Zo Phualva Thupuak - Volume 05, Issue 12

A Sung aa Om Thute:

• THUCIAM LUI AA KHADET PAWITE
  
• CIDAMNA THU
  
• NA ZONGSATNA PHIAT IN
  
• CIMPHAWNG
  
• THU TUAMTUAM
  
• THU ZAKSAKNA
  
• CHURCH ADDRESS

THUCIAM LUI AH KHADET PAWITE

 Laisiangtho in khadet pawite a kizatna ahang kician in hong gen lo hi. Khapi tawh kisai ahi zong, khadet vaite tawh kisai Laisiangtho munte en in ahi thei ding athu pawlkhat ih sut suk ding hi. Ahi zong a LST mun khempeuh ih sut gai zo kei ding hi.

        Khadet pawi bawlna: Mite Topa' mai ah lungdam aa biakna abawl ni thupi ni khat hi (Hosea 2:11) aa, tua ni nasepna pan khawl uh hi (Amos 8:5; Gamlak 29:1-3). Tua ni in innkuan annek khopna nei uh hi (1 Sam. 20:5,18). Pasian kamsangte kiangah thudong uh hi (2 Kumpi 4:23). Meihal biakpiakna, an tawh ahi aa lenggahzu tawh ahi zong, biakinn ah paipih uh hi (Gamlak 28:11-15; 29:2-5). Israel minam khempeuh in hih pawi nite zang ciat uh hi.

Thupaizia: Hih kha det pawite hong kizat khiatna in tang lai nisuah na lam aa kha-pasian biakna tawh kisai hi. Khadet pawite in tua pasiante zahtak piakna hi aa, mun khat khatte ah tua pawite kha sim in bawl uh hi. Canaan mi pawlkhatte in kha-lit ni pen ni thupipen ci uh aa, tua ni-in kha-pasian tungah ki-ap uh hi. Amau ii san dan ah, "Kha-pasiante in pilna (theihna) nei uh aa, tuate amau abia mite tungah hong hawm sawn uh hi. Amau te pen van leh lei ii thukhente hi uh aa, nuntakna bulpite hi", ci-in ngaihsun uh hi.

Topa in Israel mite pasian dangte ahi, kha-pasiante abiak ding uh phal lo hi (Thuhilhkikna 17:3). Ahi zongin kha pen a lungluthuai van pumpi khat hi aa, A mite puk sak kha ding cih bel thei hi (Thuhilhkikna 4:19). Tua tawh kizui in Pasian in Israelte sungah khadet pawi bawl pih hi. Hih ni in khapi apiangsak pa biak ni ding ahi hi (cf. Pian. 1:16). Tua in kha-pi pen zan a uk ding (Late 136:9), khua hunte a khen dinga (Late 104:19) Pasian sehsa hi aa, kha leh aksite ataan nading thupia pa zong Amah hi-in (Jere 31:35) leitung ading thukhen (thunei) pa zong khapi hilo in, Pasian ahih zawkna Israel te'n aphawk nading uh ahi hi.  Pasian in thu akhen ciangin khapi ki mialsak dinga, ataang nawn kei ding hi (Joel 3:12,15). Tua ban-ah khapi in misite nuntak kikna pia thei lo aa (Jere 8:1,2),  Pasian mite hong nasak theilo hi (Late 121:6).

        Kha-pasiante in mite kamsia/kamphat ding hong bawlsak thei acih laitak in, Israel te' khadet pawi bawlna in amaute thupha pia in, akeem, a vaan den pen Topa Pasian ahihna aphawk nading uh ahi hi. Khadet ni in ih muh ngei nailoh hun thak muh khiatna kipatna ni hi. Tuicim tun khit Noah in mual dawnte (Pian 8:5) leh lei keu (aneu 13) amuh ni-in khadet ni ahi hi. Khadet ni in Israel mite Sinai sehnel gam tung uh (Pai. 19:1) aa, Pasian tawh thuciamna bawl uh hi. Khadet ni in biakbuk lam kizo aa (Pai. 40:2,17), Khris akawk ahi siampi nasepte kipan hi.

Kha-pasiante in theihna bulpi leh apia pa aa akigen laitak in, Israel Pasian in theihna bulpi leh pilna apia pa taktak ahi hi. Banghang hiam cih leh khadet ni in Pasian in a kamsangte kiangah thu na puak aa, mite in amaute kiangah thudong uh hi. Khadet ni in Topa in biakbuk sungah a masa pen Moses a hopih hi (Gamlak 1:1). Ezekiel in zong khadet nite in Topa kiang pan thu na ngah aa, (Eze. 26:1; 29:17; 31:1; 32:1; Haggai 1:1), tuate in Pasian mite' galte lang khat kamsanna vive ahi hi. Khadet pawi bawlna in Israel mite sunga kha-pasian biakna khawlsak nading ahi hi.

Khadet Ni Vaipuak: Khadet pawi bawlna ii nasep bulpipen khat in Israel mite' pawi khamna ni leh khate ciaptehna hi. Gentehna in, Paisan pawi in kha masa, ni sawm-le-li ni in kibawl (Pai. 12:18) aa, Silngo sawh loh Anlum pawi in ni sawm-le-nga ni (khalit) in kibawl hi. Pengkul pawi in kha sagihna ni masa ni kibawl aa, tua khit ani sawm ni in Siansuah ni tawh hong kizom in tu kha sung mah ni sawm-le-nga ni pen buk pawi hong hi hi (Siampi 23:24, 27, 34). Khadet nite in Isreal mite lungsim leh kha lam ah Pasian tawh a kimuh theih nangin hong geelsak hi. Hih zong Pasian' geelna khat mah hiding hi.                                                           ? Angel Manuel Rodriguez

 

 

Kamsang Maan A om Zia Tawh Sittelna

Kamsang Maan A om Zia Tawh Sittelna

            Kamsang sittelna hih thu lite banah, Ama makaihna a hih lam ih theihna dingin Topa in thupiang pawl khat hong gen lai hi:

            1.   A hunhuna a thu hong tunna. Pasian' mite a cihmawh mahmah hun om thei hi.  Mrs. White in mangmuhna a ngah cila mah bangin, tua cihmawhna hun tawh kituak lian dingin thupuak hong pia hi.

            2.   Thupuak bang lianliana a pianna.  Mrs. White' mangmuhna-a hong kihilh thute, kimanna a nei takpi, a kizang pah thute a hihi.  Ih nisim nuntaknate ah hih teci pannate a kizat theih pah takpina ngaihsun in.

            3.   Thupuakte in kha lamah hong tawi sang hi. Thupuakte a naupang suah huai, thu nautang peuh om lo-in, thupi-in a hong tawi sang thute vive hi.  A kammal mahmah in zong vang nei hi.

            4.   Mangmuhna a kipiak dan. Kipatna lama ih gen sa mah bangin, mangmuhna tampi pen pumpi om dan in zui hi. Mang a muh lai taka Mrs. White' om dan zong Lai Siangtho sunga kamsangte' om dan mah tawh kibang hi. Hih pen sittelna a hih loh hangin kamsang a hihna teci khat a hihi.

            5.   Mangmuhnate lungsim sunga piang tawm thu hi lo hi. Mrs. White in a muh, a zak, a suk khak leh, vantung mi in a hilhte a hihi. Lawp luatna leh lungsim seh tawh a piang mawkmawk khawng hi lo hi.

            6.   A kim a pamate in Mrs. White thuzawh lo hi. Mi khat kiangah, "Mikangte in ka lungsim hong zo hi. ci-in na ngaihsun hi. Tua banga a om ka hih leh Pasian' nasem dinga kilawm ka hi kei hi," ci-in lai khak hi.

            7.   A khangualte in ama nasep thei ciat uh hi. Mrs. White tawh om khawma na a sem khawm pawlpi mite hi ta leh, pawlpi pua lam mite hi ta leh in, Mrs. White pen "Topa' kamtai" hi takpi hi ci-in thei uh hi. Amah a thei pente in ama nasepna ah muanna nei pen pah uh hi.

            Kamsang sittelna thu lite leh thupuak leh thupuaknu A mite in a muan theihna dinga Topa in a lah om dan tuamte in, tua nasep pen Pasian'a takpi hi-a, lung ka lo-in muan tham cing takpi hi cih hong lak hi.

            Mrs. White' laibute, pawlpi' a dinga a manpha lam lahna leh thuhilhna tawh kidim hi. Tua teci pannate mi tangpi tawh kisai a hi-a innkuan leh mimal tawh kisai a hi zongin, tu ni-in eite' a dingin kizang thei hi. Tua tawh kisai-in Mrs. White in:

            "Teci panna sunga mimal tawh kisai thuhilhnate, hih banga a mimal a kawk kha lo mi tampi tak tawh zong kisai a hih mah bangin, pawlpi' phattuamna ding-in laibu-a khet khiat ding ka masuan a hihi... A lauhuai leh khialhna a tuamtuamte leh, Pasian itna Ama thukham a zuite' tavuan ka lahna dingin, hih banga teci pannate sanga a hoih zaw lampi ka mu kei hi," ci hi.

            Sanggam khat peuh mawh sak theihna ding matlap khat peuh muhna dinga hih teci- panna bu simna in zat khialhna a hihi. Ih sanggamte in ei' muh banga thute a muhna dingin hih teci panna pen molhtum banga zat ding hi lo hi. A mimal in Pasian tawh a leptuah ding uha ih koih lel ding thute zong om hi.

            Tu ni-a ih nuntakna ah a kizang thei ding thuguipite ih muhna dingin hih labu sim ding a hihi. Thupuak pawlkhatte a hun leh a mun zui-a hilhna leh taaina a hih hangin, a deihna bulpi pen mun khempeuh leh hun khempeuh ah kizang thei hi. Leitung bupa mihing' lungsim a kibatna tam mahmah hi. Mi khat' buaina pen mi dang khat' buaina zong na hi zel hi. Mrs. White in, "Mi khat' khialhna a kitaai ciangin, mi tam pi puah phatna ding ngimna zong a hihi," ci hi.  "Mi dangte zong a kiphawk theihna dingin mi pawl khatte' khialhna Pasian in pholaak hi."

            A sih kuanin Mrs. White in hih bangin hong hilh hi:

            "A Kha Siangtho panin taaina leh hilhna tawh Pasian' aw hong tung den hi... Hun leh haksatna in thu hilhna a mawkna suaksak lo hi... Thupuak ngah cil lai-a hilhnate zong tu lai hun bei kuana zuih ding a muan huai thuhilhna hi ci-a let ding ahi hi."

            Hih laibu sunga thute, Ellen White' laibu tampi sung pana kila a hih tei hangin, Testimonies for the Church a kici Testimonies Treasures bu sung pana kila tam pen hi.  A buppi-a a khen khia zo lo ding pawlpi mi a tawmna muna om pawlpite' phattuamna ding ngaihsutna tawh a thupi mun diakte a kiteng khia a hihi.  Hih laibu sunga thute ten khiatna leh geelna pen Ellen G. White Publication, Board of Trustees phalna tawh kawmiti a lian khat in a sep a hihi. Board of Trustees pen Ellen White' laibute a kem ding leh a khen khia dinga tavuan kipiate a hihi. Hih laibu a bawlte in zat pah theih ding thu guipite a tom theithei leh a thu a kim theithei dinga a khop tuah uh a hihi.

            "Topa na Pasian uh um un, tua hi leh na kip ding uh hi. Ama kamsangte zong um un, tua hi leh na khangto ding uh hi," 2 Chronicles 20:20.

Source: Pawlpi Thu Lamlak 

 

SINNA 11 June 6 - 12 "PASIAN GAMNUAM"

Youtube pan zong ki Ngai thei.
https://www.youtube.com/watch?v=jRAjEkI-X2I

NIPINI (Sabbath) Nitak lam June 6

SIM DINGTE: Luke 11:2; Luke 1:32, 33; Luke 18:16-30;

Luke 17:23, 24; Mang. 21:1-3; Luke 21:34- 36.

KAMNGAH: "Nisuahna lam leh nitumna lam pan, khang

lam leh sak lam pan in amaute hong pai

ding uh a, Pasian gam sung ah atu ding uh

hi." Luke 13:29.

Zeisu thuhilhnate ah Pasian gam in vai thupi khat

ahihi. Hih kammal Matthew ah 50 vei Mark ah 16 vei Luke

ah 40 vei bang, leh John ah 3 vei hong dawk hi. Topa

thungetna, mualtung thuhilhna, athuhilhna dangte leh

gentehna agente ah hong dawk thei zel hi. Pasian gam ih

cih pen leitung kumpi gamte tawh akibatpih om lo hi. Pasian

gam ih cih in mite mawhna vai ah Pasian in nung sang in

bang ci sep khin a Satan tawh kikingkalhna vai ah koici

khalbawl ding cih vaite hong gen siangna thu ahihi. Hih

thu in leitung kumpi gam vai hi lo hi.

Pasian gam pen Laisiangtho tungtawn leh

Khasiangtho in sung lam pana sepna tawh hong piang ahihi.

Hih thu in kha nuntakna ahi Pasian tawh kikholhkhawmna

ahihi. Pasian vangliatna muh theihna lianpen in mihingte

Khazih' zia leh tong sun a hong kikhelna uh ahihi. E.G.

White, Damna Thupha, MH. p. 36.

Tu kal sung hih vai Luke hong genna tungtawn in

sin dih ni.

NIMASANI (Sunday) June 7

Pasian Gam Hong Pianna: Khen 1 (Luke 11:2)

Lungdamna thubute ah Pasian gam vai gentehna

tampi om hi. Akipan thak kumpi gam thak Zeisu leh Ama

tungtawn a hong piang ahihi.

Luke 11:2 in Pasian gam tawh kisai bang hong gen

hiam? Kua gam hi a, bang hang in thupi mahamh hiam?

Hih kumpi gam pen Pasian a' hi ih cih ciang in tua

in Pasian gam pen ngaihsutna bek ahih lohna hong lak hi.

Nek leh dawn, kipawlkhopna vai, gilkial dangtak vai, thumanh

lohna vai cihte hi mawk lo hi. Mihingte hoihna vai khempeuh

kheng hi. Khazih mihing hong suahna tawh Pasian thu neihna

bulphuh a lungdamna thu tangkona vai ahihi (Luke 4:42-

44;Matt. 4:23-25).

Luke 1:32, 33 in Pasian gam kua patkhiat hi a koici

bang teng suak ding cih hong bang ci gen hiam?

Hih munte thu 2 hang in athupi pen hong suak hi.

Akhatna ah, Laisiangtho lui a kilamen Messiah pen kua dang

hi lo Zeisu, "sang pen Pasian Tapa ahihi." Nihna ah, "Ama

gam in bei hun nei lo ding hi" cih nopna in, mi bang a hong

piang a, asihna leh athawhkikna, in Satan' langpanna thu

teng zo mang hi. Pasian gam hong phut khin ta hi. Hih

leitung pen ih Topa Ama (Khazih) sathau nilhpa' gam hong

suak ta hi. Amah amang tawntung ding hi" (Mang. 11:15,

NIrV). Khazih leh Satan kidona vai ah, Adam leh Eve, mawhna

sung hong lut uh ciang in Satan in azo bang in kigen hi. Ahi

zong in Zeisu nasep masuan in, Satan thu gen pen zuau thu

ahihna atellah hi. Kieu kim pan leh hong sihna leh athawh

kikna tungtawn in Pasian gam hong tungta cih thu nialmawh

suak sak hi.

Pasian gam atakpi ahihna koici lah thei ding ih hi

hiam? Athupi pen ah, ih nuntakna ah atakpi ahih lam koici

lah thei ding ih hi hiam? Pasian gam mi ih hihna tawh koici

nuntak ding cih hong ki koici lamdan' ding hiam?

NINIHNI (Monday) June 8

Pasian Hong Pianna: Khen 2 (Luke 18:16-30).

Luke 18:16-30; Luke 12:31-33; leh Luke 9:59-62 in

vantung gam mi hihna thu bang hong gen hiam?

Pasian gam lutna pen dinmun leh neih leh lamh tawh

kisai lo hi. Luke in, lungdamna thubu dangte mah bang in,

Zeisu kiang azuante in naupang bang a muanna leh kipumpiak

nopna lungsim neih kul hi. Na khempeuh nusiat ngam kul

hi. Akhen lah te uh in Zeisu hong tawh kidem ding hi ta hi.

Zeisu leh, ih nuntakna ah Ama hong nget thu in tu lai ih

nuntakna ah athupi pen ahihi. Hih thu pen ahih takpi ahihna

in Zeisu tungtawn bek in nuntakna ih nei thei hi. Tua ziak

in ih pum ih tang in hong neih kul hi.

Luke 18:29-30 sim kik in. Zeisu in bang hong gen hi

mawk hiam? Bang kamciam hong pia hi a? Nu leh Pa, lawmnu

lawmpa, zi leh ta te ih khen kul hi. Ahaksa tua na hi zel hi. Hi

lo maw? Zeisu in mi khempeuh in tua bang a hih kul aci hi

tuan lo hi. Akul hun vantung gam vai ading in atun leh khen

tham ahihna hong gen hi.

Misite amau na kigui uh hen cihna thu thuk ngaihsut

in. Tua bang akul hun ciang in paulap a ih neih lo ding vai

hong gen hiam? Paulap picing ih sak leh ih sak loh zong kisai

tuan lo hi.

NITHUMNI (Tuesday) June 9

Pasian Gam: Tung Khin, Tung Nai lo (Luke 17:23, 24)

Zeisu in Pasian gam thu hong hilh hi. Mihon lak a

athu gen masak Nazareth khua ah hong nei hi (Luke 4:16-

21). Tua ni in Isaiah genkholh kumpi gam vai hong tang

tung khin ta hi.

Tua kumpi gam tu mahmah in tak tun ahih zia

ciaptehna dang khat Luke in bawl hi. Pharisee te in Zeisu

kiang ah tua kumpi gam bang hun ciang hong tung ding cih

dong uh hi. Zeisu in "Pasian gam na sung uh ah om hi cih in

dawng hi (Luke 17:21, NKJV). Akiteikhiatna dang te pan en

leng "note lak ah" cihna suak hi. Zeisu hong pai ciang in tua

gam hong tung hi a,

1. Cina damsakna (Luke 9:11),

2. Lungdamna thu hilhna (Luke 4:16-19),

3. Mawh maisakna (Luke 7:48-50; Luke 19:9, 10), leh

4. Kha gilote sukniamna (Luke 11:20) cih te ahihi.

Tua hi a, Zeisu in tua kumpi gam mihingte nuntakna ah tak

suak sakk hi. Tua in Amah tawh kisun sak hi. Tua Pasian

gam mite lak ah ki mu ta hi. Hih thu in dikna leh gupna

gentehna hi. Tu lai hun teng "Pasian hehpihna gam" kici hi.

Tua gam tu in hong kiphut khin ahihna ni khat khit ni khat

langpanna lungsimte Ama itna' ukna sung ah hong ki ap hi.

E.G. White, Mualtung Thuhilhna, MB, p. 108.

Atung khin thute ah Satan leh mawhna vai

kikingkalhna tungtang a, Zeisu' gualzawhna thu ahihi. "Atung

nai lo" lam pen siatna beisiangna leh leithak vai ahihi.

"Vangliatna kumpi gam pen nih vei kumkikna" mateng

tangtung nailo ding hi." MB p. 108.

Luke 17:23, 24 leh Luke 21:5-36 in Pasian gam leh

leitung vaite beina vai bang hong gen hiam?

Ih leitung pen kidona, dahna leh buaina dim hi. Hih

leitung omzia pen Zeisu kammal mann lua hi. Pawl khatte

in natna satnate hang in Pasian in hong ompih lo ci kha hi.

Kum 2000 lai a hong genna hang in hih leitung in Pasian

ompihna leh Laisiangtho dikzia zong hong laksiang hi. "Hih

leitung Paradise bang mawk leh Zeisu' kammalte aman lo hi

ding hi." Atawpna hun ciang in Pasian gam hong kiphut

ding hi. Tua ma teng ih ngak hong kul hi.

NILINI (Wednesday) June 10

Kumpi Gam leh Khazih 2 Veina Hong Paina Thu (Luke 21:34-36)

Zeisu in Pasian gam acih ciang in thu 2 agen hi a:

1. Ahun hun a Khazih tungtawn a Pasian nasep ahi mite

mawhna pan a hotkhiatna leh

2. Hotkhiatte tawh leithak ah mangkhawm ding in leitung

hun beisakna cih te ahihi (Mang. 21:1-3).

Amasa pen thu Khazih nasep leh masuan tungtawn

in hong tung khin a Amah tawh hehpihna gam (hun) ah ih

om hi (Eph. 1:4-9). Anihna pen misiangte minthanna gam

ah kaihkhopna ahihi. Hih in Khazih sung ah om mite'

mailam thu ih lametna ahihi (Eph. 1:10; Titus 2:13). Zeisu

leh Laisiangtho thak thute hong kizom to in Khazih kumkikna

hun ciang a midikte lungdamna leh minthanna vai hong hi

ta ding hi.

Kumkikna in Zeisu leitung a hong pai masak lai a

agen lungdamna thu tangtunpina ahihi. Tua Zeisu mah in,

mawhna leh Satan, singlamteh ah zo khin a, siatna teng

sumaimang in Pasian piansakte Satan bawlsiatna leh dah

huainate pan siansuah ding ahihi.

Luke 21:34-36 sim in. Nang deih dan kammal tawh

athu tomkaih in at in. Na hih kawm in na nuntakna en in

la, hih kammalte in na nuntakzia koici gen cih kidong in.

Zeisu hong gen bang azuite hi ding in bang na bawl kul ding

hiam?

Zeisu hong kumkikna ih ngak kawm in 'Zeisu hong

paina kiging sa in . . . . mawh bang lo ding in thu ngen ni"

(aneu 36, NIrV).

Hehpihna gam aciamkha-khinte in minthanna gam

thu-ngen a ngak ding ahihi. "Atung sa" gam leh "atung nai

lo" gam, vai ah thu um mite in manlah tak in mapang a,

lametna, khantohna, leh teci panna tawh nuntak ding ahihi.

Kumkikna lametna in tu lai in ih kha nuntakna ih siantho

sak ding ahihi.

NINGANI (Thursday) June 11

Tecite (Sawl. 1:1-8)

Sawl. 1:1-8 sim in. Pasian gam thu athupi bang

hong kilak hiam?

Luke ngaihsutna ah alungdamna thu at bu nihna

hia, Pasian gam thupi ngaihsut pipen hi. Hih thubu pen

pawlpi masa vai tangthu tom ahihi. Hih tangthubu sawltak

thubu kipatna ah, Luke in Pasian gam thu thu 3 hong gen hi.

Amasa pen ah, Zeisu hong pai kik takpi ding hi. Athawh kik

leh avan kah kikal ni 40 sung in singlamteh ma a agen thute

zom in. Nungzuite hilh a "Pasian gam thu" gen hi (Sawl. 1:3,

NIrV). Avang nei mahmah thupiang ahi singlamteh leh

thawhkikna thute in kumpi gam thu Zeisu thuhilhna bang

mah kikhel sak lo hi. Ni 40 tawntung tua Pasian gam atak

ahih thu agen zomto hi.

Nihna ah Pasian hun zui in, Zeisu hong paikikna

ngak ding ahihi. Athawh-kik khit ciang in nungzuite in thu

poimawh khat dong uh a: "Topa aw, Israel kumpi gam na

din'kik ding hiam?" Sawl. 1:6, NKJV) ci uh hi. Zeisu in tua

dotna dawng lo in atelzia uh puahphat sak a: Pasian pen

Pasian hi den ding hi. Ama lungsim, agenkholhna "bang hun"

cih Ama hun gelnate, Ama thusim telsiang ding pen mihingte

nasep leh lungkham ding hi lo hi" na ci hi. Pasian in minthanna

hun pen Ama hunhun in hong tang tung sak ding hi. (Sawl.

1:7; Matt. 24:36). "Ahun atun ciang in" Gal. 4:4 NKJV cih

thu tawh akibang hi a hehpihna gam kipat na ding in Atapa

hong pai sak hi.

Thumna ah, Zeisu lungdamna thu ah teci te na hi

un. Khazih in anungzuite ahun seh vai khawl bawl sak a,

aki thei sa leh sepding thute gen hi. Kumkikna hun ding

ih thei kei hi. Tua hun thupi ngak in tua hun mateng ih

masuan sep ding ahihi. (Luke 19:13). Zeisu Khazih

lungdamna thu "leimong dong ah gen ding ahihi (Sawl. 1:8,

NKJV). Hih pen ih mawhpuak hia,ei tha tawh hilo in

Khasiangtho vangliatna tawh ahihi. Amuh azak te uh, teci

pang dingte tung ah Khasiangtho buak ding ki kamciam

hi (aneu 4-8).

Hih Zeisu nungzui muanhuaite in Khazih nasepzia

theih khialh pi in theikhial uh hi. Ahi zong in Topa in amaute

zang veve hi. Eite in zong Ama na ih sep na ding in ih theih

siang kul den maw cih thu ah ih ngaihsut ding hong om

akul ding hiam?

KIGINNI (Friday) June 12

SINBEH DING: "Lungsim kiniamkhiatte vai ah Zeisu in,

'vantung gam in amau gam uh ahi ding hi' ci hi. Tua gam in

tawm vei sung bek a om leitung gam hi lo hi. Khazih in Ama

itna, hehpihna, dikna, kha lam gamte ahihi. Messiah ukna

kilatna in mihing Tapa tawh kisutna ahihi. Ama mite in

lungsim niamkhiatte hi uh a, lungnemte, dikna thu hanga

bawlsiat thuakte ahi uh hi. Vantung-gam in amau gam uh

ahihi. E.G. White, Mualtung Thuhilhna, MB p. 8).

"Eite in Pasian nasepna mun ah ih om hi. Ei tampite

in suang khuk pan a suangtumte ih hihi. Pasian thumann

ih sann ciang in hong huzaap hi. Mi hoih mipha hong suak

sak in mawhna khempeuh hong lakkhiat sak hi. Tua hi a,

eite in Kumpipa Ama melhoih mu in atawpna ah van

Kumpipa leh vantung mite tawh mangkhawm ding in ih om

khawm ding hi. Tu in hih mun ah hong kisui hong kisekk

hun ahihi. Tawntung ading in ih pumpi leh ih kha

(nuntakna) kipuah ding ahihi. E.G. White, Pawlpi Ading

Teci Pannate, 2 T. pp. 355, 356

KIKUP DINGTE:

1. Set van siapipa Steven Weinberg gelhna ah: "vannuai na te

ih tel ih theih semsem ciang in mawkna semsem hi". Hih

kammalte in mite palau sak hi. Anung sang ciang in kamzol

zaw deih sam hi. Pawl khat te in tua vai kinial zong kul sa

vet lo uh hi. Vannuai vai ah "bang hang a mawkna lo thei

ding?" ci in Harvard a aksi vai siapi Martha Geller in gen

hi. "Vai khat e? leitung leh nate hi lel lo hiam? Bang vai om

peuh mah khong? Tua bang cih pong mawk lungkham

huai zaw." Mun van nuai, aom ngeina, vai bang mah om lo

thei ding maw leh? Zeisu' kumkikna alamen Christian khat,

Pasian gam kiphuh ding alamen mi khat in, hih thute

koici dawn kik theih ding ih hi hiam?

2. Christian te'n, amau khangkhang un, amau khang hun

sung a Zeisu hong pai kik ding in lamen uh hi. Pawl

khatte'n ani ding peuh seh zel uh a hong tung ngei nai lo

hi. Ahun ding sehna vai ah bang khialhna om hiam?

UMAS Men's Hotel lamna

Dear Pastor Kap Lian Thang, 

UMAS Principal 

Men's Hostel laih huai mahmah ta, khuamte singte muat keeita, bawda lamthak nading, fund lah pya khat zong om lo pipi mah uh na kipat uh pen, Korea te i sangam thudik mahmah Nupi nu in, kipan ngam hong sa mahmah ci in kana za hi. Topa muana tawh na kipat ngamna te thupi hongsa ing. William Carey i kamal, "attempt great things for the lord, and expect great things from the Lord" pen moto in izat theih ding leh izat ngamding koi koi ah naakpitak in kisam takpi hi. Topa in na mabaan te zong, abeisa hunsung aa hong kalsuan pihna sa te baan ah, a taangzai zaw in zongh hong kalsuan pih zom suak lai ta hen!  

Sweden pan,  meltheih maingaap zawdeuh te kiang pan a ki kaai khawm kawikawi hi aa, minam, biakna, upna tuamtuam kihel kim hi.  Kong khak bupi uh kawlgam sum tang in,(1,200.000.00) 1,2 milion kyats hi in, asum zong kawlpi tung khinta hi. Men's hostel maan te ka muh uh ciangin, na hanciamna te ih mit tang aa mun in, tha kingah mahmah ciat hi. 

Tu in, Dr. Lian Pu zong, Syapi sem ding cih i zaak man in lungdam toto hi. UMAS sang aa ding, khantona tampi mailam ah zong i neih tawntung theihna ding in, Topa in hong pan pih ciat lai ta hen.  

Pu Tong Seal

Pr Yan Aye i Zi Dr Dora in leitung nusia

---------- Forwarded message ----------
From: Thang Neu DN <frankpixy@gmail.com>
Date: Wed, Jun 3, 2015 at 7:26 AM
Subject: {Z.A.C} Pr Yan Aye i Zi Dr Dora in leitung nusia
To: Z A C <zomi-adventist-com@googlegroups.com>


Dear Zomi SDA

Pr Yan Aye i Zi Dr Dora in Tuni June 3 (5:00 AM) yangon zato pi pan leitung nusia hi. A dah a kap te KST Pasian in hong heh nep sak tahen! Amen

Pr Yan Aye te nupa pen Deek(Karen) te sung pan ei mi hong it pen te nupa hi kha dg hi. A mau hang a phat tuam lawh sangnau pang tam pi om kha dg hi.

Sent from Huawei Mobile

Teci Panna Leh A Sim Mite

Teci Panna Leh A Sim Mite

            Pasian in amah a lah thute Ellen White in kum 70 sung na genin lai-in na gelh hi.  Lai Siangtho thumaan a khial mite puah phatna ding thuhilhna tam veipi mah kipia hi.  Pasian in a mite a zuih sak nop lampi tam veipi mah lak hi. Teci pannate khat veivei inn leh biakinn-a kipan nuntak zia tawh kisai hi.  Pawlpi mite in tua thu bang ci saan uh hiam?

            A nasep hong kipat pan kipanin, a kamsanna te maan mah hiam ci-in tavuan nei makaite in a nasepna sit tel uh hi.  Sawltak Paul in, "Kamsangte" thugena na simmawh kei un.  Na khempeuh sit tel un," ci hi. 1 Thesalonica 5:20,21.  Kamsang sit telna dinga Lai Siangtho in hong gen thute tawh Mrs. White' nasepna kisit tel hi.  Tua zong ama deihna hi zaw hi.  Tua a hih manin amah in:

            "Hih nasep Pasian'a a hih kei leh a hi lo hi ding hi.  Pasian in Satan tawh bang mah sem khawm lo hi.  Kum 30 sung ka nasepna in Pasian' ciamtehna a puak kei leh gal pa' ciamtehna pua ding hi.  Hih thu ah a lang tuaka sem cih om thei lo hi," ci hi.

            Kamsang sit telna ding thu li, Lai Siangtho in hong pia hi.  Tua sittelnate Mrs. White' nasepna in zo kim hi.

            1.   Kamsang maante' thupuak pen Pasian' thukham leh kamsangte' thupuakte tawh ki thuhual ding hi. (Isaiah 8:20).

            Ellen White laigelhte in Pasian' thukham tawi sang in, Lai Siangtho deihna lamah mite makaih tawntung hi.  Lai Siangtho in upna leh gam tatna thukhun hi-a, "khawvak neu zaw" a hi ama laigelhte in khawvak lian zaw Lai Siangtho lamah kha a hihna na gen hi.

            2.   Kamsang maante' thugen kholhte tang tung ding hi (Jeremiah 28:9).

            Mite makaihna ah Mrs. White' nasep pen Moses'a tawh kibang mahmah hi napi-in, Mrs. White in a hong piang lai ding thu tampi tak na gen khol hi. 1848 kuma laibu bawlna lam ih kipat phetin, leitung bup khawvak tawh a tuam zo dingin tua nasepna mai nawt ding a hihna na gen khol hi.  Tu-in Seventh-day Adventist-te in kum simin kam nam 200 val tawh US Dollar 20,000,000 val man ding laibute bawl khia hi.

            1890 kum, mite in gal om nawn lo dinga kum tul maanna hong tung ta ding hi, a cih lai tak un Mrs. White in: "Ping hong kipei ding a hih ciangin ih ki gin kholh kul ding hi...Kim leh pamah buaina ih mu ding hi.  Tuipi taw ah tembaw tampi tum ding hi.  Tui galkapte tui kia dinga, mi a awnin si ding hi," ci-in gelh hi.  Leitung galpi masa leh a nihna ah hih thu hong piang hi.

            3.   Kamsang maan in, mihing bangin Pasian hong pianga, si leh sa pua-in Jesu Khris hong pai hi, ci ding hi (1 John 4:2).

            Desire of Ages (Kumcin Lungdeih) sim lehang Ellen White nasepna in hih sit telna zo a hih lam kilang hi.  Hih kammalte en in:

            "Pa' kiangah Jesu om lel thei hi.  Vantung minthanna tawh vantung mite' pahtawi-in om lel thei hi.  Khawmial sunga om mite khawvak a puak ding leh a si ding mite nuntakna a puak dingin, Pa' khut sungah a kumpi ciang khut apin, khaw vannuai ukna tokhom panin hong kum khia hi.

            "Tu ma kum tulnih phial lai-in, 'En in, Kong pai hi.  Kithoihna leh khuttawite na deih kei-a, kei'a dingin pumpi khat na bawl hi...En in, (lai zial sungah Keima thu kigelh khin zo-a) Pasian aw, Nangma deihna a sem dingin kong pai hi,' cih aw ging khat Pasian' tokhom panin vantung ah kiza hi (Hebrews 10:5-7). Khang tawntunga a ki-im cip ngimna a tang tunna hih kammalte tawh hong kitang ko hi.  Ih leitung ah  ah Khris hong pai-in mi banga hong piang ding a hihi.  A na deih tham dingun mite' muhna ah Ama'n mel hoihna nei lo hi.  A hi zongin Amah mi banga hong piang Pasian hi.  a, van leh lei-a khawvak a hihi.  A vangliatna kiseel hi.  A dah huai, khemna a thuak mite a naih theihna ding.  in Ama liatna leh thupinate kiseel hi.

            4.   Kamsang khat a nuntakna, a nasepna leh a thuhilhmate, kamsang maan sit telna ah a nasia bel hi kha ding hi.  "A gah uh panin amaute na thei ding uh hi," ci-in Matthai 7:15,16 ah Khris in hong hilh hi.

            Ellen White nuntakna ih sittel ciangin a thuhilhna tawh kizui-in a deih huai Khristian nuntak nei-a kamsang khat a hi ding maha kilawm hi, ci thei hi.  Ama hilhna banga a gamta mite' gahte ih et ciangin zong a hoihna kimu thei hi.  A thuhilhnate in gah hoih piang sak hi.  Pawlpi ih et ciangin zong hih lam lahna tawh nasepna a tuamtuam zong ih nei-a, Mrs. White nasepna in hih sit telna zo taktak hi, kici thei hi.  Kum 70 val a laigelhte a kithuhualna in kamsanna silpiak ngah takpi a hihna kilang sak hi.

 

Source: Pawlpi Thu Lamlak

Pr. Ngul Khaw Pau' Effort Sermon 11 te, ( You Tube )

No.1. Piangsak Pa Pasian' Liatzia

No.2. Zeisu' Thuak Siatna

No.3. LST Sunga ThuKham Te

No.4. Anti-Christ (Khazih Zuau)

No.5. Banghang Leitung ah Pawlpi Tampi Om?

No.6. Vantung Thukhenna, Gimna Nam 7, Kum 1000 

No.7. Misite Thu leh Hell Thu

No.8. Cidamna Ding Kideek Kidaamna

No.9. Pawlpi 7 leh A Ciaptehna 

No.10. Zeisu Hong Pai Nang Ciaptehna Limte 

No.11. LST Sunga Sunday Thu

Pr. Khaipute Innkuan tawh Nasepnate

Ih biak Pasian in ih thungetnate hong dawng iin, Pr. Khaipute innkuan KL Adventist pawpite' sapna leh UMM te phalna tawh May 13, 2015 ni-in Yangon pan Kuala Lumpur hong leeng uh hi. 12:50pm in KLIA hong tung uh aa, Sia Paupi leh Pr. Noel Cinh te in vadawn thei uh hi. Tua nitak Pr. Mungtong tawh, a zin tunna Maluri veng, Nu Vung Khan Man te inn ah thunget khopna nei uh hi.

​

May 14, 2015 (Thur) - Nitak 6pm in Sm Lulun te inn ah nitak an nek khit teh Elder Lyanpee' omna, Churchboard meeting ah hong kihel hi. Zan lam 9pm ciangin Subang Homecell @ Nu Ciin Sial Cing te omna ah kha-an vakna hong nei hi. 

May 15, 2015 (Fri) - zan lam 8pm in Sianu Vungboih in Dorcas kikhopna @ KLAC ah Matt 7:7 bulphuh in hanthotna hong gen hi. 

May 16, 2015 (Sat) - Sabbath sun in "Pasian Thupha Nak" cih thulu tawh LST Malachi 3:12 siksan in kha-an vakna hong nei hi. Nitak khangno hun (3pm) ah zong Samson tangthu tawh hanthotna hong nei hi. Tua zan (9pm) in ZAC ah Sia Kimsing & Sm Sansan te mopawi a' ding Rehearsal kinei hi.

May 17, 2015 (Sun) - Sunday nitak 3pm-6pm sung ZAC biakinn ah Sia Kimsing leh Sm Sansan te siangtho kitenna mopawi ah letthatna hong neihsak hi. 

May 18, 2015 (Mon) - Nitak 3pm in Tg. Muangpu & Lia Cingtom te' mopawi a' ding rehearsal KLAC biakinn ah kinei hi. Tua nitak 6pm Cheras Ria veng aa, Nu Tual Ngaih Dim te' innkuan in nitak-an lim mahmah tawh zindo aa, tua khit 8pm in Cheras homecell amau inn ah kha-an vakna nasia takin hong nei hi.  

May 19, 2015 (Tue) - Nitak 3pm in Setapak homecell @ Pa Pau En Tuang' omna ah kha-an vakna hong nei aa, tha kingah mahmah hi. Tua nitak 8pm in Hang Tuah homecell @ Pa Lian Dal te inn ah hanthotna hong nei leuleu aa, a tate unau 3 in Pasian min phatna la hong sa uh hi. 

May 20, 2015 (Wed) - Nitak 7pm in Sunway aa Sm Ngaihkim & Sia Dam Mang te innkuan in nitak-an hong vak uh hi. Tua nitak 9pm in Sunway pawlpi mite tawh Pa Ciang Suan Cin & Nu Manlek te inn ah homecell kinei aa, Siapa mah in kha-an vakna hong nei hi. 

May 21, 2015 (Thur) - Nitak 9pm in Subang aa Pa Kap Lam Thang (Pr. Lian Khan Dal' converted pawlpi mithak, Subang homecell makai) te inn ah homecell kinei aa, Siapa mah in hanthotna nasia takin hong nei hi. 

May 22, 2015 (Fri) - Sun 12pm in Pandan Jaya aa, Sia Niang Luai te innkuan sunan hong vak uh aa, nitak 6pm in Tg. Ginsan (Pr. Thawng Mung' tapa) in amau ansai ah anlim mahmah tawh zindo hi. Tua nitak Dorcas kikhop ah Sianu Vungboih in Abigail Tangthu (1 Sam 25:23-28) tawh hanthotna hong gen aa zaknop kisa mahmah hi. 

May 23, 2015 (Sat) - Sabbath sun in "Nih vei Kum kiknading Kiging In" cih thulu tawh LST Matt 24:14 sik san in kha-an vakna hong nei hi. Khe kisilsakna leh nekkhawm nekna zong hong makaih to aa, nekkhawm alut mimal 85 kipha hi. Nitak 3pm khangno hun ah VOP graduation letmat piakna hong nei aa, hong kikhawm theilo leh US aleeng khinsa tawh vekpi gawm mimal 33 in letmat hong ngah uh hi. Tua nitak 7pm in Pr. Mungtong te innkuan in siate nitak an vak uh hi. 

May 24, 2015 (Sun) - Sun 11am in pawlpi makai ahi thei teng leh Siate innkuan annkuang umkhopna & holim khopna, Pudu vege ansai ah kinei hi. 2pm ciangin Zomi Refugee Committee (ZRC zumpi) ah va hawh in thungetsakna va nei hi. 3pm ciangin Tg. Lian Biak Thang leh Lia Man Lam Dim te home-wedding ah hanthotna leh thungetsakna hong nei hi. Tua nitak Cheras Yulex aa Pa Mang Sing te innkuan in siate anvak uh hi. Tua nitak 8pm in Sri Kuching @ Siamsin Learning Centre - veng homecell ah kha-an vakna hong nei hi. 

May 25, 2015 (Mon) - Nitak 3pm in Tg. Neng Khan Muang & Lia Man Ngaih Cing te pum khat suahna mopawi @ KLAC biakinn ah letthatna hong nei sak hi. Tua nitak 8pm in Cheras homecell @ Pa Khambawi te omna ah hanthotna nasia takin hong nei aa tha kingah mahmah hi. 

May 26, 2015 (Tue) - Hih ni-in Kota D'sara aa om khuapihte kiangah va hawh uh aa, holim khopna vanei uh hi.

May 27, 2015 (Wed) - 2pm in a zin tunna Nu Vung Khan Man' omna, Maluri pan KLIA lam manawh in ding khia uh hi. Sia Kimsing te nupa, Tg. Muangpi leh Tg. Mangpi te inn Air-port dong va kha thei uh hi. 

Tutung aa Pr. Khaipu te innkuan Malaysia hong zinna hangin KL pawlpi mite Topa sungah lawp in, tha kingah mahmah hi. Topa'n siate innkuan cidam khansauna leh Pasian' nasepna lawhcin daupaina hong piak sak tahen!

Sia Mungtong,

KL pawlpi, Malaysia

--
'' MIMAL KIKONA, KISELNA LEH APICING LO LAITE KIKHAKTAN HI ''
" ITNA LEH DIKNA TAWH THUMAN GENNI "
 

ZAC Tawh Mimal Kizop Nang : zomiadventist@gmail.com
ZAC Groups Ah Lai Na Khaknop Leh: zomi-adventist-com@googlegroups.com
ZAC Groups Laite Na Deih Nawnkei Leh Laikhak In: zomi-adventist-com+unsubscribe@googlegroups.com
ZAC Group Thukhunte: https://groups.google.com/forum/#!topic/zomi-adventist-com/Ukey4yzR9qc
ZAC Facebook1: https://www.facebook.com/groups/zomiadventist/
ZAC Facebook2: https://www.facebook.com/zadventist
AWR: http://www.awrmyanmar.org/
SSL: http://www.myanmaradventist.org/myum-report-2009/sabbath-school-lesson/
SSL_CiimNuai: http://www.ciimnuaiministry.info
SSL_PowerPoint: http://www.fustero.net/es/index_ci.aspx
---
You received this message because you are subscribed to the Google Groups "Zomi Adventist Communication" group.
To unsubscribe from this group and stop receiving emails from it, send an email to zomi-adventist-com+unsubscribe@googlegroups.com.
To post to this group, send email to zomi-adventist-com@googlegroups.com.
For more options, visit https://groups.google.com/d/optout.