A hau khempeuh minuamsa hilo a, a nuamsa khempeuh zong a hau te hi kim lo in, nopsakna khempeuh zong,hauhna hang hikim lo hi. Na asem leh a semlo, azong leh azong lo, a citak leh acitak lo te a kilam dan hang in, nasepna bang in kingah kim lo thei hi. Ih Kawl gam om zia pen Hagai in Isreal te tung ah a gen tawh kibang ka sa hi. “Tu laitak na om zia uh limtak in ngaihsun un. Khaici tampi natuh uh hang in, an tawmbek na la uh a, annek ding na ngah teei uh hang in, na kham kei uh hi. Puansilh ding na neih tei uh hang in, a lum khop ding na nei kei uh hi. Sum na thalawh uh hang in, ip vangsunga a-khol tawh na ki bang uh hi” (Haggai 1:6). Bang hang a hi tam? Pasian in, a zawng ding, nuam a sa lo dinga hong teel maw?
NOPSAK DING PEN PASIAN’ DEIH NA HI
Eden huansung ah, Adam a ding in, Pasian in, a kisam omlo in nakhempeuh bawlsak in, koihsak hi (Pian.,1:19). Topa Zeisu, mihing hongpian ma in, nopsakna leh hauhna tawh ki dim in om hi. Mi hing hong suah in, bawngkuangsung ah hong suah hang in,mipil ten, kham, paknamtui leh, a manpha na te tawh va bia uh hi (Mate 2:11). Ama na sepna ah nupi hau pawl khat inzong na pan pih hi (Luke 8:1-3). Topa Zeisu van zat te pen gunkuang, inn, zinbuk, laa cih te hi a, a sih ciang zong mi hau te han ah kivui hi (Maku 15:42-46). Topa Zeisu hauna pi-in zawnna hong thuak na pen, eite hauhna ding a hi hi (2Cor. 8:9).
