam un. Hilh un, zol un, taai un. Vuuk khal a batnate uh Pasian' itna in lum saka a tui sakna dingin thu ngen un. Za nuam khol lo ding uh a hih hangin na nasepna uh mawkna lo ding hi. Midangte' phattuamna dinga na hanciamnate uh no' tung hong tu kik ding hi. 5 T, laimai 387.

         Lai siam lo a hih manun Pasian' nasepna ah a kihel thei lo dingin kuamah kingaihsun kei hen. Pasian in na sep ding uh nasep nei hi. Mi khempeuh a sep ding ciat uh pia hi. Nangma thu-in Lai Siangtho na sim thei hi. "Na kammalte a lutna in khua vak saka; mimawlte pil sak hi;" Late 119:130. Nasepna'a ding thu na ngen thei hi. Upna leh lungsim taktak tawh thungetna vantung ah kiza hi, Na hih theih sunsun na sep ding a hihi. 6 T, laimai 433.

         Mihingte bang suak thei, bang hi thei-a, amaute' huzap tawh a kisia ding mite hot khiatna ding bang ci sep theih cih leitung mite' kiangah a lah khiat theihna dingun, mihingte tawh vantung mite in na sem khawm nuam uh hi.

         Mi' om lohna tuipi gei-a tembaw kisia themte bang-in gam khempeuha kitheh thang, a mawhna uh tawh a kisia ding mi tul tampite'a dingin lungduai tak leh kuhkal taka na a sem dingin Khris in eite hong sam hi. Khris' minthanna a ngahte in Ama na zong sem ding uha, a thanem, a cimawh, a lungmang mite huh ding uh hi. 9 T, laimai 30,31.

         Pawlpi tawh a kizopna ah thu-um mi a lungsim takpi a hih ding kisam hi. Pawlpi' mainawtna ding thu masa-in koih ding hi. Pawlpi tawh a kizopna pen ama phattuamna ding sangin pawlpi' phattuamna ding hi zaw hi cih ngaihsutna a neih kei leh amah kihel kei leh hoih zaw tham ding hi. Mi khempeuh in Pasian'a dingin sep theih khat ciat kinei hi. A kisam lo gualnopna lamah sum tampipi a zang om thei hi. A duhduh uh ne uh hi. Pawlpi panpihna ding a om ciangin lah siah pia bangin kingaihsun uh hi. Ngah theih ding a om khempeuh la nuam bek uha, piak khiatna ding ciangin mi khiat nuam zel uh hi. 4 T, laimai 18.

         Khris' pawlpi pen galkap hon khat tawh kigenteh thei hi. Galkap khat nuntakna pen gimna, haksatna leh launa tawh kidim hi. Kim leh pamah gal dim hi. Lusu ngei lo-a a panmun zong a lawi ngei lo khawmial vangliatna mangpa in makaih hi. Khristiante a kikep khak loh ciangin tua a thahat galpa in sim pah lian hi. Pawlpi mite pilvangin a tangzan kei uh leh galpa in khem zo ding hi.

         Duti dinga thu a kipiak ciangin galkap hon khat lakah a lang bang thadahin ihmu le-uh bang a ci diam? Gal lelhna, kimatna leh sihna piang ding hi. Galte' khutlum pan a suakta khat peuh a om zongin amaute letsong piak tham a kisa diam? Kisa lo ding hi. Thahna thuak dingin thu piak pah huai zaw hi. Tua mah bangin Khris' pawlpi zong polhtehin a cihtak kei uh leh a nung thu ding lauhuai mahmah hi. Khristian galkapte ihmumu leh - tua sanga a lauhuai zaw om ke'n teh! Khawzing mangpa' ukna nuai-a a om leitung mite koici leh kido zo ding hiam? Kidona ah tavuan nei lo leh kin meel nei lo bangin oma, kidona huna a mawk om hithiat mite, a omzia uh a kikheel nop kei leh a tawp pah lian ding uh hoih zaw hi, 5 T, laimai 394.