Hangtakin Om Un
Lungsim taktak tawh Pasian' thumaan na saan leh hotkhiatna lamah nang hong pil sak ding hi. Thumaan uma na zuih leh tu ni-a nasepnate leh ze-etnate ah a kisam hehpihna kicing takin na ngah ding hi. Hehpihna zing ciang ading kisam nai lo hi. Tu ni'a ding a kisam zah bek mah phamawh kisa phot in. Tu ni'a dingin gual zo in; tu ni'a dingin angsung nial in; tu ni'a dingin vilin thu ngen in; tu ni'a dingin Pasian' sungah minthanna ngah in. Ei' omziate leh ih kim ih pam omziate, nisima thupiang tampite leh, na khempeuh sittela a khentel Pasian' Kammalte, - a ni a ni-a ih sep dingte leh ih sep dinga kilawmte a hong hilh dingin kicing hi. Phattuamna na ngahna loh ding ngaihsutna tampi tawh na lungsim na gim sak sangin, nisimin Lai Siangtho sima, tu ni-in nang'a dingin a gim huai zongin mi dang khat in a sep veve ding a hi nisim nuntak nasepte sem zaw in. 3T, laimai 333.
Mi tampi in a kim a pam uha a kihtak huai gitlohnate, mun khempeuha lam pialna leh thazawmnate mit suanin, dahna leh uplahna a lungsim sung uh a dim dong tua thute gengen uh hi. Amaute in khemhatpa' ngiansiamnate ngaihsunsunin, amau' ginat lohna lamlam sutsut uh a, vantung Pa Pasian' hatna leh a bei thei lo hong itnate mu kha nawn lo uh hi. Hih pen Satan' hong deih sak bang lian a hihi. Dikna galpa a hat mahmah banga ngaihsun kha-a, Pasian' hong itna leh a hatna tawm cicik bek ih gen pen khialhna a hihi. Khris' hatna ih gengen ding hi. Satan' hong mat cipna panin ei leh ei ih kisuut khia zo peuhmah kei hi; a hi zongin Pasian in suahtakna lampi khat bawl zo hi. Sang Belpa' Tapa, ei' taanga gal do dingin thahata, "ei hong it Ama hangin" "gual zo pente" ih hi ding hi.
Ih thanemnate leh ih nungtolhnate op pihpihna leh Satan' hatna khakhun pihpihna tawh khalam hatna a kingah ding hi lo hi. Ei'a dinga kithoihna-i vangliatna a hi thumaan - Ama kiang zuana Ama Kammal tawh kituaka a gamta khempeuh Pasian in hon khia a hihna thu, ih lungsim leh ih lungtang sungah ngeina bangin a teen kul hi. Pasian' deihna banga ei' deihna ih koih ding ih nasep a hihi. Tua ciangin, siansuahna sisan tawh Pasian' pianzia a ngah kisuak hi; Khris hangin Pasian' tate ih hi-a, A Tapa a it bangin Pasian in ei zong hong it hi cih ih thei hi. Jesu tawh pum khat ih hihi. Khris hong makaihna mun ah ih pai hi; ih lampi-a Satan in a koih khawzingte Ama'n hem khia-in, khawzing leh lung kiatna taangin ih lung sungah Ama thupina ni hong taang sak hi.
Ute naute aw, etna tawh kikhelna ih ngah hi. Pasian leh ih Honpa' hong itna ah kingakna, Pasian' zia leh tong a kicinna ngaihsuna, Khris' dikna ei'a banga upna pana ih ngahna tawh eite Ama meel suuna kikhel ding ih hihi. Ih khuak sungah teeng saka lungkiatna tawh ih kidim dong ih gengen ih tautau pih dingin mawhnate, thusiate leh lungkiatnate, Satan' hatnate-a kipan a dah huai khempeuhte kai khawmkhawm nawn kei ni. A lungkia mi pen khawmial lompi hi-a, amah bek in Pasian' khawvak a ngah lo hi lo-in, mi dangte' ngah ding zong a dal suak hi. Upna a nei lo ding leh lungkia dinga mihingte a bawlna ah zawhna a ngahna Satan in mu nuam mahmah hi. 5T, laimai 741-745.
Huaiham Lohna Tawh Pasian' Lim Lak
Mi a tam bel in a bawl mawhna, Pasian tawh hong kikhen saka a kilawh thei kha lam natna tampi a piang sak mawhna in huaihamna a hihi. Angsung nialna longal tawh Topa' kiang ciah kik theihna om lo hi. Ei' tha tawh bang mah ih zo kei hi; a hi zongin Pasian' hong piak thahatna tawh mi dangte' tungah a pha ih bawl zo dinga, tua bang mahin huaihamna ih pelh thei ding hi. Na khempeuh ah Pasian ki-apa, kimanna a nei a huaiham lo mi ih hih nopna a lak dingin lawki gam ah pai kul tuan lo hi. Ih innkuan sung, ih pawlpi sung, ihkikholh pihte' lak leh ih nasep pihte' lakah ih lak ding hi. Ih nisim nuntakna mahmah ah huaihamna niala ih sukmit ding a hihi. Paul in zong: "Nisimin ka si hi," ci hi. Ih nisim nuntakna ah a nisim maha angsung sih sakna in gual zote hong suak sak hi. Mi dangte' tungah a pha ih bawl nop leh angsung ih mangngilh kul hi. Mi tampi in mi dangte itna taktak nei khol lo uh hi. A sep ding uh hoih takin a sep sangsikun, amau' nopsakna ding bek zong zaw uh hi.
Vantung ah kuamah in ama angsuug bek ngaihsun lo uha, amau' nopsakna bck zong lo uh hi; mi khem peuh in a siangtho itna taktak tawh vana a om pih khempeuhte uh' nopsakna ding bek zong zaw uh hi. Lei thak ah vantunga om dan banga ih om nop leh tu-in zong vantung ngeinate tawh ih ki-uk kul hi. 2T, laimai 132,133.
Eite khat leh khat kiteh kakin, a khial lo a kician etteh ding nei napi hang, a khial thei mihingte ki-etteh lua ih hihna hong kilak hi. Leitung mite tawh ih kiteh ding hi lo-a, mihing' ngaihsutnate, thumaan ih saan ma-a ih omziate tawh ih kiteh ding hi lo hi. A hi zongin tu-a ih neih upna leh leitunga ih dinmun pen, Khris' thuzui hi'ng ih kicih ni-a kipan ih omzia mai nawtin khangto tawntung leh a koici tam cih tawh sai kak ding hi zaw hi. Tua banga kisai kakna bek a hoih a hihi. Tua lo khempeuh pen ei leh ei kikhemna a hihi. Pasian' mite' gamtatna leh kha lam omziate, amaute' tunga kipia thuphate, hamphatnate leh khawvak tawh a kizawi tawn kei leh, tawikhaina tawh amaute kiteh dinga, vantung mite in KISAM ci ding uh hi. 1T, laimai 406.
(Zop Lai Ding)
KHAWKPI 11
KHRISTIANTE PASIAN' AI-AWH HI DING
Pasian in Ama gam ngeinate A mite'tung tawna a kilat khiat ding deih hi. A nuntakna uh leh a gamtatna uh tawh tua ngeinate a kilat khiat sak theihna dingun, leitung ngeinate, zongsatnate leh gamtatnate panin amaute sam khia nuam hi. Ama deihna amaute a theih sak theihna dingin Amah tawh amaute kinai zaw sak nuam hi.
Tu huna Pasian in A mite' tung tawna a picin sak nop thu pen Egypt gam pana Israelte a lak khiat lai-a amaute tung tawna a picin sak nop thu mah a hihi.
Pawlpi pana a kilang khia Pasian' hoihna, migitna, thutanna leh itnate a muhna uh tawh leitung mite in Ama meel a mu ding uh a hihi. Nuntakna ah Pasian' thukham tua banga a kilat khiat ciangin, leitunga mi dang khempeuh sangin, Pasian ita, zahtaka a biate a thupi zawkna leitung mite in hong phawk ding uh hi.
Topa in A mite khempeuh hong mitsuan hi; khat ciat'a ding vaihawmna hong neih sak hi. Ama thukham siangtho a zuite mi-tangkaite ahih ding uh Ama deihna a hihi. Kha humopna tawh Mose in, "Note in Topa na Pasian uh' mi siangtho na hi ding uh hi; lei maitanga a om mi khempeuh tungah Ama mi-tuam a hi dingin Topa na Pasian un note hong teel hi" Thuhilhkikna 7:6, a cih kammal pen tanglai Israelte'a ding bek hi lo-in tulai-a Pasian' mite'a ding zong a hihi. 6T, laimai 9,12.
Khris Banga Gamtatna
Khris' biakna in a zuite seiniam sak ngei lo hi; a ngongtat, a maigum, a kithupi sak, a heh baih, a lung gam dingin bawl ngei lo hi. Omzia puah pha-in, lung sim sian suahin, ngaihsutnate kician sakin, Khris' khut sung tun pih zaw hi. Pasian in A tate'a dinga a ngim sakna pen mihing' ngaihsutna sang pen in zong ban zo lo hi.
Khristian dinmun pen Khris tawh kibatna a hihi. Mai nawta ih pai denna ding lampi khat om hi. Ih ngah ding na oma, ih phak ding kung zong om hi; tua sungah a hoih, a kician, a thupi leh a sang zong kihel hi. Zia leh tong picinna dongin hanciam tawntunga mai nawt tohtoh ding a hihi. 8T, laimai 63,64.
Ih zongsatna in hong bawl bangbangin, a mimalin, tu leh a tawntungin a om ding ih hihi. Zongsatna hoih nei-a, sep ding khempeuh thumaan taka a semte' nuntakna, mi dangte' lampi a taang sak meivak taangte bang hi ding hi; zongsatna hoihlote zom suaka, thadah, zualzan, polhteh zongsatnate a kizompaih leh tulai nuntakna, zankim sanga a zing zaw meiipi in a tuam banah nuntak tawntungna zong taan lai ding hi. 4T, laimai 452.
Nuntak tawntungna thu a donte hampha hi. "Thumaan Kha" in amah makaihin thumaan khempeuh ah kha ding hi. Leitung mite in amah it lo-in, pahtawi lo-in, phat lo ding a hih hangin, vantung in a muhna ah amah manpha hi. "Pasian' tate hong kicih theihna dingin, Pa in eite bang zahta-in hong it hiam, ngaihsun un. Leitung in Amah thei lo a hih manin, eite zong a hong thei kei hi," 1Johan 3:1. 5T, laimai 439.
